19/02/2025
প্ৰাপ্তিৰ দিন (১৮/০২/২০২৫)
শিক্ষাবিদ জন ডিউইয়ে কৈছিল যে শিক্ষা এক ত্ৰি-পাক্ষিক প্ৰক্ৰিয়া। শিক্ষক, শিক্ষাৰ্থী আৰু উপযুক্ত সামাজিক পৰিৱেশৰ সুস্থ সমন্বয়তহে শিক্ষা অধিক প্ৰাণৱন্ত হৈ উঠে।গতিকে এই তিনিটা উপাদানৰ প্ৰতিটোৱেই অতি জৰুৰী।
এতিয়া আহোঁ মূল কথালৈ....
এখন বিদ্যালয়ৰ প্ৰতিটো দিশৰ লগত সংপৃক্ত এটা সংস্থা হ'ল বিদ্যালয় পৰিচালনা সমিতি। বিদ্যালয়ৰ শৈক্ষিক, সহবিদ্যায়তনিক, প্ৰশাসনিক তথা সকলো দিশত উত্থান পতনৰ বেলিকা বিদ্যালয়ৰ পৰিচালনা সমিতি দায়বদ্ধ হৈ থাকে। বিদ্যালয় এখন সৰ্বাংগ সুন্দৰ কৰি তোলাৰ ক্ষেত্ৰত শিক্ষক-শিক্ষাৰ্থীৰ সমান্তৰালকৈ বিদ্যালয় পৰিচালনা সমিতিয়েও গুৰুত্বপূৰ্ণ ভূমিকা পালন কৰি আহিছে।আমাৰ বিদ্যালয়ৰ পৰিচালনা সমিতিখনো এই চেষ্টাৰ ব্যতিক্ৰম নহয়।
অতি গৌৰৱেৰে জনাও যে দেওধাই মজলীয়া বিদ্যালয়ৰ পৰিচালনা সমিতিখনে এইবাৰ মণ্ডল ভিত্তিত শ্ৰেষ্ঠ পৰিচালনা সমিতিৰ সন্মান পাবলৈ সক্ষম হ'ল। শিৱসাগৰ জিলাৰ সমগ্ৰ শিক্ষাৰ তৰফৰ পৰা কালি শিৱসাগৰ যুৱদ'লত অনুষ্ঠিত বিশেষ সভাত বিদ্যালয়ৰ তৰফৰ পৰা প্ৰধান শিক্ষক শ্ৰীযুত ৰাতুল শইকীয়াৰ প্ৰমুখ্যে পৰিচালনা সমিতিৰ সভাপতি শ্ৰী যুত দিগন্ত বড়াই এই পুৰস্কাৰ গ্ৰহণ কৰে।
আমি আশাবাদী এই স্বীকৃতিয়ে আমাক অধিক দায়বদ্ধ কৰিব, কৰ্মশীল কৰিব। ভবিষ্যতৰ দিনত বিদ্যালয়খনৰ গৰিমা আৰু স্বকীয়তা অক্ষুন্ন ৰাখিবলৈ সক্ষম হ'ব পৰাকৈ সকলোৰে আশীৰ্বাদ আৰু সহায় সহযোগিতা তথা পৰামৰ্শ কামনা কৰি এই সুখমধুৰ ক্ষণত সেৱা জনালো।
