19/09/2026
*आडसूळ पॉलिटेक्निकच्या विद्यार्थ्यांची विळद येथील आर.एम.सी प्रकल्पाला औद्योगिक भेट.*
चास, ता. नगर, जि. अहिल्यानगर : सौ. सुंदरबाई माणिक आडसूळ पॉलिटेक्निक, चास येथील स्थापत्य अभियांत्रिकी विभागातील विद्यार्थ्यांनी काँक्रीट तंत्रज्ञान विषयांतर्गत विळद येथील अल्ट्रा टेक कंपनीच्या तयार मिश्र काँक्रीट(आरएमसी) प्रकल्पाला औद्योगिक भेट दिली. विद्यार्थ्यांना अभ्यासक्रमातील सैद्धांतिक ज्ञानाचा प्रत्यक्ष औद्योगिक प्रक्रियेशी संबंध जोडता यावा, आधुनिक काँक्रीट निर्मिती तंत्रज्ञानाची माहिती मिळावी आणि गुणवत्ता नियंत्रण प्रक्रियेचा प्रत्यक्ष अनुभव घेता यावा, या उद्देशाने या भेटीचे आयोजन करण्यात आले.
या औद्योगिक भेटीदरम्यान आरएमसी प्रकल्पाचे गुणवत्ता प्रभारी श्री. कामेश शिवरकर यांनी विद्यार्थ्यांना तयार मिश्र काँक्रीट निर्मितीची संपूर्ण प्रक्रिया सविस्तरपणे समजावून सांगितली. त्यांनी काँक्रीट निर्मितीसाठी वापरण्यात येणारे सिमेंट, वाळू, खडी व पाणी यांचे योग्य प्रमाण, घटकांचे अचूक वजन, मिश्रण प्रक्रिया, तयार काँक्रीटची गुणवत्ता, वाहतूक व्यवस्था तसेच बांधकामाच्या ठिकाणी काँक्रीटचा योग्य वापर याबाबत मार्गदर्शन केले.
विद्यार्थ्यांनी आरएमसी प्रकल्पातील विविध यंत्रसामग्री व कार्यप्रणालीची प्रत्यक्ष पाहणी केली. तसेच काँक्रीटची अपेक्षित मजबुती, टिकाऊपणा व गुणवत्ता राखण्यासाठी करण्यात येणाऱ्या विविध चाचण्या आणि गुणवत्ता नियंत्रण प्रक्रियेची माहिती घेतली. विद्यार्थ्यांनी विविध तांत्रिक प्रश्न विचारून आपल्या शंकांचे निरसन करून घेतले.
या औद्योगिक भेटीमुळे काँक्रीट तंत्रज्ञान विषयातील विविध संकल्पना अधिक स्पष्ट झाल्या असून, प्रत्यक्ष प्रकल्प व्यवस्थापन, गुणवत्ता नियंत्रण, काँक्रीट निर्मिती आणि वाहतूक व्यवस्थेची माहिती विद्यार्थ्यांना मिळाली. वर्गामध्ये शिकलेल्या सैद्धांतिक ज्ञानाला प्रत्यक्ष औद्योगिक अनुभवाची जोड मिळाल्यामुळे विद्यार्थ्यांच्या तांत्रिक ज्ञानात मोठी भर पडली.
अभियांत्रिकी शिक्षणामध्ये पुस्तकी ज्ञानाबरोबरच प्रत्यक्ष औद्योगिक अनुभवाला विशेष महत्त्व आहे. अशा औद्योगिक भेटींमुळे विद्यार्थ्यांना आधुनिक बांधकाम क्षेत्रातील तंत्रज्ञान, कार्यपद्धती आणि गुणवत्ता मानकांची ओळख होते. भविष्यातील स्थापत्य अभियंता म्हणून आवश्यक असणारी व्यावहारिक कौशल्ये विकसित करण्यासाठी ही भेट विद्यार्थ्यांसाठी अत्यंत उपयुक्त ठरली.
महाविद्यालय प्रशासनाने भविष्यातही विद्यार्थ्यांच्या ज्ञानात व कौशल्यात भर घालणाऱ्या अशा शैक्षणिक व औद्योगिक उपक्रमांचे आयोजन करण्याचा संकल्प व्यक्त केला. विद्यार्थ्यांना प्रत्यक्ष उद्योगक्षेत्राशी जोडून त्यांचा तांत्रिक तसेच व्यावसायिक विकास साधण्याच्या दृष्टीने हा उपक्रम महत्त्वपूर्ण ठरला.
या उपक्रमासाठी संस्थेचे अध्यक्ष डॉ अनिरुद्ध आडसूळ, सचिव सौ. लिनाताई आडसूळ, संचालक श्री. कृष्णा आडसूळ, खजिनदार श्री. परमेश्वर आडसूळ, सदस्य डॉ. कल्पना आडसूळ, सौ रत्ना आडसूळ, सौ पायल आडसूळ, डॉ. प्रदीप एम. पाटील, डॉ. संभाजी पठारे यांचे मार्गदर्शन लाभले. तसेच आडसूळ पॉलिटेक्निकचे प्राचार्य डॉ. गडाख आर. एस. यांच्या प्रेरणेने हा औद्योगिक भेटीचा उपक्रम यशस्वीरीत्या पार पडला.
या औद्योगिक भेटीचे आयोजन स्थापत्य अभियांत्रिकी विभागाच्या विभागप्रमुख तथा विषय शिक्षिका प्रा. मस्के आकांक्षा, प्रा. भोस व्ही. आर. मॅडम तसेच समन्वयक प्रा. पठाण पी. जे. यांनी केले. विद्यार्थ्यांच्या शैक्षणिक प्रगतीसाठी आणि व्यावहारिक ज्ञानवृद्धीसाठी करण्यात आलेल्या या उपक्रमाचे सर्व स्तरांतून कौतुक होत आहे.
