17/08/2026
প্ৰেছ বিজ্ঞপ্তি
বিনামূলীয়া নামভৰ্তিৰ চৰকাৰী অধিসূচনা প্ৰকাশ নকৰালৈকে মৰিয়নি মহাবিদ্যালয়ৰ ৩য়, ৫ম আৰু ৭ম ষাণ্মাসিকৰ নামভৰ্তি প্ৰক্ৰিয়া বয়কটৰ ঘোষণা SFI-ৰ
মৰিয়নি, ১৭ আগষ্ট, ২০২৬: উচ্চ শিক্ষা সঞ্চালকালয়ৰ (DHE) স্পষ্ট অধিসূচনা আৰু নিৰ্দেশনা প্ৰকাশ নোপোৱালৈকে মৰিয়নি মহাবিদ্যালয়ৰ ৩য়, ৫ম আৰু ৭ম ষাণ্মাসিকৰ নামভৰ্তি প্ৰক্ৰিয়া সম্পূৰ্ণৰূপে বয়কট কৰাৰ সিদ্ধান্ত গ্ৰহণ কৰিছে ভাৰতীয় ছাত্ৰ ফেডাৰেচন (SFI), মৰিয়নি আঞ্চলিক কমিটী আৰু মৰিয়নি মহাবিদ্যালয়ৰ ছাত্ৰ-ছাত্ৰীসকলে। এই সন্দৰ্ভত সংগঠনটোৱে মৰিয়নি ৰাজহ চক্ৰৰ চক্ৰ বিষয়াৰ আৰু মৰিয়নি মহাবিদ্যালয়ৰ অধ্যক্ষৰ জৰিয়তে উচ্চ শিক্ষা সঞ্চালকলৈ এক স্মাৰক-পত্ৰ প্ৰেৰণ কৰে।
উল্লেখ্য যে, মৰিয়নি মহাবিদ্যালয়ৰ বেছিভাগ ছাত্ৰ-ছাত্ৰীয়েই শ্ৰমিক, কৃষক আৰু অৰ্থনৈতিকভাৱে পিছপৰা পৰিয়ালৰ। ৰাজ্য চৰকাৰৰ 'বিনামূলীয়া নামভৰ্তি নীতি' (Fee Waiver Scheme)-ৰ ওপৰত নিৰ্ভৰ কৰিয়েই এইসকল দৰিদ্ৰ আৰু শ্ৰমজীৱী পৰিয়ালৰ সন্তান উচ্চ শিক্ষাৰ সুযোগ লাভ কৰি আহিছে। কিন্তু চলিত শৈক্ষিক বৰ্ষৰ নামভৰ্তি প্ৰক্ৰিয়া আৰম্ভ হোৱাৰ পিছতো উচ্চ শিক্ষা সঞ্চালকালয়ৰ পৰা বিনামূলীয়া নামভৰ্তি সম্পৰ্কীয় কোনো স্পষ্ট নিৰ্দেশনা প্ৰকাশ নোহোৱাত ছাত্ৰ-ছাত্ৰী আৰু অভিভাৱকসকল চৰম অনিশ্চয়তা আৰু আৰ্থিক দুশ্চিন্তাত ভুগিবলগীয়া হৈছে।
এই সমস্যাৰ সমাধানকল্পে SFI মৰিয়নি আঞ্চলিক কমিটী আৰু মহাবিদ্যালয়ৰ ৩য়, ৫ম আৰু ৭ম ষাণ্মাসিকৰ ছাত্ৰ-ছাত্ৰীসকলে যৌথভাৱে নিম্নলিখিত দাবীসমূহ উত্থাপন কৰিছে:
১/ নামভৰ্তি বয়কটৰ সিদ্ধান্ত: উচ্চ শিক্ষা সঞ্চালকালয়ে ছাত্ৰ-ছাত্ৰীৰ স্বাৰ্থত বিনামূলীয়া নামভৰ্তিৰ স্পষ্ট অধিসূচনা জাৰি নকৰালৈকে মৰিয়নি মহাবিদ্যালয়ৰ ৩য়, ৫ম আৰু ৭ম ষাণ্মাসিকৰ কোনো এজন ছাত্ৰ-ছাত্ৰীয়ে নামভৰ্তি প্ৰক্ৰিয়াত অংশগ্ৰহণ নকৰে আৰু এই নামভৰ্তি প্ৰক্ৰিয়া সম্পূৰ্ণভাৱে বয়কট কৰা হ’ব।
২/ তাৎক্ষণিক অধিসূচনা জাৰিৰ দাবী: শিক্ষা লাভৰ অধিকাৰৰ পৰা যাতে কোনো এজন ছাত্ৰ-ছাত্ৰীও অৰ্থনৈতিক অভাৱৰ বাবে বঞ্চিত নহয়, তাৰ বাবে DHE-য়ে অচিৰেই বিনামূলীয়া নামভৰ্তিৰ চৰকাৰী নিৰ্দেশনা প্ৰকাশ কৰিব লাগিব।
৩/ নামভৰ্তিৰ অন্তিম তাৰিখ বৃদ্ধি: সমগ্ৰ বিষয়টোৰ আনুষ্ঠানিক আৰু স্থায়ী সমাধান নোহোৱালৈকে নামভৰ্তিৰ অন্তিম সময়সীমা বৃদ্ধি কৰিবলৈ মহাবিদ্যালয় কৰ্তৃপক্ষ আৰু সঞ্চালকালয়ক দাবী জনোৱা হৈছে।
SFI মৰিয়নি আঞ্চলিক কমিটীৰ সভাপতি বিনয় কৰ্মকাৰে স্পষ্ট কৰি দিয়ে যে চৰকাৰ তথা সঞ্চালকালয়ে যদি শীঘ্ৰেই এই ন্যায্য দাবীসমূহ মানি নলয়, তেন্তে সাধাৰণ ৰাইজ আৰু ছাত্ৰ-ছাত্ৰীক লৈ সংগঠনটোৱে তীব্ৰ আন্দোলন গঢ়ি তুলিবলৈ বাধ্য হ’ব।
ধন্যবাদেৰে
SFI মৰিয়নি আঞ্চলিক কমিটী
