08/03/2024
ਸਿੱਖ ਧਰਮ ਦੀ ਸ਼ੁਰੁਆਤ ਤੋਂ ਲੈ ਕੇ ਹੁਣ ਤੱਕ ਮਹਿਲਾਵਾਂ ਦੀ ਬਹੁਤ ਵੱਡੀ ਦੇਣ ਹੈ। ਸਿੱਖ ਧਰਮ ਦੇ ਬਾਨੀ ਸ੍ਰੀ ਗੁਰੂ ਨਾਨਕ ਸਾਹਿਬ ਜੀ ਨੂੰ ਸਭ ਤੋਂ ਪਹਿਲਾਂ ਰੱਬ ਕਰਕੇ ਪਛਾਨਣ ਵਾਲੇ (ਬੇਬੇ ਨਾਨਕੀ ਜੀ) ਹੀ ਸਨ। ਸ੍ਰੀ ਗੁਰੂ ਅੰਗਦ ਸਾਹਿਬ ਜੀ ਦੇ ਮਹਿਲ ਮਾਤਾ ਖੀਵੀ ਜੀ ਗੁਰੂ ਕੇ ਲੰਗਰਾਂ ਵਿੱਚ ਦੇਸੀ ਘਿਓ ਦੀ ਖੀਰ ਬਣਾ ਕੇ ਵਰਤਾਇਆ ਕਰਦੇ ਸਨ। ਮਾਤਾ ਖੀਵੀ ਜੀ ਇਕਲੌਤੇ ਹਨ ਜਿਨ੍ਹਾਂ ਦਾ ਨਾਮ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬਾਣੀ ਵਿੱਚ ਦਰਜ ਹੈ।
ਬਲਵੰਡ ਖੀਵੀ ਨੇਕ ਜਨ ਜਿਸੁ ਬਹੁਤੀ ਛਾਉ ਪਤ੍ਰਾਲੀ।।
ਲੰਗਰਿ ਦਉਲਤਿ ਵੰਡੀਐ ਰਸੁ ਅੰਮ੍ਰਿਤੁ ਖੀਰਿ ਘਿਆਲੀ।।
ਸਿੱਖ ਧਰਮ ਦੀ ਗੁਰਗੱਦੀ ਨੂੰ ਸੋਢੀਆਂ ਦੇ ਪਰਿਵਾਰ ਵਿੱਚ ਰੱਖਣ ਲਈ ਬੀਬੀ ਭਾਨੀ ਜੀ ਨੇ ਆਪਣੇ ਗੁਰੂ ਪਿਤਾ “ਸ੍ਰੀ ਗੁਰੂ ਅਮਰਦਾਸ ਜੀ” ਦੀ ਸੇਵਾ ਕੀਤੀ ਸੀ ਅਤੇ ਇਹ ਬਚਨ ਲਿਆ ਸੀ।
ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਜੀ ਦੇ ਮਹਿਲ ਮਾਤਾ ਗੁਜਰੀ ਜੀ ਨੇ ਹਿੰਦ ਦੀ ਰਾਖੀ ਖਾਤਰ ਆਪਣੇ ਸੁਆਮੀ ਜੀ ਨੂੰ ਸ਼ਹੀਦ ਹੋਣ ਲਈ ਦਿੱਲੀ ਭੇਜਿਆ ਸੀ। ਮਾਤਾ ਗੁਜਰੀ ਜੀ ਨੇ ਛੋਟੇ ਸਾਹਿਬਜ਼ਾਦਿਆਂ ਨੂੰ ਸੂਬੇ ਦੀ ਕਚਹਿਰੀ ਵਿੱਚ ਜਾਣ ਤੋਂ ਪਹਿਲਾਂ ਸਿੱਖੀ ਵਿੱਚ ਪ੍ਰਪੱਕ ਹੋਣ ਅਤੇ ਸ਼ਹਾਦਤ ਦਾ ਜਾਮ ਪੀਣ ਲਈ ਮਜ਼ਬੂਤ ਕੀਤਾ ਸੀ।
ਸ੍ਰੀ ਗੁਰੂ ਗੋਬਿੰਦ ਸਿੰਘ ਸਾਹਿਬ ਜੀ ਦੇ ਵੱਡੇ ਸਾਹਿਬਜ਼ਾਦਿਆਂ ਅਤੇ ਚਮਕੌਰ ਸਾਹਿਬ ਦੇ ਸ਼ਹੀਦਾਂ ਦੀਆਂ ਦੇਹਾਂ ਦਾ ਸੰਸਕਾਰ ਬੀਬੀ ਸ਼ਰਨ ਕੌਰ ਜੀ ਨੇ ਕੀਤਾ ਸੀ ਅਤੇ ਇਸ ਬਦਲੇ ਮੁਗਲ ਸਿਪਾਹੀਆਂ ਵੱਲੋਂ ਉਨ੍ਹਾਂ ਨੂੰ ਭਾਂਬੜਾਂ ਤੇ ਜਿਉਂਦਿਆਂ ਸੁੱਟ ਕੇ ਸ਼ਹੀਦ ਕੀਤਾ ਗਿਆ।
ਸ੍ਰੀ ਗੁਰੂ ਗੋਬਿੰਦ ਸਿੰਘ ਸਾਹਿਬ ਜੀ ਨੂੰ ਬੇਦਾਵਾ ਲਿਖਣ ਵਾਲੇ ਸਿੰਘਾਂ ਨੂੰ ਮਾਝੇ ਦੀ ਸ਼ੀਹਣੀ “ਮਾਤਾ ਭਾਗ ਕੌਰ ਜੀ” ਨੇ ਵੰਗਾਰਿਆ ਸੀ ਅਤੇ ਖਿਦਰਾਣੇ ਦੀ ਢਾਬ ਤੇ ਮੁਗਲਾਂ ਨਾਲ ਜੰਗ ਲੜੀ ਸੀ।
ਮੀਰ ਮੰਨੂ ਦੇ ਸਮੇਂ ਸਿੱਖ ਬੀਬੀਆਂ ਦੇ ਬੱਚਿਆਂ ਦੇ ਟੋਟੇ ਕਰ ਕਰ ਉਨ੍ਹਾਂ ਦੇ ਗਲਾਂ ਵਿੱਚ ਪਾਏ ਗਏ ਪਰ ਸਿੱਖ ਬੀਬੀਆਂ ਸਿਦਕ ਤੋਂ ਨਹੀਂ ਡੋਲੀਆਂ।
ਦੋ ਸਿਪਾਹੀ ਗੱਲਾਂ ਕਰ ਰਹੇ ਸਨ ਕਿ,”ਮੀਰ ਮੰਨੂ ਆਪ ਤਾਂ ਜ਼ਾਲਮ ਆ ਤੇ ਸਾਥੋਂ ਵੀ ਜ਼ੁਲਮ ਕਰਵਾ ਰਿਹਾ”ਤਾਂ ਇੱਕ ਬੀਬੀ ਨੇ ਇੱਕ ਸਿਪਾਹੀ ਨੂੰ ਸੱਦਿਆ, ਜਦੋਂ ਸਿਪਾਹੀ ਬੀਬੀ ਕੋਲੋਂ ਆਇਆ ਤਾਂ ਉਸ ਦੀਆਂ ਅੱਖਾਂ ਵਿੱਚ ਹੰਝੂ ਸਨ। ਦੂਜੇ ਸਿਪਾਹੀ ਦੇ ਪੁੱਛਣ ਤੇ ਕਹਿਣ ਲੱਗਾ ਕਿ ,”ਬੀਬੀ ਕਹਿੰਦੀ ਕਿ ਇਹ ਟੋਟੇ ਉਸ ਦੇ ਪੁੱਤਰ ਦੇ ਨਹੀਂ ਹਨ, ਜਾ ਕੇ ਉਸ ਦੇ ਬੱਚੇ ਦੇ ਟੋਟਿਆਂ ਦਾ ਹਾਰ ਲਿਆ ਕੇ ਪਾਇਆ ਜਾਵੇ।” ਇਹ ਸੀ ਸਾਡੀਆਂ ਬੀਬੀਆਂ ਦਾ ਸਿਦਕ।
ਸ਼ੇਰ ਏ ਪੰਜਾਬ ਮਹਾਰਾਜਾ ਰਣਜੀਤ ਸਿੰਘ ਦੇ ਸ਼ੁਰੂਆਤੀ ਸਮੇਂ ਵਿੱਚ ਉਸਦੀ ਮਦਦ ਉਸਦੀ ਸੱਸ ਬੀਬੀ ਸਦਾ ਕੌਰ ਨੇ ਕੀਤੀ ਸੀ।
ਜੰਗੀ ਜਰਨੈਲ ਸਰਦਾਰ ਹਰੀ ਸਿੰਘ ਨਲੂਆ ਤੱਕ ਜਮਰੌਦ ਵਿਖੇ ਚਿੱਠੀ ਪਹੁੰਚਾਉਣ ਲਈ ਬੀਬੀ ਹਰਸ਼ਰਨ ਕੌਰ ਮਰਦਾਂ ਵਾਲਾ ਪਹਿਰਾਵਾ ਪਹਿਨ ਕੇ ਆਪਣੀ ਜਾਨ ਖ਼ਤਰੇ ਵਿੱਚ ਪਾ ਕੇ ਗਈ ਸੀ।
ਮੌਜੂਦਾ ਸਿੱਖ ਸੰਘਰਸ਼ ਸਮੇਂ ਵੀ ਇਸਤਰੀਆਂ ਨੇ ਬਹੁਤ ਕੁਰਬਾਨੀਆਂ ਕੀਤੀਆਂ। ਤਖ਼ਤ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੇ ਹਮਲੇ ਸਮੇਂ ਸ਼ਹੀਦ ਭਾਈ ਮੋਹਰ ਸਿੰਘ ਜੀ ਦੀ ਪਤਨੀ ਅਤੇ ਉਨ੍ਹਾਂ ਦੀਆਂ ਦੋ ਧੀਆਂ ਨੇ ਆਪਣੇ ਸਰੀਰਾਂ ਨਾਲ ਬੰਬ ਬੰਨ੍ਹ ਕੇ ਟੈਂਕਾਂ ਦੇ ਪਰਖੱਚੇ ਉਡਾ ਦਿੱਤੇ ਸੀ। ਤਖ਼ਤ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੇ ਟੈਂਕੀ ਵਾਲੇ ਮੋਰਚੇ ਵਿੱਚ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਦੇ ਇਸਤਰੀ ਵਿੰਗ ਨੇ ਮੋਰਚਾ ਸੰਭਾਲਿਆ ਹੋਇਆ ਸੀ ਜਿਸਦੀ ਅਗਵਾਈ ਸ਼ਹੀਦ ਬੀਬੀ ਉਪਕਾਰ ਕੌਰ ਜੀ ਕਰ ਰਹੇ ਸਨ। ਹਿੰਦ ਫੌਜ ਨੇ ਵੱਸ ਨਾ ਚੱਲਦਾ ਦੇਖ ਕੇ ਟੈਂਕੀ ਨੂੰ ਉਡਾ ਦਿੱਤਾ ਸੀ।
ਖਾੜਕੂ ਸੰਘਰਸ਼ ਦੌਰਾਨ ਵੀ ਅਨੇਕਾਂ ਸਿੰਘਣੀਆਂ ਨੇ ਸ਼ਹਾਦਤਾਂ ਪਾਈਆਂ।
ਮੈਂ ਯੁਨਾਇਟਡ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਵੱਲੋਂ ਅੱਜ ਅੰਤਰਰਾਸ਼ਟਰੀ ਮਹਿਲਾ ਦਿਵਸ ਮੌਕੇ ਸਮੂਹ ਭੈਣਾਂ ਅਤੇ ਬੀਬੀਆਂ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਫਿਲਮਾਂ ਦੀਆਂ ਹੀਰੋਇਨਾਂ ਨੂੰ ਰੋਲ ਮਾਡਲ ਬਣਾਉਣ ਨਾਲੋਂ ਮਾਤਾ ਭਾਗ ਕੌਰ ਜੀ ਅਤੇ ਬੀਬੀ ਉਪਕਾਰ ਕੌਰ ਜੀ ਵਰਗੀਆਂ ਸਿੱਖ ਬੀਬੀਆਂ ਨੂੰ ਰੋਲ ਮਾਡਲ ਮੰਨੋ।
ਤੁਸੀਂ ਪੰਜਾਬ ਅਤੇ ਪੰਥ ਦੇ ਭਵਿੱਖ ਨੂੰ ਜਨਮ ਦੇਣਾ ਹੈ ਅਤੇ ਇਹ ਤੁਹਾਡੇ ਸਿਰ ਤੇ ਹੈ ਕਿ ਤੁਸੀਂ ਕਿਹੋ ਜਿਹਾ ਭਵਿੱਖ ਦੇਖਣਾ ਚਾਹੁੰਦੀਆਂ ਹੋ।
✍🏻 ਹਰਜੀਵਨਪ੍ਰੀਤ ਸਿੰਘ "ਗਹੌਰ"
ਮੈਂਬਰ USSF PANJAB
