MES Renavikar School Savedi, Ahilyanagar

वार्षिक स्नेहसंमेलन २०२५ /२६ विविध गुणदर्शन व पारितोषिक वितरण समारंभ म.ए.सो.पूर्व प्राथमिक शाळेत मोठ्या उत्साहात स्नेहसंमेलन साजरे झाले .या कार्यक्रमास प्रमुख पाहुणे म्हणून मा.सी.ए. शुभम जोशी सर ( माजी विद्यार्थी )हे उपस्थित होते .व तिन्ही विभागाचे मुख्याध्यापक व सर्व शिक्षक यांनी विद्यार्थ्याचे कौतुक केले .
#

म.ए.सो.पूर्व प्राथमिक शाळेत बालमेळावा उत्साहात साजरा .
# #

१९ नोहेंबर संस्था वर्धापन दिन बालवाडी विभागात संस्था वर्धापन दिना निमित्ताने स्पर्धेचे आयोजन करण्यात आले होते . त्यामध्ये श्लोक पाठांतर स्पर्धा ,चित्रकला स्पर्धा , फॅन्सी ड्रेस स्पर्धा या स्पर्धा घेण्यात आल्या होत्या . या कार्यक्रमासाठी प्रशालेचे शाळा समिती अध्यक्ष मा.डॉ. श्री. राजीव हजिरनीस सर . महामात्र मा.डॉ. श्री.बिबवे सर हे कार्यक्रमासाठी उपस्थित होते.अहिल्यानगर येथे कार्यरत असलेल्या नगरसेविका माजी विद्यार्थिनी मा.सौ. दिपालीताई बारस्कर यांच्या शुभहस्ते विजयी विद्यार्थ्यांना पारितोषिक देण्यात आले .
# #

म. ए. सो. रेणावीकर माध्यमिक विद्यालयात वार्षिक क्रीडा मेळावा उत्साहात साजरा
म. ए. सो. रेणावीकर माध्यमिक विद्यालयात २७, २८ आणि २९ नोव्हेंबर २०२५ रोजी आयोजित करण्यात आलेला त्रिदिवसीय क्रीडा मेळावा उत्साह, जोश आणि खेळीमेळीच्या वातावरणात संपन्न झाला. आठवी ते दहावीच्या विद्यार्थ्यांनी सूर्यनमस्कार, गोळाफेक, रस्सीखेच, १०० मी. धावणे, रिले व व्हॉलीबॉल अशा विविध स्पर्धांमध्ये उत्कृष्ट क्रीडाभाव दाखवत मैदान गाजवले. ⛹️‍♀️⛹️🤾🤾‍♂️
बक्षीस वितरणाच्या या कार्यक्रमाची सुरुवात अतिथी आगमन, प्रतिमा पूजन आणि सर्व विद्यार्थ्यांनी गायलेल्या मारुतीस्तोत्राने झाली. सूत्रसंचालन सौ.उपाध्ये यांनी तर प्रास्ताविक व अतिथी परिचय भालसिंग सरांनी करून समारंभाची सुयोग्य मांडणी केली. विविध स्तरावरील वेगवेगळ्या क्रीडा स्पर्धांमध्ये आपले प्राविण्य दाखवणाऱ्या विद्यार्थ्यांना प्रशालेतर्फे आज पदक आणि प्रमाणपत्राने गौरविण्यात आले. अशा सर्व बक्षीस पात्र खेळाडूंच्या यादीचे वाचन सौ अश्विनी कुलकर्णी यांनी केले.
या मेळाव्यात प्रशालेतर्फे दिल्या जाणाऱ्या फिरत्या चषकाचे प्रथम मानकरी यावर्षी – दहावी अ द्वितीय – दहावी ब आणि तृतीय – नववी अ हे ठरले असून या वर्गांनी हे बक्षीस पटकावत आपली क्रीडा क्षमता सिद्ध केली.🏆🏆🥇🥇
आज झालेल्या बक्षीस वितरणासाठी प्रमुख अतिथी म्हणून शाळेचे माजी विद्यार्थी, हँडबॉल खेळाडू व सध्या आयटी इंजिनिअर म्हणून कार्यरत असलेले श्री. रोहित उजगारे उपस्थित होते. त्यांच्या सोबत श्री. प्रशांत भिसे व श्री. सारंग खेर यांनीही उपस्थिती लावली. या क्रीडा मेळाव्याचे आयोजक भालसिंग सरांनी विद्यार्थ्यांच्या जोशपूर्ण सहभागाचे कौतुक करत या मेळाव्याचे आयोजन म्हणजे विद्यार्थ्यांमध्ये फिटनेस, शिस्त व जिद्द विकसित होणे हा मुख्य हेतू असल्याचे सांगितले.
पेमराज सारडा महाविद्यालयात नुकत्याच पार पडलेल्या कथाश्री करंडक स्पर्धेत विजेते ठरलेल्या गौरी साठ्ये, मुग्धा देवचके, राघव वरसाळे, मल्हार मुळे, सिद्धा चाकवते आणि गुंजन सेतवाल यांचा मानपत्र व रोख रक्कम देऊन गौरव करण्यात आला. शाळेला सलग दुसऱ्यांदा मिळालेला हा करंडक अभिमानाची बाब ठरली. 🏆🏆
आपल्या अतिथी मनोगतात उजगारे सरांनी अर्जुन–एकलव्य कथेचा दाखला देत, “स्पर्धेत विजेते जितके महत्त्वाचे तितकाच प्रत्येक स्पर्धकही अनमोल,” असा प्रेरणादायी संदेश विद्यार्थ्यांना दिला. अध्यक्षीय समारोपात मान.मुख्या.कांबळे सरांनी “आरोग्य हीच खरी संपत्ती” याचे महत्त्व पटवून देत विद्यार्थ्यांच्या टीम स्पिरिटचे कौतुक केले.
अशाप्रकारे विद्यालयाचा त्रिदिवसीय क्रीडा मेळावा व बक्षीस वितरण समारंभ उत्साह, शिस्त व क्रीडाभाव यांच्या सुंदर वातावरणात अत्यंत यशस्वीरीत्या पार पडला.पसायदानाने या कार्यक्रमाची सांगता झाली.

" स..... संविधानाचा "
म. ए. सो. रेणावीकर विद्या मंदिरात संविधान दिनानिमित्त विविध उपक्रम अतिशय उत्साहात साजरे करण्यात आले. विद्यालयाच्या मुख्याध्यापिका सौ.ललिता कारंडे यांच्या आणि शाला समिती अध्यक्ष डॉ. श्री राजीवजी हजिरनीस सर आणि महामात्र डॉक्टर श्री उमेश बिबवे यांच्या मार्गदर्शनाखाली विद्यालयात विविध उपक्रम आयोजित केले गेले.
यामध्ये मानवी साखळी, सेल्फी पॉईंट, प्रभात फेरी, उद्देशिका पठण, चित्रकला स्पर्धा, संविधान विषयक पोवाडा, संविधानावर आधारित गीत गायन तसेच व्याख्यानमाला अशा विविधांगी कार्यक्रमांचे आयोजन करण्यात आले होते.
संविधान विषयक व्याख्यानमालेत शाळेतील शिक्षिका सौ. गराडे यांनी तसेच समुपदेशक कु. निकिता गडाख यांनीही विद्यार्थ्यांना सखोल माहिती दिली.
परिसरामध्ये फेरी काढून संविधान विषयक घोषणा देत विद्यार्थ्यांनी नागरिकांमध्ये जागृती निर्माण केली ,तसेच पथनाट्याचेही सादरीकरण करण्यात आले.
डॉ. बाबासाहेब आंबेडकर यांच्या कार्याचा समग्र परिचय विद्यार्थ्यांना करवून देण्यात आला. याप्रसंगी पालकांनीही उपस्थित राहून विविध उपक्रमात सक्रिय सहभाग घेतला.
school

वर्धापन दिन

19 नोव्हेंबर 2025 बुधवार रोजी महाराष्ट्र एज्युकेशन सोसायटीचा 165 वा वर्धापन दिन रेणावीकर विद्यामंदिरात उत्साहात साजरा करण्यात आला.
विद्यालयाच्या मुख्याध्यापिका सौ ललिता कारंडे यांच्या मार्गदर्शनानुसार कार्यक्रमाचे नियोजन करण्यात आले.
संस्थापकांच्या प्रतिमेला पुष्पहार अर्पण करून त्यांच्याविषयी कृतज्ञता यावेळी व्यक्त करण्यात आली.
विद्यार्थ्यांनी श्रवणीय आवाजात मएसो गीत सादर केले.
यावेळी प्रशालेचे शालेय समिती अध्यक्ष मा. डॉ.राजीवजी हाजिरनीस,महामात्र डॉ. उमेश बिबवे हे उपस्थित होते. विद्यार्थ्यांना संस्थेच्या वाटचालीचा व प्रगतीचा इतिहास सादर करणारा प्रेरणादायी व्हिडिओ दाखवण्यात आला.
याप्रसंगी विद्यार्थी शिक्षक व शिक्षकेतर कर्मचारी उपस्थित होते शिस्तबद्ध व उत्साही वातावरणात संस्थेचा वर्धापन दिन साजरा करण्यात आला.

म. ए. सो. कै. दा. शं. रेणावीकर विद्या मंदिर,सावेडी,अहिल्यानगर.
आज शाळेमध्ये १४ नोव्हेंबर बाल दिनानिमित्त ' बालमेळावा ' आयोजन करण्यात आला होता. शाळेच्या मुख्याध्यापिका सौ.ललिता कारंडे यांच्या कल्पक मार्गदर्शनाखाली बाल दिनानिमित्त विविध गोष्टींचे आयोजन करण्यात आले होते. सुरुवातीला सकाळच्या प्रसन्न वातावरणात चाचा नेहरूंच्या प्रतिमेचे पूजन करून बाल मेळाव्याचे उद्घाटन करण्यात आले या कार्यक्रमांमध्ये संगीत शिक्षक श्री.थोरात यांचे स्वरचित व संगीतबद्ध बालगीत ' आम्ही सारी मुले बागेतली फुले' शाळेतील विद्यार्थ्यांनी सादर केले. या प्रसंगी शाळेतील शिक्षकांनी विद्यार्थ्यांसाठी विविध खाद्यपदार्थांचे स्टॉल लावलेले होते. तसेच प्रत्येक इयत्तेसाठी वेगवेगळ्या खेळांचे आयोजन करण्यात आले होते. यामध्ये हत्तीला शेपूट लावणे, टांगलेली जिलेबी खाणे, बादलीत चेंडू टाकणे, फुग्यावर बसून फुगा फोडणे अशा गमतीशीर खेळांचा समावेश होता. सर्व खेळांचा आणि खाद्यपदार्थांचा विद्यार्थ्यांनी मनमुराद आनंद लुटला. या बालमेळाव्यासाठी शाळेतील सर्व शिक्षकांनी व शिक्षकेतर कर्मचाऱ्यांनी विशेष परिश्रम घेतले. अशा रीतीने आजचा हा बालमेळावा अतिशय उत्साहात व आनंदात साजरा झाला.

मंगळवार दिनांक 11 नोव्हेंबर 2025 रोजी जननायक बिरसा मुंडा जन्मशताब्दी महोत्सव विद्यालयात साजरा करण्यात आला. मा. मुख्याध्यापिका सौ. ललिता कारंडे यांच्या प्रेरणेने विविध उपक्रम ठरवण्यात आले.
यामध्ये शालेय प्रांगणात व परिसरात बिरसा मुंडांच्या कार्यावर आधारित घोषवाक्य त्यांचे फोटो फेरी काढून विद्यार्थ्यांकडून म्हणून घेण्यात आले. चिमुकल्यांनी आदिवासी नृत्य, लघु नाटिका सादर केली. शालेय परिसरात वृक्षारोपण करण्यात आले.कथाकथन प्रश्नमंजुषा निबंध स्पर्धा यातून विद्यार्थ्यांनी आपली कला सादर केली. विविध कार्यक्रमाद्वारा बिरसा मुंडा जन्म शताब्दी निमित्ताने त्यांच्या कार्याचे स्मरण व गौरव याद्वारे केला गेला.

विद्यार्थी दिवस

सात नोव्हेंबर 2025 शुक्रवार रोजी विद्यार्थी दिन साजरा करण्यात आला. विद्यार्थ्यांना शालेय शिक्षणाचे महत्त्व व जाण असावी याकरिता डॉ. बाबासाहेब आंबेडकरांचा शालेय प्रवेशाचा दिवस हा विद्यार्थी दिवस म्हणून मा. मुख्याध्यापिका सौ ललिता कारंडे यांच्या संकल्पनेनुसार साजरा करण्यात आला.
डॉ. बाबासाहेबांच्या जीवनावर आधारित प्रश्नमंजुषा स्पर्धा, निबंध ,गायन स्पर्धा घेण्यात आल्या. तसेच त्यांच्या जीवनावर आधारित जीवनचरित्रपट विद्यार्थ्यांना दाखवण्यात आला.
शाळा प्रवेश व त्यानंतरचे शालेय जीवन भावी आयुष्याचा पाया आहे हे या निमित्ताने विद्यार्थ्यांच्या मनात रुजवले गेले.

शौर्यगाथा सांगती
हे दगडी भिंतींचे रूप
इथे झळकते इतिहासाचे तेज ; महाराजांच्या पराक्रमाची धूप
गड - किल्ले आहेत ऐतिहासिक ठेवा ;
कणखर महाराष्ट्राचा आपल्याला अभिमान हवा.

दरवर्षी म.ए.सो.च्या सर्व प्राथमिक शाळांमध्ये पर्यावरण पूरक किल्ले स्पर्धा हा उपक्रम राबविला जातो. मा. मुख्याध्यापिका सौ. ललिता कारंडे यांच्या संकल्पनेनुसार हा उपक्रम विद्यालयात अतिशय उत्साहात पार पडला.या उपक्रमा अंतर्गत रेणावीकर विद्यामंदिरात देखील युनेस्कोने जागतिक वारसा स्थळ म्हणून मान्यता दिलेले बारा किल्ले साकारले.

त्यामध्ये रायगड,सिंधुदुर्ग, सुवर्णदुर्ग,पन्हाळा,प्रतापगड, विजयदुर्ग, राजगड, लोहगड, जिंजी,साल्हेर,खांदेरी आणि शिवनेरी या किल्ल्यांचा समावेश होतो.

या किल्ला स्पर्धाचे परीक्षण करण्यासाठी मा. डॉ. राजीवजी हजिरनीस व मा. डॉ. निर्भय पिंपळे (नियामक मंडळ सदस्य) मा. श्री. राजेंद्र कांबळे व सौ.मंजुषा कुलकर्णी उपस्थित होते.

विद्यार्थ्यांनी पर्यावरण पूरक वस्तूंचा वापर करून जसे पुठ्ठा, कार्डबोर्ड, कापूस,गवत, काड्या, दगड - माती हे किल्ले साकारले. पालकांनी देखील यात उत्स्फूर्त सहभाग घेत विविध आकर्षक कल्पना साकारल्या. किल्ले देखणे करण्यास मदत केली. पावसासारख्या नैसर्गिक आपत्तीत देखील मुलांचे हे किल्ले दिमाखात उभे राहिले. याचे परिसरातील नागरिकांनी कौतुक केले.

स्पर्धेच्या बक्षीस वितरणाच्या कार्यक्रमात विद्यार्थ्यांनी शिवरायांच्या जीवनकार्यावर आधारित अफजल खानाचा वध या विषयावर आधारित पोवाडा विद्यार्थ्यांनी साभिनय सादर केला. यानंतर अतिशय खड्या आवाजात गारद म्हणून शिवरायांना मानवंदना देण्यात आली.

विद्यार्थ्यांनी किल्ल्यांविषयी दिलेल्या माहितीचे कौतुक आपल्या भाषणात डॉ. हाजीरनीस सरांनी केले. तसेच शिवाजी महाराजांचे न्यायदान ही कथा सांगणाऱ्या श्रावणी सद्रे व पोवाडा म्हणणाऱ्या अंशुमन आटोळे या विद्यार्थ्याला उत्स्फूर्त रोख रकमेचे पारितोषिक जाहीर केले.
विद्यार्थ्यांनी शाश्वत जीवनावर आधारित पर्यावरण पूरक किल्ले साकारले : याबद्दल श्री पिंपळे सरांनी शिक्षक व विद्यार्थ्यांचे जाहीर अभिनंदन केले.
कार्यक्रमाचे सूत्रसंचालन सौ. आहेरकर व आभार प्रदर्शन सौ महाजन यांनी व्यक्त केले.

म.ए.सो. रेणावीकर माध्यमिक विद्यालयाने वंचितांची दिवाळी आनंदित करण्यासाठी जपला सामाजिक बांधिलकीचा मूल्य संस्कार
आज गुरुवार दिनांक 16 ऑक्टोबर 2025 रोजी उद्यापासून सुरू होणाऱ्या दीपोत्सवाच्या पूर्व दिवशी रेणावीकर माध्यमिक विद्यालयातील विद्यार्थी आणि अध्यापक यांनी संयुक्तपणे होऊ आम्ही उतराई आणि एकमुष्टी धान्य योजना या उपक्रमांतर्गत वंचितांची दिवाळी आनंदित करण्यासाठी धान्य आणि दीपावली उपयुक्त वस्तूंचे एकत्रीकरण करून बालघर या अनाथ मुलांच्या संस्थेस तर सेवा भारती दक्षिण अहिल्यानगर या संस्थेमार्फत पूरग्रस्तांना मदत दिली.
या कार्यक्रमास बालघरचे संचालक श्री श्रीकांत संभाजी भोस बालघर प्रकल्पाच्या काही छोट्या दोस्तांसह उपस्थित होते, तर सेवा भारती दक्षिण अहिल्यानगर चे जिल्हा सचिव श्री उदय भणगे, कोषाध्यक्ष श्री भाऊसाहेब उन्हाळे, आपत्ती व्यवस्थापन प्रमुख श्री राजेश परदेशी हे उपस्थित होते
सर्व उपस्थित मान्यवरांच्या समवेत आणि विद्यार्थ्यांच्या उपस्थितीत राष्ट्रगीताने कार्यक्रमास प्रारंभ झाला या कार्यक्रमांतर्गत माननीय मुख्याध्यापक श्री राजेंद्र कांबळे सर यांनी विद्यार्थ्यांचे अभिनंदन करून उपक्रमास दिलेल्या भरघोस प्रतिसादाबद्दल त्यांचे कौतुक केले व पालकांचे आभार मानले