08/11/2022
ചെടികൾക്ക് ബുദ്ധിയുണ്ടോ?
ചിന്തയോ?
ഒരു ദിവസം അമ്മയും ഞാനും ഇറയത്ത് ഇരിക്കുകയായിരുന്നു. അപ്പോഴാണ് സംശയത്തിന്റെ ആദ്യ ചോദ്യം വന്നത്. ഞാനും അമ്മയും കൂടി ഒരു ചെടിയുടെ തണ്ട് വേര് മുളക്കാൻ കുപ്പിയിൽ ഇട്ടു വെച്ചിരുന്നു.അതിന്റെ ഇല കൊഴിയുന്നുണ്ടായിരുന്നു.എന്തുകൊണ്ടാണെന്ന് ചോദിച്ചപ്പോൾ അമ്മ പറഞ്ഞു ചെടിയുടെ തണ്ടിലെ വെള്ളം തീരാതിരിക്കാൻ ഇല കൊഴിക്കുന്നതാണെന്ന്.
അത് ചിന്തിക്കുന്നുണ്ടോ?
ചെടി ചിന്തിച്ചിട്ടാണോ ഇലകൊഴിക്കുന്നുന്നത്?
യൂട്യുബിലും മറ്റും കണ്ടിട്ടുണ്ട്
ചില ചെടികൾ പാട്ടുകേട്ടാൽ വളരുമെന്ന്. ചിലചെടികൾ ജീവികളെ ഭക്ഷിക്കുമെന്നും.
ഒരു ദിവസം ഞാൻ നീന്താൻ പോയി ബൈക്കിൽ മടങ്ങി വരുമ്പോൾ അച്ഛനോട് ഈ കാര്യം ഞാൻ ചോദിച്ചു.അപ്പോൾ അച്ഛൻ പറഞ്ഞു ചെടി ചിന്തിക്കുകയില്ല.ഞാൻ വീണ്ടും ചോദിച്ചു. യൂട്യൂബിലും മറ്റും കേട്ടിട്ടുണ്ടല്ലോ ചെടി ശബ്ദം കേൾക്കും, പാട്ടുകേൾക്കും. അതിന് തെളിവില്ലെങ്കിലും റോഡ് സൈഡിലുള്ള അഥവാ വാഹനം കൂടുതൽ സഞ്ചരിക്കുന്ന വഴികൾക്ക് അടുത്തുള്ള ചെടികൾ നല്ല ഉഷാറിൽ വളരുന്നു. ശബ്ദം കേട്ടാണോ ഇത് വളരുന്നത്?
അച്ഛൻ പറഞ്ഞു അല്ല.
വാഹനങ്ങൾ പോകുമ്പോൾ, ശബ്ദ തരംഗങ്ങൾ ഉണ്ടാകുന്നു, ഭൂമിക്ക് കുലുക്കം ഉണ്ടാകുന്നു, കാർബൺ വാതകങ്ങൾ ധാരാളം ഉണ്ടാകുന്നു. അതുകൊണ്ടായിരിക്കാം ചെടികൾക്ക് ഉഷാർ ഉണ്ടാകുന്നത്.
പക്ഷേ ഇതൊന്നുമല്ല എന്റെ ചോദ്യം.
പറഞ്ഞുപറഞ്ഞ് അച്ഛൻ ചില കാര്യങ്ങൾ പറഞ്ഞു തുടങ്ങി. ചെടികൾക്ക് മോതിരവളയം ചെയ്യുമ്പോൾ ആ ചെടി മരിക്കാറായെന്ന് തോന്നിയിട്ട് പുതിയ തലമുറയെ ഉണ്ടാക്കാൻ പൂക്കുകയും കായ്ക്കുകയും ചെയ്യാറുണ്ട്.ഇത് കായ്ക്കാത്ത മരത്തിനെ കായ്പ്പിക്കുന്ന സൂത്രമാണ്.
ഇതാണ് എന്റെ ചോദ്യം. എങ്ങനെയാണ് ചെടിക്ക് താൻ മരിക്കാറായെന്ന് തോന്നിയിട്ട് പൂക്കുന്നത്? അത് ചിന്തിക്കുന്നുണ്ടോ?
വീട്ടിൽ വന്നശേഷം ഒരു സസ്യ രസതന്ത്രജ്ഞനെ വിളിച്ചു.ചെടിക്ക് ചെടിയുടേതായ ബുദ്ധിയുണ്ട്.അതിന് സെമിസെൻസ് എന്നുപറയുന്നു.ഒരു വിത്ത് എപ്പോൾ മുളക്കണമെന്ന ബുദ്ധി വിത്തിനും ചെടിക്കുമുണ്ട്. ജൂൺ മാസത്തിൽ മണ്ണിൽ വീണ വിത്ത് മഴ കൊണ്ടാലും മുളക്കാതെ അടുത്ത ജൂണിലെ മഴയിൽ മുളച്ചു വരുന്നു. ലേറ്റ് എംബ്രിയോ ജനിക് അബണ്ടന്റ് എന്ന ഒരു പ്രോട്ടീനുണ്ട്. അതിനെ ലിയ പ്രോട്ടീൻ എന്ന് പറയും. വിത്ത് എപ്പോൾ മുളക്കണമെന്ന് നിശ്ചയിക്കുന്നത് ഈ പ്രോട്ടീനാണ്. അതിനെയാണ് ഇതിന്റെ ബുദ്ധി എന്ന് പറയുന്നത്. മനുഷ്യന്റെ തലച്ചോർ പോലെയല്ല.എങ്കിലും അതിനൊരു ബുദ്ധിയുണ്ട്.ഒരു ചെടിയുടെ വയബിലിറ്റി ടൈം നിശ്ചയിക്കുന്നത് ഇതാണ്. അവർ ശാസ്ത്രീയമായ കാര്യമാണ് പറഞ്ഞ് തന്നത്. മോതിര വളയവുമായി ബന്ധപ്പെട്ട എന്റെ സംശയവും ചോദിച്ചു. അവർ പറഞ്ഞു ശാസ്ത്രീയമായി പറഞ്ഞാൽ സൂര്യപ്രകാശം കൂടുതൽ കിട്ടുമ്പോഴാണ് ചെടികൾ പൂക്കാനുള്ള സാധ്യത ഉള്ളത്. മോതിര വളയം ശാസ്ത്രീയമായ രീതിയല്ല.
അച്ഛൻ പറഞ്ഞു ഇങ്ങനെ ചെയ്തു ചെടികൾ പൂവിടാറുണ്ട്.
ചെടി ചിന്തിച്ചിട്ടല്ലേ പുതിയ സസ്യത്തെ നിർമ്മിക്കുന്നത്?അതെങ്ങനെയാണ് ചിന്തിക്കുന്നത്?
എന്റെ സംശയം തീർന്നില്ല.ഇതറിയാൻ ഒരു കൃഷി ഓഫീസറെ വിളിച്ചു. ചെടിയുടെ സൈലം വെസ്സൽസ് വളവും വെള്ളവും വലിച്ച് മുകളിലേക്ക് എത്തിക്കുകയും ഭക്ഷണം ഉണ്ടാക്കുകയും ചെയ്യുന്നു. തയ്യാറാക്കിയ ഫുഡ് തൊലിയോട് ചേർന്ന് കിടക്കുന്ന ഫ്ലോയം വെസലിലൂടെ ചെടി മുഴുവനായി എത്തിക്കുന്നു. മോതിര വളയം ഇട്ടതിനാൽ പാകം ചെയ്ത ഫുഡ് താഴോട്ടേക്ക് വരാതെ അവിടെ കെട്ടി നിൽക്കും. അപ്പോൾ ചെടി ഉണങ്ങാറായി എന്ന് തോന്നിക്കൊണ്ട് ഈ ഫുഡ് ഉപയോഗിച്ച് ചെടി പൂക്കുകയും കായ്ക്കുകയും ചെയ്യുന്നു. ഇതിലൂടെ അടുത്ത തലമുറയെ ഉണ്ടാക്കുന്നു.
അത് എങ്ങനെയാണ് ചിന്തിക്കുന്നത് എന്നതാണ് എന്റെ സംശയം.കുറേ കാര്യങ്ങൾ മനസ്സിലായി. എന്നാലും എല്ലാ കാര്യങ്ങളും മനസ്സിലായില്ല അതിനാൽ എന്റെ അന്വേഷണം തുടരും. എനിക്ക് തോന്നുന്നത് ചെടികൾക്ക് ചിന്തിക്കാൻ കഴിയും എന്ന് തന്നെയാണ്.
