25/08/2026
आचार्य हेच राष्ट्रनिर्मितीचे शिल्पकार’ : डॉ. कृष्ण गोपालजी
0 श्रवणाधारित लेखन स्पर्धाचे आयोजन
अकोला : विद्या भारती विदर्भ अकोलाच्या वतीने विद्या भारती समूहातील शाळांच्या प्रधानाचार्य व आचार्यांसाठी 'शिक्षा क्षेत्र में आचार्य की भूमिका' या विषयावर प्रेरणादायी कार्यक्रमाचे आयोजन करण्यात आले. राष्ट्रीय स्वयंसेवक संघाचे सह सरकार्यवाह मा. डॉ. कृष्ण गोपालजी यांच्या ऑडिओ भाषणावर आधारित (श्रवणाधारित ) मार्गदर्शनपर कार्यक्रमात शिक्षण हे केवळ ज्ञानार्जनाचे साधन नसून राष्ट्रनिर्माण, चारित्र्यनिर्मिती व संस्कारक्षम समाज घडविण्याचे प्रभावी माध्यम असल्याचा संदेश देण्यात आला.
कार्यक्रमाच्या उद्घाटनप्रसंगी विद्या भारती विदर्भचे अध्यक्ष सचिन जोशी, प्रांत सहमंत्री समीर थोडगे, शिक्षण प्रसारक मंडळाच्या अध्यक्षा ताराताई हातवळणे आणि जनसखा शिक्षण मंडळाचे अध्यक्ष मंगेश वानखडे, मधुर खंडेलवाल उपस्थित होते. कार्यक्रमाचे प्रास्ताविक समीर थोडगे यांनी तर आभार प्रदर्शन सचिन जोशी यांनी मानले. कार्यक्रमाला विद्या भारती समूहातील पाच शाळांच्या २०० हून अधिक आचार्य उपस्थित होते. या कार्यक्रमाच्या आयोजनात मुख्याध्यापिका धनश्री पांडे, सई रानडे, रसिका वाजगे, अभय वानखडे यांचे सहकार्य लाभले. शिक्षण क्षेत्र अधिक संस्कारक्षम, मूल्याधिष्ठित आणि राष्ट्राभिमुख करण्यासाठी हा उपक्रम प्रेरणादायी ठरल्याची भावना उपस्थितांनी व्यक्त केली.
स्पर्धेतील विजेते : विद्या भारती विदर्भ अकोला आयोजित लेखलेखन स्पर्धेतील विजेत्यांना संस्थेच्या वतीने रोख पारितोषिक व विद्या भारतीच्या वतीने स्मृतिचिन्ह देवून गौरव करण्यात आला. शिक्षण प्रसारक मंडळ गटातून अरुण रावतकर यांनी प्रथम, अंकिता दिवेकर यांनी द्वितीय तर अभय वानखडे यांनी तृतीय क्रमांक मिळविला. जनसखा शिक्षण मंडळ गटातून अश्विनी संजय राजे प्रथम, विठ्ठल शिव हरी पटोकार द्वितीय आणि वैष्णवी अविनाश उजगावकर तृतीय क्रमांकाच्या मानकरी ठरल्या.
