21/07/2025
যোৱা ১৯ জুলাই, শনিবাৰে জিলা পুথিভঁৰালত মহাবিদ্যালয়ৰ নৱাগত আদৰণী সভাখনি সফলতাৰে অনুষ্ঠিত হয়। মহাবিদ্যালয়ৰ অধ্যক্ষ শিৱপ্ৰসাদ বৰাদেৱৰ পতাকা উত্তোলনেৰে অনুষ্ঠানৰ শুভাৰম্ভ কৰা হয়। ছাত্ৰ-ছাত্ৰী সকলে তেওঁলোকৰ সুন্দৰ সাংস্কৃতিক অনুষ্ঠানেৰে সকলোকে মুগ্ধ কৰে।
মুকলি সভাত শ্ৰীশ্ৰী যোগানন্দদেৱ সত্ৰাধিকাৰ গোস্বামী মহাবিদ্যালয়ৰ বুৰঞ্জী বিভাগৰ অৱসৰপ্ৰাপ্ত মুৰব্বী অধ্যাপক গোপীকানন্দ শইকীয়াদেৱ, দেৱৰাজ ৰয় মহাবিদ্যালয়ৰ অৰ্থনীতি বিভাগৰ মুৰব্বী অধ্যাপক তথা বিশিষ্ট লেখক ড৹ দেৱজিৎ ফুকন, গোলাঘাট বাণিজ্য মহাবিদ্যালয়ৰ অধ্যক্ষ ড৹ উৎপল শৰ্মা, ঋতুৰাজ ফুকন তথা কেইবাগৰাকীও বিশিষ্ট ব্যক্তিয়ে মঞ্চ অলংকৃত কৰে। গোপীকানন্দ শইকীয়াদেৱে অনুপ্ৰেৰণামূলক বক্তৃতাৰে ছাত্ৰ-ছাত্ৰী তথা সমগ্ৰ শ্ৰোতাক আপ্লুত কৰে। অসমীয়া বিভাগৰ জ্যেষ্ঠা শিক্ষয়িত্ৰী ৰুণামণি বৰা বৰদলৈয়ে আতঁ ধৰা সম্বৰ্ধনা অনুষ্ঠানত উচ্চ মাধ্যমিক আৰু উচ্চতৰ মাধ্যমিক চূড়ান্ত পৰীক্ষাত সুখ্যাতিৰে উত্তীৰ্ণ হোৱা ছাত্ৰ-ছাত্ৰীসকলক সম্বৰ্ধনা জনোৱা হয়। মহাবিদ্যালয়ৰ গ্ৰন্থাগাৰিক সুমন কলিতাদেৱৰ একমাত্ৰ কন্যাৰ সোঁৱৰণত মহাবিদ্যালয় কৰ্তৃপক্ষই আগবঢ়োৱা সংযুক্তা শইকীয়া সোঁৱৰণী শৈক্ষিক বটাঁ মহাবিদ্যালয়ৰ ২০২৪-২৫ বৰ্ষৰ শ্ৰেষ্ঠ ছাত্ৰ অংকিত বৰদলৈক প্ৰদান কৰা হয়। এই সভাতে ২০২৫ বৰ্ষৰ শ্ৰেষ্ঠ সাহিত্য প্ৰতিযোগী বটাঁটিও অংকিত বৰদলৈক প্ৰদান কৰা হয়। নৱপ্ৰজন্মৰ জনপ্ৰিয় কণ্ঠশিল্পী কমলিকা কাশ্যপৰ সুন্দৰ সংগীতানুষ্ঠানেৰে অনুষ্ঠানটিৰ সফল সমাপ্তি ঘটে।
