24/01/2023
*مسلم خواتین اور گروپ لون*
تحریر :
أشرف شاكر ریاضی
(مدرس کلیہ ابو بکر صدیق رضی اللہ عنہ گمانی جھارکھنڈ)
- - - - - - - - - - - - - - - - - -
یقیناً آج کا دور گردش ایام کے ساتھ ساتھ بالکل بدل چکا ہے، ہر چیز کے طور و طریقے بدل چکے خواہ وہ امن کا طریقہ ہو یا جنگ کا ، کل تک جو ناممکن تھے وہ آج ممکن نظر آرہے ہیں، ایسے دور پرآشوب میں ہر قوم دوسری قوم کو نظریاتی مات دینے کی کوشش میں لگی ہے، لہذا کوئی اثرانداز ہے تو کوئی اثر پذیر ہے، مغلوب قوم غالب قوم کی تہذیب و کلچر کا دلدادہ ہے، بہرحال غالب قوم کی نظریات و ثقافت اورطور طریقے اور انکے عقائد کو لوگ خوب ترجیح دے رہے ہیں، حالانکہ اسلام کی ثقافت و تہذیب دنیا کی تمام ثقافت پر ہمیشہ ممتاز و غالب رہی ہے، کیوں کہ دیگر ثقافتیں و تہذیب انسان کے خود ساختہ ہیں جبکہ اسلامی ثقافت منزل من اللہ ہے، یہی وجہ ہے کہ اسلام کی تاریخ میں ہر دور میں اسلامی ثقافت پر اغیار کا شدید حملہ ہوا ہے، اسلامی نظریات کو مات دینے کیلئے نہ جانے کتنے نظام و پروٹوکول مرتب کئے گئے، لیکن اسلام کا نظام روز اول ہی سے ترقی کے لامتناہی منازل طئے کئے جا رہا ہے، اور ان شاء اللہ یہ چراغ تاقیامت گمراہی و بے راہ روی کے خلاف لوگوں کو روشنی پہنچاتے رہے گا!
قارئین کرام!!
گروپ لون جسے ہم معاشی و اقتصادی بحران سے بچنے کا ذریعہ سمجھتے ہیں در اصل یہ اغیار کی جانب سے مرتب شدہ ایک زہر ہلاہل اور سم قاتل ہے، جس کی زد میں بآسانی کوئی بھی آسکتا ہے اور پھر اسکے دلدل میں پھنس کر اپنی پوری زندگی وعاقبت تباہ کر سکتا ہے، جسے ہم اپنی بدحالی و فاقہ کشی سے نکلنے کا واحد ذریعہ سمجھتے ہیں فی الحقیقت اس سے مزید غربت میں اضافہ ہوتا ہے اور بالخصوص مزدور طبقے کے لوگ قرض کے بوجھ تلے دبے جاتے ہیں، جس کی وجہ سے لوگ بھیگ مانگنے پر مجبور ہو جاتے ہیں
قارئین کرام!
ذیل کے سطور میں گروپ لون کی وضاحت درج کرنے کی سعی کی جا رہی ہے ، دراصل یہ بندھن بنک کی طرف سے عورتوں کیلئے ایک مخصوص اسکیم ہے جو عورتوں کیلئے معاشی استحکام کا محض ایک جھانسہ ہے، یہ لون متعدد خواتین کی گروپ بندی کے ذریعہ سے پاس ہوتا ہے پھر ماہانہ یا ہفتواری قسطوں میں سود کے ساتھ بنک اپنا رقم واپس لینا شروع کرتا ہے، واضح رہے کہ اس لون کا فائدہ اسی وقت ایک خاتون کو مل سکتا ہے جب تک وہ ایک خاص عمر کو تجاوز نہ کرے ساتھ ہی ساتھ گروپ لون میں کسی مرد کی شراکت قطعی طور پر ناقابل قبول ہے، بنک کے طرف سے جو کارندے آتے ہیں وہ نوجوان ہوتے ہیں ساتھ ہی ساتھ انکو مخصوص انداز میں تربیت دی جاتی ہے، بالخصوص مسلم معاشرے کے لئے جن کارندے کو مسلط کیا جاتا ہے کلی طور پر ان کا مائنڈ واش ہوتا ہے انکے ذہن ودماغ میں مسلمانوں کے خلاف نفرت پیدا کی جاتی ہے اور بالخصوص مسلم بہو بیٹیوں کو اپنے چنگل میں پھنسانے پر ابھارا جاتا ہے، جس کا منفی نتیجہ آج ہمارے سامنے موجود ہے ہندوستان کے مختلف مسلم معاشرے سے ہزاروں خواتین ان کے اس ناپاک عزائم کا شکار بن چکیں ہیں،اس سلگتے ہوئے چنگاری سے نہ جانے کتنے آباد گھر اجڑ چکے ہیں، کتنی بہن بیٹیوں کی زندگی اجیرن بن چکی ہے،
بنک کے طرف سے معمور غیر مسلم نوجوان جہاں ایک طرف تعلیم یافتہ ہوتے ہیں وہیں دوسری طرف ہینڈسم بھی ہوتے ہیں، بالفاظ دیگراں وہ مخصوص انداز و دلکش لب و لہجے کے مالک ہوتے ہیں، واضح رہے کہ انکے پاس ان خواتین کی پوری تفصیل بھی موجود ہوتی ہے، جو گاہے بگائے جسے چاہتا اپنا شکار بنا لیتا ہے، اس پر مستزاد یہ کہ دونوں کا تبادلہ خیال جاری رہتا ہے، مشکلات میں کچھ خصوصی مراعات آفر کی جاتی ہے، بلکہ بسااوقات انکے مادی مسائل کا حل بھی نکالا جاتا ہے، ہمدردی کا اظہار کیا جاتا ہے اپنائیت کا احساس دلایا جاتا ہے، اگر وہ خاتون جوائنٹ فیملی سے ہے اور سسرال والوں کی طرف سے کچھ پریشانی کا سامنا کر رہی ہو تو مزید آگے بڑھ کر اظہار محبت کے گلدستے پیش کئے جاتے ہیں عورت چونکہ فطری طور پر پیار ومحبت کا شوقین ہوتیں ہیں، اس لیے وہ اپنے ایمان و عقیدہ کو بھینٹ چڑھاکر انکے ناپاک جسارت کو پایہ تکمیل تک پہنچا ہی دیتیں ہیں، پھر جب دو تین دن کے بعد حقیقت کا انکشاف ہوتا ہے تب پھر ساری عمر ذلت رسوائی کے زنجیروں میں جکڑ کر رہ جاتیں ہیں!!
محترم قارئین کرام!! ان سارے حوادث کے لئے صرف ہماری مسلم خواتین ہی قصوروار نہیں ہیں بلکہ اس میں ہم مسلم مردوں کی بھی برابر کی شراکت ہے کیونکہ اس مذکورہ بالا لون کو لینے پر ہم ہی انہیں آگے بڑھاتے ہیں ان پیسے کا استعمال بھی ہم ہی کرتے ہیں، ہر ہفتے مہینے ان غیر مسلم مردوں کی مجلس کا حصہ بننے کی اجازت بھی ہم ہی دیتے ہیں، ہمارے سامنے ہی گھر کی نوجوان عورتیں زیب و زینت اختیار کرکے گروپ میں شرکت کیلئے نکلتیں ہیں اور ہمیں ذرہ برابر بھی غیرت نہیں آتی ہے ، پھر کچھ دنوں میں جب ہمارے گھروں سے بہو بیٹی غیروں کے ساتھ نکل جاتی ہے تب پھر غیرت کا جام لبریز ہوجاتا ہے اور چاروں طرف اس بہو کے بداخلاق ہونے کا ڈھنڈورا پیٹنے لگتے ہیں اور پھر اپنے بے ثباتی نااہلی و تمام گناہوں کا ٹھیکرا اس بہو پر پھوڑتے ہیں.
قارئین کرام!!
دور حاضر میں ہمیں نہایت ہی حساس و دور اندیش ہونے کے ساتھ ساتھ ہمیں اپنی قوم کی رہنمائی نہایت ہی ضروری ہے، بالخصوص علماء کرام کو چاہیے کہ جب بھی معاشرے میں کوئی نیا فتنہ انگڑائی لے اس کے سدباب کیلئے لوگوں کو متنبہ کرے، اسکے منفی نتائج سے آگاہ کرے، کیوں کہ علماء کرام کو اللہ تعالیٰ نے علم و بصیرت سے نوازا ہے اور ممبر و محراب کی زینت بھی بنایا ہے، لیکن افسوس کہ دور حاضر میں بیشتر علماء قوم کے تئیں بہت کم فکرمندی کا مظاہرہ کر رہے ہیں!!
گروپ لون کی شرعی حیثیت!
ذیل کے سطور میں سود کی حرمت پر کچھ شرعی دلائل پیش کی جارہی ہیں :
اگر گروپ لون کی شرعی حکم کی بات کی جائے تو سراسر یہ ربا ہے جو کہ اسلام میں حرام ہے اللہ تعالیٰ کا ارشاد ہے:
یٰۤاَیُّهَا الَّذِیْنَ اٰمَنُوا اتَّقُوا اللّٰهَ وَ ذَرُوْا مَا بَقِیَ مِنَ الرِّبٰۤوا اِنْ كُنْتُمْ مُّؤْمِنِیْنَ(۲۷۸)
ترجمہ:
اے ایمان والو! اگر تم ایمان والے ہو تواللہ سے ڈرو اور جو رہ گیا ہے اسے چھوڑ دو۔ اسی آیت کریمہ میں
سودی کاروبار ترک نہ کرنے والوں کے خلاف جنگ کرنے کا حکم دیا ہے، جس سے آپ سود کی قباحت کا اندازہ لگا سکتے ہیں!
سود کی حرمت کا ذکر صرف اسلام ہی میں نہیں بلکہ دیگر ادیان میں بھی موجود ہیں
اسی طرح اللہ تعالی نے ایک دوسری جگہ ارشاد فرمایا ہے کہ:
الَّذِينَ يَأْكُلُونَ الرِّبَا لَا يَقُومُونَ إِلَّا كَمَا يَقُومُ الَّذِي يَتَخَبَّطُهُ الشَّيْطَانُ مِنَ الْمَسِّ ذَلِكَ بِأَنَّهُمْ قَالُوا إِنَّمَا الْبَيْعُ مِثْلُ الرِّبَا وَأَحَلَّ اللَّهُ الْبَيْعَ وَحَرَّمَ الرِّبَا فَمَنْ جَاءَهُ مَوْعِظَةٌ مِنْ رَبِّهِ فَانْتَهَى فَلَهُ مَا سَلَفَ وَأَمْرُهُ إِلَى اللَّهِ.
ترجمہ : ’’جو لوگ سود کھاتے ہیں وہ لوگ اس طرح کھڑے ہوں گے جس طرح وہ شخص کھڑا ہوتا ہے جسے شیطان نے چھو کر خبطی بنا دیا ہو، یہ اس لیے کہ وہ کہتے ہیں بے شک تجارت بھی تو سود ہی کی طرح ہے، حالانکہ اللہ نے تجارت کو حلال اور سود کو حرام قرار دیا ہے۔ پس جس شخص کے پاس اس کے رب کی نصیحت پہنچی اور وہ باز آ گیا تو جو پہلے ہو چکا وہ اس کا ہے، اور اس کا معاملہ اللہ کے سپرد ہے۔‘‘ البقرۃ : 275
مذکورہ آیتِ کریمہ میں سود خوروں کی حالت زار کو بیان کیا گیا ہے کہ وہ قبر سے اٹھنے کے وقت قیامت کے دن انتہائی ذلیل و رسوا ہوں گے اور ان کی یہ حالت اس وجہ سے ہوگی کہ وہ بیع کی طرح سود کو بھی جائز قرار دیتے تھے جب کہ اللہ نے بیع کو حلال اور سود کو حرام قرار دیا ہے۔ اور اللہ علیم و خبیر ہے جو ہر بات سے بخوبی واقف ہے کہ کس چیز میں بندوں کے لیے نفع ہے اور کس چیز میں بندوں کے لیے ضرر پایا جاتا ہے۔ بندوں کی ذمہ داری یہ ہے کہ وہ اللہ تعالیٰ کے احکام کی اطاعت و پیروی کریں۔
سیدنا عوف بن مالک اشجعی رضی اللہ عنہ سے روایت ہے کہ رسول اللہ صلی اللہ علیہ و سلم نے فرمایا :
إياك والذنوبَ التي لا تُغفَرُ وفي رواية: وما لا كفارةَ من الذنوبِ) : (الْغُلُولُ) فمن غَلَّ شيئًا أُتِيَ به يومَ القيامةِ، وأكلُ الرِّبا؛ فمن أكل الرِّبا بُعِثَ يومَ القيامةِ مجنونًا يتخبَّطُ، ثم قرأ:
الَّذِينَ يَأْكُلُونَ الرِّبا لا يَقُومُونَ إِلّا كَما يَقُومُ الَّذِي يَتَخَبَّطُهُ الشَّيْطانُ مِنَ الْمَسّ
ترجمہ : ’’خبردار! ان گناہوں سے بچو جن کی بخشش نہیں ہوگی (ایک روایت میں ہے : جن گناہوں کا کوئی کفارہ نہیں ہے۔)
مال غنیمت میں خیانت اور چوری کرنا، پس جس نے خیانت کیا وہ قیامت کے دن اسی کے ساتھ لایا جائے گا۔ اور سود خور، پس جس نے سود خوری کی وہ قیامت کے دن پاگل بنا کر اٹھایا جائے گا کہ وہ خبطی ہوگا۔ پھر آپ نے الَّذِينَ يَأْكُلُونَ الرِّبا. والی آیت تلاوت فرمائی۔‘‘ أخرجه الطبراني في المعجم الكبير (18/ 60/ 100) بحوالہ : السلسلة الصحيحة رقم: 3313
محترم قارئین کرام! دور حاضر میں فتنہ ارتداد کا تسلسل جاری ہے جو قوم و ملت کیلئے شرمساری کا موضوع ہے، لہذا ملت اسلامیہ کے ہر ذی شعور و بیدار مغز مسلم کو اس پہلو پر آپسی تبادلہ خیال کی اشد ضرورت ہے، اگر دیکھا جائے تو آج فتنہ ارتداد کے اہم اسباب میں سے ایک سبب گروپ لون کے نام پر مسلم علاقوں میں غیر مسلم نوجوانوں کا آنا اور مسلم خواتین کو سود پر قرض دینا وغیرہ وغیرہ جسمیں عام طور پر شادی شدہ اور غیر شادی شدہ خواتین شامل ہیں،
لہذا ہمیں چاہیے کہ ایسی سرگرمیوں پر سخت نظر رکھیں اور محتاج و ضرورت مند خواتین کے لئے انکے تعاون کا نظم ونسق کریں، اور ساتھ ہی مسلم خواتین کو اقتصادی طور پر آگے بڑھانے کیلئے کوئی ایسی اسیکم مرتب کرائی جائے جسمیں عورتیں چہار دیواری میں رہ کر اپنی معاشی ضرورت بآسانی پوری کر سکے!!
اخیر میں دعاء ہے کہ اللہ تعالیٰ ہماری مسلم خواتین کو ہر قسم کے شر وفساد سے محفوظ رکھے! آمین۔
