Students' Education Committee

12/09/2026

《ས་སྐྱ་གོང་མའི་འཁྲུངས་སྐར་བསུ་བ།》
འཇམ་དབྱངས་ཐུགས་ཀྱི་ཡེ་ཤེས་དངོས་སུ་སྣང༌།།
འགྲོ་བའི་འདྲེན་པ་དཔལ་ལྡན་ས་སྐྱ་པ།།
སྐྱེས་ཆེན་དམ་པའི་ཞབས་པད་བརྟན་པ་དང༌།།
འཁྲུངས་སྐར་དུས་ཆེན་བཟང་པོར་བསུ་བ་ཞུ།།
གངས་ཅན་འགྲོ་བའི་བསོད་ནམས་ཞིང་སར་འཁྲུངས།།
ཐུབ་བསྟན་ཡོངས་ཀྱི་མངའ་བདག་ཆེན་པོ་མཆོག།
མཁྱེན་རབ་འོད་ཟེར་ཕྱོགས་བཅུར་འཕྲོ་བ་ཡིས།།
མུན་པ་སེལ་མཛད་བསྟན་པའི་ཉི་མ་ཡིན།།
མངོན་པར་མཐོ་བའི་བྲག་རིའི་ཡང་རྩེ་ནས།།
འབྲུག་ཡུལ་སྤོས་ལྡན་གནས་ཀྱི་ལྷ་ཁང་བཞིན།།
བྱིན་རླབས་གཏེར་ཆེན་འགྲོ་ལ་རྟག་ཏུ་བསྩལ།།
ཞི་བདེའི་འོད་སྣང་ཕྱོགས་མཐར་ཁྱབ་པར་མཛད།།
དགེ་ལེགས་རྒྱ་མཚོའི་དཔལ་ལ་རྟག་རོལ་ཞིང༌།།
སྐུ་ཚེ་བསྐལ་པ་རྒྱ་མཚོར་བརྟན་པ་དང༌།།
རླབས་ཆེན་ཐུགས་ཀྱི་དགོངས་དོན་མཐའ་དག་ཀུན།།
གེགས་མེད་ལྷུན་གྱིས་གྲུབ་པའི་གསོལ་འདེབས་ཞུ།།
བཀྲ་ཤིས་དཔལ་འབར་འཛམ་གླིང་ཡོངས་ལ་ཁྱབ།།
བསྟན་འཛིན་སྐྱེས་བུའི་ཞབས་པད་བརྟན་གྱུར་ཅིག།
འཁྲུངས་སྐར་དུས་སྟོན་དགའ་སྟོན་ཆེན་པོ་འདིས།།
འགྲོ་ཀུན་ཕན་བདེའི་དཔལ་ལ་སྦྱོར་གྱུར་ཅིག།

22/09/2025

ཞི་བ་ལྷས། བསྟོད་པའི་མཆོད་པ་ནི།
ཡོན་ཏན་རྒྱ་མཚོ་རྣམས་ལ་བདག །
བསྟོད་དབྱངས་ཡན་ལག་རྒྱ་མཚོས་བསྟོད།།
བསྟོད་དབྱངས་སྙན་སྤྲིན་དེ་དག་ལ།།
ངེས་པར་ཀུན་ཏུ་འབྱུང་གྱུར་ཅིག །
ཅེས་གསུངས་པ་ལྟར། དཔལ་ས་སྐྱ་མཐོ་སློབ་ཀྱི་དགེ་སློབ་ཡོངས་ནས་མགོན་པོ་གང་ཉིད་ཀྱི་ཡོན་ཏན་རྣམས་ལ་བསྟོད་རྩོམ་གྱི་སྒོ་ནས་འཁྲུངས་སྐར་སྲུང་བརྩིའི་ཆ་ཤས་ཤིག

22/09/2025

༄༅།།དཔལ་༸ས་སྐྱ་པ་ཆེན་པོ་ཁྲི་རབས་ཞེ་གཅིག་པའི་རྟོགས་པ་བརྗོད་པ་ངོ་མཚར་གཏམ་གྱི་རོལ་མོ་ཞེས་བྱ་བ་བཞུགས་སོ།།
གཡུ་མེ་ལྕེ།

​སུམ་རྩེན་བདེ་ཆེན་དཔལ་ལ་འཐུང་བའི་ལྷ་ལས་རྒན་དང་ཐི་གུའི་ལྟོ།།
​སྐབས་གསུམ་མེས་པོའི་རལ་པའི་རྒྱན་དུ་རབ་དམར་ཞབས་སེན་འོད་རིས་རྡུལ།།
​ཉེ་བར་འགོད་མཁས་ལྷ་མིའི་ཁྱུ་མཆོག་བྱང་ཆུབ་སྙིང་པོ་ལུད་པའི་རྫིང་།།
​འདྲེན་པ་མཉམ་མེད་ཉི་མའི་གཉེན་གྱིས་དུས་ཀུན་བདག་ལ་སྲུངས་གྱུར་ཅིག།།

གནམ་སྔོན་འོག་གི་ཉི་མའི་གྲོང་དུ་ཡོན་ཏན་ཕུང་པོའི་དཀྱིལ་འཁོར་རྒྱས།།
མུ་མེད་འཕྲིན་ལས་ཐུགས་རྗེའི་རླུང་གིས་གངས་རིའི་ཁོངས་ལས་རབ་ཏུ་བརྒལ།།
མ་བཅོས་སྙན་འགྱུར་བ་དན་དཀར་པོས་སྲིད་གསུམ་འདར་བར་བྱེད་སྙམ་པའི།།
ཐུབ་དབང་གཉིས་པ་འཇམ་དབྱངས་ས་པཎ་མི་ཕྱེད་དད་པའི་གཙུག་ན་བསྙེན།།

ཞི་བའི་རླབས་ཀྱིས་ཆུ་གཏེར་གཡོ་ལས་སྲིད་ཞིའི་ལང་ཚོ་གཅིག་ཏུ་སྨིན།།
​བེ་ཌཱུའི་རྒྱུད་མང་ཕང་བར་ཁུགས་ལས་ཟག་ཟད་དངོས་པོའི་ཡེ་ཤེས་གྲུབ།།
​སྣ་ཚོགས་ཐབས་ཀྱི་རྣམ་པར་འཕྲུལ་ལས་འགྲོ་མང་རྗེས་ཆགས་མིག་ཡངས་མ།།
​བདག་མགྲིན་འཁོར་ལོར་འབྲལ་བ་མེད་པར་ངག་རིག་སྒོ་མོ་ཕྱེ་ཤིགས་ཀྱེ།།
​
གདོད་ནས་དག་པའི་ལྷ་ཡི་རྫིང་བུའི་མངོན་རྟོགས་འོད་དཀར་བདུད་རྩིའི་རྡུལ།།
​ཀུན་རྟོག་རྙོག་མའི་ཟླ་བས་འཕེལ་བར་རི་བོང་ཅན་གྱི་གཟུགས་བརྙན་འཛིན།།
​རིངས་ནས་གོམས་པའི་བྱིས་བློ་ཞགས་པས་བཟུང་བར་འདོད་པ་འཁྲུལ་ན་ཡང་།།
​སྒྲོ་བསྐུར་དགའ་མ་གྲོགས་སུ་མ་བསྟེན་དད་གསུམ་སོར་མོས་ངལ་བར་བྱས།།

འགྱུར་མེད་བདེ་ཆེན་ཆོས་དབྱིངས་ཁམས་ན་སྲིད་དང་ཞི་བའི་རོལ་རྩེད་སྙོམས།།
​མཚན་རྟོག་ཉེར་ཞིའི་ཡེ་ཤེས་དངོས་པོས་བྱང་ཆུབ་སྙིང་པོའི་བདུད་རྩི་འཐུང་།།
​རབ་དྭངས་སྨོན་ལམ་ཞི་བའི་རླབས་ཕྲེང་འཇིག་རྟེན་དོན་མང་སྒྲུབ་ལ་དཔའ།།
​བསྔགས་འོས་ངོ་མཚར་ཐབས་མཁས་འཕྲུལ་གྱིས་འགྲོ་བའི་གར་དུ་རྣམ་པར་རྩེན།།
​
དམ་པའི་ཡོན་ཏན་བཞིན་བཟང་མ།།
​དད་པའི་སྙིམ་པས་བྱུག་པ་ན།།
​ངག་ཡིད་རྨུགས་འཛིན་དབང་པོ་ཡི།།
​གཏེར་ལ་རོལ་བའི་སྣང་བ་མཛོད།།
​
​རབ་འབྱམས་ཞིང་གི་རྡུལ་གྱི་ཕུང་པོའི་དབུས།།
​མི་མཇེད་ཁམས་ཞེས་རྣམ་པར་སྙན་པའི་དཔྱིད།།
​ཛམྦུའི་ཊི་ཤྲིའི་སྒྲ་ལས་དྲངས་པ་ཡི།།
​དགེ་བའི་ཀུནྡ་བཞད་པའི་ཆོས་ཀྱི་ཚལ།།

​བྱང་ཆུབ་རྡུལ་མང་བརྩེགས་པའི་དབུས་འགྱུར་ནས།།
​དཔག་ཚད་ཡུལ་གྱིས་བསྐལ་བའི་བྱང་གི་ཕྱོགས།།
​ཟླ་ཞུན་དྭངས་མས་བར་མེད་བྱུག་པ་བཞིན།།
​གངས་རིའི་མུ་འཁྱུད་དཔལ་དང་ལྡན་པ་ཉིད།།

​དེ་ཡི་འཛིན་མའི་འགྲམ་པའི་ངོས།།
​གདོང་ལྔའི་བཞིན་གྱི་གཟུགས་འཛིན་ཅིང་།།
​བཀྲ་ཤིས་རི་མོས་མཚན་པ་ཡི།།
​ནོར་ལྡན་འཆི་མེད་གྲོང་ལྟར་ཡོད།།
​
​གྲུབ་རིག་འབུམ་གྱི་ཞལ་ཁྱིམ་ལས།།
​བསྔགས་པའི་རྡུལ་མང་འཛག་པ་ཡི།།
​གསང་འཛིན་གཞལ་ཡས་ཁང་ཆེན་ནི།།
​དཔལ་ལྡན་ས་སྐྱ་ཞེས་སུ་གྲགས།།

​མ་བཅོས་ངོ་མཚར་ཡོན་ཏན་རྔ་།།
​གྲགས་པའི་དབྱུག་གུས་བརྡུང་བ་ན།།
​གྲུབ་དང་རིག་འཛིན་གཙོ་རྣམས་ཀྱང་།།
​དེ་རུ་ཞབས་སྐྱེས་འགོད་ལ་འཚང་།།

​ཡར་ངོའི་ཟླ་བའི་ཚེས་པར་སྒྲུབ་པའི་རི་བོང་འཛིན་གྱིས་ཆུ་གཏེར་འཕེལ།།
​ཀ་ཊུ་བུ་ཡི་གཙུག་ན་རོལ་བའི་འདོད་རྒུའི་གཏེར་གྱིས་རྐང་འོག་རྒྱན།།
​སྤྲིན་གྱི་མེ་ཏོག་མངལ་དུ་སྦྲུམ་པའི་མཁའ་ཡི་གླང་པོས་གནམ་སྔོན་མཛེས།།
​དེ་བཞིན་རིགས་གསུམ་གོང་བུར་ཆགས་པའི་འཛིན་མ་དཀར་པོ་གངས་རིའི་དཔལ།།

​ངོ་མཚར་སྤྲིན་གྱི་རོལ་མོའི་སྒྲ།།
​ཀུན་དགའི་སྙན་དུ་འཁྲོལ་བ་ན།།
​དགེ་ལེགས་ག་བུར་དྭངས་མའི་ཐིགས།།
​གངས་རིའི་ལྟོ་བར་ཡོངས་སུ་བསྐྱིལ།།

​འཛིན་མ་དགེ་བའི་ལང་ཚོ་ནི།།
​དཔལ་ལྡན་ལྷུན་པོ་བཀོད་པའི་ཁམས།།
​གཟུགས་ཅན་ཟོལ་གྱིས་འཕོས་པ་ལ།།
​སུ་ཡིས་བློ་ཡི་དཔྱང་ཐག་འཛིན།།
​
​མཆོད་སྦྱིན་བརྒྱ་པའི་རྩེ་བརྒྱ་འཇིགས་ཡེར་བའི།།
​ཤར་རི་དབང་སོགས་རི་བོ་ཆེན་པོ་དག།།
​རབ་དཀར་གངས་རིའི་མདོག་དང་མཚུངས་པ་ནི།།
​ག་བུར་རྡུལ་མང་བརྩེགས་པའི་ཕུང་པོ་བཞིན།།

​རྣམ་སད་བདུད་རྩིའི་དཔལ་ལ་ཅོ་འདྲི་དྭངས་གཙང་ཁའུའི་གཞོལ་འགྲོ་མ།།
​ཉན་བྱེད་དབང་པོ་དོན་ཡོད་བྱེད་པའི་ཤང་ཤང་དལ་གྱིས་རྒྱུ་བ་ནི།།
​རིན་ཆེན་གསེར་གྱི་དྲྭ་བས་མཛེས་པའི་གཉིས་འཐུང་སྣ་ཞགས་རིང་མོ་ཡིས།།
​རྔུལ་དཀར་དྭངས་མའི་ཁམས་ལས་གྲུབ་པའི་རིན་ཆེན་མཆོད་པ་ཕུལ་དང་མཚུངས།།

​མ་བྲིས་རྩིབ་སྟོང་འཁོར་ལོའི་རི་མོས་གནམ་སྔོན་མཐོངས་ནི་དོག་པར་བྱེད།།
​མ་བརྐོས་རྟགས་བརྒྱད་ལྷ་རྫས་ཤམ་བུས་འཛིན་མའི་དཀྱིལ་འཁོར་རབ་ཏུ་བཀང་།།
​མ་བཅོས་རང་བྱུང་གྲགས་པའི་རོལ་མོས་ཕྱོགས་ཀྱི་ཉན་བྱེད་དོན་ཡོད་བྱེད།།​
​མ་བོས་གྲུབ་རིག་མགྲོན་དུ་ཁུགས་པའི་མི་དགེ་བསྐྱུང་བའི་ཁོར་ཡུག་ཅན།།

​གནམ་བསྐོས་ཁ་བའི་འགྲན་མེད་རྨིག་པའི་རྡུལ་།།​
​བཙན་པོའི་སྙིང་སྟོབས་དཔུང་གིས་དྲངས་པ་ན།།
​སུམ་གཉིས་ནོར་ལྡན་སྒེག་མོ་དབང་ཟ་བའི་།།
​མེས་པོའི་དབུ་འཕང་ལྷུན་པོའི་སྤོ་ལས་མཐོ།།

​འོན་ཏང་མཐུ་མྱུར་ཡིད་སྲུབ་སྦར་མོའི་ཁྱིམ།།
​རིང་མིན་གངས་ཀྱི་རི་ལ་སྤར་བ་ན།།
​ཆོས་སྲིད་འོད་དཀར་ཉི་ཟླའི་སྣང་བའི་གཟི།།
​ནུབ་ཕྱོགས་ཆུ་ལྷའི་ཕང་བར་གཟིམ་པར་ཆས།།

​དེ་ཚེ་མིག་སྨན་ལྟར་གནག་ཆོས་མིན་རི་བོའི་རྐང་།།
​མཐར་བྱེད་ཆོས་མིག་ཆོས་སྦྱིན་རྩེ་བརྒྱས་བཅགས་པ་ན།།
​མཛད་མེད་འཕྲུལ་གྱི་ཆོས་སྲིད་དཔལ་གྱི་འོད་རྒུ་ཆེར།།
​སླར་ཡང་ངོ་མཚར་ཆུ་གཏེར་གསར་པ་འདི་ནས་འཔེལ།།

​སྔོན་ཚེ་ཐུབ་དབང་གཉིས་པ་མཚོ་སྐྱེས་རྗེས།།
​བསླུ་མེད་གསུང་གི་དབྱུགས་དབྱུང་བསྩལ་བ་བཞིན།།
​བྷོ་ཊའི་དབུས་འགྱུར་དཔལ་ལྡན་ས་སྐྱ་ནི།།
​གངས་རིའི་ཕན་བདེ་བཞད་པའི་རྩ་ལག་མཆོག།།

གང་གི་ཡེ་ཤེས་བདེ་འཐུང་སྣང་བས་མ་འདྲེས་དངོས་ཁམས་གཟུགས་བརྒྱར་གསལ་བའི་ཀུན་གསལ་སྒེག་མོའི་མེ་ལོང་བཞིན།།
འགྲོ་བའི་ཡིད་ཀྱི་ངལ་གསོ་ཐོབ་མཛད་རླབས་ཆེན་སྙིང་སྟོབས་ཟློས་གར་སྒྱུ་འཕྲུལ་ཡིད་འོང་ལུས་ཕྲའི་འཇོ་སྒེག་བཞིན།།
རིང་མོ་ཉིད་ནས་རྒྱལ་སྲས་སྤྱོད་པའི་གྲུ་ཆེན་ཞུགས་ཏེ་རབ་མང་གདུལ་བྱ་གླིང་བཞིའི་དབུས་ན་ཐབས་ལ་མཁས་པའི་དེད་དཔོན་བཞིན།།
རྣམ་དཀར་གྲགས་པའི་སྙན་འགྱུར་རོལ་མོ་དབྱངས་བདུན་དང་འགྲོགས་གཙུག་ཕུད་དགའ་བའི་འབྲུག་སྒྲའི་ཟོལ་གྱིས་དུས་ཀུན་རྒྱུ།།

དཔལ་༸ས་སྐྱ་པ་ཆེན་པོ་ཁྲི་རབས་ཞེ་གཅིག་པའི་རྟོགས་པ་བརྗོད་པ་ངོ་མཚར་གཏམ་གྱི་རོལ་མོ་ལས་གནས་ཀྱི་རྒྱུ་ཕུན་སུམ་ཚོགས་པར་བསྟན་པའི་གཏམ་གྱི་སརྒ་དང་པོའོ།།


​རབ་འབྱམས་བདེ་གཤེགས་ཉི་མའི་བསྟན་པ་ནི།།
​ཡིད་སྲུབ་མཐོ་རིས་གསལ་གྱིས་མཐར་གཏུགས་ཀྱང་།།
​རྒྱལ་སྲས་ཕྱོགས་ཀྱི་མཐར་བྱེད་འོད་པོ་ཆེ།།
​སྙིང་སྟོབས་ཁྱུང་སྔོན་སྐྱེས་མས་དྲངས་པ་བྱེད།།
​
​ངག་དབང་ཀུན་གསལ་དགའ་མའི་རྗེས་སོང་བའི།།
​ཐེག་ཆེན་བདུད་རྩིའི་འོད་དཀར་དཔལ་འབར་གཟིས།།
​ངོ་མཚར་འཕྲིན་ལས་ཆུ་གཏེར་གསར་པ་ལས།།
​བསམ་འཕེལ་དབང་གི་རྒྱལ་པོ་འདི་ནས་འཛུམ།།

​བྱང་གི་ཐུབ་བསྟན་ས་འཛིན་ལྷུན།།
​ངན་འཐུང་ཆུ་གཏེར་གྱིས་གཡོགས་པས།།
​ཁྱོད་ཀྱི་སྙིང་སྟོབས་ར་ཡིག་དཔུང་།།
​ཚོགས་བཅས་འཕྲེང་བར་འཛིན་པར་བྱེད།།

​དེ་ཚེ་དམ་པ་ཀུན་མཐུན་པའི།།
​གཟིགས་པ་ལྔ་རུ་ཉེར་གཟིགས་ཏེ།།
​གསང་འཛིན་དཔལ་ལྡན་ས་སྐྱ་རུ།།
​དགེ་ལེགས་སྟོང་གི་རོལ་མོ་བསྒྲགས།།

​ཁྱད་པར་ལྷ་རིགས་འཁོན་གྱི་གདུང་།།
​རྒྱུད་པ་གསེར་རིའི་ཕྲེང་བ་ནི།།
​གངས་ཅན་བསོད་ནམས་འཇུག་ངོགས་ཕྱིར།།
​ཁྱོད་ཀྱི་ཡིད་ལ་ཤིན་ཏུ་མོས།།

​དེ་དུས་གསང་ཆེན་འོག་མིན་གཉིས་པ་རུ།།
​རྡོར་འཛིན་གཙུག་རྒྱན་ཀུན་དགའ་རིན་ཆེན་ཉིད།།
​ས་སྐྱོང་རིགས་ཀྱི་ཅོད་པན་བཞིན་དུ་ནི།།
​ཐུབ་དབང་བསྟན་པའི་མེལ་ཆེར་བརྩོན་བཞིན་བཞུགས།།

​དེ་ལ་ལྷ་ལྡན་རྒྱལ་ཁབ་ཆེན་པོ་ཡི།།
​བོན་གྲོང་ཤོད་ཞེས་མདུན་ན་འདོན་ཆེན་པོའི།།
​རིགས་མྱུག་བསོད་ནམས་སྒྲོལ་མ་དཀར་མོ་དེ།།
​པདྨའི་ལང་ཚོ་རྒྱས་པ་བཞིན་དུ་ཡོད།།
​
​དེ་ཚེ་དེ་ཡི་མཛེས་སྡུག་ངང་མོའི་གདོང་།།
ལེགས་བསྐོས་སྟོབས་ཀྱིས་མགྲོན་དུ་ཁུགས་པ་ན།།
​གཞན་དོན་རྗེས་ཆགས་འོད་ཀྱི་རྩེ་འགའ་ནི།།
​སྦྲང་རྩི་སྤྱོད་པའི་བརྟུལ་ཞུགས་འཛིན་པར་བྱེད།།

​འོན་ཏང་ཐུབ་བསྟན་ཉིན་མོའི་རྡུལ།།
​ནུབ་ཀྱི་ཐུན་མཚམས་འཛིན་ཉེ་བས།།
​རྒྱལ་སྲས་ཉི་གཞོན་འཆར་ཀའི་འོད།།
​དབང་ཕྱོགས་རྩེ་ནས་འཆར་བར་དཀའ།།

​དེ་ཚེ་སྔགས་འཆང་ཐུབ་པའི་དབང་།།
​གདུལ་བྱའི་འཁོར་ཚོགས་གྱིས་བསྐོར་ཏེ།།
​རེ་ཞིག་གསང་འཛིན་དབུས་འགྱུར་ནས།།
​ཕྱོགས་ཀྱི་བྱིན་ཅན་ནགས་སུ་བྱོན།།

​ཁྱད་པར་ལྷ་ལྡན་ཉི་མའི་བྱང་གི་ཕྱོགས།།
​འཕགས་ཡུལ་ལྟེང་རྒྱས་ཚལ་ལ་འགྲན་པ་ཡི།།
​མ་ཕམ་ཆོས་ཀྱི་མདུན་དང་མི་གཉིས་པའི།།
​འཕན་ཡུལ་རྒྱུན་གྱི་དབང་པོར་ཞབས་སྐྱེས་བཀོད།།

​བསྟན་འཛིན་ཆེན་པོ་གཟིམ་ཁང་གོང་འོག་སོགས།།
​ཆོས་གྲྭ་ཆེ་དེའི་འདུས་ཚོགས་ལི་ཁྲི་ཡིས།།
​སྣ་ཚོགས་སྒྲུབ་པའི་ཆོ་ག་དུ་མས་ཀྱང་།།
​འཁོན་གདུང་སྤེལ་བའི་ཐབས་ཚུལ་མང་དུ་མཛད།།

​ཁྱད་པར་ལས་བཞིའི་འཕྲིན་ལས་བསྒྲུབ་པ་ལ།།
​ལྷ་སྔགས་ཏིང་ངེ་འཛིན་གྱི་མཐུ་གྲུབ་པའི།།
​ངག་དབང་བློ་གྲོས་རིན་ཆེན་ནོར་གྱི་སྡེ།།
​འཁྲུལ་མེད་ཆོ་ག་སྐྱོང་བའི་གྲོགས་སུ་བརྫངས།།

​དབང་འབྱོར་དྲང་སྲོང་ཆེན་པོ་དེ་ཉིད་ཀྱིས།།
​རྣམ་དག་ཐབས་འཕྲུལ་དཀའ་ཐུབ་མང་བསྟེན་པས།།
​སྲིད་པའི་ཁམས་ཀྱི་ལྷ་ཆེན་རབ་བརྙེས་ཏེ།།
​བྱེད་པ་ཛ་ཧུའི་བུ་མོ་མངལ་དུ་བསྐྱིལ།།

​དེ་ནས་མི་རིང་གདན་ས་འོག་མ་སྟེ།།
​རྩེ་གདོང་ཆོས་སྡེ་སྲིད་གསུམ་རྣམ་རྒྱལ་དུ།།
​ཆུ་སྟོད་ཟླ་བའི་དཀར་ཕྱོགས་དང་པོ་ལ།།
​ཡུམ་ལ་མྱ་ངན་མེད་པ་བདེ་བར་བལྟམས།།

​དེ་འཕྲལ་ཤེས་རབ་རིལ་བུ་འབུལ་བ་དང་།།
​བདུད་རྩིས་ལྗགས་ལ་དྷི་ཡིག་བྲི་བ་སོགས།།
​ཇི་ལྟར་ཤེས་རབ་འཕེལ་བའི་ཆོ་ག་ནི།།
​དམ་པའི་སྲོལ་བཟང་འཕྱུག་པ་མེད་པར་མཛད།།

​གཞན་ཡང་འབྲི་བརྒྱའི་འོ་མས་མཆོད་པ་དང་།།
​ཕྱོགས་ཀུན་བརྒྱ་བྱིན་གཞུ་ཡིས་བཀང་བ་སོགས།།
​ངོ་མཚར་སྟོང་གི་བཀྲ་ཤིས་རེ་ཁ་ཡིས།།
དམ་པའི་རང་རྟགས་དུ་མ་ལྷུན་གྱིས་གྲུབ།།
​
ཡབ་རྗེ་སྔགས་འཆང་ཆེན་པོ་རབ་དགྱེས་ཏེ།།
​གསང་གསུམ་ལང་ཚོ་རྟག་བརྟན་སྦྲུམ་པའི་སླད།།
​རིང་འཚོའི་འཆི་མེད་ཚེ་ཡིས་སྨིན་པ་དང་།།
​ཨ་ཡུ་བཛྲའི་མཚན་གྱི་ཅོད་པན་གནང་།།

​ཉིན་མོའི་ཕྲེང་བ་རིང་མོ་ནི།།
​བདུན་གྱིས་གྲངས་ལ་ཟོས་པའི་ཚེ།།
​གསང་རྒྱ་བཀྲོལ་བའི་སྤྲིན་གྱི་སྒྲས།།
​ཕྱོགས་ཀྱི་གདོང་མཐའ་དགའ་བར་བྱས།།

​དེ་ནས་ནོར་བུ་ལེན་དུ་རྒྱ་མཚོའི་གླིང་ཕྱིན་པའི།།
​དོན་མཐུན་མཉན་པའི་ཚོགས་དག་ཡིད་རབ་དགའ་བ་ཡིས།།
​རིན་བྲལ་རིན་ཆེན་ཟོང་ནི་སྣ་ཚོགས་ཐོགས་བྱས་ཏེ།།
​བདེ་བའི་ངང་དུ་རང་ཡུལ་ལོག་ལ་བྲེལ་དང་མཚུངས།།

​སྤྲིན་གྱི་རོལ་མོའི་འཁྲུན་སྒྲ་འབྱིན་པའི་མཁའ་གླང་དག་ནི་དལ་གྱིས་རྒྱུ།།
​ཁུ་བྱུག་མགྲིན་པས་སད་པར་བྱས་པའི་ལྗོན་པའི་མགོ་བོས་ཀུན་ནས་དུད།།
​སྐེད་མེད་གཡོན་མས་ཐགས་སུ་འཐག་འདྲའི་འཇིག་རྟེན་ལྗང་མདོག་གྱུར་པའི་དུས།།
​ཁྱོད་ཀྱི་ཞབས་སྐྱེས་འོད་རྡུལ་དཀར་པོ་དབུས་འགྱུར་ཚལ་དུ་ཐོག་མར་བཀོད།།

​དེ་ཚེ་གདུག་དང་རྒྱལ་མཚན་སོགས།།
​ལྷ་རྫས་མཆོད་པའི་ཡོ་བྱད་ཀྱིས།།
​མདུན་ནས་བདར་བའི་སེར་སྦྲེང་ཡིས།།
​གང་སྐུ་ཉི་གཞོན་བསུ་བ་མཛད།།

​ལྷ་རྣམས་དགའ་བའི་གར་གྱིས་བྲེལ།།
​དད་པའི་མཆི་མ་འབྱིན་པ་ཡི།།
​སྐྱེ་བོའི་ཚོགས་ཀྱང་དཔག་མེད་ཀྱི།།
​བསྐལ་བཟང་མིག་གི་དགའ་སྟོན་གྱུར།།

དཔལ་༸ས་སྐྱ་པ་ཆེན་པོ་ཁྲི་རབས་ཞེ་གཅིག་པའི་རྟོགས་པ་བརྗོད་པ་ངོ་མཚར་གཏམ་གྱི་རོལ་མོ་ལས་སྐུ་ཡི་སྲིད་པ་ཇི་ལྟར་བཟུང་བའི་ཚུལ་ཕུན་སུམ་ཚོགས་པར་བསྟན་པའི་གཏམ་གྱི་སརྒ་གཉིས་པའོ།།

​ལང་ཚོའི་ཟླ་ཚེས་ཆེས་ཕྲ་ཡང་།།
​བློ་གྲོས་འདབ་མ་གྲོལ་བ་ནི།།
​ཆོས་རྗེ་ཐུབ་བསྟན་ཉི་མ་ཡི།།
​རྣམ་པར་ཐར་དང་མཚུངས་པར་གྱུར།།

​རྡོར་འཛིན་ཀུན་དགའ་རིན་ཆེན་གྱིས།།
​ཡབ་ཆོས་ཕུར་པའི་དཀྱིལ་འཁོར་གྱི།།
​དབང་བསྐུར་ཆེན་པོར་བཅུག་པ་ན།།
​ཕྱི་ནང་གེགས་བར་མཚན་མ་ཞི།།
​
​གཞན་ཡང་རྒྱུད་སྡེ་བཞི་ལ་སོགས།།
​སྨིན་གྲོལ་ལམ་བཟང་ཟབ་མོའི་བཅུད།།
​མངོན་པར་སྤྱོད་པའི་བདུད་རྩི་ཡི།།
​གཏེར་ལ་རོལ་བའི་སྐལ་བ་བཟང་།།

​ཡེ་ཤེས་དངོས་ཞུགས་ལྷག་པའི་ལྷ།།
​འཇམ་དབྱངས་གཟི་འོད་འབར་བའི་དྲུང་།།
​བསླབ་པའི་གནས་ཀྱི་དང་པོ་ཡི།།
​ཀ་མད་གསེར་གྱི་མདོག་ཅན་འཐུང་།།

​རིག་པའི་དཔལ་གོས་འཛིན་པ་ཡི།།
​གནས་སློབ་ཀུན་དགའི་མཚན་ཅན་གྱིས།།
​མཛད་རྒྱ་དཔག་བསམ་འཁྲི་ཤིང་ལས།།
​ཐུབ་པའི་བརྟུལ་ཞུགས་བསྟན་པ་མཛད།།

​གུས་རྟག་བརྟུན་པ་ནམ་ཡང་མ་ལྷོད་པས།།
​རྣམ་དཔྱོད་ཆུ་གཏེར་འཕེལ་བའི་ངང་ཚུལ་ལ།།
​བཤེས་གཉེན་ངང་མོ་ཚོགས་ཀུན་ཡིད་མགུ་ཞིང་།།​
​དད་པའི་རླབས་ཕྲེང་ཀྱང་ནི་ཆེས་ཆེར་འཕེལ།།

​དེ་ནས་མཁན་ཆེན་འཇམ་དཔལ་མཚན་ཅན་གྱིས།།
​ཚད་མེད་ཐུགས་རྗེའི་རླུང་གིས་བསྐུལ་བ་ལས།།
​སྐུ་མཆོག་གཞོན་ནུའི་ཞབས་སྐྱེས་ངང་མོ་ཟུང་།།
​ཐབས་སྟོང་གཉིས་མཆོག་ཨེ་ཝཾ་གདན་སར་བཀོད།།
​
​གང་སྐུ་དཀར་བ་འཛུམ་གྱིས་དཀར་བས་གངས་རིའི་ལང་ཚོར་སྙེམས་པ་བྱེད།།
​གང་གསུང་སྙན་པ་དབྱངས་ཀྱིས་སྙན་པས་རྒྱུད་མང་སྒྲ་ལ་འཕྱ་བར་བྱེད།།
​གང་ཐུགས་ཡངས་པ་ཆོས་ཀྱིས་ཡངས་པས་གནམ་སྔོན་མཐོང་ཡང་ཕམ་པར་བྱེད།།
​མ་ལུས་ཡོན་ཏན་བང་མཛོད་གཅིག་པུ་ཁང་གསར་དམ་པ་རྡོ་རྗེ་འཆང་།།

​དེ་ཡི་ཡོན་ཏན་ཕུང་པོའི་རྡུལ།།
​མིག་གི་བདུད་རྩིར་གྱུར་པ་ན།།
​དད་གདུང་སྤྲིན་གྱི་རོལ་མོའི་སྒྲས།།
​མདོངས་མཐའི་དགའ་བ་ཕམ་པར་བྱེད།།

​དུས་ཀྱི་རིང་མོ་ཉིད་དུ་ནི།།
​དབུ་ལ་ཕོག་པའི་མེ་ཏོག་རྡུལ།།
​ཁྱོད་ཀྱི་ཡིད་ལ་ལྷུང་བ་ན།།
​དད་པའི་བྲག་རི་མི་ཤིགས་གྱུར།།

​གྲོ་བཞིན་ཟླ་བའི་བཅུ་བཞི་ལ།།
​བིར་ཝའི་མ་དྲོས་ཐུགས་མཚོ་ལས།།
​ཆད་མེད་ཛ་ཧཱུ་བུ་མོའི་རྒྱུན།།
​མ་ལུས་ཐུགས་ཀྱི་དཀྱིལ་དུ་བསྐྱིལ།།

​དེ་ཚེ་རྒྱལ་ཀུན་དགོངས་པའི་དཔྱིད།།
​གྲུབ་དང་རིག་འཛིན་འཇུག་པའི་ངོགས།།
​སླར་ཡང་རྫོགས་ལྡན་གསར་པ་རུ།།
​བསྐྱལ་བའི་ཉིན་མོར་འཛུམ་པར་གྱུར།།

​རྗེ་བཙུན་ཐུགས་རྗེ་ཆེན་པོ་ཡི།།
​འགྲམ་པར་ཆགས་པའི་མདོ་རྒྱུད་རྡུལ།།
​ཞལ་སྐྱེས་གསར་པས་ངོམ་མེད་དུ།།
​བཏུང་བའི་སྐལ་བ་རབ་ཏུ་སྦོམ།།

​དེ་ནས་ཉི་མ་བྱང་གི་ཕྱོགས།།
​བསྡུ་བའི་དངོས་པོ་བསྟབས་བཞིན་དུ།།
​གངས་རིའི་ཆོས་སྲིད་དཔལ་གྱི་ཞིང་།།
​ཉི་མའི་གྲོང་གི་མགྲོན་དུ་ལྷགས།།

​གཞུང་ས་དགའ་བ་བརྒྱ་ལྡན་དུ།།
​སྙན་གྱི་ཕྱོགས་སུ་སྒྲོན་པ་ན།།
​གསེར་ཞལ་ཟླ་བའི་འོད་པོ་ཆེས།།
​ཡིད་ལ་བདེ་བའི་བསིལ་ཟེར་རྒྱས།།

​དེ་ནས་གནམ་བསྐོས་བཀའ་ལུང་བཞིན།།
​གདན་སའི་ཆོས་ཀྱི་ཁྲི་འཕང་དུ།།
​ལུགས་གཉིས་དགའ་སྟོན་གཉེར་བ་ཡི།།
​སྐལ་བཟང་ཁུར་གྱིས་རབ་ཏུ་ལྕི།།

​དངོས་གྲུབ་བདུད་རྩི་གྲུབ་པའི་གནས།།
​བྱིན་རླབས་བསིལ་ཡབ་གཡོ་བ་ཡི།།
​ངོ་མཚར་འབར་བའི་བབས་སྟེགས་སུ།།
​དཀའ་ཐུབ་འཁྲུལ་གྱི་ཞགས་པས་དྲངས།།

​གངས་ཅན་དཔལ་གྱི་དུམ་བུའི་ཁྲོད།།
​བཞུགས་པའི་ཆོས་ཚུལ་ངང་མོའི་གདོང་།།
​ཡིད་ཀྱི་ཞགས་པས་བཟུང་བའི་དོན།།
​ཁོར་ཡུག་རི་བོའི་ཁོངས་སུ་རྒྱུ།།

​མིག་འགྱེད་ཟླ་བའི་འོད་ལྡན་ཉིན།།
​གསང་འཛིན་ཆས་གོས་ཨ་དར་ཤ།།
​སྐུ་ལ་གསོལ་བའི་སྣང་བ་ནི།།
​མཚམས་སྤྲིན་གསར་པའི་མདངས་སུ་འཛིན།།

​པཎ་ཆེན་སྣང་བ་མཐའ་ཡས་ཀྱི།།
​མངའ་གསོལ་བཀྲ་ཤིས་དུས་ཚིགས་ལ།།
​རྟེན་འབྲེལ་ཞུ་བའི་སྦྲང་རྩིའི་གླུས།།
​མཁས་རྒུས་ཅོད་པཎ་ས་ལ་ལྷུང་།།

​དེ་ནས་གངས་རིའི་རྒུད་པའི་དཔུང་།།
​རིག་པའི་ཞོ་འཐུང་རུས་པ་ཡིས།།
​མཐར་བྱེད་བྱང་ཕྱོགས་ལྟེང་རྒྱས་ཚལ།།
​ཆོས་ཀྱི་ཁྲི་འཕང་འཕགས་ལ་ཉེ།།

​ལང་ཚོའི་འཁྲི་ཤིང་དར་ལ་བབས།།
​ཆོས་སྲིད་དཔལ་གོས་འདབ་མ་ལྕི།།
​འཁོན་རིགས་གདོང་ལྔའི་དབང་པོ་ཉིད།།
​ཆོས་ཁྲི་གངས་རིའི་སྤོ་ལ་འཛེགས།།

​དེ་ཚེ་ཆོས་ཀྱི་གནྜི་སྒྲ་བོ་ཆེ།།
​ཀུན་གྱི་སྙན་དུ་དལ་བུས་བརྡུང་བ་ན།།
​ཡུན་རིང་མུན་པའི་ཁུང་བུར་ཉལ་བ་ཡི།།
​བྲང་འགྲོའི་ཚོགས་ཀྱང་ཡིད་རབ་མགུ།།

ད་དུང་ཁྱོན་ཡོན་གངས་རི་ལྷུན་པོའི་དཔལ།།
སྲིད་འདིའི་ཀུན་བཟོད་སྒེག་མོས་ཐེག་པ་ལ།།
རྣམ་སད་དག་ནི་རབ་ཏུ་ངོ་མཚར་འཛིན།།
མདའ་ལྔའི་ཚོགས་ནི་སྨྲ་བ་མེད་པར་གྱུར།།


དཔལ་༸ས་སྐྱ་པ་ཆེན་པོ་ཁྲི་རབས་ཞེ་གཅིག་པའི་རྟོགས་པ་བརྗོད་པ་ངོ་མཚར་གཏམ་གྱི་རོལ་མོ་ལས་གསན་བསམ་གྱི་རྒྱུ་ཕུན་སུམ་ཚོགས་པར་བསྟན་པའི་གཏམ་གྱི་གསུམ་པའོ།།

དུས་ཀྱི་མེ་ལྕེ་རྒོད་མའི་ཁ།།
​བསྲེག་བྱེད་དཔལ་དུ་སོང་བ་ན།།
​གངས་རིའི་ཆུ་རྡུལ་ནགས་མའི་ཚལ།།
​ཁ་ཡི་རྔུལ་ཆུ་འཛགས་པར་བྱེད།།

​འོད་ལྡན་ཁ་བ་རི་བོའི་ཚོགས།།
​མུན་པའི་ཐུན་མཚམས་འཛིན་ཉེ་བས།།
​གཉན་པོ་བཀའ་ཡི་ལུང་བཞིན་དུ།།
​འཆར་ཀའི་དུས་ཀྱི་རྗེས་སུ་སོང་།།

​དོན་མཐུན་སྟོན་འཁོར་ཞབས་འབྲིང་བཅས།།
​ཕྱོགས་ཀྱི་མགྲོན་དུ་ལྷགས་པ་ན།།
​ཞབས་ཀྱི་བབས་སྟེགས་གསར་པ་ནི།།
​ལ་ཆེན་གྲོང་གི་རྩེ་ལ་བཀོད།།
​
​འདོད་པ་ཟླ་བ་དྲུག་པའི་ཉིན།།
​འཇམ་མགོན་ཆོས་བློ་ཉིན་མོར་བྱེད།།
​ནུབ་རིའི་ཕང་བར་གཤེགས་པའི་ཚེ།།
​དགོངས་རྫོགས་མཆོད་པའི་སྤྲིན་ཕུང་བཏེགས།།

​བཟློག་མེད་དུས་ཀྱི་རླུང་ཤུགས་ཀྱིས།།
​ཆོས་སྲིད་འཁྲི་ཤིང་གཡོས་གྱུར་ཀྱང་།།
​ཞུམ་མེད་སྙིང་གི་སྟོབས་ཤུགས་ནི།།
​ལྷག་པར་བསྐྱེད་པའི་དུས་སུ་གཟིགས།།
​
​བྱེ་མའི་ཐང་དུ་འགྲེང་བ་བཞིན།།
​གདན་སའི་རིག་གྲོལ་གསེར་མིག་ཚོགས།།
​ངལ་བའི་འཁུན་སྒྲ་མ་བཟོད་པར།།
​རྫིང་བུ་གསར་པའི་བྱ་སྐྱིབས་བསྐྲུན།།

​བདག་ཉིད་ཆེན་པོ་ས་པཎ་གྱིས།།
​རྒྱ་མཚོ་ཆུ་ཡིས་མི་ངོམ་བཞིན།།
​མཁས་པ་ལེགས་བཤད་ཀྱིས་མི་ངོམ།།
​གསུངས་པའི་རྣམ་ཐར་འདི་ལྟར་འཛིན།།


ཇི་ལྟ་ཇི་སྙེད་ཆོས་ཀྱི་འཇུག་ངོགས་གསུང་རབ་རིན་ཆེན་མཛོད་ཀྱི་སྒོ་གླེགས་ནི།།
རིག་པའི་ངང་མོ་ཡིད་ཀྱི་རླབས་ལ་རྣམ་པར་རྩེན་པའི་དམ་པའི་དབྱུག་གུས་བརྡུང་བ་ན།།
རྣམ་འབྱེད་ཤེས་རབ་ཀེ་ཏ་ཀ་ཡིས་གཟུགས་ཅན་བཞིན་དུ་ཡིད་ནི་ཕྱུར་བུ་རུ།།
གཏམས་པའི་ཡོན་ཏན་འོད་དཀར་རྡུལ་གྱིས་ཡིན་མིན་དག་ནི་སོ་སོར་གསལ་བར་འགྱེད་པ་ནུས།།

​དེ་ཕྱིར་རིག་པའི་ལང་ཚོ་ཡིས།།
​སྙེམས་པའི་རྒོལ་བ་འབུམ་ཕྲག་གི།།
​སྤོབས་པའི་མྱོས་བུམ་དབྲལ་མཛད་པའི།།
​ཨ་དང་རཏྞའི་མཚན་ཅན་བསྟེན།།


​དེས་ཀྱང་རྒྱལ་བའི་ཆོས་ཚུལ་རི་བོང་འཛིན།།
​དྲི་མེད་ཡིད་ཀྱི་རྫིང་བུར་བཟུང་བ་ལ།།
​ཐབས་འཕྲུལ་ནོར་བུའི་རྔ་ཡབ་གསར་པ་ཡི།།
​གཞུང་ལུགས་རིན་ཆེན་ཞགས་པ་ཕྱག་ཏུ་གཏད།།

ཁྱོད་ཀྱི་སྐྱེས་སྦྱང་ཤེས་རབ་གཉིས་འཐུང་སྣས། །
ཆོས་ཚུལ་སྤོས་དཀར་འཁྲི་ཤིང་རེག་ཙམ་གྱིས། །
འཇིགས་མེད་རྣམ་དཔྱོད་ལག་ལྡན་སྟོབས་འཆང་ཚེ།།
མཁས་སྙེམས་གདོང་ལྔ་དག་ཀྱང་ཕྱི་ཕྱིར་འགྲོས།།

དོན་མཐུན་ཀུན་གྱིས་ཡིད་རེ་བཞིན།།
​ཆོས་སྲིད་སྣང་གཏེར་གཞི་གསར་པ།།
​ནོར་ལྡན་དཔལ་གྱི་དུམ་བུ་ཞིག།།
​ཐབས་ཤེས་གནམ་རུ་བཀང་ལ་བྲེལ།།

​དེ་དོན་གསེར་གྱི་དྲིལ་ཆུང་དེ།།
​གཞུང་སའི་སྙན་དུ་ཁྲོལ་བའི་ཚེ།།
​མཐུ་དཔུང་གྲོགས་དན་རྡོ་རྗེ་ཡི།།
​བྲག་བཞིན་བརྟན་པའི་བཀའ་ལུང་ཕེབས།།

​དེ་ནས་འཕགས་ཡུལ་བྱང་གི་ཆར།།
​ས་འཛིན་གསེར་རི་ཕྲེང་བའི་འགྲམ།།
​ལོ་ལེགས་ཡུལ་ཕྱོགས་དགེ་བའི་སར།།
​ཆོས་སྲིད་གནས་གཞི་གསར་པ་ཚུགས།།

​ལྷག་བསམ་ཤར་རིའི་ཕྲག་པ་ནས།།
​སྙིང་སྟོབས་འོད་དཀར་ཅན་གྱི་གཟིས།།
​ལུགས་གཉིས་ཆུ་གཏེར་གསར་པ་ཡིས།།
​ཀུན་ལ་ངལ་གསོའི་གོ་སྐབས་ཐོབ།།

​སྔོན་ཚེ་ཐུབ་དབང་ཉི་མས་ཐོག་མ་རུ།།
​དམ་ཆོས་བདུད་རྩི་བསྟན་པའི་གནས་ཀྱི་མཆོག །
​དྲང་སྲོང་ལྷུང་བའི་ནགས་ཀྱི་དགའ་ཚལ་དུ།།
​བིར་ཝའི་ཐུགས་བཅུད་ཐོག་མར་སྤྲོ་བར་མཛད།།

​དེ་ཚེ་དད་ལྡན་མདངས་མཐའི་ཚོགས།།
​དགའ་བའི་གར་གྱིས་རབ་མྱོས་ཞིང་།།
​གང་གི་སྙན་པའི་རོལ་མོ་ཡང་།།
​ཕྱོགས་ཀྱི་བུ་མོའི་རྒྱན་དུ་སོང་།།

​དེང་སང་གངས་རིའི་ཁོར་ཡུག་ཏུ།།
​རྒྱུད་དང་མན་ངག་བཞུགས་སོ་ཅོག།།
​ཕལ་ཆེར་ཁྱེད་ཐུགས་གནས་པ་ཀྱང་།།
​ཆེ་རྒུའི་རིགས་ཀྱི་ཅོད་པཎ་གྱུར།།
​
​རིགས་ཀྱི་ས་བོན་རྣམ་སད་ཡུལ་ནས་བབས།།
​རུས་གྱི་གཉེན་མཚན་འཁོན་གྱི་གདུང་ལས་མཆེད།།
​ལང་ཚོའི་མེ་ཏོག་འཇམ་དཔལ་མི་གཟུགས་ཅན།།
​ཆེ་བ་གསུམ་ལྡན་གདུང་འདིར་སྤེལ་བར་བསྐུལ།

​དེ་ནས་དགའ་བཞིའི་རྩེ་དགའ་རོལ་བའི་སླད།།
​བཀྲ་ཤིས་ལྷ་སྐྱིད་ཞེས་བྱའི་རིགས་བཟང་མ།།
​མཚན་ཉིད་ཀུན་ལྡན་པདྨའི་ལང་ཚོ་ཅན།།
​འགྲམ་ཆང་བདུད་རྩིའི་སྐྱེས་སུ་དྲངས་པར་མཛད།།

​མི་རིང་བཀུར་འོས་འཁོན་གྱི་རིགས།།
​འཆང་བའི་མཚན་མཆོག་གསུམ་ལྡན་གྱི།།
​རིགས་མྱུག་མིག་གི་གྲངས་འཛིན་པ།།
​སྤེལ་བའི་བཀའ་དྲིན་བླ་ན་མཐོ།།

དཔལ་༸ས་སྐྱ་པ་ཆེན་པོ་ཁྲི་རབས་ཞེ་གཅིག་པའི་རྟོགས་པ་བརྗོད་པ་ངོ་མཚར་གཏམ་གྱི་རོལ་མོ་ལས་འཕགས་ཡུལ་དུ་ཆིབས་ཀྱི་ཁ་ལོ་བསྒྱུར་ཏེ་ལུགས་གཉིས་ཀྱི་འཕྲིན་ལས་སྤེལ་བའི་གཏམ་གྱི་སརྒ་བཞི་པའོ།།

​རིགས་ཀུན་བདག་པོ་འཇིག་རྟེན་མེས་པོའི་ཞབས་སྐྱེས་འོད་ཆགས་གསར་པའི་རྡུལ།།
​མཉེས་བྱེད་དཀའ་ཐུབ་སྐལ་ལྡན་ཤིང་རྟས་དུས་ཀྱི་རིང་མོར་གཏུགས་པ་ན།།
​བགྲང་ཡས་ཆོས་ཚུལ་གངྒའི་ཆུ་རྒྱུན་ཡིད་ཁམས་རྒྱ་མཚོའི་གོས་ཅན་གཞིར།།
​བཀྲ་ཤིས་རེ་ཁའི་དགེ་མཚན་འབུམ་བཅས་ལུས་པ་མེད་པར་ཡོངས་སུ་འཁྱིལ།།

ཆགས་མེད་རབ་ཡངས་བློ་གྲོས་སྦྲང་རྩི་འཛིན་གྱི་བརྟུལ་ཞུགས་སྤྱོད་པས་ཡོན་ཏན་དཔལ་གོས་ཚལ་ལ་འཐུང་།།
ལེགས་བཤད་ས་སྟིའི་དབྱངས་བདུན་རྫོགས་པའི་དར་དིར་དང་བཅས་ཕྱོགས་མེད་ལམ་དུ་ཀུན་ནས་སྒྲོགས་པར་བྱེད།།
ཆོས་མིན་འཇིགས་ཚོགས་རི་བོའི་རྐང་པ་མིང་གི་ལྷག་མར་གྱུར་པའི་རྫོགས་ལྡན་ཞོ་འཐུང་རུས་པ་དྲངས།།
སྲིད་ཞིའི་ལེགས་ཚོགས་འབྱོར་པ་རྒྱས་པའི་ཆོས་ཀྱི་ཁང་བཟང་བསྐྲུན་ཏེ་བཤད་སྒྲུབ་རྒྱལ་མཚན་རྩེ་རུ་མཆོད།།

​དེ་ལྟར་བློ་གྲོས་གསེར་གྱི་ཡོལ་གོ་ཆེར།།
​ཀུན་མཁྱེན་ནོར་བུའི་ཟོང་གིས་བཀང་བ་ན།།
​བདེ་འབྱུང་གཙུག་སོགས་ཆེན་པོའི་ཆེན་པོ་དག།།
​མགོ་བོར་ལན་བརྒྱར་བཏུད་པའི་ཉེར་བསྡོགས་བརྩམས།།

​ལྷག་པར་རྒྱལ་བསྟན་གདེང་ཀའི་མགོ་བོ་ཡིས།།
​རབ་མཛེས་གངས་རི་ན་ཀྲའི་གྲོང་ཁྱེར་དུ།།
​འཁྱིལ་བའི་ཆོས་ཚུལ་ཆུ་ཀླུང་འབུམ་ཕྲག་ཡང་།།
​ཁྱེད་ཐུགས་ཡུར་བས་ཕྱོགས་སུ་དྲངས་པར་མཛད།།

​ཁྱད་པར་བདེ་འབྱུང་བཏུང་བའི་ཐབས།།
​མཐའ་དྲུག་ཚུལ་བཞིས་ཉེར་མཚོན་པའི།།
​རྒྱུད་སྡེ་རྒྱ་མཚོའི་དཀྱིལ་འཁོར་དུ།།
​ཁྱོད་ཉིད་གཙོ་བོར་བཞུགས་པར་གྱུར།།

​དུས་ཀྱི་སྤྲིན་པས་ཉམས་དམས་པའི།།
​ས་བསྟན་ཉིན་བྱེད་འོད་པོ་ཆེ།།
​ཁྱེད་ཀྱི་ཤིང་རྟས་དྲངས་པའི་ཚེ།།
​འོད་ཀྱིས་གླིང་བཞིའི་མུན་པ་འཕྲོག།།

​དུས་དྲུག་གླིང་བཞིའི་གདུལ་བྱར་བསྐོར་བ་ཡི།།
​ཟླ་མེད་འཕྲིན་ལས་འོད་དཀར་ཅན་གྱི་རྡུལ།།
​སྐལ་ལྡན་ཀུནྡའི་གདོང་ལ་ཟགས་པ་ན།།
​ལེགས་ཚོགས་ག་བུར་གེ་སར་ཅི་ཡང་བཞད།།

​བསྐལ་མང་བསྲུབས་པའི་རྒྱ་ཆེན་ཚོགས་གཉིས་ཆབ།།
​ཛམྦུས་མཚོན་པའི་ན་དའི་རྗེས་སོང་བས།།
​མ་སྨད་ལེགས་བྱས་ཕྱིན་དྲུག་ལྷུན་པོའི་སྤོར།།
​བསྡུ་དངོས་ཉི་ཟླའི་རྣ་ཀོར་འོད་ཀྱིས་མཛེས།།

​རང་དོན་གཞི་མདོའི་རྩ་ཕྲན་བཞིན།།
​གཞན་དོན་ངང་པ་མཚོར་འཇུག་བཞིན།།
​མཐའ་དག་བསྟན་པའི་རྒྱལ་མཚན་ནི།།
​འཛིན་བཟོད་གླང་པོའི་སྙིང་སྟོབས་ཅན།།
​
​ཆོས་མིན་མིག་སྨན་ཤིན་ཏུ་མོད།།
​ཆོས་མིག་གསེར་ཐུར་ཤིན་ཏུ་དཀོན།།
​སྣ་ཚོགས་སྨྲ་བའི་གླིང་དག་ཏུ།།
​ཐུགས་རྗེའི་འཇུག་པ་ཤིན་ཏུ་ཡངས།།

​ལ་ལ་དག་གི་ཡིད་ལ་ནི།།
​སྔོན་དུས་ཆོས་རྗེ་ཡབ་སྲས་ཀྱི།།
​མཛད་མེད་འཕྲིན་ལས་དཀར་པོ་ཡང་།།
​ཉུང་ངུར་བྱེད་པའི་དོག་པ་འཆང་།།
​
​ཕལ་ཆེར་དག་གི་ཡིད་ལ་ནི།།
​ཆོས་རྗེ་འཇམ་དབྱངས་མངོན་སུམ་དུ།།
​ཕེབས་པ་ཉིད་ལས་གཞན་དུ་ནི།།
​རྣམ་པར་རྟོག་པ་གཉིས་པ་མེད།།
​
བྱོན་པ་ལེགས་སོ་འཇིག་རྟེན་མགོན།།
​བཀའ་དྲིན་ཆེའོ་དྲིན་ཅན་རྗེ།།
​སྐྱབས་སུ་མཆིའོ་བྱང་ཆུབ་བར།།
​བརྩེ་བའི་ཐུགས་རྗེས་བཟུང་དུ་གསོལ།།

གང་གི་ཞབས་སེན་འཆར་ཀའི་རྗེས་སོང་སྐོམ་པའི་གདུང་སེལ་འདོད་རྒུའི་ནོར་སྲུང་རྨུགས་འཛིན་མཛོད་ཀྱི་དཔལ་ལ་དབང་འབྱོར་བ།།
ཁ་བའི་རྡུལ་ཚོགས་ལྷག་པར་གང་བའི་ས་གཞི་སྤྱི་བོའི་གཙུག་ལྟར་མཐོ་བའི་ནོར་རྒྱས་གྲོང་ཁྱེར་དཔལ་ལྡན་ས་སྐྱ་རུ།།
ལེགས་བྱས་དཀར་པོའི་སྟེང་འཐུང་རྩ་བ་ཆུ་ཁུར་གྱིས་རྒྱས་ལོ་མ་འཁྲིགས་པས་སྦྲང་རྩི་སྤྱོད་པར་འགུག་པ་ཇི་བཞིན་དུ།།
རྣམ་མང་འགྲོ་བའི་ཉེར་འཚོའི་གཞིར་གྱུར་ཁ་བའི་རེག་འཇམ་སྲིད་མུན་འཕྲོག་བྱེད་དཔལ་ལྡན་ཁྱོད་ཀྱིས་རིང་ནས་རིང་དུ་བཏང་།།

དཔལ་༸ས་སྐྱ་པ་ཆེན་པོ་ཁྲི་རབས་ཞེ་གཅིག་པའི་རྟོགས་པ་བརྗོད་པ་ངོ་མཚར་གཏམ་གྱི་རོལ་མོ་ལས་གཞན་དོན་དུ་བྱང་ཆུབ་ཀྱི་སྤྱོད་པ་བསྟན་པའི་གཏམ་གྱི་སརྒ་ལྔ་པའོ།།

​ཅུང་ཟད་བྱས་པའི་བདག་གི་བསོད་ནམས་དགེ་བའི་དངོས་པོ་མཆིས་སོ་ཅོག།།
​ལུས་པ་མེད་པར་དམིགས་མེད་སེམས་ཀྱིས་དུས་གསུམ་རྣམ་དཀར་ཅི་ཡོད་དང་།།
​ཕངས་པ་མེད་པར་གཅིག་ཏུ་གཅིག་ཏུ་བཅིལ་ཏེ་རྗེ་བཙུན་ཨ་ཡུ་མཚན་ཅན་མཆོག།།
​འཇིག་པ་མེད་པར་མི་ཤིགས་རྡོ་རྗེའི་ཁམས་སུ་བཞུགས་པའི་གསོལ་བ་འདེབས།།
འདི་ཡང་བཀའ་དྲིན་སུམ་ལྡན་གྱི་འདྲེན་མཆོག་བླ་ན་མ་མཆིས་པ་དཔལ་ས་སྐྱ་པ་ཆེན་པོ་ཁྲི་རབས་ཞེ་གཅིག་པ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་སྐུའི་མཚན་དཔེ་བཞད་ནས་བགྲང་བྱ་བརྒྱད་ཅུ་བཞེས་པའི་བཀའ་དྲིན་རྗེས་དྲན་དུ་འདུ་ཤེས་གསུམ་ལྡན་གྱི་སྙོམས་ལས་པ་གཡུ་མེ་ལྕེ་འབོད་པས་དགའ་དད་སྤྲོ་གསུམ་གྱིས་རང་ཤག་ཞི་བའི་དགའ་ཚལ་དུ་སྔར་ནས་སུག་བྲིས་བགྱིས་པ་ཞིག་ཡོད་པ་ལ་མདོ་སྨད་གྱ་སྟོན་ཚོགས་པའི་རྩོམ་བརྡར་མཐོང་བ་རྐྱེན་བྱས་ཏེ་སླར་ཡང་འགྱུར་བཅོས་བགྱིས་ཏེ་ཕྱི་ལོ་༢༠༢༤ཕྱི་ཟླ་༡༠ཕྱི་ཚེས་༡༦ཉིན་མཇུག་རྫོགས་པར་བྱས་སོ།།

27/09/2022

མདང་བོད་ཟླ་༦ པའི་ཚེས་༡ ནི་བདག་ཅག་རྣམས་ཀྱི་རྩ་བའི་བླ་མ་ངེས་པ་དོན་གྱི་རྡོ་རྗེ་འཆང་དངོས་༧སྐྱབས་མགོན་༧གོང་མ་ཁྲི་ཆེན་ཞེ་གཅིག་པ་ཆེན་པོ་མཆོག་གི་དགུང་གྲངས་དོན་བརྒྱད་པའི་འཁྲུངས་སྐར་འཁེལ་གྱིན་ཡོད་པ་བཞིན། འདི་ག་མཐོ་སློབ་ཀྱི་སློབ་མ་ཐུན་མོང་ནས་ཀྱང་འཁྲུངས་སྐར་སྲུང་བརྩིའི་སླད་དུ། སློབ་མའི་མདུན་སྐྱོད་ཀྱི་རམ་འདེགས་རིག་རྩལ་དོ་ར་སྐབས་གཉིས་པའི་གར་སྟེགས་སུ། གང་ལ་བསྟོད་རྩོམ་འདྲ་མིན་གྱི་མེ་ཏོག་ཆུན་པོ་རེ་མཆོད་སྤྲིན་དུ་སྤེལ་བའི་སྣང་བརྙན་ཁག་ཅིག

07/09/2022

༼དེབ་གསར་སྔོན་བརྡ།༽
དཔལ་ས་སྐྱའི་མཐོ་རིམ་སློབ་གྲྭ་ཆེན་མོའི་དུས་དེབ་ འདོན་ཐེངས་༡༧ པ་ཁྲོམ་རར་བལྟམས་ལ་ཁད་ཡོད་པས། རྒྱ་ཆེའི་ཀློག་པ་པོ་དང་ལྷག་པར་དུ་བོད་ཀྱི་རྩོམ་རིག་ལ་ཞེན་པ་དཀར་བ་རྣམས་ལ་སྔོན་བརྡའི་ཚུལ་དུ།

16/08/2022

ཕྱི་ལོ་༢༠༢༢ ནས་༢༠༢༣ དབར་གྱི་དཔལ་ས་སྐྱའི་མཐོ་རིམ་སློབ་གྲྭ་ཆེན་མོའི་གྱང་སྦྱར་རྩོམ་ཡིག་༼རིག་རྩལ་དོ་ར་༽སྐབས་དང་པོ་མི་ཡུལ་དུ་བལྟམས་ཡོད་པས། ཉེ་རིང་གང་ནས་ཀྱང་ཐུགས་བརྩེས་སྐྱོང་བའི་གྲོགས་ཕོ་མོ་ཡོངས་ཀྱི་སྤྱན་ལམ་དུ་བརྙན་སྒྲོན་ཅིག་ཞུ་འོ།།

04/08/2022

མཛའ་ཞིང་བརྩེ་བའི་མཐོ་སློབ་ཀྱི་སྨྱུག་ཐོགས་པའི་སྤྱན་སྔར་གོ་སྐབས་ཀྱི་ལེགས་སྐྱེས་ཤིག་བསྐྲུན་ཡོད། དམ་འཛིན་གནང་རོགས།

02/08/2022

02/08/2022