Darul Uloom Nadwatul Ulama Lucknow

رحلة ثقافية و ترفيهية ثانية إلى معهد سيدنا أبي بكر الصديق بمهبت مئو (لكناؤ)

*سیرۃ النبی و ذکر صحابہ کے موضوع پر سید احمد شہید اکیڈمی کی دو اہم کتابوں کی رسم اجرا*
*بدست؛ حضرت مولانا ڈاکٹر سعید الرحمن اعظمی ندوی دامت برکاتہم*

مؤرخہ ۲۵/اکتوبر ۲۰۲۳ء بروز بدھ؛
آج بروز بدھ بعد نماز عصر حضرت مہتمم صاحب دار العلوم ندوۃ العلماء کی رہائش گاہ پر ایک اہم نشست منعقد ہوئی، جس میں مولوی محمد ارمغان بدایونی ندوی کی کتاب *اسفار رسول صلی اللہ علیہ وسلم* اور مولوی محمد امین حسنی ندوی کی کتاب *تذکرہ اصحاب بدر* کے نام سے دو اہم تصنیفات کی رسم اجرا ہوئی۔
رسم اجرا کرتے ہوئے حضرت مہتمم صاحب نے فرمایا:
“سیرت رسول صلی اللہ علیہ وسلم کے موضوع پر *اسفار رسول* کے نام سے دعوتی اسلوب سے ہم آہنگ یہ ایک علمی وتحقیقی پیش کش ہے، جس میں حضور صلی اللہ علیہ وسلم کے تجارتی ودعوتی اسفار کو جمع کیا گیا ہے، انشاء اللہ یہ کتاب دعوت سے تعلق رکھنے والوں کے لیے مفید ثابت ہوگی، جس میں رسول اللہ صلی اللہ علیہ وسلم کے ہر سفر کے بعد حاصل مطالعہ کے عنوان سے داعیان دین کو مد نظر رکھتے ہوئے ضروری باتیں لکھی ہیں۔
اسی طرح *تذکرہ اصحاب بدر* کے نام سے یہ کتاب صحابہ کرام رضی اللہ عنہم میں سے ان نفوس قدسیہ کا ذکر خیر ہے جنہوں نے غزوہ بدر میں شرکت کی، ان میں سے کچھ نے جام شہادت نوش کیا اور جو فتح یاب ہوکر مدینہ واپس آئے اللہ نے انہیں مغفرت کا پروانہ سنایا، علم وتحقیق کے لحاظ سے یہ کتاب اس طور پر ممتاز ہے کہ اس میں مکمل شرکائے بدر یعنی ۳۱۳ صحابہ کرام کا حروف تہجی کے لحاظ سے تذکرہ آگیا ہے۔
یہ دونوں کتابیں اس لحاظ سے بھی ممتاز ہیں کہ ان میں مرشد الامت حضرت مولانا سید محمد رابع حسنی ندوی رحمۃ اللہ علیہ کا قیمتی مقدمہ بھی تحریر ہے۔”
اس محفل کا آغاز مولانا ذبیح اللہ ندوی کی تلاوت سے ہوا اور حضرت مہتمم صاحب کی دعا پر اختتام ہوا۔

اس موقع پر بطور خاص یہ حضرات موجود تھے؛
مولانا فخر الحسن خاں ندوی، مولانا عبد اللہ مخدومی ندوی، ڈاکٹر محمد مسلم ندوی، مولانا سلمان بجنوری ندوی، مولانا سید محمد مکی حسنی ندوی اور مولوی محمد نجم الدین ندوی وغیرہ۔