30/05/2025
ৰূপকোঁৱৰৰ মহান অৱদান 'জয়মতী'ৰ পাছৰে পৰা অসমীয়া চলচ্চিত্ৰই বহু বাট অতিক্ৰম কৰি আহি ইতিমধ্যে ৯০ বছৰীয়া বৰ্ণিল পৰিক্ৰমা সম্পন্ন কৰিছে৷ বহু কৃতবিদ্য ব্যক্তিয়ে সমৃদ্ধ কৰিছে অসমীয়া চলচ্চিত্ৰক৷
অসমীয়া চলচ্চিত্ৰ জগতৰ এক সম্ভ্ৰান্ত নাম আমাৰ সকলোৰে শ্ৰদ্ধাৰ মুনিন বৰুৱাদেৱ৷ বহুজনৰ বাবে তেখেত ভাইমন দা৷ বহুকেইখন কালজয়ী অসমীয়া চিনেমা উপহাৰ দিয়া মুনিন বৰুৱাদেৱে চলচ্চিত্ৰ পৰিচালক হিচাপে নিজৰ খ্যাতি কাললৈ অক্ষুণ্ণ ৰখাৰ লগতে অসমৰ সাংস্কৃতিক জগতক দি গৈছে অনন্য উপহাৰ৷ আমাৰ কলেজীয়া দিনত দূৰদৰ্শনযোগে প্ৰচাৰ হোৱা 'পাপু-নিকু সংবাদ' নামৰ জনপ্ৰিয় ধাৰাবাহিকখনৰ যোগেদি তেখেতৰ সৈতে মোৰ সম্পৰ্ক গঢ় লৈ উঠিছিল৷ পৰৱৰ্তী সময়ত চিনেমা জগতৰ বহু বিষয় লৈ তেখেতৰ সৈতে মোৰ যোগাযোগ অব্যাহত আছিল৷
মুনিন বৰুৱাদেৱৰ জীৱনৰ আধাৰত 'ভাইমন দা' শীৰ্ষক চিনেমা এখন নিৰ্মাণ হোৱা বাতৰিয়ে মোক আহ্লাদিত কৰিছিল৷ চিনেমাখনে শেহতীয়াকৈ মুক্তিলাভো কৰিছে৷ ৰাইজে মৰমেৰে আঁকোৱালি লৈছে 'ভাইমন দা'ক৷ আমি আশা ৰাখিছোঁ এই চিনেমাখনে আমাৰ ছবি জগতৰ ইতিহাসৰ এটা টুকুৰা নিশ্চয়কৈ জিলিকাই তুলিব৷ চিনেমাখনৰ লগত জড়িত প্ৰতিগৰাকীকে আন্তৰিক অভিনন্দন আৰু শুভেচ্ছা জ্ঞাপন কৰি শ্রদ্ধাৰ ভাইমন দালৈ শত-সহস্ৰ প্ৰণিপাত জনালোঁ৷
