29/07/2020
മാനവ വിഭവ ശേഷി മന്ത്രാലയം ഇനി വിദ്യാഭ്യാസ മന്ത്രാലയം; ദേശീയ വിദ്യാഭ്യാസ നയത്തിന് കേന്ദ്ര മന്ത്രിസഭ അംഗീകാരം നല്കി
ന്യൂഡല്ഹി: രാജ്യത്തെ സ്കൂള് വിദ്യാഭ്യാസത്തില് ഘടനാപരമായ മാറ്റങ്ങള് ശുപാര്ശ ചെയ്യുന്ന പുതിയ വിദ്യാഭ്യാസ നയത്തിന് കേന്ദ്ര മന്ത്രിസഭ അംഗീകാരം നല്കി. മാനവ വിഭവ ശേഷി മന്ത്രാലയത്തിന്റെ പേര് വിദ്യാഭ്യാസ മന്ത്രാലയം എന്ന മാറ്റാനുള്ള തീരുമാനവും കേന്ദ്ര മന്ത്രി സഭ അംഗീകാരം നല്കി.
രാജ്യത്തെ വിദ്യാഭ്യാസ മേഖലയില് സമഗ്രമായ പൊളിച്ചെഴുത്താണ് വിദ്യാഭ്യാസ നയത്തിലൂടെ ലക്ഷ്യമിടുന്നത്. വിദ്യാഭ്യാസത്തിനുള്ള അവകാശം മൂന്ന് വയസു മുതല് 18 വയസു വരെയുള്ള കുട്ടികള്ക്ക് ഉറപ്പാക്കണമെന്നാണ് പുതിയ വിദ്യാഭ്യാസ നയത്തില് വ്യവസ്ഥ ചെയ്തിരിക്കുന്നത്. പത്ത്, പന്ത്രണ്ട് ക്ലാസുകളിലെ ബോര്ഡ് പരീക്ഷാ സമ്പ്രദായങ്ങളിലും മാറ്റം വരും. 10+2 എന്ന നിലവിലെ രീതി മാറി 5+3+3+4 എന്ന ഘടനയിലേക്ക് വിദ്യാഭ്യാസ രീതി പരിഷ്ക്കരിക്കാനാണ് തീരുമാനം.
ഐഎസ്ആര്ഒ മുന് ചെയര്മാന് ഡോ. കസ്തൂരിരംഗന്റെ നേതൃത്വത്തിലുള്ള സമിതി തയ്യാറാക്കിയ പുതിയ വിദ്യഭ്യാസ നയം 2019 മെയ് മാസത്തിലായിരുന്നു സര്ക്കാരിന് സമര്പ്പിച്ചത്. സര്ക്കാര് വെബ്സൈറ്റില് നേരത്തെ പ്രസിദ്ധീകരിച്ച കരട് നയത്തില് പൊതുജനങ്ങളില് നിന്നും വിദ്യാഭ്യാസ വിദഗ്ധരില് നിന്നും സംസ്ഥാന സര്ക്കാരുകളില് നിന്നും നിര്ദ്ദേശങ്ങള് സ്വീകരിച്ച ശേഷമാണ് വിദ്യാഭ്യാസ നയത്തിന് അന്തിമ രൂപം നല്കിയത്.
