Al-Isbaah Foudation

Inquilab 09/01/2025

تحصیل پھول پور کے موضع نوادہ میں گاؤں کی علمی و ادبی انجمن الإصباح فاؤنڈیشن کے زیر اہتمام منعقدہ"مسابقہ برائے چالیس روزہ نماز باجماعت" کی تقسیمِ انعامات کی تقریب قاری اعجاز احمد اصلاحی کی صدارت میں کامیابی کے ساتھ اختتام پذیر ہوئی؛ جس میں بالترتیب محمد صارم، محمد اذہان اور محمد نبیل نے چالیس روز تک تکبیر اولیٰ کے ساتھ ادا کر کے اول، دوم اور سوم پوزیشن حاصل کی؛ جن کو عبید اللہ خان، محمد صادق خان اور دیگر اصحابِ خیر کے تعاون سے سائیکل بطورِ انعام دی گئیں۔ محمد عابد کو بھی خصوصی انعام سے نوازا گیا۔ نیز تمام شرکاء کو تشجیعی انعام دیا گیا۔
پروگرام میں مقررِ خصوصی کی حیثیت سے مولانا محمد صادق اصلاحی ندوی نے شرکت کی۔
مولانا نے نماز کی اہمیت پر زور دیتے ہوئے کہا کہ نماز اسلام کا اٹوٹ حصہ ہے جس کے بغیر مکمل اسلام کا تصور ہی نہیں کیا جا سکتا۔ لہذا ہمیں اپنے نونہالوں کے دلوں میں اس کی اہمیت و فضیلت کو اجاگر کرنے کی سخت ضرورت ہے۔
انہوں نے ملک کی موجودہ صورتِ حال کے تناظر میں یہ بات واضح کرنے کی کوشش کی کہ آج ہم سے ایک ایسے اسلام کی امید کی جا رہی ہے جس میں ہم اپنے اسلامی عقائد ونظریات کو ماننے کے ساتھ ساتھ دوسرے مذاہب کی نہ صرف یہ کہ قدر کریں بلکہ ان کے شرکیہ رسومات میں بڑھ چڑھ کر ہاتھ بھی بٹائیں۔ یعنی باغباں بھی خوش رہے اور صیاد بھی ناراض نہ ہو۔
انہوں نے کہا آج ہمیں پہلے سے بہت زیادہ اس بات کی ضرورت ہے کہ ہم اپنے بچوں کو اسلامی عقائد ونظریات کے ساتھ ساتھ اسلامی شناخت، تہذیب وثقافت اور آداب و اخلاق سے بھی نہ صرف یہ کہ واقف کرائیں بلکہ مکمل طور سے ان پر کاربند رہنے کی بھی تلقین کریں۔
قاری اعجاز احمد اصلاحی نے اپنی صدارتی تقریر میں کہا کہ اولاد اللہ تعالیٰ کی ایک عظیم نعمت ہیں، ہمیں اس نعمت کی قدردانی کرنی چاہیے۔
تربیت کے حوالے انہوں نے اس بات پر زور دیا کہ بچوں کی تربیت ایک ایسے پر امن ماحول میں ہونی چاہئے جہاں تشدد کا دور دور تک سایہ بھی نہ ہو۔ ان کے ساتھ نرم لہجے میں بات کی جانی چاہیے، اور زوجین کے باہمی اختلافات اور بدمزگیوں سے ان کو دور رکھا جائے نیز بری صحبت سے ان کو پوری طرح سے محفوظ رکھنے کی کوشش کی جائے؛ کیوں کہ ابتداء میں بچے اپنے والدین اور اپنے گھریلو ماحول ہی سے سب کچھ سیکھتے ہیں۔
مولانا محمد عاطف ندوی نے پروگرام کے انعقاد پر خوشی کا اظہار کرتے ہوئے کہا کہ اس طرح کے تعلیمی و تربیتی پروگرام طلبہ کے ساتھ ساتھ طالبات کے درمیان بھی منعقد ہوتے رہنے چاہئیں جس سے ان کی خوابیدہ صلاحیتیں پروان چڑھیں۔
پروگرام کی نظامت محمد سعد اصلاحی نے کی اور کنوینر کے فرائض محمد جابر اصلاحی نے ادا کئے۔
اس موقعے پر گاؤں کی معزز شخصیات مولانا شفیق الرحمن اصلاحی، مولانا عظیم الرحمٰن قاسمی،یو این اے نیوز کے ایڈیٹر محمد ریحان اعظمی، حافظ محمد احتشام، حافظ سمیع اللہ، حافظ عبد الخالق، عبید اللہ خان (پردھان)، سٹی میڈیکل اسٹور کے محمد اشہد خان، عرفان احمد کے علاوہ دوسرے لوگ بھی موجود رہے۔
بچوں کی حوصلہ افزائی میں تعاون کرنے والوں میں مذکورہ شخصیات کے علاوہ محمد جسیم خان، محمد نفیس خان، محمد فضیل، محمد فہد اصلاحی وغیرہ کا نام خصوصیت کے ساتھ قابلِ ذکر ہے۔

عزیزان‌ گرامی
السلام علیکم و رحمۃ اللہ وبرکاتہ
یہ اطلاع دیتے ہوئے ہمیں بے انتہا خوشی ہو رہی ہے کہ "الإصباح فاؤنڈیشن" نوادہ پھول پور نے بچوں کے لیے انعامی "مسابقہ برائے چالیس روزہ نماز باجماعت" کا انعقاد کیا تھا؛ جس کی انعامی تقریب بتاریخ 7 / جنوری 2025 بروز منگل نوادہ 'عید گاہ' میں ہونے جا رہی ہے؛ جس میں آپ تمام کی حاضری ہمارے لئے باعث مسرت ہوگی۔
والسلام

انقلاب ۱۸/٠٥/٢٠٢٢

الحمدللہ! نوادہ پھولپور اعظم گڑھ کی خالص علمی وادبی انجمن "الإصباح فاؤنڈیشن" کی جانب سے ہونے والا پہلا اسلامی انعامی مقابلہ استاد محترم مولانا محمد عمر اسلم اصلاحی صاحب کی زیرِ صدارت، مولانا محمد صادق قاسمی صاحب اور مولانا ابو طالب اعظمی صاحب کے زیرِ اہتمام بمقام نوادہ پھولپور، انتہائی کامیابی کے ساتھ اپنے اختتام کو پہنچا۔ جب کہ جج کا فریضہ جناب ابو اویس اصلاحی صاحب (پورہ ناظر) نے اور ناظم کی روپ میں محمد سعد اصلاحی اور عبداللہ اصلاحی(پورہ ناظر)نے خدمت انجام دی۔
اس موقع پر استاد محترم مولانا محمد عمر اسلم اصلاحی صاحب نے اسلام میں علم کی اہمیت اور ضرورت کے موضوع پر دلوں میں گھر کر جانے والے اسلوب میں ایک انتہائی جامع اور مفصل خطاب فرمایا۔ آپ نے اپنے خطاب میں مختلف رپورٹوں کے حوالے سے یہ آیینہ دکھانے کی کامیاب کوشش کی کہ جس امت میں طلبِ علم کی ذمہ داری ہر فرد پر لازم ہے اس قوم میں تعلیم کا تناسب سب سے کم ہے۔
حیرت ہے کہ تعلیم و ترقی میں ہے پیچھے
جس قوم کا آغاز ہی اقرأ سے ہوا تھا

مولانا نے اپنے خطاب میں یہ بھی بتایا کہ اللہ تعالیٰ نے کامیابی اور سرخروئی کے کچھ اصول وضوابط مقرر فرما دیے ہیں۔ جب تک ہم ان اصول وضوابط پر نہیں چلیں گے تب تک کامیابی ہمارا مقدر نہیں بن سکتی۔ دنیا میں سرخروئی ہمیں صرف اس بنا پر نہیں مل سکتی کہ ہم اللہ اللہ کرتے ہیں اور مسلمان گھرانے میں پیدا ہوئے ہیں۔اس کے لئے ضروری ہے کہ ہم سب سے پہلے اپنا ہدف مقرر کریں اور اس ہدف کو حاصل کرنے کے لئے تندہی سے لگ جائیں۔ امت کا بھی کیا عجیب فلسفہ ہے کہ:
بنا محنت بنا کوشش کے امت
حکومت،شان و شوکت چاہتی ہے
(اختر سلطان اصلاحی)

استاد محترم نے جس خوش اسلوبی اور وضاحت کے ساتھ اپنا پیغام لوگوں تک پہونچایا واقعہ یہ ہے کہ یہ خوبی انہی کا مقدر ہے اور اس میں دور دور تک ان کا کوئی ثانی نظر نہیں آتا۔ اللہ تعالیٰ مولانا کو مکمل صحت و عافیت کے ساتھ طویل عمر عطا فرمائے اور ان کا سایۂ شفقت ہمارے سروں پر دیر تک قائم رکھے۔آمین۔

مسابقہ میں حصہ لینے والے تمام بچوں نے اس بات کا ثبوت دیا کہ وہ بے پناہ صلاحیتوں کے حامل ہیں۔ انہوں نے جس انداز، جس اعتماد اور ٹایمنگ کے ساتھ سوالات کے صحیح اور مکمل جواب دیے اُس سے اِس بات کا اندازہ ہوتا ہے کہ اگر ان کو برموقع اور مناسب مقدار میں غذا فراہم کی جائے تو ان شاء اللہ بہت جلد یہ ننھے پودے تناور درخت اور پھل دار شجر کی حیثیت سے دنیا کے سامنے اپنے آپ کو ثابت کر سکتے ہیں۔ ان شاء اللہ اگر خدا تعالیٰ کی توفیق اور گاؤں والوں کا تعاون اور احباب کی دعائیں اور مشورے ہمارے ہمراہ رہے تو اس طرح کے بچوں کے لئے ادبی، تعلیمی و تدریسی اور مسابقتی(competitive) پروگرام ہماری اولین ترجیحات میں شامل ہوں گے۔

اس پروگرام کو منعقد کرنے میں جن اشخاص کا بنیادی کردار رہا اور جن کی رفاقت کا احساس ہر موڑ پر ہمیں ہوتا رہا، ان میں جناب محمد جسیم خان، عبید اللہ خان (پردھان نوادہ)، سرفراز احمد، حافظ محمد فیصل، حافظ محمد حفیظ، حافظ سمیع اللہ، حافظ محمد انس، حافظ محمد شارق صاحبان کا نام خاص طور پر قابل ذکر ہے۔
ہم مذکورہ شخصیات کے ساتھ ساتھ ان تمام حضرات کا دل کی گہرائیوں سے شکریہ ادا کرتے ہیں جنہوں نے کسی بھی پہلو سے بھی ہماری مدد کی ہو۔ اور اللہ تعالیٰ سے ان کی سلامتی اور بلند حوصلے کی دعا کرتے ہیں۔آمین۔
یہ بات بھی سو فی صد درست اور مبنی بر حقیقت ہے کہ ہمارے انتہائی عزیز، مولانا محمد صادق قاسمی اور ان کے دستِ راست، بہترین مربئ اطفال، تجربہ کار استاد مولانا محمد طالب اعظمی و مولانا عظیم الدین صاحب (لہبریا) کا پرخلوص جذبہ، ان کی سچی لگن اور طویل تجربہ اگر ہمارے شاملِ حال نہ رہا ہوتا تو شاید پروگرام کا انجام اس سے کچھ مختلف ہو سکتا تھا۔ ہم ان کی خدمات پر ان کا خاص طور سے شکریہ ادا کرتے ہیں اور ان کا اجر تمام خزانوں کے مالک اللہ رب العالمین کے حوالے کرتے ہیں۔اس لئے کہ إن اللہ لا يضيع أجر المحسنين. اور اس لیے بھی کہ:
نذرانہ تیرے "کام" کا کیا دیں کہ اپنے پاس
لے دے کے ایک دل ہے، سو ٹوٹا ہوا سا ہے۔

اس پروگرام کی تمام تر عملی ذمہ داریاں چند اصلاحی و غیر اصلاحی برادران نے خالص اپنے ذاتی فرائض سمجھ کر بے لوث و بے غرض ہوکر سر انجام دیں، جن میں برادرم محمد جابر اصلاحی (کنوینر)، ابو ہریرہ، محمد صادق، محمد شارب، ابو البشر اصلاحی، سمیع اللہ اصلاحی، محمد ارسلان اصلاحی، عبد العظیم اصلاحی جرزی، عبد الرزاق اصلاحی شعری، عبداللہ اصلاحی (سجنی)، عبداللہ اصلاحی فراہی، محمد شاہد اصلاحی، محمد عرباض اصلاحی، محمد شہاب اصلاحی، محمد حسن اصلاحی، محمد وقاص اصلاحی اور محمد فہد اصلاحی خاص طور سے قابل ذکر ہیں۔ جی تو چاہتا ہے کہ اِن اہلِ وفا اِخوانُ الصفا کا بالخصوص شکریہ ادا کریں لیکن:
ادائے _ فرض پر اہلِ _وفا کا شکریہ کیسا؟
محبت میں تو قربانی بھی قربانی نہیں ہوتی

البتہ دعا ضرور کر سکتے ہیں کہ اللہ تعالیٰ ان تمام دوستوں کو سلامت رکھے اور اشاعتِ حق کے لیے قبول فرمائے۔ امین یارب العالمین۔
رپورٹ : محمد سعد اصلاحی و محمد جابر اصلاحی۔

عزیز ممبران
السلام علیکم و رحمۃ اللہ وبرکاتہ
آپ لوگوں کو یہ اطلاع دیتے ہوئے خوشی ہو رہی ہیکہ الإصباح فاؤنڈیشن نے اپنے چھوٹے بھائیوں کیلئے ایک اسلامی کوئز مقابلہ کا انعقاد کیا ہے۔ ہم امید کرتے ہیں کہ گروپ کے ممبران اپنے بھائیوں یا اپنے بچوں کو اس مقابلے میں شرکت کیلئے ضرور آمادہ کرینگے
والسلام

Al-Isbaah Foundation to highlight children's potential and provide higher education