09/02/2026
আজি আমাৰ বিদ্যালয়ৰ ২২ সংখ্যক প্ৰতিষ্ঠা দিৱসৰ লগত সংগতি ৰাখি এক কাৰ্যসূচী অনুষ্ঠিত হয়। পুৱা প্ৰয়াস অধ্যয়ন চক্ৰৰ সভানেত্ৰী তথা বোকাখাত জাতীয় বিদ্যালয়ৰ পৰিচালনা সমিতিৰ সভানেত্ৰী, সাহিত্যিক পেন্সনাৰ নিজৰা বৰঠাকুৰ বাইদেৱে পতাকা উত্তোলনেৰে প্ৰতিষ্ঠা দিৱসৰ কাৰ্যসূচী শুভাৰম্ভ কৰা অনুষ্ঠানত বিদ্যালয়খনৰ জেষ্ঠ শিক্ষয়িত্ৰী মনালিছা শইকীয়া বাইদেৱে বন্তি প্ৰজ্বলন কৰাৰ পাছতেই বিদ্যালয়ৰ নৱম শ্ৰেণীৰ ছাত্ৰ-ছাত্ৰী সকলে জাতীয় বিদ্যালয়ৰ সংগীত পৰিবেশন কৰে। ইয়াৰ পূৰ্বে অনুষ্ঠানৰ লগত সংগতি ৰাখি বিদ্যালয়ৰ অংকুৰ,কুঁহি আৰু সোপান শ্ৰেণীৰ ছাত্ৰ-ছাত্ৰীসকলে প্ৰস্তুত কৰি উলিওৱা প্ৰাচীৰ পত্ৰিকা "মৌ-কোঁহ" উন্মোচন কৰে প্ৰয়াস সংগীত কলা কেন্দ্ৰৰ ৰেক্টৰ প্ৰদীপ বৰুৱা ছাৰে। কণমানিহঁতৰ প্ৰদৰ্শনীৰ দ্বাৰ উন্মোচন কৰে অৱসৰপ্ৰাপ্ত শিক্ষক,সমাজ কৰ্মী বিকুল শইকীয়া ছাৰে। ইয়াৰ পাছতে অনুষ্ঠিত শ্ৰদ্ধাঞ্জলি অৰ্পণ অনুষ্ঠানৰ আঁত ধৰে মনালিছা শইকীয়া বাইদেৱে। অনুষ্ঠানত বিশিষ্ট অতিথি হিচাপে উপস্থিত থাকে সদৌ অসম লেখিকা সমাৰোহ সমিতিৰ প্ৰাক্তন সভানেত্ৰী সুৱৰ্ণ শইকীয়া বৰদলৈ বাইদেউ আৰু অৱসৰপ্ৰাপ্ত শিক্ষক বিকুল শইকীয়া ছাৰ।প্ৰতিষ্ঠা দিৱসৰ লগত সংগতি ৰাখি বিদ্যালয়ৰ জ্যেষ্ঠ শিক্ষক, প্ৰয়াস সংগীত কলা কেন্দ্ৰৰ ৰেক্টৰ,ভায়লিন বাদনৰ প্ৰচাৰ আৰু প্ৰসাৰৰ বাবে সেৱা আগবঢ়াই অহা বিশিষ্ট শিল্পী প্ৰদীপ বৰুৱা ছাৰ আৰু সাহিত্য জগতত সেৱা আগবঢ়াই অহা মনালিছা শইকীয়া বাইদেউক সম্বৰ্ধনা জনোৱাৰ লগতে বিদ্যালয়ৰ বাবে সেৱা আগবঢ়াই যোৱা কৰ্মচাৰী ৰশ্মি দাস বাইদেউ আৰু শিক্ষয়িত্ৰী দৰ্শনা বৰা বাইদেউক বিশেষ সন্মান জনোৱা হয়। উল্লেখযোগ্য যে আজিৰ প্ৰতিষ্ঠা দিৱসৰ লগত সংগতি ৰাখি বিদ্যালয়খনৰ অংকুৰ, কুঁহি, সোপান শ্ৰেণীৰ ছাত্ৰ-ছাত্ৰীসকলে পৰিৱেশন কৰা নৃত্য আৰু গীতৰ অনুষ্ঠানে প্ৰতিষ্ঠা দিৱসটিৰ সৌষ্ঠৱ বৃদ্ধি কৰে। বিদ্যালয়খনৰ শিক্ষয়িত্ৰী ঈপ্সিতা দত্তই আঁত ধৰা অনুষ্ঠানটোৰ অন্তত উপস্থিত সকলোৰে প্ৰতি শলাগ আৰু ধন্যবাদসূচক বক্তব্য আগবঢ়াই অধক্ষা ইনজু আহমেদে বাইদেৱে।
