14/07/2026
Nabi Kareem ﷺ jab Makkah Mukarramah se Madinah Munawwarah ki taraf hijrat farma rahe the to raste mein Hazrat Buraidah Aslami (RA) se mulaqat hui. Aap apni qaum ke sardar the. Quraish ne Rasulullah ﷺ aur Hazrat Abu Bakr Siddiq (RA) ko giraftar karne wale ke liye bada inaam ka elan kar rakha tha, isi lalach mein Hazrat Buraidah (RA) bhi un ki talash mein nikle the.
Lekin jab un ka Rasulullah ﷺ se saamna hua aur guftagu hui to woh Aap ﷺ ke akhlaaq, sadaqat aur noor-e-nubuwwat se is qadar mutaasir hue ke foran imaan le aaye. Un ke saath un ki qaum ke sattar afraad bhi usi waqt Musalman ho gaye.
Is ke baad Hazrat Buraidah (RA) ne apni pagri utaar kar neze ke saath baandh di, jis ka safed jhanda hawa mein lehra raha tha aur goya yeh khushkhabri de raha tha ke aman ka badshah, sulah ka da'i, aur duniya ko adl-o-insaaf se bhar dene wala tashreef la raha hai.
Hawala: Rahmatul-lil-'Aalameen, Safha 101.