06/05/2026
ગંગોત્રી સ્કૂલ ગોંડલની શૈક્ષણિક સફળતાની હેટ્રિક: ધોરણ 12 સાયન્સ-કોમર્સ બાદ હવે ધોરણ 10માં પણ ગંગોત્રી સ્કૂલનો દબદબો...
આજરોજ ધોરણ 10નું પરિણામ જાહેર થયું ત્યારે ગોંડલની ગંગોત્રી સ્કૂલે શ્રેષ્ઠ પરિણામની પરંપરાને જાળવી રાખીને ગુજરાતના સ્વપ્નદ્રષ્ટા એવા સર ભગવતસિંહજી મહારાજ સાહેબના ગોકુળીયા ગોંડલનું ગૌરવ વધાર્યું છે. ગંગોત્રી સ્કૂલના ગુજરાતી માધ્યમમાં અભ્યાસ કરતા ધવલ ખસીયાએ 99.97 PR સાથે સમગ્ર ગુજરાત બોર્ડમાં ત્રીજું સ્થાન પ્રાપ્ત કરી સંસ્થા, પરિવાર અને ગોંડલ શહેરનું નામ રાજ્યભરમાં રોશન કર્યું છે. તેની સાથે ધનેશ્રીબા જાડેજાએ 99.92 PR, દિયા સૂચકે 99.92 PR અને શુભમ ટીલાળા એ 99.92 PR મેળવી સમગ્ર ગુજરાતમાં આઠમું સ્થાન પ્રાપ્ત કરેલ છે જયારે નૈતિક સાવલિયાએ 99.90 PR સાથે દસમું સ્થાન હાંસલ કરીને સંસ્થાની યશકલગીમાં વધુ એક સુવર્ણ પીંછું ઉમેર્યું છે.
સમગ્ર ગુજરાત બોર્ડમાં ગંગોત્રી સ્કૂલના ધોરણ 10 ના પરિણામમાં 99 PR ઉપર 27 વિદ્યાર્થીઓ, 98 PR ઉપર 39 અને 97 PR ઉપર 53 વિદ્યાર્થીઓ આવેલ છે. જયારે A1 ગ્રેડ 71 વિદ્યાર્થીઓએ અને A2 ગ્રેડ 65 વિદ્યાર્થીઓએ મેળવ્યા છે. આ ઉપરાંત અલગ - અલગ વિષયમાં 100 માંથી 100 માર્ક્સ 50 વિદ્યાર્થીઓએ મેળવ્યા છે. આ શ્રેષ્ઠ પરિણામનો શ્રેય ગંગોત્રી ગ્રુપ ઓફ સ્કૂલના ફાઉન્ડર અને ચેરમેન સંદીપસર છોટાળાએ વિદ્યાર્થીઓ, શિક્ષકોને અને વાલીઓને આપ્યો છે. આ સાથે શ્રેષ્ઠ પરિણામ લાવવા બદલ વિદ્યાર્થીઓને અને શિક્ષકોને ખુબ ખુબ શુભેચ્છાઓ પાઠવેલ હતી.
આજે જ્યારે ગંગોત્રી સ્કૂલનું ધોરણ 10નું ઐતિહાસિક પરિણામ આવ્યું છે, ત્યારે શ્રેષ્ઠ પ્રદર્શન કરનાર દરેક વિદ્યાર્થીઓને મીઠાઈ ખવડાવી અને શિલ્ડ એનાયત કરી સન્માનિત કરવામાં આવ્યા હતા. શાળાના પ્રિન્સિપાલ કિરણ મેડમ દ્વારા વિદ્યાર્થીઓ, શિક્ષકો તેમજ વાલીઓને મીઠાઈ ખવડાવી ઉજ્જવળ પરિણામની શુભકામનાઓ પાઠવવામાં આવી હતી. તેમણે આ સફળતાને વિદ્યાર્થીઓના પુરુષાર્થ, શિક્ષકોના અવિરત માર્ગદર્શન અને વાલીઓના સહયોગનું પરિણામ ગણાવી તમામને અભિનંદન આપ્યા હતા.
