08/07/2026
డిగ్రీ ఫలితాల్లో మరోసారి సత్తా చాటిన ఎమ్మెస్సార్ విద్యార్థులు
విక్రమ సింహపురి యూనివర్సిటీ ఇటీవల విడుదల చేసిన డిగ్రీ మొదటి సెమిస్టర్ పరీక్షా ఫలితాల్లో కావలి పట్టణంలోని ఎమ్మెస్సార్ డిగ్రీ కళాశాల విద్యార్థులు అత్యుత్తమ ప్రతిభ కనబరిచి మరోసారి తమ సత్తా చాటారు. వివిధ కోర్సులకు చెందిన విద్యార్థులు విశిష్ట సీజీపీఏలు సాధించి కళాశాల విద్యా ప్రమాణాలను మరోసారి చాటిచెప్పారు. ఈ ఫలితాలపై కళాశాల యాజమాన్యం, అధ్యాపకులు హర్షం వ్యక్తం చేస్తూ ప్రతిభ కనబరిచిన విద్యార్థులను బుధవారం అభినందించారు.
ప్రథమ సెమిస్టర్ ఫలితాల్లో కలిదాసు మాధురి బీఎస్సీ కెమిస్ట్రీలో 9.64 సీజీపీఏతో కళాశాల ప్రథమ స్థానంలో నిలవగా, మోర్ల వర్షిత బీకాం (కంప్యూటర్స్)లో 9.40 సీజీపీఏతో ద్వితీయ స్థానం, ఎస్.కె. హఫీజున్నిసా బీఎస్సీ కంప్యూటర్స్‌లో 9.29 సీజీపీఏతో తృతీయ స్థానం, సంతోష్ అక్షిత బీసీఏ (డేటా సైన్స్)లో 9.25 సీజీపీఏతో నాలుగో స్థానం, బి.రమ్య బీకాం (కంప్యూటర్స్)లో 9.11 సీజీపీఏతో ఐదో స్థానం, డి. కీర్తన బీకాం (కంప్యూటర్స్)లో 9.06 సీజీపీఏతో ఆరో స్థానం సాధించి కళాశాలకు కీర్తి తీసుకువచ్చారు.
ఈ సందర్భంగా ఏర్పాటు చేసిన అభినందన కార్యక్రమంలో కళాశాల కరస్పాండెంట్ గుంటుపల్లి రాజ్ కుమార్ చౌదరి మాట్లాడుతూ విద్యార్థులు సాధించిన ఈ అద్భుత ఫలితాలు కళాశాల విద్యా నాణ్యతకు నిదర్శనమని అన్నారు. ప్రతి విద్యార్థి విజయం వెనుక వారి నిరంతర కృషి, తల్లిదండ్రుల ప్రోత్సాహం, అధ్యాపకుల అంకితభావం ఉన్నాయని పేర్కొన్నారు. ఇదే పట్టుదలతో ఉన్నత విద్య, పోటీ పరీక్షలు, ఉద్యోగ రంగాల్లోనూ మరిన్ని విజయాలు సాధించాలని విద్యార్థులకు తెలిపారు.
ప్రతిభ కనబరిచిన విద్యార్థులను కళాశాల యాజమాన్యం ప్రత్యేకంగా అభినందించడంతో పాటు, వారి విజయానికి కృషి చేసిన అధ్యాపక బృందానికి, ఎల్లప్పుడూ ప్రోత్సహించిన తల్లిదండ్రులకు కృతజ్ఞతలు తెలియజేసింది. నాణ్యమైన విద్య, విద్యార్థుల సమగ్ర వికాసం, ఉత్తమ ఫలితాల సాధనకు ఎంఎస్ఆర్ డిగ్రీ కళాశాల ఎల్లప్పుడూ కట్టుబడి ఉంటుందని పేర్కొంది. ఈ కార్యక్రమంలో విద్యార్థులు, అధ్యాపకులు, సిబ్బంది పాల్గొన్నారు.
