23/11/2013
Tamudek u gle takoeh bak bili,
Peutroen u pasi taloe jeureungkha,
Hudep lam donya Beu hati-hati,
Bek roeh takropsi ngoen pajoeh riba.
Bukoen le sayang bintang meuriti,
Oh wate pagi ka padam cahya,
Hudep lam donya beu hati-hati,
Riba ngoen kropsi meubek ta hawa.
Kuala Aceh bate meuriti,
Hotel Reunggali toe laot tawa,
Hudep lam donya Beuna bakeuti,
Ayah ngoen ummi tabalah jasa.
Rincoeng meu pucoek tampoek suasa,
Atra pusaka endatu keubah,
Hudep lam donya Tanyoe syedara,
Ayah deungan ma beugoet tapapah.
Meutan goegajoe kupue teuh kiki,
Meunyoe tan campli kupue teuh sira,
Akhirat donya meutan arueti,
Ayah ngoen ummi tadaruhaka.
