04/09/2026
ਅਧਿਆਪਕ ਦਿਵਸ ‘ਤੇ ਪੰਜਾਬੀ ਯੂਨੀਵਰਸਿਟੀ ਲਈ ਵਿਸ਼ੇਸ਼
ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ, ਪੰਜਾਬ ਦੇ ਬਹੁਤ ਵੱਡੇ ਖੇਤਰ ਦੀ ਨੌਜਵਾਨ ਪੀੜੀ ਨੂੰ ਕਈ ਦਹਾਕਿਆਂ ਤੋਂ ਕੇਵਲ ਵਿੱਦਿਆ ਹੀ ਨਹੀਂ, ਸਗੋਂ ਸਰਬ ਪੱਖੀ ਗਿਆਨ ਦੇ ਕੇ ਚਾਨਣ ਮੁਨਾਰੇ ਕਰ ਰਹੀ ਹੈ। ਮੈਂ ਵੀ ਉਹਨਾਂ ਖੁਸ਼ਨਸੀਬਾਂ ਵਿੱਚੋਂ ਇੱਕ ਹਾਂ ਜਿਸਨੇ ਇਸ ਮਾਣਮੱਤੀ ਯੂਨੀਵਰਸਿਟੀ ਵਿੱਚੋਂ ਪੜਾਈ ਕੀਤੀ ਹੈ। ਪੰਜਾਬੀ ਯੂਨੀਵਰਸਿਟੀ ਨੇ ਮੇਰੀ ਜ਼ਿੰਦਗੀ ‘ਚ ਚਾਰ ਚੰਦ ਉਦੋਂ ਲਗਾ ਦਿੱਤੇ ਜਦੋਂ ਪਾਸ ਹੁੰਦਿਆਂ ਸਾਰ ਬਿਨਾਂ ਕਿਸੇ ਸਿਫਾਰਿਸ਼ ਤੋਂ ਰੈਗੂਲਰ ਭਰਤੀ ਕੀਤੀ। 3 ਸਾਲ ਦੀ ਪੜਾਈ ਅਤੇ 13 ਸਾਲ ਦੇ ਅਧਿਆਪਨ ਸਣੇ ਤਕਰੀਬਨ 16 ਸਾਲ ਹੋ ਗਏ ਹਨ ਇਸ ਖ਼ੂਬਸੂਰਤ ਅਦਾਰੇ ਨਾਲ ਜੁੜੇ ਹੋਏ। ਮਾਲਵੇ ਦੇ ਖੇਤਰ ਵਿੱਚ ਲਗਭਗ 6 ਦਹਾਕਿਆਂ ਤੋਂ ਉੱਤੇ ਹੋ ਗਏ ਹਨ, ਭਾਸ਼ਾ ਦੇ ਨਾਮ ਤੇ ਬਣੀ ਭਾਰਤ ਦੀ ਇਸ ਪਹਿਲੀ ਯੂਨੀਵਰਸਿਟੀ ਵਿੱਚੋਂ ਵਿਦਿਆ ਪ੍ਰਾਪਤ ਕਰ ਕੇ ਨਿਕਲੇ ਹਜ਼ਾਰਾਂ ਅਫਸਰ, ਕਲਾਕਾਰ, ਨੇਤਾ ਅਤੇ ਹੋਰ ਦੇਸ਼ਾਂ ਵਿਦੇਸ਼ਾਂ ਵਿੱਚ ਧੂਮਾਂ ਪਾ ਰਹੇ ਹਨ। ਇਸ ਬੇਮਿਸਾਲ ਵਿਸ਼ਵ-ਵਿਦਿਆਲਿਆ ਦਾ ਹਿੱਸਾ ਹੋਣਾ ਬਹੁਤ ਵੱਡਾ ਸੁਭਾਗ ਹੈ। ਹੁਣ ਤਾਂ ਇਹ ਜ਼ਿੰਦਗੀ ਦਾ ਅਹਿਮ ਹਿੱਸਾ ਬਣ ਚੁੱਕੀ ਹੈ ਜਿਸਦੀ ਖੁਸ਼ਬੋ ਵੀ ਰੋਮ-ਰੋਮ ਵਿੱਚ ਵਸ ਗਈ ਹੈ। ਯੂਨੀਵਰਸਿਟੀ ਦਾ ਹਰ ਮੌਸਮ ਜਿਵੇਂ ਜ਼ਿੰਦਗੀ ਦੇ ਪੈਮਾਨੇ ਜਿਹੇ ਸਮਝਾ ਰਿਹਾ ਜਾਪਦਾ ਹੈ। ਮੇਰੀ ਬੇਨਤੀ ਹੈ ਸਰਕਾਰਾਂ ਦਰਬਾਰਾਂ ਨੂੰ ਕਿ ਇਸ ਯੂਨੀਵਰਸਿਟੀ ਦੀ ਭਲਾਈ ਲਈ ਜੋ ਵੀ ਕਦਮ ਚੁੱਕੇ ਜਾ ਸਕਦੇ ਹੋਣ ਉਹ ਦੇਰ ਹੋਣ ਤੋਂ ਪਹਿਲਾਂ ਚੁੱਕ ਲਏ ਜਾਣ ਨਹੀਂ ਤਾਂ ਪਤਾ ਵੀ ਨਹੀਂ ਲੱਗੇਗਾ ਜਦੋਂ ਵਿੱਦਿਆ ਦਾ ਵਿੱਤੀ ਲਾਭ ਲੈਣ ਵਾਲੇ ਦੈਂਤ ਇਸਨੂੰ ਨਿੱਘਰ ਜਾਣਗੇ। ਸਾਡੀ ਰੱਬ ਵਰਗੀ ਯੂਨੀਵਰਸਿਟੀ ਉੱਤੇ ਹਮੇਸ਼ਾ ਮਿਹਰ ਭਰਿਆ ਹੱਥ ਰਹੇ ਅਤੇ ਰੱਬ ਸਾਨੂੰ ਸਭ ਨੂੰ ਤਨਦੇਹੀ ਨਾਲ ਇਸਦੀ ਸੇਵਾ ਕਰਨ ਦਾ ਬਲ ਬਖਸ਼ੇ। ਕਦੇ ਤੱਤੀ ਵਾਅ ਨਾ ਲੱਗੇ ਇਸ ਸਿੱਖਿਆ ਦੇ ਮੰਦਰ ਨੂੰ, ਹਮੇਸ਼ਾ ਚੜਦੀਕਲਾ ਵਿੱਚ ਰੱਖੀਂ ਮਾਲਕਾ। ਅੱਜ ਅਧਿਆਪਕ ਦਿਵਸ ‘ਤੇ ਮੈਂ ਪ੍ਰਣ ਲੈਂਦਾ ਹਾਂ ਕਿ ਕਦੀ ਵੀ ਆਪਣੇ ਨਿੱਜੀ ਫਾਇਦੇ ਲਈ ਦੇਸ਼ ਦੇ ਭਵਿੱਖ ਪਿਆਰੇ ਵਿਦਿਆਰਥੀਆਂ ਦਾ ਨੁਕਸਾਨ ਨਹੀਂ ਕਰਾਂਗਾ। ਮੈਨੂੰ ਅਧਿਆਪਕ ਹੋਣ ਤੇ ਮਾਣ ਤਾਂ ਪਹਿਲਾਂ ਹੀ ਸੀ ਪਰ ਇਹ ਮਾਣ ਦੂਣਾ ਹੋ ਜਾਂਦਾ ਜਦੋਂ ਪੰਜਾਬੀ ਯੂਨੀਵਰਸਿਟੀ ਦਾ ਨਾਂ ਮੇਰੇ ਨਾਂ ਨਾਲ ਜੁੜ ਜਾਂਦਾ।
ਪੰਜਾਬੀ ਯੂਨੀਵਰਸਿਟੀ ਜਿੰਦਾਬਾਦ❤️
ਡਾ. ਸਤਪਾਲ ਸਿੰਘ
