Titanium - TMGSS 2016-17 Student Association

26/09/2017

最終章。

2016/17 屯門官立中學學生會內閣 Titanium

26/09/2017

20170925 學生會交接儀式

24/09/2017

有始有終。

2016/17 屯門官立中學學生會內閣 Titanium

23/09/2017

20170922 社際男子羽毛球比賽

賽果：
紅社 對 綠社 綠社勝
綠社 對 黃社 黃社勝
藍社 對 紅社 藍社勝
黃社 對 藍社 藍社勝

假若同學有感相片內容不妥或因而產生不愉快的情緒，同學可私下與本會聯絡。本會將會按相屬同學的意願，刪除有關照片。

22/09/2017

「如果你還記得當初的承諾……」

2016年9月1日，
我哋曾經喺度許下諾言：
「我哋將以『公開透明』作為一切行事嘅作風，
活動亦唔會『被失蹤』。」

時日如梭，
Titanium嘅任期轉眼迎來尾聲，
呢一年內我哋有幸獲得過肯定，
亦受過同學嘅批評。
無論此刻你對Titanium嘅觀感如何，
我哋都想就住呢年做得好與唔好嘅事每個你道謝同道歉。

以下將會臚列本會提出過嘅活動及服務，
並交代相關舉辦情況或未能成功舉辦嘅原因：

「學生會附屬幹事及各部門副部長招募計劃」
我哋於當選後一個月內成功招募附屬幹事及副部長共十四人，
大大提升學生會嘅運作效率，
謹在此向所有附屬幹事、副部長及曾參與面試嘅同學致謝。

「時裝表演」
我哋於試後活動期間成功舉辦時裝表演，
並以「環保」作主題。
各班同學有不同嘅奇思妙想，
服裝耀眼奪目、別具巧思，
台下觀眾亦反應熱烈，活動頗為成功。
感謝每位同學嘅參與及支持令活動得以順利舉行。

「自由師生組隊閃避球」
此項活動曾因多方原因而先後兩次延期，
所幸九月開學後場地、參賽者、評判等各項因素都能夠配合比賽，
比賽得以順利進行。
當日有唔少同學觀賽，
參賽者亦樂在其中，
相信有幸成為大家中學生涯中一個美好嘅回憶。

「LOL屯官盃」
我哋喺當選前後都曾經向電腦科老師詢問關於學校配套能否舉辦LOL屯官盃嘅問題，
老師指出我哋學校電腦數量足夠，
遊戲嘅安裝問題亦可靠外置硬件解決，
基本上學校嘅硬件配套絕對容許我哋舉辦LOL屯官盃，
因此我哋早於第一次正式會議已向校長介紹此項活動。
可惜，
校方以同學學業、學生會形象、家校關係等為由要求擱置活動，
即使我哋極力游說校方，
亦尋求過替代方案，
最後仍然無功而還。

不過綜合校方嘅理據，
當下舉辦電競比賽最大嘅障礙係學校認為學生會作為代表全校學生嘅團體，
唔適合以官方名義舉辦電競比賽。
若往後嘅學生會想舉辦同類活動，
我哋建議先由同學自發性組織及舉辦相關活動，
而學生會只負責提供獎品及場地；
配合社會對電競業日漸開放嘅態度，
相信校方嘅態度終會軟化，
共議出雙贏嘅方案。

「才藝表演」
才藝表演於試後活動期間順利舉行，
當日更有校友特意回校參賽；
同學各展所長，
令觀眾及評判都讚嘆不已。
我哋好高興能夠提供一個俾同學展現才能嘅平台，
亦感謝同學對才藝表演活動嘅支持。

「屯官T-files」
屯官T-files原定係一個懸疑類嘅密室逃脫遊戲，
但由於今年數學學會已舉辦同類活動，
加上於試後活動期間學生會需要負責其他活動，
時間同人手等等都難以分配，
為確保其他活動嘅質素，
學生會幹事經商議後決定捨棄此項活動。

「學習小組安排」
我哋曾於十月至十一月提出自組學習小組並開放予全校同學報名，
惟參加人數甚少，
因此學校難以調配教師或助教看管同學安全、協助解決學業疑難等，
此項活動便告終結。
不過現時學校嘅自修室長期開放，
而且依平時所見同學會自動向老師請教疑問，
因此即使此項活動取消，
相信屯官同學仍有方法獲得同樣嘅成效。

「校慶填詞比賽」
我哋喺一月至二月嘅時候曾經張貼海報向各位同學介紹校慶填詞比賽，
但係至今只收到一份作品。
由於校慶將會持續到明年四月，
稍後我哋將會與下屆學生會洽談延續校慶填詞比賽的事宜。

「聯校口試工作坊」
聯校口試工作坊喺二月順利舉行。
參與學校包括南屯門官立中學、順德聯誼會梁銶琚中學、妙法寺劉金龍中學以及宣道會陳瑞芝紀念中學。
同學藉此機會與友校同學切磋，
模擬公開試的場景，
獲益良多。

「本土文化嘉年華」
本土文化嘉年華亦於上學年成功舉辦，
令同學得以從「衣、食、住、行」四方面重新認識香港，
感謝各班同學的付出令整個活動多姿多彩。

「售賣凍飲服務」
了解過上屆學生會無法售賣凍飲係由於學生會辦事處唔可以設置雪櫃後，
我哋曾經嘗試帶小型保溫箱回校，
希望能夠實行此項目標。
可惜保溫箱難以做到明顯嘅冰凍效果，
令此項服務唔能夠成功推行。
Titanium全員就此誠懇地向全體同學道歉。
不過，
反映過後校方向我哋透露屯官於數年之內將會增設飲品自動販賣機及小食部，
屆時屯官同學便可購得凍飲。

「代訂社衫班衫服務」
有不少班級及社都有享用此項服務，
頗為成功。

「學術資源分享平台」
我哋本來打算利用雲端技術喺網上建立一個共享學術資源嘅平台，
為此我哋曾向十數間聯校詢問能否與佢哋交換試卷；
我哋亦收集咗唔同嘅筆記同參考資料。
不過於與校方嘅第一次會議之中，
校方提出分享別校嘅資源有可能造成版權及法律問題，
令學校陷於麻煩嘅局面。
多番考量之下，
學術資源分享平台被取消。
可幸嘅係現時校方開放自修室，
內有大量舊試題、參考書等學術資源，
有需要嘅同學亦可以輕易從學校獲得呢啲資源。

呢一年以嚟，
我哋Titanium盡力為同學提供更好嘅學習環境，
務求為改善屯官出一分力。
然而，
我哋深知我哋所做嘅一切未盡圓足，
承蒙各位同學嘅包容、鼓勵，
以及善意嘅監察同督促，
我哋先可以越戰越勇，
逐漸進步。
因此，
喺衷心感謝同學之餘，
我哋更希望再一次勸勉同學留意學生會嘅一舉一動，
適時反映意見，
協助所選嘅內閣成為真正屬於屯官、代表屯官嘅學生會。

2016/17 屯門官立中學學生會內閣 Titanium

21/09/2017

20170921 學生會選舉日
第二十七屆學生會選舉投票結果：

總投票人數：690人
1號候選內閣I.F所得選票：406票
2號候選內閣Fusionist所得選票：223票
廢票（無效票）：61票

結果：
1號候選內閣I.F以六成半有效票數勝出是次選舉，
並將成為屯門官立中學第二十七屆學生會。

21/09/2017

「那天你話我想搞SA
　我答你好哇OK
　要改革就要夠堅定」

今日係九月二十一日，
亦即屯門官立中學第二十七屆學生會嘅選舉日。
喺顧問老師、學生會以及兩閣閣員嘅主持同監察之下，
今日選舉最終圓滿落幕，結果亦正式誕生。

以下為本次學生會選舉嘅投票結果：
1號候選內閣I.F所得選票：406票
2號候選內閣Fusionist所得選票：223票
廢票（無效票）：61票

結果：1號候選內閣I.F以接受六成有效票數勝出是次選舉，
並將成為屯門官立中學第二十七屆學生會。

在此，本會先恭喜1號內閣I.F成功當選，
並祝願佢地係未來能夠保持現時嘅一腔熱血，
繼續以同學為己任，
於來年為同學創造更難忘同具特殊意義嘅屯官生活。
學生會作為校園內具民意授權嘅最大學生組織，
定當以同學福祉為先，個人利益為後，
真正貫徹「非以役人，乃役於人」嘅精神。
下屆學生會背負住嘅唔單止係名義上嘅責任，
更加係406位屯官同學嘅信任同希冀，
以及276位同學嘅鞭策同監督。
還望11位同學及未來嘅附屬幹事不負眾望，
兌現選舉承諾，展現風骨。

此外，本會亦冀望2號內閣Fusionist能夠繼續秉持熱誠，
不忘參選期間希望服務同學嘅初心，
透過制度內外繼續實現個人同團隊理想。
參選學生會固然係服務同學、
回饋我校嘅途徑之一，
但亦往往不限於此。
本會相信屯官同學於往後嘅日子都會有更多機會，
係校園中見到你地係其他範疇上為學校作出貢獻。
即使未能躬身實現政綱，
同學亦可為下任學生會提供意見想法，
共同力行當日所言。

本會將於星期一學生會交接典禮正式交棒予新任內閣，
而學生會辦事處自星期二起會由下屆接手營運。
換而言之，
本會可以繼續以「學生會」名義，
發表一番肺腑之言嘅時日亦已無多，
僅希望可以利用僅餘嘅時日同機會，
以「選舉過來人」嘅身份講一番說話，
希望仲剩一點份量。

有人視學生會選舉為一場比賽嘅終點。
由籌組內閣、招攬人才，
至構思政綱、演練宣傳，
一步步走向選舉全然不易，
其中一點一滴，實在不足為外人道。
跌過撞過，你每日越發期待比賽嘅完結，
好接受勝利嘅桂冠，得到加冕。
路途上你哋或許遇上旁人嘅勸阻同批評，
而你百言莫辯，有理說不清，
就更加希望以勝利終結一切流言。

但事實上，學生會選舉只係一切嘅起點。
經歷選舉嘅洗禮之後，
你或者會因為結果而欣喜若狂，
而相信你亦比任何人都有資格講，
學生會唔係一句
「那天你話我想搞SA
　我答你好哇OK」
咁簡單、咁表面、咁膚淺。
但更重要嘅唔係你經歷幾多，
感悟幾深，理念幾真。
參選學生會，
當初或者只係因為一個忽爾閃過嘅念頭，
一個偶然嘅契機，
可以鬆散得站唔住腳，
亦當然唔排除具長遠組織嘅可能。
但你必須理解嘅係，
學生會重要嘅從來都唔係當初嘅組成，
唔係當初嗌嘅口號同熱血，
而係你嘅堅持同信念，
你可以維持呢番幹勁幾耐。

學生會，共勉之。

2016/17 屯門官立中學學生會內閣 Titanium

18/09/2017

參賽老師：
許劭峪老師 劉愷欣老師
馮子健老師 林震宇老師
在此感謝所有老師及同學的積極參與。:)

17/09/2017

「你點知老師會同學生打波㗎？」
「唔知㗎......希望在明天呀嘛！」

先前學生會曾着手準備於五月中舉辦師生閃避球比賽，
惟後來因時間協調問題而暫時擱置，
本會謹就安排之不善在此再度道歉。
然而，經過開學後與校方、參賽隊伍的深入討論後，
最終決定復辦比賽，
而詳情如下：

比賽日期：9月18日(一)
時間：午息時段
比賽隊伍：2隊
隊伍結構：每隊15人，而當中須包括至少2名老師或助理教師
參賽老師：
1. 許劭峪老師 劉愷欣老師
2. 馮子健老師 林震宇老師

先前比賽有四隊隊伍，
惟其中有兩隊向本會自行申請退出比賽，
本會就此表示遺憾。
因此，由於是次比賽僅有兩隊對賽，
賽制將採用三盤兩勝制，
歡迎有興趣觀賞賽事的同學於明日午息時段前往排球場欣賞。 :)

2016/17 屯門官立中學學生會內閣 Titanium

16/09/2017

20170916 學界甲乙組男子足球分組賽
賽果：
日期：16/09/2017
對賽學校：明愛屯門馬登基金中學
結果：1-0(勝)
恭喜我校男子足球隊在此場賽事中獲勝，祝願全隊越戰越強，繼續為屯官爭光 :)

07/09/2017