ആത്മാന്വേഷണം

#ആത്മാന്വേഷണം159 #പോസ്റ്റ്‌159 #സാധാരണക്കാരുംബ്രഹ്മവും #ഗണപതിഎന്നമിത്ത്

വളരെ പ്രധാനപ്പെട്ട ചില അറിവുകളെക്കുറിച്ചും, അവയുടെ രഹസ്യങ്ങളെക്കുറിച്ചും, പ്രായോഗികതകളെക്കുറിച്ചുമെല്ലാം അന്വേഷിച്ച്, അലഞ്ഞു നടന്നിരുന്ന കാലം...

മറ്റൊരു സംസ്ഥാനത്തുനിന്നും തികച്ചും അവിചാരിതമായി, ഒരാളെ പരിചയപ്പെട്ടു... കുറച്ചുനാൾ കഴിഞ്ഞ്, കൂടുതൽ അടുത്തറിഞ്ഞപ്പോൾ - പരിചയം അടുപ്പമായി മാറിക്കഴിഞ്ഞപ്പോൾ, കാലങ്ങളായി ഞാൻ തേടിക്കൊണ്ടിരുന്ന ഒരു വിദ്യയിൽ, അയാൾ അഗ്രഗണ്യനാണെന്ന് മനസ്സിലായി... ഇനി അത്‌ എങ്ങനെയെങ്കിലും പഠിച്ചെടുക്കണം... അപൂർവ്വമായ അറിവുകൾ അങ്ങനെയൊന്നും അടിച്ചു മാറ്റുവാൻ ഒക്കുകയില്ലല്ലോ...! എങ്കിലും മലയാളിയായതിനാൽ, കാഞ്ഞബുദ്ധി ധാരാളമായിത്തന്നെ, കയ്യിൽ ഉണ്ടായിരുന്നത് എടുത്തു നന്നായി പ്രയോഗിച്ചു... അയാളെ സോപ്പിട്ടും, മുഖസ്തുതി പറഞ്ഞും, ചെറിയ ദക്ഷിണകൾ നൽകിയുമൊക്കെ കയ്യിലെടുത്തു കാര്യം കാണുവാൻ ശ്രമിച്ചു... എന്നാൽ അതൊന്നും അയാളുടെയടുത്തു ചെലവായില്ല... 😄 എന്നെപ്പോലുള്ള എത്ര വേന്ദ്രന്മാരെ അദ്ദേഹം കണ്ടിരിക്കുന്നു...!

അദ്ദേഹം മൊഴിഞ്ഞു: നിന്റെ അഭ്യാസം ഒക്കെ എനിക്ക് ഇഷ്ടപ്പെട്ടു... തല്ക്കാലം അതൊക്കെ അവിടെ വെക്ക്...
ഓരോന്നിനും അതിന്റേതായ മൂല്യമുണ്ട്... ഒന്നും ചുളുവിൽ നേടുവാൻ ശ്രമിക്കരുത്... അങ്ങനെ ശ്രമിച്ചു നേടിയാലും, ആത്യന്തികമായി, അത്യാവശ്യം വരുമ്പോൾ അത് നമുക്ക് ഉപകാരപ്പെടാതെ പോകും... കർണ്ണന്റെ കഥ അറിയാവുന്നതല്ലേ...? പിന്നെ, ഒരു കാര്യം പറയാം... എനിക്ക് കഞ്ചാവ് (Bhang) കൊണ്ടുവന്നു തരുകയാണെങ്കിൽ, നീ ആഗ്രഹിക്കുന്ന വിദ്യ പഠിപ്പിച്ചു തരാം...

ആത്മീയ മേഖലയിൽ സഞ്ചരിക്കുന്ന, ബ്രഹ്മത്തോട് കുറച്ചൊക്കെ അടുത്ത് നിൽക്കുന്നു എന്ന് ഞാൻ കരുതിയ ആള് കഞ്ചാവ് ഉപയോഗിക്കുകയോ...? എനിക്ക് വിശ്വസിക്കാൻ സാധിച്ചില്ല... ആ ചിന്ത മനസ്സിൽ വെച്ചില്ല... അദ്ദേഹത്തോട് തുറന്നു ചോദിക്കുക തന്നെ ചെയ്തു...

"എടാ പൊട്ടാ, ബ്രഹ്മത്തെ അറിയുവാൻ ഈ പറയുന്നത്ര ബുദ്ധിമുട്ടൊന്നുമില്ല... ഒരു നല്ല കഞ്ചാവ് ബീഡി ആസ്വദിച്ചു വലിച്ചു നോക്ക്... നീ കുറച്ചുനേരത്തെക്കെങ്കിലും, അത് അനുഭവിച്ചറിഞ്ഞിരിക്കും... അല്ലാതെ "ഇപ്പോൾ" നീ കഷ്ടപ്പെട്ട്, ബ്രഹ്മത്തെ അറിയാൻ ഓടി നടന്നിട്ടും കാര്യമൊന്നുമില്ല"... അദ്ദേഹം മൊഴിഞ്ഞു...

കാശി, ഹരിദ്വാർ, ഋഷികേശ് തുടങ്ങിയ പല ആത്മീയ കേന്ദ്രങ്ങളുടെയും പരിസരത്ത്, ഒരുപാട് പേർ പലതരം മയക്കുമരുന്നുകൾ ഉപയോഗിച്ച് കറങ്ങി നടന്നുകൊണ്ടിരുന്നതിന്റെ രഹസ്യവും അപ്പോൾ ആണ് എനിക്ക് മനസ്സിലായത്... അവർ ബ്രഹ്മത്തെ അടുത്തറിഞ്ഞു, കിറുങ്ങി നടക്കുകയാണ്... 😄 (ഇവർ എന്താ ഇങ്ങനെ എന്ന്, ഞാൻ പല പ്രാവശ്യം എന്നോട് തന്നെ ചോദിച്ച് ഉത്തരം മുട്ടി ഇരിക്കുകയായിരുന്നു... അതോടെ ഉത്തരമായി... ആത്മീയതയും ലഹരിയും തമ്മിൽ അത്രയ്ക്ക് ബന്ധപ്പെട്ടു കിടക്കുന്നു എന്നുള്ളത്, എനിക്കും പുതിയ തിരിച്ചറിവുതന്നെയായിരുന്നു...😄)

ഇത് ഞാൻ എഴുതുമ്പോൾ, വെറുതെ തെറ്റിദ്ധരിപ്പിക്കുവാനായി എഴുതുന്നതാണെന്ന് വിശ്വസിക്കാൻ തോന്നുന്നവരും ഉണ്ടാകുമല്ലോ... അതുകൊണ്ട് സന്തോഷ്‌ ജോർജ് കുളങ്ങര, അനുഭവിച്ചറിഞ്ഞ കാര്യങ്ങളെക്കുറിച്ച് അദ്ദേഹം പറഞ്ഞതിന്റെ video, താഴെ ചേർക്കുന്നു... ക്ഷമയില്ലാത്തവർക്ക്, വീഡിയോയുടെ തുടക്കം മുതൽ 4.30
വരെയുള്ള ഭാഗം മാത്രം കാണാവുന്നതാണ്...

https://youtu.be/jOILIjqU7YU

വാരണാസിയിൽ (കാശി) കഞ്ചാവിന്റെ പച്ച ഇല അരച്ചെടുത്തിട്ട്, അത് വിവിധ പഴങ്ങളുടെ ജ്യൂസിന്റെ കൂടെയും, ലസ്സിയിലുമൊക്ക കലക്കി കൊടുക്കുന്ന സ്ഥാപനങ്ങൾ, ഇപ്പോളും പരസ്യമായിത്തന്നെ പ്രവർത്തിക്കുന്നുണ്ട്... കാര്യം അവിടെ പോയി അന്വേഷിച്ചാൽ, തിരിച്ചറിയാവുന്നതേയുള്ളൂ... എങ്കിലും സംശയാലുക്കൾക്കായി, നമ്മുടെ നാട്ടുകാരി അരുണിമ, വാരണാസിയിൽ വെച്ച് കഞ്ചാവ് കലർന്ന ജ്യൂസ്‌ (Thandai) കുടിച്ചതിന്റെ video താഴെ ചേർക്കാം വിഡിയോയുടെ 7. 30 മുതലുള്ള ഭാഗം കാണുക...

https://youtu.be/BAvHtOS3Feo

ഇത് വായിച്ചിട്ട് ആരും മയക്കുമരുന്നുകൾ ഉപയോഗിക്കുകയോ, അതിന്റ അനുഭവം അറിയാനോ ശ്രമിച്ചുപോകരുത്... ഇങ്ങനെയും വിശ്വസിക്കുകയും പ്രവർത്തിക്കുകയും, പ്രചരിപ്പിക്കുകയും ചെയ്യുന്ന ആളുകൾ ഉണ്ടെന്ന്, വായനക്കാരെ ബോദ്ധ്യപ്പെടുത്തിതരുകയെന്ന ദൗത്യമാണ് ഞാൻ ചെയ്യുന്നത്...

ഇതുവരെ പറഞ്ഞത്, നമ്മുടെ നാട്ടിൽ നിരോധിക്കപ്പെട്ടിട്ടുള്ള ഒരു സാധനത്തേക്കുറിച്ചായിരുന്നു... ഇനി ബ്രഹ്മത്തെ അറിയുവാൻ, നമ്മുടെ നാട്ടിൽ നിരോധിച്ചിട്ടില്ലാത്തതും, സർക്കാരിന് വരുമാനമുണ്ടാക്കിക്കൊടുക്കുന്നതുമായ ഒന്നിനെക്കുറിച്ച് പറയാം... സാധാരണക്കാർക്ക് എളുപ്പത്തിൽ ബ്രഹ്മാനുഭൂതി അനുഭവിച്ചറിയുകയും ചെയ്യാം, നാട് നന്നവുകയും ചെയ്യും... ഒരുവെടിക്ക് രണ്ട് പക്ഷി... 😄

ഈ വിഷയത്തിൽ താൽപ്പര്യമുള്ളവർ ആദ്യമായി ചെയ്യേണ്ടത്, സിവിൽ സപ്ലൈസ് കോർപ്പറേഷന്റെ, മദ്യം വിൽക്കുന്ന ഒരു പ്രിമിയം shop കണ്ടുപിടിക്കുകയെന്നതാണ്... (എന്റെ നാട്ടിൽ കണ്ണൂർ ടൗണിൽ ഉണ്ട്...) അവിടെനിന്നും ഒരു ഫുള്ളിന് 3000 രൂപയിൽ അധികം വിലയുള്ള ഒരു സാധനം വാങ്ങുക...

ഒരു ഗ്ലാസിൽ ഒരു പെഗ്ഗ് ഒഴിച്ചതിനു ശേഷം, അതിൽ കുറച്ച് ഐസുകട്ടകൾ ഇട്ടിട്ട്, ബ്രഹ്‌മാനുഭൂതിയിലേക്ക് പ്രവേശിക്കുന്നതിന് തയ്യാറാകുന്നതിനായി, കുറച്ചുനേരം സ്വസ്ഥമായിരിക്കാം... 😄 വേണമെങ്കിൽ കണ്ണുകൾ അടച്ചുവെക്കുകയുമാകാം... 😄എന്നിട്ട് അത് സാവധാനത്തിൽ അകത്താക്കാം... ആക്രാന്തം അരുത്... കുറേശ്ശേ കുറേശ്ശേയായി മതി... പ്രിമിയം സാധനം ആയതിനാൽ അരുചിയോ, ഇറങ്ങിപ്പോകുന്നതിന് ബുദ്ധിമുട്ടോ ഉണ്ടാവുകയില്ല എന്ന് അറിയാമല്ലോ... 😄

ആറാം തമ്പുരാനിൽ മോഹൻലാൽ പറഞ്ഞ ഡയലോഗ് പോലെ: രണ്ടാമത്തെ പെഗ്ഗിൽ ഐസുകട്ട വിഴുമ്പോളേക്കും, പതിയെ ബ്രഹ്മത്തെ അറിഞ്ഞു തുടങ്ങിയിട്ടുണ്ടാകും... (വില കൂടിയ സ്റ്റാൻഡേർഡ് സാധനം ആയതിനാൽ, സാവധാനത്തിലേ ബ്രഹ്മം പ്രവർത്തിച്ചു തുടങ്ങുകയുള്ളൂ എന്ന ബോധം വേണം... 😄) രണ്ടാമത്തെ പെഗ്ഗ് അകത്താക്കി കുറച്ചു കഴിയുന്നതോടെ, മോശമല്ലാത്ത ബ്രഹ്മാനുഭൂതിയിൽ എത്തിച്ചേർന്നിട്ടുണ്ടാകും... (തിരക്ക് കൂട്ടരുത്... കുറച്ചു wait ചെയ്യുക... കണ്ണടച്ചിരിക്കുകയും ആകാം...) എന്നിട്ടും തൃപ്തി വരാത്തവർക്ക്, മൂന്നാമത്തെ പെഗ്ഗ് കൂടി അകത്താക്കാവുന്നതാണ്... അതോടെ കാര്യത്തിന് തീരുമാനമാകും... ഇനി നിങ്ങളായി, ബ്രഹ്മമായി നിങ്ങളുടെ പാടായി... എനിക്ക് റോളൊന്നുമില്ല... 😄

എന്തിനാണ് പ്രിമിയം ഷോപ്പിൽ പോയി വിലകൂടിയ സാധനം വാങ്ങിക്കുന്നത്, ഞങ്ങൾ സാധാരണക്കാരായതുകൊണ്ട് സാധാരണ ഷോപ്പിൽ പോയി, വില കുറഞ്ഞത് വാങ്ങിച്ചാൽ പോരെ എന്ന് ചോദിക്കുന്നവരുണ്ടാകാം... അവരോട് പറയാനുള്ളത്, നിങ്ങക്ക് "കൂതറ" ബ്രഹ്മത്തെ അറിഞ്ഞാൽ മതി എന്നുണ്ടെങ്കിൽ ആയിക്കോളൂ, എന്നാൽ സ്റ്റാൻഡേർഡ് ബ്രഹ്മാനുഭൂതി നുകരണമെങ്കിൽ, ആദ്യം പറഞ്ഞതുപോലെ തന്നെ ചെയ്യണം... 😄

ആത്മീയ അന്വേഷണവുമായി മുന്നോട്ടു പോയപ്പോൾ, ഇടയ്ക്കൊക്കെ സംവദിക്കാറുള്ള നാട്ടിലുള്ള ഒരു സുഹൃത്ത് ഉണ്ടായിരുന്നു... മദ്യപിച്ചു നടക്കുന്ന ആളുകളെക്കാണുമ്പോൾ അദ്ദേഹം പറയാറുണ്ട്, നമ്മൾ ഒക്കെ എന്ത് ബ്രഹ്മത്തെ അറിഞ്ഞു... അയാളെ നോക്ക്... ബ്രഹ്മവുമായി താദാമ്യം പ്രാപിച്ച് അനുഭൂതിയിൽ അലിഞ്ഞു നിൽക്കുന്നു... മക്കളോടോ, ഭാര്യയോടോ, കുടുംബത്തോടോ, സമൂഹത്തോടോ യാതൊരു ഉത്തരവാദിത്വവുമില്ലാതെ, നിസ്സംഗതയിൽ നടക്കുന്നു... നമ്മളേക്കാൾ എത്രയോ ഭേദമാണയാൾ... നമ്മൾ ബ്രഹ്മത്തെ ഒട്ട് അറിഞ്ഞിട്ടുമില്ല... നിസ്സംഗതയിൽ എത്തിയിട്ടുമില്ല... ഞാനും കുത്തിയിരുന്ന് ചിന്തിച്ചു നോക്കിയിട്ടുണ്ട്... പണി പാളിയോ...? ഒരു തിരിച്ചുപോക്ക് വേണ്ടിവരുമോ...? 😄

NB: ഈ പോസ്റ്റിന്റെ ഇതുവരെയുള്ള ഭാഗം, ആക്ഷേപഹസ്യം (satire) എന്ന രീതിയിൽ എഴുതിയ ഒന്നാണ്... അതിനാൽ, ആ മനോഭാവത്തോടെ തന്നെ, വായിക്കുകയും ചിന്തിക്കുകയും വേണം... തുടർന്നങ്ങോട്ട് കുറച്ചു ഗൗരവം ആകാം...

പ്രായോഗിക ആത്മീയത എന്ന് പറഞ്ഞുകൊണ്ട് ആദ്യമായി ആത്മാന്വേഷണം കടന്നുവന്നപ്പോൾ, സാമ്പ്രദായികവും, ശാസിക്കപ്പെട്ടുകിട്ടിയ അറിവുകളിലും വിശ്വസിച്ചു നിലനിന്നുവന്നിരുന്നവർ, അസ്വസ്ഥരാവുകയും, ഇതിനെ തളർത്തുവാനും അവഹേളിക്കുവാനും ഒക്കെ ശ്രമിച്ചിരുന്നത്, നിങ്ങൾക്കും അറിവുള്ള കാര്യമായിരുന്നുവല്ലോ...

പറയുന്ന കാര്യങ്ങൾ കൃത്യമായി അനുഭവത്തിൽ കാണിച്ചു കൊടുക്കുക എന്ന ഉത്തരവാദിത്വം പിന്തുടരാത്തവർ, ആത്യന്തികമായി അവഹേളിതരാകും എന്ന നയം ആയിരുന്നു അന്നും ആത്മാന്വേഷണം പിന്തുടർന്നിരുന്നത്... അതുകൊണ്ടായിരുന്നുവല്ലോ ഇവിടെ തർക്കങ്ങളുമായി വന്നവർക്കൊക്കെ പിന്തിരിഞ്ഞു പോകേണ്ടിവന്നത്... അവർ പറയുന്ന ഒരു കാര്യം പോലും, അനുഭവത്തിൽ കാണിച്ചു തരുവാൻ ഉള്ള പ്രാപ്തി ഉണ്ടായിരുന്നില്ല... കേൾക്കുന്നവർ അങ്ങനെതന്നെ അങ്ങ് വിശ്വസിച്ചോണം...!

ഇപ്പോൾ ഗണപതി എന്ന മിത്തിനെക്കുറിച്ച്, വാദപ്രതിവാദങ്ങളും, കോലാഹലങ്ങളും നടന്നുകൊണ്ടിരിക്കുകയാണല്ലോ... അത്‌ നടത്തുന്ന പല വിഭാഗത്തിനും, "കൂടുതലായി" അവരുടേതായ "രാഷ്ട്രീയ ലക്ഷ്യങ്ങൾ" ആണ് ഉള്ളത്... ഇതിനിടയിൽപ്പെട്ട, ഈശ്വര വിശ്വാസികളായ വിവിധ മത വിഭാഗങ്ങളിലെ ആളുകൾ, അവരുടെ വിശ്വാസക്രമങ്ങളിൽ പ്രശ്നത്തിൽപ്പെടുകയും ചെയ്യുന്നു... ഉയരുന്ന ചോദ്യങ്ങൾക്ക്, യുക്തിസഹമായ മറുപടി കൊടുക്കുവാൻ, ആരാലും സാധിക്കുന്നുമില്ല... എല്ലാവർക്കും അവരവരുടെ, വിശ്വാസം മുത്തും, ശ്രേഷ്ഠവും തന്നെ... എന്നാൽഅത് മുത്ത് ആണെന്ന് പറയുന്നതല്ലാതെ, തെളിയിച്ചു കൊടുക്കുവാൻ ആർക്കും കഴിയുന്നുമില്ല...!

എല്ലാ മത വിശ്വാസങ്ങളിലും പെട്ടവർ, ഇനി വരാനിരിക്കുന്ന കാലങ്ങളിൽ, വലിയ പ്രതിസന്ധിയാണ് അനുഭവിക്കാൻ പോകുന്നത്... അനുഭവത്തിൽ കിട്ടാത്ത അന്ധമായതൊക്കെ, അധികം താമസിക്കാതെ സ്വീകാര്യതയില്ലാത്തതായിപ്പോകും... അതിനാൽ പ്രയോഗികത ഇല്ലാത്ത ആത്മീയതയൊക്ക, അധികം താമസിക്കാതെ കാലഹാരണപ്പെട്ടുപോവുകതന്നെ ചെയ്യും... അതിന് ഇന്ന മതത്തിന്റെത് എന്ന കണക്കൊന്നും ഇല്ല... അതുകൊണ്ടുതന്നെ, ഭാരതീയ ആത്മീയതയുടെ പ്രായോഗിക വഴികൾ കണ്ടെത്തിക്കൊടുക്കക എന്ന ദൗത്യമാണ്, ഇതിലൂടെ ചെയ്തുകൊണ്ടിരിക്കുന്നത്...

ഗണപതി മിത്തല്ല എന്ന് അവകാശപ്പെട്ടുകൊണ്ട്, FB യിൽ വന്ന ഒരു പോസ്റ്റിന്റെ ലിങ്ക് താഴെ ചേർക്കുന്നു... നിങ്ങൾ ദയവായി വായിക്കുക...

https://m.facebook.com/story.php?story_fbid=10160625907911041&id=751151040&mibextid=Nif5oz

എന്തോന്ന് ഇത്...? ഇത് വായിക്കുന്നവർക്ക് ഗണപതി മിത്തല്ല എന്ന് തോന്നുമോ...? അതോ വേറെ വല്ലതും തോന്നുമോ...? പോസ്റ്റിന്റെ തുടക്കത്തിൽത്തന്നെ, ഗണപതി മിത്തല്ല എന്നും അത് മനസ്സിലാകണമെങ്കിൽ, പോസ്റ്റ്‌ ശ്രദ്ധിച്ച് വായിക്കണമെന്നും എഴുതിയിരുന്നു... നിങ്ങൾ വായിച്ചുനോക്ക്... മിത്തല്ല എന്നതിന് എന്ത് കാര്യങ്ങളാണ് നിരത്തിയിരിക്കുന്നത്...? ഒന്നുമില്ല... ഇദ്ദേഹം മിത്തല്ല എന്ന് പോസ്റ്റിൽ എഴുതിയാൽ മാത്രം അങ്ങനെ ആകുമോ...? അതിന്റെ കാര്യ കാരണങ്ങൾ കൂടി പറയേണ്ടേ...? അതിലൂടെ പ്രായോഗികമായി സഞ്ചരിച്ചു പോകുന്ന ഒരാൾക്ക്, അനുഭവിച്ചറിയാനും സാധിക്കേണ്ടേ...? അങ്ങനെ പറയാനുള്ള അറിവോ, ചങ്കൂറ്റമോ ഉള്ള ഒരാളെപ്പോലും എവിടെയും കാണാനില്ല എന്നതാണ് ഏറെ അതിശയകരം ...! ശ്ലോകങ്ങളും, ആർക്കും തിരിയാത്ത ന്യായങ്ങളും കൊണ്ട് കുറേപ്പേർ ഇറങ്ങിയിട്ടുണ്ട് എന്നത് മാത്രം മിച്ചം... (ലിങ്കിലുള്ള പോസ്റ്റ്‌ എഴുതിയ ആളെ, അവഹേളിക്കുവാനായല്ല ഇങ്ങനെ എഴുതുന്നത്... മിത്തല്ല എന്ന് തെളിയിക്കുവാനുള്ള അദ്ദേഹത്തിന്റെ ശ്രമത്തെ അംഗീകരിക്കുന്നു... പക്ഷെ അത് കാര്യകാരണ സഹിതം വേണ്ടേ...? അല്ലാതെ ഓരോ തത്വങ്ങൾ അടിച്ചേൽപ്പിച്ചിട്ട് കാര്യമുണ്ടോ...? ഇതിൽ അദ്ദേഹം അവതരിപ്പിച്ചിരിക്കുന്ന കാര്യങ്ങൾ ഒന്നും അങ്ങനെയല്ല എന്ന് തർക്കിച്ചുകൊണ്ട് ഒരാൾ വന്നാൽ, അങ്ങനെ ആണെന്ന് ബോദ്ധ്യപ്പെടുത്തിക്കൊടുക്കുവാൻ വല്ല വഴിയും ഉണ്ടോ...? ഭാരതീയ ആത്മീയതയെ, അതിലെ പതിരുകൾ പെറുക്കിക്കളഞ്ഞിട്ട്, അതിന്റെ പ്രയോഗികതയിലൂടെ ആളുകൾ നെഞ്ചോട് ചേർത്തുപിടിക്കണം എന്ന ആഗ്രഹം ഉള്ളിൽ ഉള്ളതുകൊണ്ടാണ്, ഇങ്ങനെയൊക്കെ എഴുതേണ്ടി വരുന്നത്... മറിച്ച് ആരെയും അവഹേളിക്കുവാനോ, വേദനിപ്പിക്കാനോ അല്ല...)

ഈ സാഹചര്യത്തിൽ ആത്മാന്വേഷണത്തിന്റെ പ്രസക്തി വർധിച്ചു വരുന്നത്, ചിന്തിക്കുവാൻ ബോധം ഉള്ളവർക്ക് മനസ്സിലാക്കുവാൻ പറ്റും... ഇവിടെ ഒരു ബാഹ്യശക്തിയെയും പ്രൊമോട്ട് ചെയ്യുന്നില്ല...

അത്യന്തികമായി അവരവരുടെ ആത്മാവ് മാത്രമാണ്, ഇവിടുത്തെ പ്രതിപാദ്യ വിഷയം... അല്ലാതെയുള്ള എന്തിന്റെ പുറകെ പോയാലും, ഭാവിയിൽ പണി വാങ്ങിച്ചെടുത്തിരിക്കും... ഒരുപാട് ചോദ്യങ്ങൾക്ക് ഉത്തരമില്ലാതെ നടക്കേണ്ടിയും വരും... തന്നെ പരിഗണിക്കാതെ, വേറെ ശക്തികളുടെ പുറകെ പോകുന്നതിന്, അവനവന്റെ ആത്മാവ് തന്നെ തരുന്ന പണിയാണത്... അത് വേണ്ട എന്ന് പറഞ്ഞിട്ട് യാതൊരു കാര്യവും ഇല്ല... കിട്ടി ബോധിച്ചിരിക്കും... 😄 പ്രത്യേകിച്ച് രൗദ്ര ശക്തികളുടെ പിന്നാലെ പോകുന്നവർ... അത്തരം ശക്തികളെ അപ്പനായും, അമ്മയായും കാണുന്നതൊന്നും, ഒരു ഗുണവും ചെയ്യുകയില്ല എന്ന്, മുന്നോട്ടുപോകുമ്പോൾ അനുഭവിച്ചുതന്നെ ബോദ്ധ്യം വന്നുകൊള്ളും... 😄

ആത്മാവ് ഉണ്ടെന്ന് scientific ആയിട്ട് തന്നെ തെളിയിക്കപ്പെട്ടിട്ടുണ്ട്... അത് ഒരു മിത്ത് അല്ല... അതിനെക്കുറിച്ച് വിശദമായിത്തന്നെ തുടർന്നുവരാനിരിക്കുന്ന പോസ്റ്റുകളിൽ നമ്മൾ ചർച്ച ചെയ്യുന്നുണ്ട്... അത് സത്യം ആണെന്ന്, ആത്മാന്വേഷണത്തിലെ അറിവുകളിലൂടെ പ്രായോഗികമായി സഞ്ചരിക്കുന്നവരെ, അനുഭവത്തിലൂടെ ബോദ്ധ്യപ്പെടുത്തി തന്നിരിക്കും എന്ന് ഉറപ്പുതരുന്നു... അപ്പോൾ നിങ്ങൾക്ക് നിങ്ങളുടെ ആത്മാവിന്റെ വാസ്തവികതയെക്കുറിച്ച്, പൂർണ്ണമായ ബോദ്ധ്യം വരും...

ഗണപതി, അള്ളാഹു, ക്രിസ്തു ഇതൊക്കെ മിത്തുകൾ ആണെന്നും അല്ലെന്നുമൊക്കെയുള്ള വാദങ്ങളും ചർച്ചകളും പുരോഗമിക്കട്ടെ... മിത്തുകൾ അല്ലെങ്കിൽ, അങ്ങനെ വാദിക്കുന്നവർ, അവയുടെ ഒക്കെ അനുഭവ സാക്ഷ്യങ്ങൾ കാണിച്ചു തരുവാനുള്ള ചങ്കൂറ്റവുമായി മുന്നോട്ട് വരട്ടെ... എന്നിട്ട് അവർ പറയുന്നത് സത്യമാണെന്ന് തെളിയിക്കട്ടെ... അങ്ങനെ കൃത്യമായി അനുഭവത്തിൽ കണ്ടു കിട്ടുന്നതുവരെ: അവയൊക്കെ യുക്തിയും, ബുദ്ധിയും കാത്തുസൂക്ഷിക്കുന്നവരുടെയും, കാര്യങ്ങൾ അനുഭവത്തിൽ കാണണം എന്ന് കരുതുന്നവരുടെയും മുന്നിൽ മിത്തുകളായി തന്നെ നിൽക്കും... (കടുത്ത ഭക്തിയിലും, വിശ്വാസത്തിലുമൊക്കെ പോകുന്നവർക്ക്, അനുഭവഗുണം വേണമെന്ന നിർബന്ധം ഇല്ലാത്തതുകൊണ്ട്, അവർ മിത്ത് അല്ല എന്ന് വിശ്വസിക്കുന്നതിൽ കുഴപ്പമൊന്നുമില്ല... ഇവിടെ പ്രായോഗിക ആത്മീയത ആയതുകൊണ്ടുള്ള പ്രശ്നമുണ്ട്...! നമുക്ക് അനുഭവത്തിൽ കിട്ടണമല്ലോ...!) മുകളിൽ പറഞ്ഞവയിൽ സ്വർഗ്ഗീയ സുന്ദരികളും, മദ്യപ്പുഴയുമൊക്കെ മിത്ത് ആകാതിരിക്കുകയും (അങ്ങനെ കാര്യ, കാരണ, അനുഭവങ്ങൾ സഹിതം തെളിയിക്കുന്നതുവരെ) ബാക്കിയെല്ലാം മിത്ത് ആവുകയും, ചെയ്യില്ല എന്നതാണ് പരമാർത്ഥം... അല്ലാതെ ഒന്ന് മിത്ത് അല്ലെന്നും, മറ്റേതൊക്കെ മിത്ത് മാത്രമാണെന്നും പ്രചരിപ്പിക്കുന്നവരുടെ ഉദ്ദേശ ശുദ്ധിയെക്കുറിച്ച്, സാമാന്യബോധമെങ്കിലും ഉള്ളവർക്ക് മനസ്സിലാകും... അതുപോലും ഇല്ലാത്തവരോട് വായിട്ടലയ്ക്കുന്നതിൽ കാര്യവുമില്ലല്ലോ...!

......

മിത്ത് അല്ലാത്ത ഗണപതിയും ഉണ്ട്... എനിക്ക് പരിചയമുള്ള അത്തരം ഒരു ഗണപതിയെ താമസിക്കാതെ പരിചയപ്പെടുത്താം...

......

ഇന്നത്തെ വാർത്ത:

തിരിച്ചടി ഭയന്ന് സർക്കാർ; 1,254 ക്ഷേത്രങ്ങളിൽ വിശേഷാൽ ഗണപതി ഹോമം കൂട്ടിച്ചേർത്ത് ദേവസ്വം ബോർഡ്.

തിരുവനന്തപുരം: ഗണപതി ഭഗവാനെ അവഹേളിച്ചതിന് പിന്നാലെ ക്ഷേത്രങ്ങളിൽ വിശേഷാൽ ഗണപതി ഹോമത്തിന് ഉത്തരവിട്ട് തിരുവിതാകൂർ ദേവസ്വം ബോർഡ്. ശബരിമല ഒഴികെയുള്ള ദേവസ്വം ബോർഡിന്റെ 1,254 ക്ഷേത്രങ്ങളിലാണ് ഗണപതി ഹോമം നടത്തുക. ചിങ്ങം ഒന്നിനും വിനായക ചുതുർത്ഥി ദിനത്തിലുമാകും വിശേഷാൽ ഗണപതി ഹോമം നടത്തുക. ദൈനം ദിന ഗണപതിഹോമം പതിവാണെങ്കിലും ആദ്യമായാണ് ഇത്തരത്തിൽ രണ്ട് ദിവസത്തെ ഹോമത്തിന് ഉത്തരവിടുന്നത്.

നിലവിൽ നടക്കുന്ന വിവാദങ്ങളുമായി വിശേഷാൽ ഹോമത്തിലെ കൂട്ടികലർത്തരുതെന്ന് ദേവസ്വം ബോർഡ് വ്യക്തമാക്കി. ഹോമം സംബന്ധിച്ച മുന്നൊരുക്കങ്ങളും നടപടിക്രമങ്ങളും ദേവസ്വം വിജിലൻസും ഇൻസ്‌പെക്ഷൻ വിഭാഗവും പരിശോധിക്കുമെന്നും അറിയിച്ചിട്ടുണ്ട്. ഹോമത്തിനായി ഓൺലൈൻ ബുക്കിംഗും ആരംഭിച്ചിട്ടുണ്ട്. ആദ്യദിനം തന്നെ ആയിരങ്ങളാണ് രജിസ്റ്റർ ചെയ്തിരിക്കുന്നത്. 26 ക്ഷേത്രങ്ങളിലെ ഹോമം ഓൺലൈനായി ബുക്ക് ചെയ്യാവുന്നതാണ്.

Janam online.

പണ്ടൊക്കെ ക്ഷേത്രങ്ങളിൽ "ദേവഹിതം" ആയിരുന്നു നടപ്പാക്കിയിരുന്നത്... ഇപ്പോൾ ചെറിയ വ്യത്യാസമേ വന്നിട്ടുള്ളൂ - ദേവന്റെ സ്വന്തം ബോർഡ്‌ ഹിതം...! 😅

NB: ചില പോസ്റ്റുകൾ ഇടുന്നതിനുമുൻപ്, അതിന്റെ പ്രധാനഭാഗം, വിമർശനബുദ്ധിയോടെ പോസ്റ്റുകളെ സമീപിക്കുന്ന ചിലർക്ക് അയച്ചു കൊടുക്കാറുണ്ട്... അവരുമായുള്ള സംവാദം പോസ്റ്റുകളെ കൂടുതൽ നന്നാക്കുന്നതിന് തീർച്ചയായും സഹായിക്കാറുമുണ്ട്... ഈ പോസ്റ്റിലെ സർക്കാരിന്റെ അനുമതിയോടെയുള്ള ബ്രഹ്മത്തെ അറിയാനുള്ള മാർഗ്ഗത്തേക്കുറിച്ചുള്ള ഭാഗം, ഒരാൾക്ക് അയച്ചു കൊടുത്തു അയാളുമായുള്ള സംസാരത്തിൽ നിന്ന്::

ചന്ദ്ര: എന്താവുമോ എന്തോ !

ആത്മ: എന്തോന്ന്...?

ചന്ദ്ര: Readers ന്റെ അവസ്ഥ 😂

ആത്മ: അപ്പൊ ഒന്ന് ബ്രഹ്മത്തെ അറിയണമെന്ന് തോന്നുന്നുണ്ട് അല്ലേ...?

ചന്ദ്ര: ഓ. വേണ്ട.

ആത്മ: ബ്രഹ്മം കോപിക്കുമേ...

ചന്ദ്ര: ആയിക്കോട്ടെ 😀

ആത്മ: അയ്യേ തോറ്റു...
നിസ്സംഗമായ ബ്രഹ്മത്തിന് കോപമോ, എന്നായിരുന്നു ചോദിക്കേണ്ടിയിരുന്നത്... നീ മന്ദബുദ്ധി ആണെന്ന് വീണ്ടും വീണ്ടും തെളിയിച്ചുകൊണ്ടേയിരിക്കുന്നു... 😅

ചന്ദ്ര: ചോദ്യം തമാശ ആയിട്ടാ എടുത്തേ.

ആത്മ: ആണല്ലോ... തമാശ ആയിട്ട് അങ്ങനെ മറുപടി പറയാമായിരുന്നു...

ചന്ദ്ര: തോന്നിയില്ല എന്ത് ചെയ്യാനാ ?

ആത്മ: കൃത്രിമ ബ്രഹ്മത്തെ ഇഷ്ടപ്പെട്ടോ...?

ചന്ദ്ര: ആ ബ്രഹ്മം എനിക്ക് വേണ്ടായേ...

ആത്മ: സർക്കാർ രക്ഷപ്പെടട്ടെ... 😄

ചന്ദ്ര: ഉവ്വ്. 😄 എല്ലാരും ജപം നിർത്തും. 😀
ആത്മാന്വേഷകൻ ഇൻസ്റ്റന്റ് ബ്രഹ്മത്തിൽ ആണെന്നെ കരുതൂ.

ആത്മ: അങ്ങനെകരുതിക്കോട്ടെ... എനിക്കെന്താ...?
ഞാൻ നല്ലവൻ ആണെന്ന് ആളുകൾ കരുതിയാലും, എനിക്ക് പ്രത്യേകിച്ച് ഗുണമൊന്നും ഇല്ലല്ലോ...

ചന്ദ്ര: വല്ലോം കിട്ടിയാലോ ?

ആത്മ: എനിക്ക് നന്നായിട്ടുതന്നെ കിട്ടുന്നുണ്ടല്ലോ... പിന്നെ, മലയാളിയല്ലേ... എന്തായിരിക്കും കിട്ടുന്നത് എന്ന് ഊഹിക്കാമല്ലോ... 😅 കിട്ടിയതൊന്നും പോരാ, "അങ്ങോട്ട്" കൂടുതൽ എങ്ങനെ വാങ്ങിച്ചെടുക്കാം എന്നതായിരിക്കുമല്ലോ ചിന്ത... 😄
നല്ലവരെ ചൂഷണം ചെയ്യാനേ ആളുകൾ ശ്രമിക്കാറുള്ളൂ... അപ്പൊ ലേശം മോശക്കാരൻ എന്ന് തോന്നിക്കുന്നതാണ് നല്ലത്... വലിയ ശല്യം ഉണ്ടാകില്ല...😄

ചന്ദ്ര: ഒരു doubt.
ബ്രഹ്മം നിർഗുണം ആണെങ്കിൽ, ആത്മാവും നിർഗുണമാവണ്ടേ 🤔
അതിനെന്തിനാ ഇഷ്ടാനിഷ്ടങ്ങൾ ?

ആത്മ: അങ്ങനെയെങ്കിൽ, ഒരാൾ നല്ലവൻ ആണെങ്കിൽ അവന്റെ ഭാര്യ കൂതറ ആകാൻ പാടില്ലല്ലോ... 😅

ചന്ദ്ര: കൂതറയെ നന്നാക്കിയെടുത്തൂടെ ആത്മാവിന്...? പിന്നെ ജീവിതം സ്വർഗമല്ലേ സ്വാമീ ? അങ്ങനെ ആവാത്തതെന്താ ?

ആത്മ: സ്വാമി നിന്റെ അമ്മാവൻ... 😄 എനിക്ക് ഗുരുവോ, സ്വാമിയോ ഒന്നും ആകാനുള്ള യോഗ്യതയൊന്നും ഇല്ലെന്ന് പോസ്റ്റുകളിൽ എത്ര പ്രാവശ്യം പറഞ്ഞു...? ഒരുത്തന്റെ ഭാര്യ കൂതറ ആയാൽ, അവന്റെ ആത്മാവിന് എന്ത് പ്രശ്നം...? നമ്മുടെ ആത്മാവിന്റെ ആകെ ഇഷ്ടം എന്താണ്... ബ്രഹ്മത്തിൽ എത്തുക എന്നതല്ലേ...? അതിനല്ലേ ആത്മാവ് ശ്രമിക്കുന്നത്... എന്നാൽ നമ്മൾ നന്നാവില്ലല്ലോ... 😂

ചന്ദ്ര: അപ്പോ ആലോചിക്കട്ടെ. 🤔 ആത്മാവിനു അപ്പോ കഴിവില്ലേ ? 🤔 ആകെ ഒരു പുകമയം.

ആത്മ: പറയുന്നത് അല്ലല്ലോ തലയിൽ കയറുന്നത്... 😄

ചന്ദ്ര: ഈ ആത്മാവിനു കണ്ട്രോൾ ചെയ്തുടെ ? ആലോചിച്ചു ഒരു വഴിയായി.

ആത്മ: എന്തൊരു വിവരക്കേട്... ആത്മാവല്ലേ നമ്മളെ control ചെയ്ത്, ഒതുക്കി കൊണ്ടുവരുന്നത്...? പോസ്റ്റ്‌ വായിക്കുന്നത് ഒക്കെ വെറുതെ... 🤣

ചന്ദ്ര: ഞാൻ മന്ദബുദ്ധി അല്ലേ,
ഇടക്ക് ഇടയ്ക്കു കിളി പോകും 😀🙏
ഇന്ന് ഇത്തിരി അബദ്ധം പറ്റി,
കുറെ പേരെയും കൺഫ്യൂഷൻൽ ആക്കി. 😄 രാവിലെ വെള്ളമടിച്ചാൽ, ഇങ്ങനെന്നു ഇവിടെല്ലാരും 😀

ആത്മ: പോസ്റ്റ്‌ വായിച്ച് പ്രീമിയം ഷോപ്പിൽ പോയോ...?

ചന്ദ്ര: എന്തിനാ പോകുന്നേ 😀 പോസ്റ്റ്‌ ആലോചിച്ചാൽ മതിയല്ലോ.!

#ആത്മാന്വേഷണം158 #പോസ്റ്റ്‌158 #ദുരിതശമനവഴികൾ2

കഴിഞ്ഞ പോസ്റ്റിൽ ജ്യോതിഷത്തേക്കുറിച്ച് തുറന്നെഴുതിയത്, യഥാർത്ഥ സത്യം തേടുന്നവർക്ക് ഉപകാരപ്പെടട്ടെ എന്ന് കരുതിയാണ്... ആ പോസ്റ്റ്‌ വായിച്ച് എന്നോട് ദേഷ്യവും, പകയും ഒക്കെ തോന്നിയവർക്ക്, വരാനിരിക്കുന്ന ഭാവിയിൽ അനുഭവങ്ങളിലൂടെ, യഥാർത്ഥ സത്യം തിരിച്ചറിയാനാവുക തന്നെ ചെയ്യും... അവർക്ക് അപ്പോൾ തിരിയട്ടെ... ഒരു കാര്യം ഉറപ്പിച്ചു തന്നെ പറയാം, നിങ്ങളുടെ ആത്മാവിനെ വിട്ടിട്ട് (ഒഴിവാക്കി) വേറെ എന്തിന്റെയൊക്കെ പുറകെ പോയാലും, അതൊക്കെ വലിയ പാരയായിട്ട് തിരിച്ചടിക്കുക തന്നെ ചെയ്യും... അതുകൊണ്ടാണ്, അത്തരത്തിൽ തിരിച്ചടികൾ കിട്ടുവാൻ സാദ്ധ്യതയുള്ള കാര്യങ്ങളെക്കുറിച്ചുള്ള പോസ്റ്റുകൾ ഇടുന്നത്... ചിന്തകളെ പണയം വെച്ചിട്ടില്ലാത്തവർക്ക് അവ ഉപകാരപ്പെടുക തന്നെ ചെയ്യും... അല്ലാതുള്ളവർ, അനുഭവിച്ചു തന്നെ പഠിച്ചോളൂ എന്ന ആശംസയോടെ, പുതിയ പോസ്റ്റിലേക്ക് പോകുന്നു...

ജ്യോതിഷം കൊണ്ട്, എന്റെ ദുരവസ്ഥക്ക് യാതൊരു പരിഹാരവും കിട്ടാൻ പോകുന്നില്ല എന്ന്, അനുഭവിച്ച് ഉറപ്പിച്ചു നിൽക്കുന്ന കാലം... ഇനിയെന്ത് വഴി എന്ന ചിന്ത, അതികഠിനമായി തലയിൽ ചുറ്റിത്തിരിഞ്ഞുകൊണ്ടേയിരുന്നു... അപ്പോളാണ്, വീട്ടിൽ വരുത്തിയിരുന്ന പത്രത്തിന്റെ മുന്നിലെ, ഹെഡ് space ൽത്തന്നെ, (പത്രത്തിന്റെ പേര് എഴുതിയതിന്റെ, തൊട്ടു വലതുവശത്ത്) തൃശ്ശൂർ ജില്ലയിലുള്ള, ഒരു ചാത്തൻ മഠത്തിന്റെ പരസ്യം ശ്രദ്ധയിൽപ്പെട്ടത്... എന്ത് പ്രശ്നവും തീർത്തു കൊടുക്കുമത്രേ...! ഞാനാണെങ്കിൽ ഒരുപാട് പ്രശ്നങ്ങളിൽപ്പെട്ടു കിടന്നവനായതുകൊണ്ട്, ആ പരസ്യത്തിൽ നല്ല ആകർഷണം തോന്നി...

പത്രത്തിൽ കണ്ട അഡ്രസ്സിൽ, എന്റെ അവസ്ഥകളും, കാര്യങ്ങളും പറഞ്ഞു വിശദമായ ഒരു കത്തെഴുതി... 5 ദിവസത്തിനുള്ളിൽ അതിനു മറുപടി കിട്ടി... എന്റെ കാര്യം അവർ ഏറ്റു... അതുപ്രകാരം, അതിൽ കണ്ട ഫോൺ നമ്പറിൽ വിളിച്ച്, വിശദമായി കാര്യങ്ങൾ അന്വേഷിച്ചു... അപ്പോൾ, എന്ത്‌ ദോഷങ്ങളും, ദുരിതങ്ങളും ആണെങ്കിലും, അതിന്റെയെല്ലാം കാരണങ്ങൾ അവർ കണ്ടു പിടിച്ച്, സകല പ്രശ്നങ്ങൾക്കും പരിഹാരം ഉണ്ടാക്കിത്തരാം എന്ന് പറഞ്ഞു... ഒരാഴ്ച്ച കൊണ്ട്, അനുഭവം പൂർണ്ണമായും മാറിവരും എന്ന കാര്യത്തിൽ, പൂർണ്ണമായ ഉറപ്പും തന്നു... അതിനായി അവിടെപ്പോയി രണ്ട് ബ്രഹ്മ വെള്ളാട്ട് കർമ്മം ചെയ്യിക്കണം എന്നും, ചാത്തൻ സ്വാമിയുടെ കല്പന കേൾക്കണമെന്നും പറഞ്ഞു... അതിന്റെ ചെലവ് ആയി, അവിടെ എത്തുമ്പോൾ 2000 രൂപ കയ്യിൽ കരുതണമെന്നും പറഞ്ഞു... (അന്ന് ഒരു പവന് 4000 രൂപ)

അവർ പറഞ്ഞത് ഞാൻ തത്വത്തിൽ വിശ്വസിച്ചു... യാത്ര ചെലവ് അടക്കം 2500 രൂപ ഉണ്ടെങ്കിൽ, എന്റെ സകല പ്രശ്നങ്ങളും തീർന്നു രക്ഷപ്പെടാൻ പോകുന്നു... ഒരു സുഹൃത്തിന്റെ അടുത്തുനിന്നും കടം വാങ്ങിച്ച പണവുമായി, നേരെ ചാത്തൻ മഠത്തിലേക്ക് യാത്രയായി...

രാവിലെ സ്ഥലത്തെത്തി...

കുറച്ചു സമയം കഴിഞ്ഞപ്പോൾ, ഒരാൾ അമ്പലത്തിൽ കയറി പൂജ ചെയ്യുന്നു... അവസാനം കർപ്പൂരം കത്തിച്ച, ആരതി ഉഴിഞ്ഞ താലവുമായി പുറത്തേയ്ക്ക് വരുന്നു... അമ്പലത്തിനോട് ചേർന്ന്, ശ്രീകോവിലിനു പുറത്തായി, ഏകദേശം ഒരു മീറ്ററോളം പൊക്കമുള്ള, ഒരു മരത്തിന്റെ തടിയിൽ കയറി, (പഴയ, മരം കൊണ്ടുള്ള ഉരൽ പോലെ തോന്നിക്കുന്ന ഒന്ന്) നല്ല തടിയുള്ള ഒരാൾ ഇരിക്കുന്നുണ്ട്... അയാളെ ആരതി ഉഴിയുന്നു... അതിനുശേഷം അയാൾ (ഇരിക്കുന്ന ആൾ) വിസ്തരിച്ചു മുറുക്കുന്നു... കുറച്ചുനേരം ചവച്ചതിനു ശേഷം, കാറ്റ് പുറത്തേക്ക് ഊതി വിട്ടുകൊണ്ട്, ഒരു പ്രത്യേക രീതിയിൽ, മുറുക്കാൻ പല പ്രാവശ്യം തുപ്പുന്നു... എന്നിട്ട് നമുക്കൊന്നും മനസ്സിലാക്കാൻ പറ്റാത്ത, പ്രാകൃതമായ ഭാഷയിൽ, എന്തൊക്കെയോ വിളിച്ചു പറയുന്നു... അതോടെ ഓരോരുത്തർ അവരുടെ ആവലാതി ഉണർത്തിക്കുവാൻ, അദ്ദേഹത്തിന്റെ മുന്നിലേക്ക് എത്തുകയായി... അന്ന് ഏകദേശം ഒരു 30 പേരോളം, അവരുടെ പ്രശ്നങ്ങൾ പറയുവാൻ, അവിടെ ഉണ്ടായിരുന്നു...

എന്റെ ഊഴം വന്നപ്പോൾ, മുറുക്കി ചുവപ്പിച്ചിട്ട് മരത്തടിയുടെ മുകളിൽ കയറിയിരുന്നിരുന്ന ആളുടെ മുന്നിലേക്ക്, പരിഹരിച്ചു കിട്ടേണ്ടതായ പ്രശ്നങ്ങളുടെ പരിദേവനങ്ങളുമായി, ഞാനും എത്തി... ആവലാതികൾ കേട്ടതിനുശേഷം, മുറുക്കാൻ പുറത്തേക്കു തുപ്പിയിട്ട്, എനിക്കുള്ള മറുപടിയായി , അവ്യക്തമായ ഭാഷയിൽ എന്തൊക്കെയോ പറഞ്ഞു... എനിക്ക് ഒന്നും മനസ്സിലായില്ല... അവിടെ ഉണ്ടായിരുന്ന ഒരാൾ, അത് പച്ച മലയാളത്തിലേക്കാക്കി വിവർത്തനം ചെയ്ത്, എന്നോട് പറഞ്ഞു തന്നു... അതിന്റെ ചുരുക്കം:

എന്റെ കാര്യങ്ങൾ എല്ലാം ചാത്തൻസ്വാമി ഏറ്റെടുത്തിരിക്കുന്നു... എല്ലാ കാര്യങ്ങളും വേഗത്തിൽ നേരെയായി വരും... അതിനുവേണ്ടി മൂന്ന് വെള്ളാട്ട് കർമ്മങ്ങൾ കൂടി ചെയ്യണം... സത്യത്തിൽ ഞാൻ തകർന്നു പോയി...! അവസാന ആശ്രയം, ഇതോടെ പ്രശ്നങ്ങൾ തീരുന്നു എന്ന വിചാരത്തോടെയായിരുന്നു, കടം വാങ്ങിച്ച 2500 രൂപയുമായി ഞാൻ പോയത്...

ഞാൻ ഇപ്പോൾ രണ്ട് വെള്ളാട്ടു കർമ്മങ്ങൾ ചെയ്യിച്ചിട്ടുണ്ട്, ഇനി ഒന്നുകൂടി ചെയ്താൽ പോരെ എന്ന് ചോദിച്ചു... പോരാ ഇനി മൂന്ന് കൂടി വേണം എന്ന കല്പന... ശരിക്കും പെട്ടു...!🙄

അന്ന് ഫോൺ വിളിച്ചു വിശദമായി സംസാരിച്ചപ്പോൾ, രണ്ട് വെള്ളാട്ട് കർമ്മങ്ങൾ നടത്തിയാൽ, മുഴുവൻ പ്രശ്നങ്ങളും പരിഹരിച്ച്, അനുഭവങ്ങൾ നേരെയാക്കിത്തരാമെന്ന് പറഞ്ഞിരുന്നതെല്ലേ എന്ന് ഞാൻ... നിന്റെ പിന്നിലുള്ള ദോഷങ്ങൾ അതിഭീകരമാണ്, അതുകൊണ്ടാണ്, വീണ്ടും ചെയ്യേണ്ടിവരുന്നത് എന്ന കല്പ്ന... 🙄 ഞാൻ ഏതാണ്ട് കളഞ്ഞ ഏതാണ്ടിനെപ്പോലെ, അന്തവും കുന്തവുമില്ലാതെ തരിച്ചു നിന്നു...!

തിരിച്ച് നാട്ടിലേക്ക് പോകുമ്പോൾ, മലബാർ എക്സ്പ്രസ്സിന്റെ ജനറൽ കമ്പാർട്ടുമെന്റിൽ ഇരുന്നു ചിന്തിച്ചത്, അടുത്ത ആഴ്ച ഉണ്ടാക്കിക്കൊണ്ടുചെല്ലേണ്ടിയിരുന്ന മൂവായിരം രൂപയെക്കുറിച്ചായിരുന്നു...! 🙄

......

3000 രൂപയുമായി, വീണ്ടും ചാത്തൻ മഠത്തിലേക്ക്... ആ തുക ഉണ്ടാക്കാൻ ഞാൻ പെട്ടപാട് എനിക്കേ അറിയൂ... ചാത്തൻ മഠത്തിനെ വിശ്വസിച്ച്, അത് കടം വാങ്ങിയതുമൂലം, കാലങ്ങളായുണ്ടായിരുന്ന നല്ല ഒരു ബന്ധം നഷ്ടപ്പെട്ടുകിട്ടി എന്ന് ചുരുക്കി പറയാം... 😄

അവിടെ എത്തിയതിനു ശേഷം, കഴിഞ്ഞ ആഴ്ചയിലെ സംഭവങ്ങളുടെ തനിയാവർത്തനം... പിന്നീട് വെള്ളാട്ട് കർമ്മത്തിന് പണം ചോദിച്ചില്ല എന്ന് മാത്രം... ഇതോടെ ദോഷങ്ങൾ എല്ലാം ചാത്തൻസ്വാമി മാറ്റിയിട്ടുണ്ട്, ഇനി അങ്ങോട്ട് കാര്യങ്ങളൊക്കെ നന്നയിവരുമെന്ന കല്പനയും, അനുഗ്രഹവും കിട്ടി... വലിയ സന്തോഷത്തോടെ ഞാൻ നാട്ടിലേക്ക് തിരിച്ചു...

നാട്ടിൽ തിരിച്ചെത്തിയതിനുശേഷം, എന്നെ സംബന്ധിച്ചിടത്തോളം യാതൊരു അനുഭവഗുണവും ഉണ്ടായില്ല എന്നുമാത്രമല്ല, കാര്യങ്ങൾ കൂടുതൽ വഷളാവുകയാണുണ്ടായത്... അവർ പറഞ്ഞ സമയമായ ഒരാഴ്ച്ച വരെ കാത്തിരുന്നു... ഒന്നും നടന്നില്ല... ഒരാഴ്ച കഴിഞ്ഞപ്പോൾ പ്രശ്നങ്ങൾ രൂക്ഷമായി... പിടിച്ചു നിൽക്കുവാൻ പറ്റാതെ വന്നപ്പോൾ, അങ്ങോട്ടേക്ക് ഫോൺ വിളിച്ചു... മറുവശത്ത് തീരെ തണുത്ത പ്രതികരണം... എല്ലാം നേരെ ആയിക്കോളും എന്ന്... ഇത് പറയുവാനാണോ, 5000 രൂപ വാങ്ങിയെടുത്തത് എന്ന് ഞാൻ തിരിച്ചു ചോദിച്ചു... അതിനും ഉഴപ്പൻ മറുപടി...

അങ്ങനെ ആകെ സങ്കടമായി... അവസാനം പറ്റിക്കപ്പെട്ടു എന്ന് മനസ്സിലായപ്പോൾ, ഇതുപോലത്തെ ചതി ആരോടും ചെയ്യരുത് എന്നും പറഞ്ഞുകൊണ്ട്, അവർക്ക് ഒരു കത്തെഴുതി... പ്രത്യേകിച്ച്, ഒരുഗതിയും പരഗതിയും ഇല്ലാത്ത പാവങ്ങളോട്... ഈശ്വരൻ നിന്നോടൊക്കെ ചോദിച്ചോളും എന്നും എഴുതി... എന്നിട്ട് എന്റെ ആവലാതി മുഴുവനും ശിവനോട് കരഞ്ഞു പറഞ്ഞു... വേറെ ആരോട് പറയാൻ...! അങ്ങനെ ആ വിഷയം മനസ്സിൽ നിന്നും വിട്ടു... പ്രശ്നങ്ങളിൽ നിന്നും പുറത്ത് കടക്കുവാൻ, വേറെ വല്ല വഴിയും ഉണ്ടാകുമോ എന്ന അന്വേഷണവും തുടർന്നു...

ഏകദേശം ഒരുമാസം കടന്നുപോയി... ഒരു ദിവസം പത്രം എടുത്തു നോക്കുമ്പോൾ, ഒരു വാർത്ത: ആ മഠത്തിൽ ഇൻകം ടാസ്‌ ഡിപ്പാർട്മെന്റ് റൈഡ് നടത്തി, ഒരുകോടി രൂപ പിടിച്ചടുത്തു എന്ന്... സത്യത്തിൽ ഞാൻ തരിച്ചുപോയി... ഈയുള്ളവൻ കരഞ്ഞു പറഞ്ഞാൽ ഈശ്വരൻ പരിഗണിക്കുമെന്നോ...! അവിടുന്ന് അങ്ങോട്ടാണ്, ഞാൻ ശിവന് വേണ്ടപ്പെട്ട ആളാണെന്ന ബോധോദയം ഉണ്ടായിവന്നത്... 😄

പിന്നീട് കൂടുതൽ ചിന്തിച്ചപ്പോൾ, ഒരു മരത്തടിയുടെ മുകളിൽ കയറിയിരുന്ന്, മുറുക്കിത്തുപ്പുന്ന ഒരു സംഭവത്തിന്‌, എങ്ങനെയാണ് മറ്റുള്ളവരുടെ കാര്യങ്ങൾ അറിയാൻ കഴിയുന്നതെന്നും, പ്രശ്നങ്ങൾ പരിഹരിച്ചു കൊടുക്കാൻ കഴിയുന്നതെന്നുമുള്ള ചോദ്യം, അന്നേ മനസ്സിൽ കുടുങ്ങിയതാണ്... (എനിക്കാണെങ്കിൽ ഒന്നും അനുഭവത്തിലും കിട്ടിയില്ല) അതിന് എനിക്ക് ഇന്നും ഉത്തരം കിട്ടിയിട്ടില്ല... ഉത്തരം വല്ലവരുടെയും കയ്യിൽ ഉണ്ടെങ്കിൽ, comment ആയി താഴെ ചേർത്താൽ ഉപകാരമായിരിക്കും... (കഴിഞ്ഞ പോസ്റ്റിൽ സൂചിപ്പിച്ച, ജ്യോൽസ്യന്മാർ പറയുന്ന ഒരു ദോഷങ്ങളും, അവിടെ ബാധകമല്ല താനും...!)

പണം വാങ്ങിച്ചതിനുശേഷം, അവിടെ അമ്പലത്തിൽ ആർക്കുവേണ്ടിയും ഒരു കർമ്മവും ചെയ്യുന്നത് കണ്ടില്ല... സാധാരണ അവിടെ നടത്താറുള്ള പൂജ നടത്തുന്നത് മാത്രം കണ്ടു... അവിടെ ഒന്നും പ്രത്യേകമായി ചെയ്യുന്നത് കാണാത്തതുകൊണ്ടായിരിക്കാം, എനിക്ക് കൂടുതൽ ചിന്തിച്ചപ്പോൾ അവിശ്വാസം തോന്നിയിട്ടുണ്ടാവുക... ഇവർ പറയുന്ന ഈ വെള്ളാട്ട് കർമ്മം എന്ന് പറയുന്നത് എന്താണെന്ന്, ഇന്നുവരെ എനിക്ക് ഒരു പിടിയും കിട്ടിയിട്ടില്ല...

അവിടെ പോകുന്ന ആരുടേയും, കാര്യങ്ങൾ ഒന്നും നേരെയാകാറില്ല എന്ന് പറഞ്ഞു സമർത്ഥിക്കുവാനല്ല, ഇതിലൂടെ ശ്രമിക്കുന്നത്... നല്ല അനുഭവങ്ങൾ കിട്ടിയവരുണ്ടാകാം... (ക്ഷേത്രങ്ങളിലൂടെ, give and take രീതിയിൽ കാര്യങ്ങൾ സാധിച്ചെടുക്കാം എന്ന് മുൻപ് പറഞ്ഞത് ഓർമ്മിക്കുന്നുണ്ടാകുമല്ലോ... വിശദമായി പിന്നീട് മനസ്സിലാക്കാം...) എന്നാൽ എനിക്ക് പണം പോയതല്ലാതെ യാതൊരു നല്ല അനുഭവവും ഉണ്ടായില്ല എന്നുമാത്രമല്ല, അവരെ വിശ്വസിച്ച്, കടം വാങ്ങിച്ച പണം തിരിച്ചുകൊടുക്കാനാകാതെ, ഒരുപാട് നരകിക്കേണ്ടി വരുകയും ചെയ്തു... 🙄 (എനിക്ക് സംഭവിച്ച അനുഭവം, വേറെ ആളുകളോട് ചർച്ച ചെയ്തപ്പോൾ, ഒറിജിനൽ സ്ഥലത്ത് അല്ല ഞാൻ എത്തിപ്പെട്ടതെന്നും, അത് വേറെ സ്ഥലമാണെന്നും, അവിടെ പോകുന്നവർക്കെല്ലാം, കാര്യങ്ങൾ നേരെ ആകുന്നുണ്ടെന്നും പറഞ്ഞറിഞ്ഞു... പിന്നീട് അതിന്റെ പുറകെ പോകുവാനുള്ള ധനമോ, താൽപ്പര്യമോ ഇല്ലാതിരുന്നതുകൊണ്ട്, കൂടുതൽ പരീക്ഷിക്കുവാൻ ശ്രമിച്ചില്ല)

സത്യത്തിൽ അവിടെ സംഭവിച്ചത്, എന്നെ ഉപദ്രവിച്ചുകൊണ്ടിരുന്ന ദുഷ്ടശക്തികളെക്കണ്ട്, കുട്ടിച്ചാത്തൻ കണ്ടം വഴി ഓടി, സ്വന്തം തടി രക്ഷിച്ചെടുത്താണെന്ന്, ഇന്നെനിക്ക് തിരിച്ചറിയാം...😄 അതിശക്തരായ ദുഷ്ടശക്തികൾ നമ്മുടെ പിന്നിൽ ഉണ്ടാകണമെങ്കിലും, ഒരു ഭാഗ്യം വേണം... അവയിലൂടെ മറ്റുള്ളവർക്ക് അന്യമായ, അപ്രാപ്യമായ പലതരം വിചിത്രമായ അനുഭവങ്ങളിലേക്കും, നമ്മൾ നയിക്കപ്പെടും... അവയിൽ നിന്നൊക്കെ: സാധാരണക്കാർക്ക് അപ്രാപ്യവും, അസാധാരണവും, അനുപമവുമായ അറിവുകളുടെ തലത്തിലേക്ക്, നാം എത്തിച്ചേരുകതന്നെ ചെയ്യും... അതുകൊണ്ട് ദോഷങ്ങളും ദുരിതങ്ങളും ഉള്ളവരേ, നിങ്ങൾ ഭാഗ്യവാന്മാർ...! അപൂർവ്വമായ അറിവുകൾ, നിങ്ങൾക്കായി കാത്തിരിക്കുകതന്നെ ചെയ്യുന്നു... അത് ഭാവിയിൽ നിങ്ങൾ തിരിച്ചറിയുക തന്നെ ചെയ്യും...😅

ശിവൻ നമ്മുടെയെല്ലാം മനസ്സിൽ പതിഞ്ഞുപോയ ഒരു വിഗ്രഹമാണ്... അതുകൊണ്ടുതന്നെ, അദ്ദേഹത്തിന്റെ പേര് പറഞ്ഞ്, എന്തും മാർക്കറ്റ് ചെയ്യുക എന്നത് വളരെ എളുപ്പമാണ്... ഇത്തരത്തിലുള്ള പല കേന്ദ്രങ്ങളും, അദ്ദേഹവുമായിട്ടുള്ള ബന്ധം പറഞ്ഞിട്ടാണ്, ആളുകളെ ആകർഷിക്കുന്നത്... അതിനായി പല കഥകളും പ്രചരിപ്പിച്ചിരിക്കുന്നു... ചിലർ അതിനായി, പുരാണങ്ങൾ തന്നെ ഉണ്ടാക്കിയിരിക്കുന്നു...! 😄 ഇതൊക്കെ വായിച്ചു വിശ്വസിക്കുന്നവരെ വേണം സമ്മതിക്കുവാൻ...! 😅

അത്തരത്തിൽ മാർക്കറ്റുചെയ്യപ്പെടുവാനുള്ള സകലതും, ചാർത്തപ്പെട്ടിരിക്കുന്നത് ശിവനിലാണ്... കുട്ടിച്ചാത്തൻ, മാടൻ, പൊട്ടൻ, ഗുളികൻ തുടങ്ങി സകല സംഭവങ്ങളും: അങ്ങേരുടെ അവതരാമോ, പുത്രന്മാരോ, പുത്രികളോ ഒക്കെ ആണത്രേ...! (ഓരോരുത്തർ പടച്ചുവിടുന്ന, പല കഥകളും കേൾക്കുമ്പോൾ, അങ്ങേർക്ക് മൂത്ത കാമഭ്രാന്താണോ എന്ന് തോന്നിപ്പോകും...😅 ഒരു ഫാൻസി ഡ്രസ്സ് നടത്തിയ വിഷ്ണുവിനെയും, വെറുതെ വീട്ടില്ലല്ലോ...! 😄 അങ്ങേര് നിർഗ്ഗുണനായിരിക്കുന്നത് ഇവരുടെയൊക്കെ ഭാഗ്യം...! 😄 ഈ ഭാഗം കൂടുതൽ വിശദീകരിക്കണമെന്നുണ്ട്... എന്നാൽ ഒരു open പ്ലാറ്റ്ഫോമിൽ വേണ്ടെന്നു വെക്കുകയാണ്... പുസ്തകങ്ങൾ ഇറങ്ങുമ്പോൾ അതിൽ ആകാം...) ശിവന്റെ മകൻ, മകൾ, ശിഷ്യർ, അദ്ദേഹത്തിന്റെ തന്നെ ജന്മം എന്നൊക്കെ വിശ്വസിച്ചും, അല്ലാതെയും, തള്ളി നടന്നിരുന്ന പല അവതാരങ്ങളെയും, പരിചയപ്പെടാനും അടുത്ത് ഇടപഴകാനും ഭാഗ്യവശാൽ (നിർഭാഗ്യ.... 😄) എനിക്ക് അവസരങ്ങൾ കിട്ടിയിട്ടുണ്ട്... ഞാനും അങ്ങനെ എന്തൊക്കെയോ ആണെന്ന് കരുതിയിരുന്ന ഒരു ഭൂതകാലം, എനിക്കും ഉണ്ടായിരുന്നു... ഇപ്പോൾ സത്യം തിരിച്ചറിയാനുള്ള ബോധം വെച്ചപ്പോൾ, പണ്ടത്തെ മണ്ടൻ ചിന്തകളെക്കുറിച്ചോർത്ത് ഏകാന്ത വേളകളിൽ ഊരിച്ചിരിക്കാറുണ്ട്... നിങ്ങൾക്കും അങ്ങനെ വല്ല ചിന്തകളും ഉണ്ടെങ്കിൽ, ഒരുപാട് കരഞ്ഞതിനുശേഷം, ഓർത്തുചിരിക്കാനുള്ള ദിനങ്ങൾ, ഭാവിയിൽ നിങ്ങളെയും കാത്തിരിക്കുന്നു എന്ന് ഞാൻ ഉറപ്പു തരുന്നു... 😄

ഈ പോസ്റ്റ്‌ ആരെയും അവഹേളിക്കാനോ, മോശമാക്കാനോ ആയി എഴുതിയതല്ല... പ്രശ്നപരിഹാരം അന്വേഷിച്ചിറങ്ങുന്നവർ, കടന്നു പോകാനിരിക്കുന്ന ചില സംഭവങ്ങളെക്കുറിച്ചും, അവിടെയൊക്കെ നടക്കുന്ന കാര്യങ്ങളെക്കുറിച്ചും ചെറിയ അറിവ് പകരാനും, എടുക്കേണ്ടതായ നിലപാടുകളെക്കുറിച്ചും ചിന്തിക്കുവാനും, അതിലൂടെ ഒരു അവബോധം ഉണ്ടാകുമെങ്കിൽ ആകട്ടെ എന്നും കരുതി എഴുതുന്നു എന്നെ ഉളളൂ... കുറേ പണം പോയാലും "നേതി, നേതി" എന്ന് മനസ്സിലാക്കി, മുന്നോട്ട് പോകുവാനുള്ള ഒരു വഴി കൂടി കിട്ടി എന്ന് കരുതാം... നയിക്കുന്നത് അവനവന്റെ ആത്മാവ് ആയതിനാൽ, ഏതൊക്കെ "അല്ല" എന്ന് അനുഭവങ്ങളിലൂടെ കാണിച്ചു തരുന്നത്... അങ്ങനെയൊക്കെയല്ലേ, ശരിയായത് കണ്ടെത്താൻ പറ്റുകയുള്ളൂ...

"വാരാഹിയും ദുരനുഭവങ്ങളും" എന്ന പോസ്റ്റ്‌ നിങ്ങൾ വായിച്ചിരുന്നല്ലോ (പോസ്റ്റ്‌: 154) അതിൽ ഒരാളെ പരാമർശിച്ചിരുന്നു... അദ്ദേഹം ഇതുപോലെ ചാത്തൻ സേവ നടത്തുന്ന ഒരാളെയാണത്രേ, ഇപ്പോൾ ഗുരു ആയി എടുത്തിരിക്കുന്നത്... (അയാളുമായി അടുത്ത് പരിചയമുള്ള നമ്മുടെ ചില വായനക്കാർ, പറഞ്ഞു തന്ന അറിവാണ്... പൂർണ്ണമായും ശരിയാണോ എന്ന് അറിയില്ല... ഗുരുവിന്റെ പ്രത്യേകതകൾ നിങ്ങൾ പോസ്റ്റിൽ വായിച്ചിരുന്നുവല്ലോ...!) അതിൽ കുഴപ്പമൊന്നുമില്ല... ശരിയായ അറിവ് എത്തിച്ചു കൊടുക്കുക എന്നുള്ളതാണ്, ഗുരുവിന്റെ ധർമ്മം... പക്ഷെ ഒരാളുടെ ആത്മാവിനെ വിട്ടിട്ട് (പരിഗണിക്കാതെ) വേറെ ശക്തികളുടെ പിന്നാലെ പോയാൽ, ഭാവിയിൽ ആത്മാവിൽ നിന്നും കിട്ടുന്ന പണി താങ്ങുവാൻ പറ്റി എന്ന് വരില്ല എന്ന്, ഈ പോസ്റ്റിന്റെ തുടക്കത്തിലേ സൂചിപ്പിച്ചിരുന്നു... (മൂർത്തി ഉപാസകരായ ഗുരുക്കന്മാരുടെ പിന്നാലെ പോകുമ്പോൾ ഉള്ള ഒരു വലിയ പ്രശ്നമാണിത്... ഭാവിയിൽ വലിയ പണി വാങ്ങിച്ചെടുത്തിരിക്കും...) ഈ ഭാഗം മനസ്സിലാക്കുവാൻ മാത്രമുള്ള വിവരം, നമ്മുടെ വായനക്കാർക്ക് ഇപ്പോൾ ഉണ്ട് എന്നുള്ളതുകൊണ്ടാണ്, ഇങ്ങനെ തുറന്നു തന്നെ എഴുതുന്നത്... പ്രത്യേകിച്ച് കഴിഞ്ഞ പോസ്റ്റ്‌ വായിച്ചതോടെ... നിങ്ങൾ ശരിക്കും ചിന്തിച്ചു മനസ്സിലാക്കുവാൻ ശ്രമിക്കുക... കൂടുതൽ വിശദീകരണത്തിന്റെ ആവശ്യമില്ല...

പ്രശ്നപരിഹാരം തേടി ഒരുപാട് അലഞ്ഞു നടക്കേണ്ടി വന്നതുകൊണ്ട്, വ്യത്യസ്ഥരായ ഒരുപാട് പേരെ പരിചയപ്പെടുവാൻ സാധിച്ചു... (അവരിൽ പലരും പറയുന്നതും, പ്രവർത്തിക്കുന്നതും എന്താണെന്ന്, അവർക്കുതന്നെ അറിയുമായിരുന്നില്ല) അതുപോലെ തന്നെ അപൂർവ്വങ്ങളായ വിദ്യകളെക്കുറിച്ച് മനസ്സിലാക്കുവാനും, ചിലവ പഠിച്ചെടുക്കുവാനും സാധിച്ചു... അങ്ങനെ അലഞ്ഞു നടന്നപ്പോൾ, "സാധാരണക്കാർക്കും" കുറച്ചു നേരത്തെക്കാണെങ്കിലും, ബ്രഹ്മത്തെ അടുത്തറിയാനുള്ള ചില വിദ്യകൾ ഉണ്ടെന്നുള്ള അറിവുകൾ വീണുകിട്ടി... അത് അടുത്ത പോസ്റ്റിൽ വായിക്കാം...

NB: 1. കഴിഞ്ഞ പോസ്റ്റിൽ, ടാരറ്റ് കർഡുകളെക്കുറിച്ചെഴുതിയത്തിന് ശേഷം, ഒരുപാട് പേർ അതിന്റെ പല videos കണ്ടിട്ട്, വിവിധ സംശയങ്ങളുമായി വന്നിരുന്നു... Videos ൽ പലതിലും, പലവിധ വിവരക്കേടുകളും പ്രചരിപ്പിക്കുന്നതായി കാണുന്നു... അതിനാൽ നമ്മുടെ വായനക്കാർ, മറ്റൊരു അന്ധവിശ്വാസത്തിലേക്ക് കൂടിപ്പോയി വീഴുന്ന അവസ്ഥ വരരുത്... നിലവിലുള്ള ജ്യോതിഷത്തേക്കാൾ എന്തുകൊണ്ടും: ആത്മീയ പുരോഗതിക്കും, ഭൗതിക മുന്നേറ്റത്തിനും കൂടുതൽ ഉപകരിക്കും എന്നുള്ളത് കൊണ്ടാണ്, അതിനെക്കുറിച്ചു പറഞ്ഞത്... നമുക്ക് അറിയുവാനുള്ള കാര്യങ്ങൾ, മനസ്സിലാക്കിഎടുക്കുവാനുള്ള ഒരു മാർഗ്ഗമായി, അതിനെ ഉപയോഗിക്കാം എന്നാണ് ഉദ്ദേശിച്ചിട്ടുള്ളത്... അല്ലാതെ, അതിലൂടെ വിവിധ (ദുരു)ഉദ്ദേശത്തോടെ പ്രചരിപ്പിക്കുന്ന കാര്യങ്ങൾ, അന്ധമായി വിശ്വസിച്ചുകൊള്ളണം എന്നല്ല...!

NB: 2. ചാത്തൻ മഠത്തിൽ വെച്ച്, തിരുവല്ലയിൽ ഉള്ള ഒരാളെ പരിചയപ്പെട്ടിരുന്നു... ഫോൺ നമ്പർ വാങ്ങിയിരുന്നു... ആയാളും മാരകമായ സാമ്പത്തിക പ്രശ്നത്തിന് വല്ല പരിഹാരവും ഉണ്ടോ എന്ന് അന്വേഷിച്ചു വന്നതായിരുന്നു... എന്റെ കാര്യങ്ങൾ എല്ലാം കുളമായപ്പോൾ, അത് ചിലപ്പോൾ എന്റെ മാത്രം പ്രശ്നമായിരിക്കാം, മറ്റുള്ളവർ ഒക്കെ നന്നായി പോകുന്നുണ്ടായിരിക്കും എന്ന ചിന്തയോടെ, അദ്ദേഹത്തെ വിളിച്ചു സംസാരിച്ചു...

A: ഹലോ സുഖമല്ലേ കാര്യങ്ങൾ ഒക്കെ എങ്ങനെ പോകുന്നു...? പ്രശ്നങ്ങളൊക്കെ തീർന്നോ...?

ആകെ കുളമായി... കടം വാങ്ങി അവിടെ പൂജ ചെയ്യിച്ചതോടെ, കടം തന്നവർ ഇരിക്കപ്പൊറുതി തരുന്നില്ല... ഒരു വഴിയും തെളിഞ്ഞില്ല... ശരിക്കും പെട്ടു...

A: ഞാനും അതിലും മാരകമായ അവസ്ഥയിൽ ആണ്... കടം കാരണമാണ് അവിടെ പോയത്... അവർ കാരണം കടം പിന്നെയും കൂടി... അവിടെ പോകാൻ കടം തന്ന ഒരാളുടെ മുന്നിൽ പെടാതെ, മുങ്ങി നടക്കുകയാണ്... ഇവർ ഈ ചെയ്യുന്നതിൽ ഒരു പാപവും ഇല്ലേ...? ഇതൊക്കെ തിരിച്ചും അനുഭവിക്കേണ്ടി വരില്ലേ...?

അതിനല്ലേ സുഹൃത്തേ അവിടുന്ന് നമ്മളെ പറഞ്ഞു വിടുന്നതിനുമുൻപ്, വയർ നിറച്ചു രുചികരമായ ഭക്ഷണം തന്നു വിടുന്നത് !ഭക്ഷണം കഴിക്കാതെ, ആരെയും അവർ അവിടുന്ന് പുറത്ത് വിടുന്നില്ലല്ലോ...! അന്നദാനം പുണ്യം എന്നും, പാപത്തെ ഇല്ലാതാക്കുന്നു എന്നുമാണല്ലോ. അപ്പോൾ നമ്മോട് ചെയ്യുന്ന പാപത്തിന്, അവർ അഡ്വാൻസ് ആയിത്തന്നെ പരിഹാരവും കണ്ടിരിക്കുന്നു. അവരുടെ പാപവും കൂടി, ഭക്ഷണം കഴിപ്പിച്ചതിലൂടെ, നമുക്ക് തന്നു വിട്ടിരിക്കുന്നു...! കൊടുക്കുന്നവന്റെ പാപം, വാങ്ങുന്നവനിലേക്ക് പോകുന്നുണ്ടായിരിക്കില്ലേ ?

പ്ലിംഗ്... അത്‌ കേട്ടത്തോടെ എന്റെ കിളി പോയി... അതിനാൽ വായനക്കാർ ഇങ്ങനെ എവിടെയെങ്കിലുമൊക്കെ പോകുന്നുണ്ടെങ്കിൽ, അവിടുന്ന് ഭക്ഷണം കൂടി കഴിച്ച്, കൂടുതൽ പാപി ആകണോ എന്ന്, നിങ്ങൾ തന്നെ സ്വയം തീരുമാനിച്ചോളൂ... ഇതിലൊക്കെ സംശയം ഉള്ള, എന്നെപ്പോലെ അനുഭവിച്ചു പഠിച്ചാലേ ബോദ്ധ്യപ്പെടൂ, എന്ന നിർബന്ധബുദ്ധി ഉള്ളവർ, പരീക്ഷിച്ചു നോക്കി അനുഭവിച്ചറിയാൻ ശ്രമിക്കുന്നതിലും തെറ്റില്ല കേട്ടോ... 😄

NB: 3. ഇനി ഇത് വായിച്ചിട്ട്: നമുക്ക് അരിയും, കിറ്റും, ഭക്ഷണ സാധനങ്ങളുമൊക്കെ ദാനം പോലെ തന്നിട്ട്, അതിലൂടെ നമ്മുടെ പുണ്യം അടിച്ചുമാറ്റിയിട്ടാണോ, .......വീണ്ടും ഭരണത്തിൽ കയറിയത് എന്നും ചോദിച്ചോണ്ട് വരല്ലേ, ഞാൻ ഈ നാട്ടുകാരനേ അല്ല... 🤣