14/06/2020
സുശാന്തിൻ്റെ വാർത്ത കേട്ടപ്പോൾ നിങ്ങളുടെ സുഹൃദ്ബന്ധത്തിലോ, പരിചയത്തിലോ ആത്മഹത്യ ചെയ്ത ആരെയെങ്കിലും ഓർമ്മ വരുന്നുണ്ടോ ? എന്തുകൊണ്ടാണ് അവർ ആത്മഹത്യ ചെയ്തതെന്ന് നിങ്ങൾക്കറിയാമോ? നിങ്ങൾ എപ്പോഴെങ്കിലും അതിനെ കുറിച്ച് ആലോചിക്കുകയോ, അന്വേഷണം നടത്തുകയോ ചെയ്തിട്ടുണ്ടോ?.
ലോകത്താകമാനം ഓരോ നാല്പ്പത് സെക്കന്റിലും ഒരാൾ എന്ന കണക്കിൽ ഏകദേശം എട്ടു ലക്ഷത്തോളം ആളുകള് ഒരു വർഷത്തിൽ ആത്മഹത്യ ചെയ്യുന്നുണ്ട്. ഇവയിൽ ഒട്ടുമിക്ക ആത്മഹത്യകളും നമുക്ക് പ്രതിരോധിക്കാൻ കഴിയുന്നവയാണ്.
ഒരു വ്യക്തി ആത്മഹത്യയിലേയ്ക്ക് എത്തിച്ചേരുന്നതിന് പിന്നിലുള്ള കാരണങ്ങൾ നിരവധിയാണ്. ദൈനദിന ജീവിതത്തിൽ ഉണ്ടാകുന്ന മാനസിക സംഘർഷങ്ങൾ, വിഷാദം പോലുള്ള മനോരോഗങ്ങൾ, വ്യക്തിപരമായ പ്രശ്നങ്ങൾ, ജീവിത സാഹചര്യങ്ങളിലെ സങ്കീർണ്ണത, സാമൂഹികമായ കാരണങ്ങൾ ഒക്കെ ആത്മഹത്യ എന്ന
തീരുമാനത്തിലേയ്ക്ക് വ്യക്തിയെ എത്തിക്കുന്നു. ജീവിതത്തിനോടുള്ള അടക്കാനാകാത്ത ആഗ്രഹവും ,ഒഴിവാക്കാനാകാത്ത തീവ്ര മാനസിക വേദനയും ചേർന്നുള്ള വല്ലാത്ത ഒരു മാനസികാവസ്ഥയിൽ സഹായിക്കുമോ എന്ന ചോദ്യവുമായി പലരും നമ്മളെ സമീപിച്ച് കടന്ന് പോയിട്ടുണ്ടാകാം. നിങ്ങളുടെ ഒരു ആശ്വാസ വാക്കോ ,കരുതലോ, സഹായമോ ഒക്കെ പ്രതീക്ഷിച്ച് വരുന്ന വ്യക്തികളുടെ മാനസിക, വൈകാരിക അവസ്ഥകളെ
മനസ്സിലാക്കി , ആശ്വാസമേകാൻ, പ്രശ്നങ്ങളെ ലഘൂകരിക്കാനും, മാനസിക പിന്തുണ നൽകാനുമൊക്കെ നിങ്ങൾക്കോ, നിങ്ങളിലൂടെ മറ്റൊരാൾക്കൊ കഴിഞ്ഞാൽ
ഒട്ടുമിക്ക ആത്മഹത്യകളേയും ഒഴിവാക്കാൻ കഴിയും. ആത്മഹത്യ ചെയ്യാൻ ഉള്ള മാനസികാവസ്ഥയിലാണോ
വ്യക്തി ഇപ്പോഴുള്ളത് എന്ന് അറിഞ്ഞാൽ മാത്രമേ പ്രതിരോധം സാധ്യമാകൂ.
ആത്മഹത്യ ചെയ്യാൻ പോകുന്ന വ്യക്തികൾ ചില സൂചനകൾ നല്കാറുണ്ട്. ഈ സൂചനകളെ മനോരോഗ വിദഗ്ധരും മന:ശാസ്ത്രജ്ഞരും ഉൾപ്പടെയുള്ള മനോരോഗ ചികിൽസാരംഗത്ത് ജോലിചെയ്യുന്നവരും പൊതുസമൂഹവും മനസ്സിലാക്കേണ്ടതുണ്ട്. ഇവയിൽ ചിലത് മാത്രമാണ് താഴെ കൊടുത്തിരിക്കുന്നത്.
*മരണത്തെക്കുറിച്ച്/ ആത്മഹത്യയെ കുറിച്ച് ആവർത്തിച്ചുള്ള സംസാരം.
*വിഷമഘട്ടങ്ങളിൽ അപകടം വിളിച്ചു വരുത്തുന്ന രീതിയിലുള്ള പ്രവർത്തനങ്ങളിൽ ഏർപ്പെടുക / ആത്മഹത്യയ്ക്ക് ശ്രമിക്കുക
*കടുത്ത നിരാശയും, ഒന്നിനോടും താൽപര്യമില്ലാത്ത അവസ്ഥയും പ്രകടിപ്പിക്കുക.
*എന്നെ സഹായിക്കാൻ ആരുമില്ല, ഞാൻ ജീവിച്ചിട്ട് കാര്യമില്ല, മുന്നോട്ട് ജീവിച്ചിരിക്കാനുള്ള ഒരു പ്രതീക്ഷയും കാണുന്നില്ല എന്നിങ്ങനെയൊക്ക സംസാരത്തിനിടയിൽ സൂചിപ്പിക്കുക
*കുടുംബാംഗങ്ങൾ, സുഹൃത്തുക്കൾ, ബന്ധുക്കൾ തുടങ്ങിയവരിൽ നിന്നൊക്കെ ക്രമാതീതമായി അകലം പാലിക്കുക. പൊതുവേ ഒരു ഉൾവലിയൽ പ്രകടിപ്പിക്കുക.
* അമിതമായി ദേഷ്യപ്പെടുകയും, നിരാശയും, കുറ്റബോധവുമൊക്കെ ചേർന്ന മാനസികാവസ്ഥ പ്രകടിപ്പിക്കുകയും ചെയ്യുക.
*സ്വകാര്യ സ്വത്തുക്കളും, വസ്തുക്കളും കൂടുതൽ അടുപ്പമുള്ളവരെ ഏൽപ്പിക്കുകയും, ഇതന്റെ ഓർമയ്ക്കായി സൂക്ഷിക്കണമെന്ന് അഭ്യർഥിക്കുകയും ചെയ്യുക.
*വളരെ അടുപ്പമുള്ളവരെ നേരിൽക്കണ്ടു സംസാരിക്കുകയും, അകൽച്ചയുള്ളവരോടു രമ്യതയിലെത്താൻ ശ്രമിക്കുകയും ചെയ്യുക.
*മദ്യം, മയക്കുമരുന്ന് എന്നിവ ഉപയോഗിക്കാൻ തുടങ്ങുകയോ/ പതിവിലേറെ ഉപയോഗിക്കുകയോ ചെയ്യുക.
*വിഷാദാവസ്ഥയിൽ നിന്നും മാറി പെട്ടെന്ന് ഒരു ദിവസം കൂടുതൽ ശാന്തനും സന്തോഷവാനുമായി കാണപ്പെടുക.
*ആത്മഹത്യാക്കുറിപ്പുകൾ തയ്യാറാക്കുക എന്നിവയൊക്കെ പ്രധാന സൂചനകളാണ്.
ആത്മഹത്യക്കെതിരെ നാം നിസ്സഹായരാണ് ഒന്നും ചെയ്യാൻ കഴിയില്ല എന്ന് കരുതരുത്. ഒട്ടുമിക്ക ആത്മഹത്യാ ശ്രമങ്ങളേയും തടയാവുന്നതാണ് മാനസിക സംഘർഷം അനുഭവിക്കുന്നവരെ കണ്ടാൽ അവരുമായി പെട്ടെന്ന് തന്നെ ബന്ധം സ്ഥാപിക്കുകയും സമയം ചെലവഴിക്കുകയും, അവരെ ശ്രദ്ധിക്കുകയും വേണം. വൈകാരികമായ പിന്തുണ നൽകുന്നതിനോടൊപ്പം മരിക്കണോ, ജീവിക്കണോ എന്ന മനസ്സിന്റെ ആശയക്കുഴപ്പം മാറ്റിയെടുത്ത് ജീവിക്കണം എന്നുള്ള ഉറച്ച തീരുമാനത്തിലേക്ക് മനസ്സിനെ അടുപ്പിക്കുകയും, ചിക്തസ ലഭ്യമാക്കുകയും ചെയ്യേണ്ടതുണ്ട്.
മരുന്ന് ചിക്തസ കൊണ്ട് മാത്രം വിഷാദ രോഗമുള്ളവരേയോ, ആത്മഹത്യ പ്രവണത ഉളളവരെയോ, പിൻതിരിപ്പിക്കാൻ സാധിക്കും എന്നത് വിചാരിക്കരുത്. മരുന്നുകൾക്കൊപ്പം മന:ശാസ്ത്ര ചികിത്സ വിഷാദ രോഗമുള്ളവർക്കും, ആത്മഹത്യാ പ്രവണത ഉള്ളവർക്കും അത്യന്താപേക്ഷിതമാണ്. മരുന്ന് മാത്രം കഴിച്ച് കൊണ്ട് വിഷാദ രോഗത്തെയോ ആത്മഹത്യാ ചിന്തയേയോ പ്രതിരോധിക്കാൻ കഴിയില്ല എന്ന് ഓർക്കുക. കൂട്ടായ പരിശ്രമത്തിലൂടെ മാത്രമേ ആത്മഹത്യയെ തടയാനും വിഷാദത്തെ മറികടക്കാനും കഴിയൂ.
ജീവിതം അവസാനിപ്പിക്കാൻ വിരലിൽ എണ്ണാവുന്ന കാരണങ്ങളേ ഉണ്ടാകൂ എന്നാൽ ജീവിച്ചിരിക്കാൻ പതിനായിരം കാരണങ്ങളുണ്ട്.
Dr. Boban Eranimos
