26/03/2020
Lai Students Association
PRESS RELEASE
26. March. 2020
LSA General Headquarters hmalakna in zirlai naupang tangkhang Aizawl ațangin mi 153 hruai haw an ni.
Tunlai hrileng tihbaihawm tak, Covid 19 vanga Zirlai harsatna tawkte, an Hostel awmna khar anih vanga awmna nei lo te leh harsatna hrang hrang avang a mahni khawlam a haw duh Aizawl khawpui a tangkhang Laifa zirlai naupang 153 te chu Lai Students Association hmalakna in Lairam chhunga an mahni khua ah țheuh hruai haw an ni.
LSA General Headquarters; Lawngtlai chuan, heng Laifa zirlai naupang harsatna tawk mangang tak te, hruai haw an nih theih nan hian nasataka hmalain theihtawp a chhuah a, chu mai chu duhtawk lovin kawnglaka harsatna an tawh lo nan leh, mumal zawk leh him zawka Lairam thlenpui an nih theih nan LSA General Headquarters; Lawngtlai atangin Office Bearers 5 in Aizawl thleng an va hruai hlawm bakah, LSA Joint Headquarters; Aizawl atangin Office Bearers 1 in Lawngtlai thleng a tawiawm hlawm bawk.
Lai Students Association General Headquarters; Lawngtlai chuan, Laifa zirlai naupang țhahnemtak harsatna tawk mek miram leh khuaa mangang taka awm te, hruai haw an nih theih nana LSA hmalakna kawnga lo puitu zawng zawng te chungah lawmthu a sawi tak meuh meuh a ni. A bik takin kawng engkimah lo buaipui a tawiawmtu Lai House, Aizawl a DRC Pu T. Chalnghingluaia leh a thawhpuite, CYLA leh a hnuai a Branch hrang hrang te hnenah lawmthu kan sawi a, tin Motor Permit kan neih theih nana ruahmanna min siamsaktu Pu H. Biakzaua MLA Lawngtlai East bialtu leh Lawngtlai Deputy Commissioner Pi. Shashanka Ala IAS te chungah pawh lawmthu kan sawi a ni.
Laifa zirlai naupang tangkhang te hruaihaw na tur hian LSA chuan nasa takin Motor kan zawng a, lockdown a nih tawh avangin, service lai an awm tawh lova, chuvangin hiring cost te a sang em em hlawm a ni. Chutiang te anih avang chuan zirlai te manganna leh harsatna hriain, LSA chuan an senso tur te tlem a zawng tal min tum sak ve theih tak mialin tiin kan MLA te leh kan CEM LADC te, an țanpuina kan dil hlawm a, mahse, vanduai thlak takin kan MLA te hnen ațang chuan kan dilna te a hlawhtling thei ta lo ani. Amaherawh chu, kan Lai hnam leh ram hmangaih em em tu, a bik takin zirlai te hmakhua ngai em em tu leh, an harsatna vawi tam lo sutkian sak tawhtu kan CEM zahawm tak Pu. T. Zakunga chuan kan zirlaipui Aizawl hmuna tangkhang mek hawn na tur neilo te, an haw theih nan a neih zawng zawng pawh uilo in kan senso, (zirlai ten an thawhkhawm theih bak) zawng zawng phal taka min tum sak hi *Lai Students' Association* chuan thinlung takin kan CEM hnenah *LAWMTHU* kan sawi tak zet zet a ni.
Laifa zirlaite hun harsa leh dinhmun khirh tak tak kan tawh chang pawh a, hmangaih tak leh kan hmakhua ngaia min țanpui reng thin tu Kan CEM Zahawm tak Pu T. Zakunga hi keini Laifa zirlai te chuan, kan zah a, kan chawimawi a, malsawmna Pathian hnen dil sak mawlh mawlh hi kan tih tur makmawh ani tih LSA members te'n i hre thar leh ang u.
Hetiang hun harsatak, Lairam leh hnam in kan tawn mek lai leh Zirlai naupang baihvai leh mangang tak a kan awm lai a, mi țhahnemngai tamtakin min puiha min țawiawm tlat laia kan ram leh hnam tan a kan thlantlin leh kan chhuan em em thin, kan MLA 2 te Laifa zirlaiten kan mamawh huna an *IPTE* a ruak tlat mai leh kan mamawh min phuhhruk sak thei lo hi, mak kan tiin, lungchhiat thlak kan ti tak zet ani.
Lai Students Association chuan, khawvel huap natna Covid-19 hrileng lak ata kan Lairam leh hnam a him theih nan hian hma ala chhunzawm zel dawn a, Mipuiten harsatna kan tawh loh nan leh, Zirlai naupangte thlamuang taka an awm theih nan a țul hunah a che chhuak fo dawn a, kawng engkim ah kohhran, chhungkua leh mimal țawngtaina ah LSA min hre reng turin kan inngenin kan in chah hlawm a ni. LSA General Headquarters chuan, kan zavaia kan him tlan theih nan Lai mipui te, Sawrkar in dan a zam zawm hram hram turin a ngen tak meuh a, he hun reilote chhung harsatna kan tawh hi k*m tam tak leh kan tuchhuante thlenga kan him tlanna tur ani tih hria a, fimkhur tlang turin leh Sawrkar leh CYLA ruahmanna leh hmalakna zawm hram hram turin kan in chah nawn mawlh mawlh bawk a ni.
Sd/-
Salai C. Vanramdinmawi
Associate General Secretary
LSA Gen Hqrs; Lawngtlai
