माध्यमिक विद्यालय खर्ची ता एरंडोल जिजळगाव

23/08/2026

*माध्यमिक विद्यालय खर्चीच्या विद्यार्थ्यांची विज्ञान नाटिका स्पर्धेत तालुक्यात प्रथम क्रमांकाची बाजी*
खर्ची, ता. एरंडोल : शिक्षण विभाग, पंचायत समिती एरंडोल यांच्या वतीने आयोजित राष्ट्रीय विज्ञान नाट्योत्सव २०२६-२७ अंतर्गत तालुकास्तरीय विज्ञान नाटिका स्पर्धेत माध्यमिक विद्यालय खर्चीच्या विद्यार्थ्यांनी ‘इलेक्ट्रॉनिक वाहनांचे महत्त्व’ या विषयावर प्रभावी सादरीकरण करत प्रथम क्रमांक पटकावला.
या स्पर्धेसाठी विद्यार्थ्यांनी कृत्रिम बुद्धिमत्ता, वैज्ञानिक दृष्टिकोन, इलेक्ट्रिक वाहने, पर्यावरण संवर्धन तसेच भविष्यातील विज्ञान-तंत्रज्ञान या विषयांवर प्रभावी भाष्य करणारी नाटिका सादर केली. विद्यार्थ्यांच्या अभिनयासोबतच वैज्ञानिक आशय, विषयाची मांडणी, सादरीकरणातील परिणामकारकता आणि जनजागृतीचा संदेश यामुळे नाटिकेला परीक्षकांची विशेष दाद मिळाली.
कार्यक्रमास तालुक्याचे शिक्षणाधिकारी मा. श्री. आर. डी. महाजन, शिक्षण विस्तार अधिकारी मा. श्री. जे. डी. पाटील, केंद्रप्रमुख श्रीमती मनीषा सोनवणे, तालुका विज्ञान मंडळ समन्वयक श्री. अमोल वाणी, श्रीमती समिता पाटील यांच्यासह विविध मान्यवर उपस्थित होते.
या उल्लेखनीय यशाबद्दल संस्थेचे अध्यक्ष मा. श्री. नानाभाऊ महाजन, मा. जि. प. सदस्य, मुख्याध्यापक श्री. अनिल विक्रम माळी, शिक्षकवृंद व पालकांनी नाटकेत सहभागी विद्यार्थी गौरव नाबदे,समृद्धी महाजन, देवयानी देशमुख, कल्याणी माळी,भूमिका महाजन,देवेश माळी, हिमानी महाजन,योगिता महाजन तसेच नाटिकेच्या मार्गदर्शक शिक्षिका श्रीमती लोखंडे मॅडम व श्रीमती चव्हाण मॅडम यांचे अभिनंदन केले.
तालुकास्तरीय स्पर्धेत प्रथम क्रमांक मिळाल्याने माध्यमिक विद्यालय खर्चीच्या विद्यार्थ्यांची पुढील स्तरावरील विज्ञान नाटिका स्पर्धेसाठी निवड झाली आहे. विद्यार्थ्यांच्या या यशामुळे विद्यालयाच्या शिरपेचात आणखी एक मानाचा तुरा रोवला गेला.

15/08/2026

15/08/2026

*माध्यमिक विद्यालय खर्ची येथे स्वातंत्र्य दिनानिमित्त ध्वजारोहण उत्साहात संपन्न*

खर्ची, ता. एरंडोल : माध्यमिक विद्यालय खर्ची येथे १५ ऑगस्ट स्वातंत्र्य दिनानिमित्त ध्वजारोहणाचा कार्यक्रम मोठ्या उत्साहात, जल्लोषात व देशभक्तीपूर्ण वातावरणात संपन्न झाला. *कार्यक्रमाच्या अध्यक्षस्थानी माननीय श्री. नानाभाऊ पोपट महाजन, माजी जिल्हा परिषद सदस्य होते*

यावेळी ध्वजारोहणाच्या मानकरी *ताईसो मुक्ताबाई भुरा महाजन यांच्या शुभहस्ते राष्ट्रध्वजाचे ध्वजारोहण करण्यात आले* ध्वजारोहणानंतर उपस्थित मान्यवर, शिक्षक, विद्यार्थी व ग्रामस्थांनी राष्ट्रध्वजाला मानवंदना देत राष्ट्रीय गीत, राष्ट्रगीत व राज्यगीताचे गायन केले.
स्वातंत्र्य दिनाचे औचित्य साधून विद्यालयातील विद्यार्थ्यांनी राष्ट्रीय एकात्मता जनजागृती रॅली, तिरंगा रॅली तसेच विविध आकर्षक सांस्कृतिक कार्यक्रमांचे सादरीकरण केले. विद्यार्थ्यांनी सादर केलेले मानवी मनोरे, डंबेल्स व लेझीमचे प्रात्यक्षिक विशेष आकर्षण ठरले. विद्यार्थ्यांच्या शिस्तबद्ध संचलनाने व दमदार सादरीकरणाने उपस्थितांची वाहवा मिळवली. विद्यार्थ्यांच्या कलागुणांना वाव देणाऱ्या या कार्यक्रमातून देशप्रेम, एकता, शिस्त आणि राष्ट्रभक्तीचा संदेश देण्यात आला.

या कार्यक्रमास ग्रामपंचायतीचे सरपंच, उपसरपंच व सदस्य, विविध संस्थांचे चेअरमन, व्हाईस चेअरमन व संचालक मंडळ, तसेच अंगणवाडी सेविका व मदतनीस, आशा सेविका, शिक्षक, शिक्षकेतर कर्मचारी, पालक व ग्रामस्थ मोठ्या संख्येने उपस्थित होते.

कार्यक्रम यशस्वी होण्यासाठी माध्यमिक विद्यालय खर्चीचे मुख्याध्यापक श्री. अनिल विक्रम माळी, शिक्षकवृंद व शिक्षकेतर कर्मचारी यांनी विशेष परिश्रम घेतले. विद्यार्थ्यांनीही कार्यक्रमाच्या नियोजनात उत्स्फूर्त सहभाग नोंदविला. कार्यक्रमाचे सूत्रसंचालन विद्यालयाच्या उपशिक्षिका योगिता महाजन मॅडम यांनी प्रभावीपणे केले.

स्वातंत्र्य दिनाच्या निमित्ताने विद्यालय परिसरात निर्माण झालेले देशभक्तीचे आणि उत्साहाचे वातावरण सर्वांच्या स्मरणात राहणारे ठरले.

24/07/2026

*माध्यमिक विद्यालय खर्ची येथे आषाढी एकादशीनिमित्त ग्रंथदिंडी उत्साहात*
खर्ची, ता. एरंडोल (प्रतिनिधी): आषाढी एकादशीच्या पावन निमित्ताने माध्यमिक विद्यालय, खर्ची येथे विद्यार्थ्यांमध्ये वाचन संस्कृतीची आवड निर्माण व्हावी तसेच संत परंपरेतील विचारांचा प्रसार व्हावा या उद्देशाने ग्रंथदिंडीचे आयोजन करण्यात आले.
हातात धार्मिक, ऐतिहासिक व प्रेरणादायी ग्रंथ घेऊन विद्यार्थ्यांनी गावातून उत्साहात ग्रंथदिंडी काढली. "ज्ञानाची कास धरा", "वाचन संस्कृती जोपासा", "ग्रंथ हेच खरे मित्र" अशा घोषणांनी परिसर दुमदुमून गेला.
यावेळी शाळेचे मुख्याध्यापक व शिक्षकांनीही संत साहित्याचे महत्त्व विशद करून विद्यार्थ्यांना ज्ञानार्जनासाठी ग्रंथांचे वाचन करण्यास प्रेरित केले.
या उपक्रमात शाळेतील सर्व शिक्षक, शिक्षकेतर कर्मचारी व विद्यार्थ्यांनी उत्स्फूर्त सहभाग नोंदविला. ग्रंथदिंडीमुळे विद्यार्थ्यांमध्ये वाचनाची आवड, सांस्कृतिक मूल्ये आणि संत परंपरेबद्दल आदर निर्माण करण्यास निश्चितच मदत होणार असल्याची भावना उपस्थितांनी व्यक्त केली.

04/07/2026

*स्कॉलरशिप परीक्षेत माध्यमिक विद्यालय खर्चीचे घवघवीत यश*
खर्ची (ता. एरंडोल): माध्यमिक विद्यालय, खर्ची येथील इयत्ता ५ वीचा विद्यार्थी प्रेम प्रवीण मराठे याने पूर्व उच्च प्राथमिक शिष्यवृत्ती (इयत्ता ५ वी) परीक्षेच्या गुणवत्ता यादीत स्थान मिळवून विद्यालयाच्या शिरपेचात मानाचा तुरा रोवला आहे.
यावर्षी झालेल्या शिष्यवृत्ती परीक्षेत विद्यालयाचे चार विद्यार्थी पात्र ठरले असून, त्यापैकी *प्रेम प्रवीण मराठे* याने गुणवत्ता यादीत स्थान मिळवून विद्यालयाच्या यशात मानाची भर घातली आहे. या उल्लेखनीय यशामुळे विद्यालय, पालक व ग्रामस्थांमध्ये आनंदाचे वातावरण निर्माण झाले आहे. विद्यार्थ्याच्या या यशामागे त्याची मेहनत, नियमित अभ्यास, पालकांचे प्रोत्साहन तसेच शिक्षकांचे सातत्यपूर्ण मार्गदर्शन लाभले.
या यशाबद्दल विद्यालयाचे मुख्याध्यापक श्री. अनिल माळी यांच्या हस्ते प्रेम प्रवीण मराठे व त्याचे पालक श्री. प्रवीण (दादा) मराठे यांचा पुष्पगुच्छ देऊन सत्कार करण्यात आला. यावेळी विद्यालयातील सर्व शिक्षक व शिक्षकेतर कर्मचारी उपस्थित होते. सर्वांनी विद्यार्थ्याचे मनःपूर्वक अभिनंदन करून त्याच्या उज्ज्वल शैक्षणिक वाटचालीसाठी शुभेच्छा दिल्या.
विद्यालयाच्या सातत्यपूर्ण गुणवत्तापूर्ण शैक्षणिक कार्याचा हा आणखी एक मानाचा टप्पा असून, भविष्यातही विद्यार्थ्यांनी अशाच प्रकारे यश संपादन करून विद्यालयाचे नाव उज्ज्वल करावे, असा विश्वास विद्यालयाचे अध्यक्ष माननीय श्री नानाभाऊ महाजन यांनी व्यक्त केला.

14/06/2026

🌺📚 प्रवेशोत्सव २०२६-२७ 📚🌺

माध्यमिक विद्यालय, खर्ची ता. एरंडोल जि. जळगाव येथे शैक्षणिक वर्ष २०२६-२७ च्या प्रवेशोत्सवानिमित्त सर्व विद्यार्थी व पालकांचे हार्दिक स्वागत करण्यात येत आहे.

🎓 गुणवत्तापूर्ण शिक्षण 🎓 अनुभवी व तज्ज्ञ शिक्षकवृंद 🎓 सुसज्ज शैक्षणिक वातावरण 🎓 विविध शैक्षणिक व सहशालेय उपक्रम

आपल्या पाल्याच्या उज्ज्वल भविष्यासाठी आजच प्रवेश निश्चित करा.

📅 दिनांक : 15/06/2026 🕘 वेळ : ठीक 10:45 वा 📍 स्थळ : माध्यमिक विद्यालय, खर्ची

"विद्याधन सर्वधनात प्रधानम"

आपले नम्र, मुख्याध्यापक, शिक्षकवृंद व संचालक मंडळ माध्यमिक विद्यालय, खर्ची ता. एरंडोल जि. जळगाव

19/05/2026

*🏆 माध्यमिक विद्यालय खर्ची, ता. एरंडोल 🏆*
📚 इयत्ता ५ वी स्कॉलरशिप परीक्षेत घवघवीत यश 📚
माध्यमिक विद्यालय खर्ची येथील इयत्ता ५ वीच्या विद्यार्थ्यांनी स्कॉलरशिप परीक्षेत उल्लेखनीय यश संपादन केले आहे.
या परीक्षेसाठी एकूण ८ विद्यार्थ्यांनी सहभाग घेतला होता. त्यापैकी ४ विद्यार्थी पात्र ठरले आहेत.
✨ पात्र विद्यार्थ्यांची नावे पुढीलप्रमाणे :
🥇 प्रेम प्रवीण मराठे — 204 गुण
🥈 मयूर गोपाल माळी — 158 गुण
🥉 सुमित प्रदीप देशमुख — 156 गुण
🏅 गौरव प्रकाश नाबदे — 146 गुण
या यशाबद्दल सर्व पात्र विद्यार्थ्यांचे, त्यांना मार्गदर्शन करणाऱ्या शिक्षकांचे तसेच पालकांचे हार्दिक अभिनंदन विद्यालयाचे अध्यक्ष माननीय श्री नानाभाऊ महाजन, मुख्याध्यापक व शिक्षक यांच्यावतीने करण्यात आले 💐💐🏫 माध्यमिक विद्यालय खर्ची, ता. एरंडोल