26/06/2026
MS-CIT कोर्सला प्रतिष्ठित SKOCH Award प्राप्त – अभिमान महाराष्ट्राचा, सन्मान आपल्या सर्वांचा!
महाराष्ट्र ज्ञान महामंडळ मर्यादित अर्थात MKCL च्या MS-CIT या राज्यव्यापी डिजिटल साक्षरता उपक्रमाला देश पातळीवरील प्रतिष्ठित SKOCH Award प्रदान करण्यात आला आहे. Digital Literacy या श्रेणीत मिळालेला हा सन्मान MKCL च्या गेल्या २५ वर्षांतील डिजिटल शिक्षण, कौशल्य विकास, सामाजिक समावेशन आणि नागरिक सक्षमीकरणातील सातत्यपूर्ण योगदानाची राष्ट्रीय पातळीवरील दखल आहे.
SKOCH Award हा भारतातील शासन, डिजिटल परिवर्तन, सामाजिक विकास, कौशल्यवृद्धी आणि नागरिकाभिमुख उपक्रमांना दिला जाणारा एक मानाचा राष्ट्रीय पुरस्कार मानला जातो. महाराष्ट्रातील कोट्यवधी विद्यार्थी, युवक, महिला, ज्येष्ठ नागरिक, नोकरदार, उद्योजक आणि सर्वसामान्य नागरिकांना डिजिटल जगाशी आत्मविश्वासाने जोडण्याचे कार्य MS-CIT ने गेली अनेक वर्षे प्रभावीपणे केले आहे.
या सन्मानाबद्दल MKCL चे व्यवस्थापकीय संचालक श्री. समीर पांडे यांनी सांगितले की, “हा पुरस्कार MKCL परिवारासाठी अत्यंत अभिमानाचा क्षण आहे. हा सन्मान कोट्यवधी विद्यार्थी व त्यांच्या पालकांचा, तसेच हजारो केंद्रप्रमुख, केंद्र समन्वयक, प्रशिक्षक, नेटवर्क पार्टनर्स, MSBTE, MKCL मधील सर्व सहकारी, संस्थापक मार्गदर्शक, तसेच महाराष्ट्र शासनाने दिलेल्या विश्वासार्ह पाठबळामुळे आहे. या सर्व घटकांच्या संयुक्त प्रयत्नांमुळे MS-CIT ने महाराष्ट्रात डिजिटल परिवर्तनाची व्यापक चळवळ उभारली आहे.”
MKCL च्या महाराष्ट्रभर पसरलेल्या ५००० हून अधिक अधिकृत शिक्षण केंद्रांमुळे MS-CIT ने ग्रामीण तसेच शहरी भागातील नागरिकांपर्यंत दर्जेदार आणि परवडणारे डिजिटल शिक्षण पोहोचवले आहे. आजच्या कृत्रिम बुद्धिमत्ता-आधारित युगाच्या गरजा लक्षात घेऊन MS-CIT अभ्यासक्रम नव्याने अधिक सक्षम स्वरूपात सादर करण्यात आला असून त्यात Artificial Intelligence (AI), Cyber Security, Data Literacy, Cloud Computing आणि आधुनिक डिजिटल साधनांचा समावेश आहे.
या सन्मानामुळे महाराष्ट्राला अधिक सक्षम, डिजिटलदृष्ट्या साक्षर आणि AI-Ready बनविण्याचे MS-CIT चे हे कार्य अधिक जोमाने पुढे नेण्याची प्रेरणा देणारी आहे.
धन्यवाद
महाराष्ट्र ज्ञान महामंडळ मर्यादित (MKCL)
