27/10/2025
*ਸੜਕ ਹਾਦਸੇ ਵਿੱਚ NSQF ਵੋਕੇਸ਼ਨਲ ਅਧਿਆਪਕ ਦੀ ਹੋਈ ਮੌਤ, ਪਰ ਨਹੀ ਲਈ ਸਰਕਾਰ ਨੇ ਕੋਈ ਸਾਰ।*
ਆਊਟਸੋਰਸ/ਕੱਚਾ ਅਧਿਆਪਕ ਹੋਣ ਦਾ ਮਿਲਿਆ ਇਨਾਮ।
ਪਿਛਲੇ ਦਿਨੀ ਸਰਕਾਰੀ ਸੀਨੀਅਰ ਸੈਕੈਂਡਰੀ ਸਕੂਲ ਰਾਮਪੁਰ ਝੱਜੋਵਾਲ ਵਿਖੇ NSQF ਆਈ.ਟੀ. ਵਿਸ਼ੇ ਦੀ ਗਰਭਵਤੀ ਅਧਿਆਪਿਕਾ ਨੀਰਜ ਕੁਮਾਰੀ ਪਤਨੀ ਜਸਵੰਤ ਰਾਏ ਦੀ ਸੜਕ ਹਾਦਸੇ ਵਿੱਚ ਬੇਵਕਤੀ ਮੌਤ ਹੋ ਗਈ ਸੀ। ਨੀਰਜ ਕੁਮਾਰੀ ਅੱਠ ਮਹੀਨੇ ਦੀ ਗਰਭਵਤੀ ਸੀ। ਸੜਕ ਹਾਦਸੇ ਦੌਰਾਨ ਮੌਕੇ ਤੇ ਹੀ ਜੱਚਾ ਬੱਚੇ ਦੀ ਮੌਤ ਵੀ ਹੋ ਗਈ।
ਅਧਿਆਪਿਕਾ ਸਰਕਾਰੀ ਸਕੂਲ ਵਿੱਚ ਪ੍ਰਾਈਵੇਟ/ਆਊਟਸੋਰਸ ਅਧਿਆਪਕ ਵਜੋਂ ਸੇਵਾ ਨਿਭਾ ਰਹੀ ਸੀ। ਪਿਛਲੇ ਕਈ ਸਾਲਾਂ ਤੋਂ ਓਹੋ ਕੇਵਲ 15000/- ਉੱਤੇ ਕੰਮ ਕਰ ਰਹੇ ਸਨ। ਆਊਟਸੋਰਸ ਅਧਿਆਪਕ ਹੋਣ ਕਾਰਨ ਸਰਕਾਰ ਵੱਲੋਂ ਇਸ ਅਧਿਆਪਕ ਦੀ ਕੋਈ ਵੀ ਸਾਰ ਨਹੀਂ ਲਈ ਗਈ ਅਤੇ ਨਾ ਹੀ ਪਰਿਵਾਰ ਨੂੰ ਕੋਈ ਮੁਆਵਜਾ ਦਿੱਤਾ ਗਿਆ।
ਆਮ ਆਦਮੀ ਪਾਰਟੀ ਦੀ ਸਰਕਾਰ ਨਲਾਇਕੀਆਂ ਜੱਗ ਜਾਹਰ ਹਨ ਇਹ ਸਰਕਾਰ ਜੋ ਵੋਟਾਂ ਤੋਂ ਪਹਿਲਾਂ ਕਹਿੰਦੀ ਹੁੰਦੀ ਸੀ ਕਿ ਸਰਕਾਰ ਬਣਦੇ ਹੀ ਅਸੀਂ ਠੇਕੇਦਾਰੀ ਭਰਤੀ ਬੰਦ ਕਰ ਦਵਾਂਗੇ। ਪਰੰਤੂ ਇੰਨੇ ਸਾਲ ਬੀਤਣ ਤੋਂ ਬਾਅਦ ਵੀ ਇਹ ਮਸਲੇ ਪਹਿਲਾਂ ਵਾਂਗ ਹੀ ਹਨ। ਸਿੱਖਿਆ ਕ੍ਰਾਂਤੀ ਦਾ ਰੋਲਾ ਪਾਣ ਵਾਲੀ ਸਰਕਾਰ ਇਹਨਾਂ ਆਊਟਸੋਰਸ ਮੁਲਾਜ਼ਮਾਂ ਦਾ ਕੋਈ ਪੱਕਾ ਹੱਲ ਨਹੀਂ ਕਰ ਸਕੀ। ਪਹਿਲਾਂ ਵੀ ਕਈ NSQF ਅਧਿਆਪਕ ਦੁਰਘਟਨਾ ਦਾ ਸ਼ਿਕਾਰ ਹੋਏ ਹਨ। ਪ੍ਰੰਤੂ ਨਾ ਸਰਕਾਰ ਨੇ ਇਹਨਾਂ ਅਧਿਆਪਕਾਂ ਦੀ ਸਾਰ ਲਈ ਅਤੇ ਨਾ ਹੀ ਕਿਸੇ ਪ੍ਰਾਈਵੇਟ ਕੰਪਨੀ ਨੇ ਕੋਈ ਮੁਆਵਜ਼ਾ ਦਿੱਤਾ। ਇਹ ਅਧਿਆਪਕ ਆਪਣੇ ਜਾਨ ਹਥੇਲੀ ਉੱਤੇ ਰੱਖ ਕੇ ਰੋਜ ਦੂਰ ਦਰਾੜੇ ਦੇ ਸਕੂਲਾਂ ਵਿੱਚ ਜਾ ਕੇ ਨੌਕਰੀ ਕਰਦੇ ਹਨ।
NSQF ਵੋਕੇਸ਼ਨਲ ਟੀਚਰਜ਼ ਫਰੰਟ, ਪੰਜਾਬ ਵੱਲੋਂ ਸਰਕਾਰ ਤੋਂ ਕਈ ਵਾਰ ਇਹ ਮੰਗ ਕੀਤੀ ਗਈ ਹੈ ਕਿ 11 ਸਾਲਾਂ ਦੀ ਨੌਕਰੀ ਹੋਣ ਤੋਂ ਬਾਅਦ ਵੀ NSQF ਅਧਿਆਪਕਾਂ ਨੂੰ ਰੈਗੂਲਰ ਅਧਿਆਪਕਾਂ ਵਾਂਗ ਸੁਵਿਧਾਵਾਂ ਦਿੱਤੀਆਂ ਜਾਣ। ਇਹ ਅਧਿਆਪਕ ਇੱਕ ਪਾਸੇ ਆਊਟਸੋਰਸ ਹੋਣ ਦਾ ਸੰਤਾਪ ਭੋਗ ਰਹੇ ਹਨ। ਦੂਜੇ ਪਾਸੇ ਘੱਟ ਤਨਖਾਹਾਂ ਅਤੇ ਮੈਡੀਕਲ ਭੱਤਿਆਂ ਤੋਂ ਵਾਂਝੇ ਹਨ। ESI ਦੇ ਨਾਮ ਤੇ ਇਮਪਲੋਰ ਅਤੇ ਇਮਪਲੋਈ ਫੰਡ ਅਧਿਆਪਕਾਂ ਦੀ ਤਨਖਾਹਾਂ ਵਿੱਚੋਂ ਹੀ ਕੱਟਿਆ ਜਾਂਦਾ ਹੈ। ਪਰੰਤੂ ਕੋਈ ਵਿੱਤ ਲਾਭ ਨਹੀਂ ਦਿੱਤਾ ਜਾਂਦਾ। ਇੱਕ ਪਾਸੇ ਸਰਕਾਰ ਦੇਸ਼ ਲਈ ਸ਼ਹੀਦ ਹੋਣ ਵਾਲੇ ਅਗਨੀਵੀਰਾਂ ਨੂੰ ਇਕ ਕਰੋੜ ਰੁਪਏ ਦੇ ਸਕਦੀ ਹੈ ਤਾਂ ਇਹਨਾਂ ਆਊਟਸੋਰਸ ਅਧਿਆਪਕਾਂ ਨੂੰ ਕੋਈ ਮਾਣ ਪੱਤਾ ਕਿਉਂ ਨਹੀਂ ਦਿੱਤਾ ਜਾਂਦਾ। ਕਮੇਟੀ ਵੱਲੋਂ ਇਹ ਮੰਗ ਕੀਤੀ ਜਾਂਦੀ ਹੈ ਕਿ ਸਰਕਾਰ ਉਹਨਾਂ ਦੀਆਂ ਜਾਇਜ਼ ਮੰਗਾਂ ਨੂੰ ਪੂਰੀ ਕਰੇ।
🚩🚩NSQF ਵੋਕੇਸ਼ਨਲ ਟੀਚਰਜ਼ ਫਰੰਟ ਪੰਜਾਬ🚩🚩
