Howrah U.P. School

مذاکرہ برائے ۔"میرے دست و بازو " مضامین کا مجموعہ
بروز سنیچر مورخہ 2 ستمبر 2023 بوقت بعد نماز مغرب بمقام شیب پور کمبائنڈ کلب، 28 کاویز گھاٹ روڈ، شیب پور، ھوڑہ، زیر اہتمام بزم غواص، ھوڑہ ایک محفل مذاکرہ کا انعقاد کیا گیا جس کی صدارت جناب اشفاق حسین خان نے کی اور نقابت کے فرائض معروف شاعر و ادیب اور استاد جناب جاوید مجیدی نے بحسن و خوبی انجام دیا۔ نقیب محفل جناب جاوید مجیدی نے معزز مقررین و شرکاء کا اجمالی تعارف بڑے ھی دلکش انداز میں پیش کیا۔ دراصل یہ شاندار محفلِ مذاکرہ کا انعقاد معروف شاعر و افسانہ نگار اور پی۔ ایم۔ بستی، شیب پور، ھوڑہ میں واقع ھوڑہ یو۔ پی۔ اسکول کے ھیڈ ٹیچر جناب شبیر ذوالمنان کی تصنیف کردہ کتاب "میرے دست و بازو" کی دوسری جلد کی اشاعت پر ھوا تھا۔ واضح ھو کہ میرے دست و بازو کی دوسری جلد کی رونمائی 13 اگست 2023 کو ھوڑہ ھائی اسکول میں ھوئی تھی۔ "میرے دست و بازو" میں مصنف نے سماجی، سیاسی، ادبی، تعلیمی، مذہبی کاموں میں خود کو وقف کرنے والوں کا مختصر سوانحی خاکہ و ان کی نمایاں کارکردگی کو بہت ھی دلکش انداز میں قلمبند کیا ھے جو آئندہ نسلوں کے لئے ایک قیمتی اثاثہ ثابت ھوگا۔ اس کتاب کی خاص نوعیت یہ ھے کہ صاحب کتاب نے ہر شخص کی ذاتی زندگی و کارناموں کو اجاگر کرنے سے پہلے تمہیدی جملوں کو اس خوبصورتی کے ساتھ قلمبند کیا ھے ان کلمات کو پڑھتے پڑھتے قاری کے اندر ایک عجیب سا تجسس پیدا کر دیتا ھے اور قاری کو مکمل پڑھنے پر مجبور کردیتا ھے۔ ہر شخص پر لکھے گئے تمہیدی کلمات ایک دوسرے سے مختلف ھیں۔ جملہ مقررین نے صاحب کتاب کی اس بے مثل کاوش کو کافی سراہا اور انہیں مبارکباد بھی دی۔ اس کتاب کے ذریعہ صاحب کتاب نے ھمارے محسنین کی خدمات کو اجاگر کیا ھے۔ اس کتاب میں ان شخصیات پر بھی قلم اٹھایا گیا ھے جو چپکے چپکے عوام الناس کی فلاح کے لئے کوشاں ھیں۔ صاحب کتاب نے انہیں اس لئے اجاگر کیا ھے کہ دوسرے بھی اس سے سبق لیں۔ اس کتاب میں مقتدر شخصیات کا مختصر سوانحی خاکہ اور ان کی خدمات درج ھیں جو انہوں نے صاحب کتاب کو بہم پہنچائی ھیں۔
مقررین میں صدر محفل اور نقیب محفل کے علاوہ جناب جاوید احمد (ریٹائرڈ ٹیچر، ھوڑہ ھائی اسکول)، جناب احتشام الرحمن شبیہ ( ھیڈ ٹیچر شیب پور بستی فری پرائمری اسکول)، جناب ضیاء الدین انصاری (ریٹائرڈ ٹیچرز انچارج، ترقی اردو ھائی اسکول)، جناب ذکی ممتاز، بزرگ سماجی خدمت گار جناب ولی اللہ انصاری، جناب محمد شجاع الدین (سکریٹری، شیب پور کمبائنڈ کلب) اور راقم الحروف نے اپنے اپنے خیالات سے سامعین کو محظوظ کیا۔
رپورٹ ۔۔۔خوشتر عزیز

Happy 77th Independence Day

Howrah U.P. School

شبیرذوالمنان کی تصنیف کردہ کتاب ”میرے دست و بازو “ جلد دوم کی تقریبِ رونمائی۔

بروز اتوار مورخہ 13/ اگست 2023ء بوقت ساڑھے دس بجے دن ہوڑہ ہائی اسکول کے وسیع ہال میں شبیرذوالمنان کی تصنیف کردہ کتاب ” میرے دست و بازو“ جلد دوم کی تقریبِ رونمائی زیرِ صدارت الحاج عبدالودود انصاری( سائنسی ادیب ) منعقد ہوئی۔نقابت کے فرائض جدید لب ولہجہ کے شاعروادیب جناب خواجہ احمد حسین نے بخوبی انجام دیا اور نقابت کے ایسے جوہر دکھلائے جو برسوں سا معین کرام کے دل و دماغ پر چھائے رہیں گے۔تقریب کا آغاز محمد آصف کی تلاوتِ کلام پاک اور نعتِ سرورِ کونین سے ہوا۔اس کے بعد اساتذہ ہوڑہ پوپی اسکول نے مہمانانِ کرام کو گلہائے عقیدت و محبت پیش کیا۔مہمانِ خصوصی کی حیثیت سے جناب وسیم الحق ڈپٹی میئر آسنسول میونسپل کارپوریشن ، جناب مستفیض الحسن سماجی خدمت گذار جموڑیا آسنسول ، جناب مبارک علی مبارکی، جناب نیر اعظمی ،جناب منظرجمیل، جناب خورشید ادیب ، محترمہ صوفیہ عباس، جناب جاوید مجیدی اور جناب محمد پرویز نے اپنی شرکت سے اس یاد گار محفل کو وقاربخشا۔دنیائے علم و ادب کی نامور شخصیت جناب ڈاکٹر مشتاق انجم کے مبارک ہاتھوں سے مزکورہ کتاب کی رونمائی عمل میں آئی ۔اُنہوں نے کتاب اور مصنف کے حوالے سے بڑی بصیرت افروز تقریر بھی کی۔
شبیرذوالمنان کی تصنیف کردہ منفرد کتاب ”میرے دست و بازو جلد دوم کے حوالے سے جناب ولی اللہ انصاری نے کہا کہ شبیرذوالمنان کا یہ کارنامہ تاریخ ساز ہے۔معروف شاعرو ادیب جناب عاصم شہنواز شبلی نے کہا کہ اس کتاب کو تذکرے کے زمرے میں رکھا جاسکتا ہے۔ یہ منفردتحریریں شبیرذوالمنان کی نیک دلی کا مظہر ہیں۔معروف محقق ڈاکٹر نوشاد مومن نے کہا کہ شبیرذوالمنان کی تحریریں لائق تحسین ہیں بس اِن کا اندازِ تخاطب ”معزز قارئین کرام، معزز قارئین کرام“ ذہن پر بار گذرتا ہے۔اس سے انہیں پرہیز کرنا چاہیے ۔حقیقی سماجی خدمت گذار جناب منظرجمیل نے شبیرذوالمنان کی کاوشوں کی سراہنا کرتے ہوئے کہا کہ آنے والے دنوں میں یہ کتاب قارئین کے دلوں میں گہرے اثرات مرتسم کرے گی ۔معروف شاعر وادیب جناب مبارک علی مبارکی نے کہا کہ اس دور پرفتن میں جہاں لوگ صرف اور صرف اپنی تعریف میں مگن رہتے ہیں ایسے میں ایک ایسا قلم کار ہمارے سامنے آیا ہے جس نے دوسروں کے کارناموں کو اجاگر کرنے کا بیڑا اُٹھا رکھا ہے دراصل یہ خود بھی ایک نیک اور مخلص انسان ہے۔ پورے ملک میں اس نوعیت کی کوئی دوسری کتاب ہماری نظروں سے اب تک نہیں گذری ہے ۔جناب پروفیسراشرف علی نے کہا کہ اس کتاب میں شامل بعض شخصیتوں سے میں آشنا ہوں مگر اُن کے کارناموں سے روشناس اس کتاب کے وسیلے سے ہوا ہوں۔جناب ڈاکٹر واصف اختر ریاستی سکریٹری انجمن ترقی اردو مغربی بنگال نے ایک سو کتابیں مختلف سرکاری لا ئبریریوں میں رکھوانے کا بیڑا اُٹھا یا۔جناب وسیم الحق مہمانِ خصوصی نے شبیرذوالمنان کو ہر طرح سے تعاون کرنے کا یقین دلاتے ہوئے کہا کہ وہ اس نیک کام کو جاری و ساری رکھیں ہم سب اِن کے ساتھ ہیں۔جناب خورشید ادیب نے شبیرذوالمنان کے حوالے سے ایک تہنیتی نظم پیش کی جسے سامعین نے پسند کیا۔اس تاریخ ساز موقع پر جناب جاوید احمد ، جناب ماسٹر خورشید انور، جناب سرور عزیز ، محترمہ صوفیہ عباس اور محترمہ انجم پروین نے بھی سامعین سے خطاب کیا اور میرے دست و بازو جلد دوم کی اشاعت پر اپنی دلی مسرت کا اظہار فرمایا ۔اس موقع پر منصنف نے اپنے جذبات و احساسات کو نم آنکھوں سے سامعین کے حضور پیش کیا۔صدرِ جلسہ جناب عبدالودود انصاری نے اپنے صدارتی خطبے میں فر مایا کہ شبیر میرا شاگرد ہے اور اس پر مجھے ناز ہے۔اپنے اساتذہ کی قدر کرنے والے لوگ ہی زندگی کے جس شعبے میں قدم رکھتے ہیں کا میاب و کا مران ہوتے ہیں۔یہ تاریخ ساز تقریب راقم الحروف کے اظہار تشکر کے بعد دن کے ایک بجے اختتام پذیر ہوئی ۔ جناب رشیق احمد کے علاوہ ہوڑہ یوپی اسکول کے تمام اساتذہ نے اس پروگرام کو کا میابی سے ہمکنار کرنے میں نمایاں کردار نبھایا۔
تحریر عامرخان

Annual Sport,Sadar South Circle

Happy Republic Day 2023

School reopening ceremony

Paray Shikshalaya