港大講永續, Hong Kong (2026)

09/09/2026

【🌏永續小測驗｜聯合國永續發展目標（SDGs）：保育陸域生態🌳🐾】

試想像下，如果無咗森林為我哋淨化空氣、無咗健康嘅泥土種植糧食，人類嘅生活到底會變成點？保育陸地生態，絕對唔單止係為咗週末有靚景行山打卡，仲直接關乎人類嘅糧食安全、氣候調節、水源淨化同埋防範自然災害。

隨住城市過度開發、氣候變化，加上全球部分地區因為過度農業擴張，令好多野生動植物失去家園，土地亦因為退化而逐漸變成沙漠。根據聯合國數據，全球每年有成千萬公頃嘅森林消失（大約等於成個南韓嘅面積！），更有過百萬種動植物面臨絕種危機！點樣確保地球「綠色心臟💚」同生物多樣性得以延續，已經係刻不容緩嘅挑戰。

👇根據聯合國永續發展目標（SDGs），「保育陸域生態」包括以下細項指標：
🔹15.1 保護和恢復陸地淡水生態系統：確保陸地和淡水生態系統及其服務的保護、恢復和可持續利用；
🔹15.2 推動可持續森林管理，終止森林砍伐：推廣可持續管理各類型森林，停止森林砍伐；
🔹15.3 對抗荒漠化，恢復退化土地：對抗荒漠化，恢復退化的土地和土壤；
🔹15.4 保護山地生態系統：確保山地生態系統及其關鍵服務能力的保護；
🔹15.5 防止物種滅絕，保護生物多樣性：採取緊急行動，減少自然棲息地退化，防止物種滅絕；
🔹15.6 確保公平分享遺傳資源利益：確保公平合理地分享利用遺傳資源帶來的效益；
🔹15.7 終止偷獵和走私野生動植物：採取緊急行動，終止偷獵及走私受保護的野生動植物；
🔹15.8 控制外來入侵物種：防止引入外來入侵物種，並減輕其對陸地和水生生態系統的影響；
🔹15.9 將生態系統價值納入規劃：將生態系統及生物多樣性的價值納入國家及地方規劃；
🔹15.A 增加保育資金：從各渠道籌集並大幅增加保護生物多樣性和生態系統的資源；
🔹15.B 支持可持續森林管理資金：加強發展中國家的可持續森林管理融資；
🔹15.C 加強打擊非法野生生物貿易：加強全球打擊非法野生生物貿易的力度。

世界好多地方正面對「森林大火頻發」、「物種滅絕」、「非法野生動植物貿易」等危機——要守護地球嘅生態系統，各國政策、保育行動同大眾嘅日常生活習慣都非常重要。一齊睇下推動SDG15嘅🌍國際同本地案例！⬇️

🪾 哥斯達黎加：由「砍伐大國」變身「全球綠色模範」

中美洲國家哥斯達黎加曾經因為過度放牧同伐木，令森林覆蓋率大幅下降。但佢哋透過強大嘅政策，成功令森林「起死回生」：
💠推行「環境服務付費計劃」（Payments for Ecosystem Services, 簡稱 PES）：政府向保護森林、植樹造林嘅土地擁有者發放補貼，令農民由「斬樹賺錢」變成「護樹賺錢」，成功令全國森林覆蓋率由80年代嘅20%幾，大幅回升到現時超過50%。
💠大力發展「生態旅遊」，將全國近四分之一嘅土地劃為國家公園同保護區。透過保育野生動植物（如樹懶、海龜）吸引全球遊客，證明咗「保育」同「經濟發展」絕對可以雙贏。

🏜️ 非洲「綠色長城」：跨國聯手對抗沙漠化
面對撒哈拉沙漠不斷向南擴張，吞噬農地同水源，非洲多國展開咗一項史無前例嘅生態工程：

💠啟動「非洲綠色長城」（Great Green Wall）計劃，目標係橫跨非洲大陸（長達8,000公里）種植一條龐大嘅植物帶，以阻擋沙漠化。
💠計劃唔單止恢復咗數以百萬公頃嘅退化土地，仲改善咗土壤質素，為當地創造咗大量農業同綠色就業機會，同時減少因為資源短缺而引發嘅地區衝突。

🏙️ 香港：保育與農業雙贏！隱藏於都市中嘅生態寶庫
香港雖然係高度發展嘅大都會，但其實擁有超過40%嘅受保護綠色版圖，生物多樣性極之豐富。我哋嘅郊野公園條例正正就保育到成熟嘅森林。我哋中心亦積極推廣將「農業發展」同「生態保育」完美結合嘅共生模式：

💠推動「農林業」（Agroforestry）與林共生：透過鄉郊活化（如永續荔枝窩計劃）推行農林間作，修復退化土地；而「LoCoFARMS（本地種植）」嘅本地咖啡——正正採用「林蔭種植」模式，將咖啡樹種喺原有嘅森林樹冠之下。善用林間微氣候保護農作物，同時保留森林結構同野生動植物棲息地，真正做到農業與生態修復雙贏！
💠米埔自然護理區：作為國際重要濕地，米埔係候鳥（例如極度瀕危嘅黑臉琵鷺）遷徙路線上嘅重要中轉站。世界自然基金會（WWF）同政府合作進行基圍及紅樹林管理，為候鳥提供安全棲息地。
💠制定「生物多樣性策略及行動計劃」（BSAP）：政府加強保育本地物種（例如盧氏小樹蛙、穿山甲），並打擊非法野生動植物貿易。

實現「保育陸域生態」，我哋喺日常生活都可以出一分力：
✅ 減少用紙：善用雙面打印，轉用電子帳單；買紙巾或木製品時認住「FSC認證」（森林管理委員會），確保產品來自可持續管理嘅森林📄
✅ 支持生態農業及綠色消費：選擇購買有森林管理委員會(FSC-Forest Stewardship Council)認證嘅產品，透過消費力量改變現況！由每日一杯咖啡開始，支持與大自然共生嘅永續農業！☕🌳
✅ 支持保育行動：參與本地嘅植樹活動、清除外來入侵物種或山野清潔行動，身體力行愛護大自然🌱

希望未來，我哋可以同地球上所有動植物和諧共存，令呢片綠色家園繼續生生不息！🌍✨

如果你想了解更多關於其他聯合國永續發展目標（SDGs），可以參閱留言區嘅🌟延伸閱讀～

#保育陸域生態 #生物多樣性 #環境保護 #愛護大自然 #永續發展 #綠色生活 #聯合國 #永續小測驗

02/09/2026

【AI新科技 × 社會共融👥｜當 AI 融入招聘程序，誰會被in？誰會被out？🚧】

「多元、平等、共融（DEI）」近年成為唔少企業重視嘅方向。越來越多機構認同，一個多元共融團隊有助企業創新同吸納更多人才，同時亦更能夠回應客戶同社會需要。隨之而來，廣攬多元人才、拓展人才庫，就成為咗各機構 HR 團隊嘅首要任務！

面對大量求職申請，唔少公司開始引入 AI 協助篩選 CV，甚至利用演算法進行影片面試，務求快速識別「符合條件」嘅理想求職者。不過，呢啲「理想條件」係點樣得出㗎呢？🤔如果AI背後嘅訓練數據帶有偏見，一啲有能力但背景、表達方式或需要支援方式不同嘅多元人才，可能喺第一關就被無聲無息咁淘汰，成為「排除在系統外嘅人」💔AI 招聘工具本意係提升效率，協助HR 更快尋找合適人才；但如果缺乏監察，AI有機會將隱性歧視自動化甚至規模化，令企業同真正嘅「多元共融」越行越遠！

我哋可以點樣善用 AI，同時避免陷入歧視陷阱，確保每位多元人才都有平等機會展現所長呢？👇

＝＝＝＝＝＝＝＝＝＝

💡 國際借鏡：美國監管偏見第一步

美國司法部曾發佈《Algorithms, Artificial Intelligence, and Disability Discrimination in Hiring》技術輔助指引，提醒僱主使用演算法或 AI 招聘工具時，必須確保有能力嘅求職者唔會因殘疾而被不公平篩走，並應提供「合理調適（Reasonable Accommodation）」。例如，如果 AI 影片面試系統過度依賴面部表情、眼神接觸或語音分析，可能會對有語言障礙、神經多樣性特質，或眼神習慣不同嘅 SEN 求職者造成不利影響，僱主便有可能負上法律責任。美國平等就業機會委員會（EEOC）亦針對 AI 系統造成嘅「不利影響」發出指引，提醒企業忽視演算法偏見所面臨嘅法律風險。

紐約市就率先立法，要求企業對 AI 招聘工具（AEDT）進行年度「偏見審計（Bias Audit）」，但現行法例主要涵蓋性別、種族/族裔，以及相關交叉類別，未有明確涵蓋殘疾及年齡。因此，當地民間團體仍然努力為唔同殘疾及年齡嘅求職者爭取更全面保障。

＝＝＝＝＝＝＝＝＝＝

🔎本地倡議方向

縱然香港現時未有專門針對 AI 招聘嘅法例，平機會早前亦回應立法會提問，表示會持續與持份者溝通以促進共融應用。

除咗法律規管，AI 招聘應用開發商或者僱主，又可以如何積極採取行動，確保自己的產品同公司可以做到多元共融呢？

1️⃣ 建立全面嘅數據及演算法偏見審查機制 📊
不論係 AI 開發商定係採用AI工具嘅企業，都應定期評估訓練數據嘅公平性、完整性與可訪問性，切忌忽視不同種族、殘疾、年齡等社群嘅數據代表性，避免偏見自動化。

2️⃣ 堅守人本判斷及決策原則 🤝
AI 工具可以協助HR處理大量資料，但唔應該成為招聘決策嘅唯一依據。喺最終錄用等關鍵招聘決策中，企業應保留人工判斷與覆核機制，確保 AI 只作輔助參考，避免演算法一刀切，錯失具潛力嘅多元人才。

3️⃣ 保持彈性溝通，著重合理調適 🔍
企業僱主應清晰告知求職者招聘過程中會否使用 AI、AI 會用於邊一個環節，以及相關結果會點樣影響招聘決定。同時，求職者應有渠道提出疑問、要求人工覆核，或申請合理調適，例如改用人工面試、文字作答、延長作答時間等調整方式。

🌟AI 唔一定係實踐共融招聘嘅阻力，關鍵在於企業點樣設計、運用同監察相關工具。如果 AI 只係複製過去嘅招聘習慣，好容易會令舊有偏見植根更深、擴散更快；反之，企業若能建立偏見審查機制、堅守人本決策，並給予合理調適，AI依然係廣納多元人才嘅得力工具。

＝＝＝＝＝＝＝＝＝＝

👉 如果要你設計一套 AI 招聘守則，你會將邊一項放喺第一位？歡迎留言分享你嘅想法！💬

下一篇我哋會同大家分享「🏢企業管治篇」：當企業使用 AI產出錯誤內容，最終責任應該由邊個承擔？記得繼續留意我哋最新嘅資訊！✨

【AI新科技 × 氣候🌿｜AI 如何讓城市更早「看見」氣候風險？🏙️】傳送門：https://www.facebook.com/share/p/1DLUpavZNi/

#新科技 #人工智能 #環境 #社會共融 #企業管治 #數碼轉型 #智慧城市 #數據倫理 #可持續發展

26/08/2026

【🌏永續小測驗｜聯合國永續發展目標（SDGs）：可負擔且乾淨的能源⚡☀️】

講到「能源」，你第一時間會諗起交電費同開冷氣？其實能源唔只係「有電用」咁簡單，仲直接關乎氣候變化、經濟發展同人類的基本生存條件。

隨住全球暖化加劇、化石燃料逐漸枯竭同能源價格波動，點樣確保每一個人都可以用到「平靚正」又對環境無害嘅潔淨能源，已經成為各國共同面對嘅重大挑戰。根據聯合國數據，世界上仍然有數以億計嘅人生活喺無穩定電力供應嘅地方，或者仲依賴緊極度污染環境同危害健康嘅燃料（例如木柴、動物糞便）嚟煮食！

👇根據聯合國永續發展目標（SDGs），「可負擔且乾淨的能源」包括以下細項指標：
🔹7.1 確保所有人都能取得可負擔、可靠及現代化的能源服務。
🔹7.2 大幅增加再生能源（如太陽能、風能、水力發電等）在全球能源結構中的比例。
🔹7.3將全球能源效率的改善率提高一倍（即是用更少嘅能源，做到同樣甚至更多嘅效果）。
🔹7.a 加強國際合作，促進潔淨能源研究與技術（包括再生能源、能源效率以及先進和更清潔的化石燃料技術）的獲取，並促進對能源基礎設施和潔淨能源技術的投資。
🔹7.b 擴大基礎設施並提升技術，為所有開發中國家（特別是最不發達國家、小島嶼發展中國家）提供現代和可持續的能源服務。

世界好多地方仍然面對「極端依賴化石燃料」、「貧困地區能源匱乏」、「轉型綠色能源成本過高」等問題——要實現永續能源，政府政策、科技創新同民間參與都扮演住關鍵角色。一齊睇下推動SDG7嘅🌍國際同本地案例！⬇️

🌬️ 丹麥：以「風力發電」引領全球綠色轉型

丹麥係全球推動再生能源嘅先驅，目標喺2050年全面擺脫化石燃料，全國100%使用再生能源：
• 丹麥三面環海且地勢平坦，擁有絕佳的風場優勢。政府善用地理優勢發展離岸及陸上風力發電，有時風力強勁時風力發電量甚至超過全國用電需求，可以將多餘電力出口至德國、瑞典與挪威等鄰國。
• 推動「社區風電合作社」，鼓勵當地市民共同出資購買風力發電機，令市民由「用家」變成「發電投資者」，直接支持綠能並分享發電利潤，成為丹麥能源轉型嘅重要基石。
• 高效能嘅「區域供熱系統」結合熱電聯產（CHP）、發電廠或工業廢熱回收以及龐大嘅儲熱技術，轉化為居民冬天嘅暖氣。近三分之二嘅丹麥家庭透過地下絕緣管道接收由集中設施或發電廠產生嘅暖氣與熱水，實現了極高的能源利用率。

☀️ 新加坡：土地限制下推動能源轉型

新加坡因地理位置鄰近赤道，日照充足，為再生能源嘅推廣提供可行性同發展前景：
• 大規模推行「水上浮動太陽能發電廠」（例如勝科登格浮動式太陽能發電廠Sembcorp Tengeh Floating Solar Farm），該發電廠發電容量達60百萬瓦（MWp），面積相當於45個足球場（45公頃），產出嘅電力專門供應全國5座自來水廠。
• 推行「SolarNova」跨部門大型太陽能計劃，喺公共房屋（組屋）及政府大樓屋頂大量安裝太陽能板，以克服土地狹小嘅限制，加速推動再生能源發展。
• 積極投資智能電網同儲能系統（ESS），確保天氣變化時電力依然穩定供應。

🏙️ 香港：以「減碳及節能」推動綠色城市

香港主要依靠進口燃料，近年積極推動能源轉型同節約能源：
• 推出「上網電價」計劃，電力公司以較高價格（每度電 2.5港元至4.0港元）收購市民或機構安裝太陽能或風力發電系統所產生嘅電力，鼓勵全民參與發電。
• 逐步減少燃煤發電，轉用天然氣及零碳能源，目標爭取喺2050年前實現碳中和。
• 推行「強制性能源效益標籤計劃」，規定喺香港供應嘅電子產品必須貼上能源標籤，分級由1級（最節能）至5級不等，鼓勵消費者購買高能源效益嘅電器。
• 大力推動綠色運輸，透過電動私家車「一換一」計劃，全面支援電動車普及化，並擴展充電網絡，減少路面廢氣同燃油依賴。

實現「可負擔且乾淨的能源」，我哋喺日常生活都可以出一分力：
✅ 節約用電：冷氣保持25.5度，離開房間記得熄燈、熄冷氣，並掹走後備插頭🔌
✅ 選購節能產品：買電器時認住「一級能源標籤」，慳電減碳之餘仲可以慳電費💡
✅ 善用自然資源：日頭盡量打開窗簾用自然光，天氣涼爽時開窗吹風代替開冷氣🌬️
✅ 支持低碳出行：多乘搭公共交通工具，或者踩單車、步行，減少對燃油車輛嘅依賴🚌

希望未來，我哋可以共同打造一個低碳、環保，而且人人都負擔得起潔淨能源嘅永續社會。🌈🫶

如果你想了解更多關於其他聯合國永續發展目標（SDGs），可以參閱留言區嘅🌟延伸閱讀～

#可負擔的潔淨能源 #再生能源 #節能減碳 #氣候行動 #綠色能源 #永續發展 #聯合國 #永續小測驗

19/08/2026

【AI新科技 × 氣候🌿｜AI 如何讓城市更早「看見」氣候風險？🏙️】

面對氣候變化帶來越來越頻繁嘅極端天氣，未來城市除咗需要更強嘅基建，仲需要更快、更準確嘅數據分析同「智慧決策能力」。🌏過去，城市管理好多時依靠歷史數據、人工分析同傳統模型作判斷；但當面對突如其來嘅暴雨、熱浪、能源需求高峰等複雜問題，大量即時數據需要喺短時間內被分析同判斷，傳統方法未必足以應付。人工智能（AI）嘅出現，為氣候治理帶嚟新可能。透過分析氣象、能源、交通及城市環境等多元數據，協助城市預測風險、優化資源分配，並支援更科學、更精準嘅城市規劃及氣候行動。

今次我哋由「AI × 氣候韌性」出發，一齊探索科技如何協助城市由「事後應對」走向「提前預測」，建立更智慧、更可持續嘅未來。🌱

＝＝＝＝＝＝＝＝＝＝

💡 國際借鏡：新加坡 AI 智慧城市規劃

作為人口密集、土地有限嘅城市國家，新加坡一直積極利用數據同科技提升城市管理能力。面對升溫、極端降雨及海平面上升等氣候風險，新加坡將AI、數碼孿生（Digital Twin）及城市模型融入規劃過程，協助政府分析唔同氣候情境下城市可能面對嘅影響。

其中，新加坡 Urban Redevelopment Authority（URA）利用城市氣候模型研究城市熱環境，例如建築布局、綠化位置及風道設計，評估不同規劃方案對降低城市熱島效應嘅成效。換句話講，城市規劃者可以喺建設之前，先透過數據模擬預測方案可能帶來嘅環境影響，而唔係等問題出現後補救。

此外，新加坡亦透過 Singapore Integrated Transport and Energy Model（SITEM），整合交通及能源數據，模擬不同政策及基建方案對能源消耗、電動車發展及碳排放嘅影響，為低碳交通規劃提供更科學嘅決策基礎。

呢啲例子反映，AI 嘅價值唔只係「自動化」，而係幫助城市更清楚了解自身運作模式，作出更有根據、更具前瞻性嘅氣候決策。

＝＝＝＝＝＝＝＝＝＝

🔎本地案例：香港天文台 AI 天氣預測——以數據提升極端天氣應變能力

面對越來越複雜嘅極端天氣，香港正探索利用 AI 及大數據分析，處理大量天氣雷達及衛星觀測資料，提升氣象預測同提升城市預警能力。香港天文台近年積極探索 AI 喺降雨臨近預報方面嘅應用。簡單而言，呢類技術主要回答一個問題：

👉「當雨區已經形成，我哋點樣更準確預測佢未來會移向邊度、強度會點樣變化？」

透過多年天氣雷達資料訓練模型，AI 可以分析雨區嘅移動及演變規律，預測未來短時間內降雨位置及強度變化。相關 AI 模型目前已投入實時運行，提升短時間暴雨預測能力。除咗追蹤已形成嘅降雨系統外，香港學界亦研究利用 AI 更早識別強對流天氣風險。呢類研究進一步關注：

👉「喺危險天氣形成之前，有冇跡象可以更早發現？」

透過分析衛星觀測資料、雲系結構及大氣變化，AI 模型嘗試捕捉雷暴及極端強降雨形成前嘅訊號。研究顯示，相關 AI 模型具備提前最多 4 小時預測強對流天氣嘅能力，並較現有方法提升超過 15% 預報準確率，展示 AI 如何協助城市將風險預警時間推前。

🌟AI 並唔係取代氣象專業，而係協助預報員更有效處理大量複雜數據，提升風險判斷能力，為城市應對極端天氣提供更及時、更可靠嘅資訊支持。由城市規劃、能源管理，到天氣預警，AI 正逐步成為提升氣候韌性嘅重要工具。佢令城市唔再只係被動面對氣候風險，而係有機會更早「看見」風險、更快作出部署。

＝＝＝＝＝＝＝＝＝

下一篇我哋會同大家分享「👥社會共融篇」：點樣善用 AI招聘工具確保每位多元人才都有平等機會展現所長呢? 記得繼續留意我哋最新嘅資訊！✨

👉 如果城市可以用 AI 提早幾小時預測極端天氣，你認為最應該點樣通知市民先至最有效？歡迎留言分享你嘅想法！💬

#新科技 #人工智能 #環境 #社會共融 #企業管治 #數碼轉型 #智慧城市 #數據倫理 #可持續發展

29/07/2026

【🌏永續小測驗｜聯合國永續發展目標（SDGs）：健康與福祉💊❤️】

講到「健康」，你第一時間會諗起醫院同醫生？其實健康同福祉唔只係醫病咁簡單，仲關乎生活環境、教育、社區支援、心理狀態同公共政策。

隨住全球人口老化、慢性疾病增加同疫情頻繁爆發，點樣確保每一個人「身心靈」都可以健康成長，已經成為各國共同面對嘅重大挑戰。根據聯合國數據，世界上仍然有好多人缺乏基本醫療服務、兒童可預防疾病致死、心理健康問題被忽視等等。

👇根據聯合國永續發展目標（SDGs），「健康與福祉」包括以下細項指標：
🔹3.1 全球孕產婦死亡率降低至每十萬活產中少於70例。
🔹3.2 消除新生兒和五歲以下兒童的可預防死亡率，所有國家將新生兒死亡率降低至每千人死亡12人，五歲以下兒童死亡率降低至每千人死亡25人。
🔹3.3 終結愛滋病、肺結核、瘧疾以及受忽視的熱帶性疾病，並對抗肝炎、水傳染性疾病以及其他傳染疾病。
🔹3.4 透過預防、治療，以及促進心理健康與福祉，將非傳染性疾病導致的過早死亡率降低三分之一。
🔹3.5 強化物質濫用的預防與治療，包括麻醉藥品濫用以及酗酒。
🔹3.6 全球道路交通事故造成的死傷人數減半。
🔹3.7 確保性和生殖醫療保健服務的普遍性與可取得性，包括家庭計畫、資訊與教育，並將生育保健納入國家策略與計畫。
🔹3.8 實現全民醫療保險，包括財務風險保障，提供所有人高品質的基本保健服務，以及安全、有效、優質、可負擔的基本藥品和疫苗。
🔹3.9 大幅減少危險化學物質、空氣污染、水污染、土壤污染以及其他污染造成的死亡及疾病人數。
🔹3.a 加強所有國家執行與落實「世界衛生組織菸草控制框架公約（World Health Organization Framework Convention on To***co Control）」。
🔹3.b 針對主要影響開發中國家的傳染病和非傳染性疾病，支援疫苗以及醫藥研發，並依據杜哈宣言提供負擔的起的基本藥物與疫苗。
🔹3.c大幅增加開發中國家醫療保健的融資與借款，以及醫療保健從業人員的招募、培訓以及留任，尤其是最低度開發國家（LDCs）與小島嶼發展中國家（SIDS）。
🔹3.d加強所有國家早期預警、減少風險，以及國家和全球健康風險的管理能力，特別是開發中國家。

世界好多地方仍然面對「醫療資源分配不均」、「精神健康支援不足」、「空氣污染影響呼吸系統」等問題——要實現健康與福祉，公共政策、醫療制度同社區支援都扮演住關鍵角色。一齊睇下推動SDG3嘅🌍國際同本地案例！⬇️

🏥英國透過國民保健服務（NHS）為市民提供接近免費、可負擔嘅醫療服務：

• 建立全民醫療系統，市民睇家庭醫生（GP）、急症同住院治療一般毋須自付高昂費用
• 重視預防性醫療，例如癌症篩查、疫苗接種同常規健康檢查
• 推動公共衛生政策，如禁止境內所有煙草廣告、推行「含糖飲料稅」，減少肥胖同心血管病風險
• 加強精神健康服務，包括社區心理支援、輔導計劃同求助熱線，減低精神疾病污名化

🏯日本：以「健康長壽社會」應對人口高齡化

日本係全球高齡化最嚴重嘅國家之一，因此積極推動多層面措施，應對長者健康同照護需求：
• 建立「介護保險制度」，為65歲以上長者提供長期照護服務，包括上門護理、日間照顧中心同安老院舍
• 推動「社區綜合照護系統」，將醫療、復康、照護同生活支援整合喺同一地區，方便長者留喺社區安老
• 鼓勵「活躍老化」，例如設立銀髮人力資源中心，支援適度就業、義工服務同社區參與，減少社會孤立
• 提供長者健康促進計劃，如體操班、跌倒預防運動、營養教育，延長「健康壽命」，減低長期臥床風險

🏙️香港：以「預防為本」提升市民健康

• 推行疫苗接種計劃，預防多種傳染病
• 發展長者健康檢查計劃及社區診所，鼓勵定期身體檢查
• 加強健康教育，推廣均衡飲食、運動習慣、戒煙同減少酒精攝取
• 提升精神健康服務，例如社區精神健康中心同輔導熱線

實現「健康與福祉」我哋喺日常生活都可以出一分力：
✅保持均衡飲食、多做運動，建立健康生活習慣
✅關注心理健康，需要時主動求助，同朋友家人互相支持
✅減少吸煙及過量飲酒，避免物質濫用風險
✅支持公共衛生措施，例如垃圾分類、減少空氣污染，營造更健康生活環境

希望未來，我哋可以共同打造一個人人都能享有身心健康同有尊嚴生活嘅社會。🌈🫶

如果你想了解更多關於其他聯合國永續發展目標（SDGs），可以參閱留言區嘅🌟延伸閱讀～

#健康與福祉 #全民健康覆蓋 #心理健康 #公共衛生 #醫療平等 #永續發展 #聯合國 #永續小測驗

22/07/2026

【支持中小企實踐 ESG｜《SME ESG 約章2026》首場專題工作坊開放報名】

今年香港大學公民社會與治理研究中心再度成為《SME ESG 約章2026》嘅支持機構，呢個項目由大新銀行以及香港中小型企業聯合會合辦﹐主力協助中小企業將 ESG 元素融入營運及管治，推動可持續發展，提升企業長遠競爭力。

今年項目嘅首場專題工作坊將以「中小企 ESG 致勝之道：商機 × 案例 × 實務分享」為主題，透過大企業策略、本地中小企成功案例，以及 ESG 實務工具介紹，協助中小企了解如何將 ESG 轉化為實際商機，並逐步建立可持續發展文化。

工作坊詳情如下：

主題：中小企 ESG 致勝之道・商機 × 案例 × 實務分享
日期：2026年7月31日（星期五）
時間：下午3時至4時
形式：線上 Zoom
語言：廣東話
費用：全免

分享嘉賓包括：

1) 李浩然博士, MH, JP
全國人大常委會香港基本法委員會委員、香港特區立法會議員、華潤集團粵港澳大灣區首席戰略官
主題︰分享大企業及大灣區視野下，中小企如何透過 ESG 打入大型供應鏈，開拓新商機。
2) 何芷琦女士
倡威科技有限公司銷售及市場經理
主題︰分享本地中小企實踐 ESG 的真實案例，展示 ESG 如何由概念轉化為具體商業成果。
3) 吳澤成先生
天職香港會計師事務所有限公司助理經理（ESG、可持續發展及風險管理）
主題︰介紹「ESG 線上自我評估平台」，協助企業快速掌握 ESG 現況，善用資源，踏出實踐第一步。

歡迎有興趣推動 ESG、提升企業管治及拓展可持續商機嘅中小企報名參加。

立即報名：
https://docs.google.com/forms/d/e/1FAIpQLSfJpB-gvQWBi387JbYTSzWc7QhmUqxbJf4DWPKptIkJo_tRfQ/viewform

如有查詢，可通過電郵 [email protected] 或 WhatsApp 66421231與項目秘書處陳小姐聯絡。

#可持續發展 #企業可持續發展 #大新銀行 #香港中小型企業聯合會

26/06/2026

【氣候韌性🌡｜企業點樣應對氣候風險？🏢 經營與投資篇💼】

對好多企業嚟講，「氣候變化」以前可能係環保部門先會提到嘅字眼。但近年愈嚟愈多企業開始發現：

• 極端天氣打斷供應鏈，貨品趕唔切送到客人手上令生意受影響
• 海外工廠、倉庫遇上水浸、風災，資產受損、保費飆升
• 投資者、銀行要求披露氣候風險，同時睇重企業有冇制定減碳以及氣候風險管理策略

研究顯示，自2000年以嚟，同氣候相關嘅災害已造成超過3.6兆美元嘅損失。如果企業未能就相關影響做好準備，推測未來二十年內，其「稅息折舊及攤銷前利潤」（一種衡量公司核心經營獲利能力與現金流嘅財務指標）嘅潛在跌幅可能高達 25%。例如 2022 年四川旱災，導致當地水力發電量降至正常水平約 20%，迫使豐田（Toyota）暫停工廠生產以減少用電。喺香港過去20年，8號或以上熱帶氣旋警告信號懸掛嘅頻率及持續時間均有所增加。根據香港保險業監管局統計，2023年超級颱風「蘇拉」及隨後嘅黑色暴雨所涉及嘅保險索償總金額就達到19億港元﹐其中以財產損失同埋業務中斷嘅個案最多，總賠償金額高達16.4億港元。所以﹐企業絕對唔可以忽視極端天氣所帶嚟嘅經濟損失！

喺新嘅「氣候韌性經濟」概念之下，企業需要持續學習同調整策略﹐唔單止推動低碳轉型、綠色金融等策略﹐仲要開始關注以自然為本解決方案（Nature-based Solutions, NbS）亦開始受企業關注﹐納入企業策略中以創造新機遇﹐今次我哋就一齊睇下國際間有咩例子啦！

＝＝＝＝＝＝＝＝＝＝

💡 國際借鏡:

瑞士再保險（Swiss Re）係保險業界嘅龍頭企業之一﹐佢哋得悉健康嘅珊瑚礁同區域經濟密不可分﹐當中包括帶嚟穩健嘅旅遊業收入來源﹐同時間亦能夠提供颱風災害嘅防護。但係每次暴風雨後﹐修復珊瑚礁嘅成本都好高，唔係每個地區都負擔得起。
於是﹐佢哋就聯同自然保育協會（The Nature Conservancy）同墨西哥坎昆州政府推出一個創新嘅保險方案﹐為珊瑚礁同海灘提供保障﹐成為國際間第一個以自然為本嘅保險方案。呢個項目由政府稅收資助﹐並由當地依賴旅遊業嘅機構共同承擔保費﹐若果暴風雨嚴重破壞該區珊瑚礁生態系統﹐當個年度公司就會賠償2,500萬至7,000萬美元復育費用不等﹐讓受損嘅珊瑚移至其他地方休養數周或數月，等珊瑚重新生長，再重新植回原生地，重建珊瑚礁嘅生態系統。透過呢項保險計劃﹐除左珊瑚得到持續保育之外﹐亦都同時加強當地旅遊業抗氣候風險嘅能力。呢個以NbS為基礎嘅保險項目亦都為瑞士再保險帶嚟新嘅保費收入來源，演變出一個全新嘅保險商業模式。

＝＝＝＝＝＝＝＝＝＝

🔎本地案例:

香港早喺幾年前，領展（Link REIT）同AXA 安盛以及達信（Marsh）合作，推出亞洲房地產界別首個「可持續發展相連保險」（Sustainability-Linked Insurance, SLI）。

呢個新型保險唔係等到受災先理賠，而係根據企業嘅防災措施同表現去調整保費。例如，領展旗下嘅物業曾經因暴雨令設施有所損毀﹐於是佢地投放資源喺低窪地段嘅停車場安裝可拆卸防洪閘以及 IoT 水浸監控系統。透過數據管理，將「氣候威脅」轉化為「可控風險」。而保險公司就將保費同領展嘅防災表現掛鈎﹐領展喺2024/25 年度成功獲得 11.7% 嘅保費調減，遠高於業界約 3% 嘅平均保費調整水平。佢哋節省到嘅金額甚至能夠抵銷當初購買防洪設施嘅開支添。呢個創新嘅模式，唔單止幫助企業降低成本，更促使佢哋提前做好氣候風險準備，形成一個良性循環——企業越早投入，風險越低，保費就越抵，最終實現經濟效益同可持續發展雙贏。

＝＝＝＝＝＝＝＝＝＝
【氣候韌性🌡｜從極端天氣中學習：打造有韌性嘅城市設計🏙️】傳送門：https://www.facebook.com/share/p/1c5gD8s2Tf/
【氣候韌性🌡｜👥 社會共融篇：當極端天氣來襲，誰被留下？♿】傳送門：https://www.facebook.com/share/p/18yrCTizAx/

你覺得邊一類措施（供應鏈分散、數據分析、社區支援等）最值得香港企業優先投資？歡迎留言分享你嘅想法！💬

#氣候韌性 #氣候風險 #極端天氣 #可持續金融 #企業管治 #供應鏈管理 #社會共融 #殘疾人士 #可持續發展

17/06/2026

【🌏永續小測驗｜聯合國永續發展目標（SDGs）：永續城鄉🏙️🌿】

城市發展唔淨係起樓咁簡單，整體城市發展方向會影響我哋嘅生活質素、社區安全同環境健康。隨著全球城市化速度加快，點樣打造宜居、包容同有韌性嘅城市成為迫切嘅挑戰。根據聯合國數據，全球仍然有大量城市居民面臨住屋唔安全、空氣污染同公共服務不足等問題。

你知唔知，聯合國永續發展目標（SDGs）之中，其中一個核心目標就係「 #永續城鄉」（SDG11）？到2030年，聯合國希望「建構具包容、安全、韌性及永續特質的城市與鄉村」。

👇根據聯合國永續發展目標（SDGs），「永續城鄉」包括以下細項指標：
🔹11.1 確保所有的人都可取得適當的、安全的，以及負擔的起的住宅與基本服務，並改善貧民窟。
🔹11.2 為所有的人提供安全的、負擔的起、可使用的，以及可永續發展的交通運輸系統，改善道路安全，尤其是擴大公共運輸，特別注意弱勢族群、婦女、兒童、身心障礙者以及老年人的需求。
🔹11.3 提升具包容性、永續的都市化和參與程度，在所有國家落實整合性、永續的人類安住規劃與管理。
🔹11.4 進一步努力保護和捍衛世界文化與自然遺產。
🔹11.5 大幅減少各種災害的死亡及受影響人數，且減少災害造成的全球國內生產毛額（GDP）直接經濟損失，包含與水相關的災害，並著眼於保護窮人與弱勢族群。
🔹11.6 減少都市對環境的有害影響，其中包括特別注意空氣品質、都市管理與廢棄物管理。
🔹11.7 為所有人提供安全、包容、無障礙的綠色公共空間，尤其是婦女、孩童、老年人以及身心障礙者。
🔹11.a 強化國家與區域的發展規劃，促進都市、郊區與城鄉之間的社經與環境的正面連結。
🔹11.b 致使在包容、融合、資源效率、移民、氣候變遷適應、災後復原能力上落實一體政策與計畫的都市與地點數目增加x%，依照日本兵庫縣架構管理所有階層的災害風險。
🔹11.c透過財務和技術援助支援，協助最低度開發國家（LDCs）善用當地建材興建永續且具災害韌性的建築物。

唔少城市正面對「交通擠塞」、「空氣污染」同「公共空間不足」等問題——要實現永續城鄉，城市規劃同社區參與扮演住關鍵角色。一齊睇下推動永續城鄉嘅🌍國際同本地案例！⬇️

🚲哥本哈根：以「單車優先」打造綠色交通城市

哥本哈根長期被視為單車友善城市，透過完善基建同政策支持，令超過一半市民選擇單車作為日常交通工具。再加上持續投資綠色能源同公共空間，令城市更加宜居：
• 建設完善嘅單車專用道網絡，全市超過400公里嘅單車路，連接所有主要區域
• 推行「綠波(Green Wave)」計劃，減少單車使用者停等紅燈次數及保持行車速度
• 提供充足嘅單車泊位，包括有蓋停車場同維修站
• 將單車納入整體交通規劃，與公共交通無縫銜接

🛣️新加坡：以「智慧城市」推動永續發展
新加坡近年大力推動「智慧國家」計劃，透過科技創新同規劃結合改善城市管理：
• 發展綜合交通管理系統，實時監控交通流量，改善公共交通服務
• 推行「花園城市」願景，將綠化融入城市建設，打造垂直花園同空中走廊
• 投資水資源管理技術，包括新生水系統同雨水收集
• 推動綠色建築認證，鼓勵節能減排嘅建築設計

🚇香港：以「公共交通導向發展（TOD）」實踐高密度永續城市
• 建立完善嘅公共交通網絡，地鐵、巴士、渡輪無縫連接
• 推行「行人友善」環境，建設空中走廊同地下通道系統
• 增加市區綠化空間，如海濱長廊同社區公園
• 推動舊區活化，保留歷史建築同時改善社區設施

實現「永續城鄉」我哋都可以喺日常生活出一分力：
✅多使用公共交通、步行或單車代步，減少私家車使用
✅參與社區清潔同綠化活動，改善居住環境
✅支持本地文化遺產保護，保留城市特色
✅實踐垃圾分類同回收，減少都市廢物

希望未來，我哋可以共同打造一個安全、綠色、包容同有活力嘅城鄉環境。🏘️🌳

如果你想了解更多關於其他聯合國永續發展目標（SDGs），可以參閱留言區嘅🌟延伸閱讀～

#永續城鄉 #智慧城市 #綠色交通 #城市規劃 #社區發展 #公共空間 #聯合國 #永續發展 #永續小測驗

11/06/2026

【氣候韌性🌡｜👥 社會共融篇：當極端天氣來襲，誰被留下？♿】

「氣候變化」對你嚟講係咩？係黑雨水浸、定係出街 5 分鐘就滿頭大汗？🔥

世界氣象組織（WMO）預告，今個夏天香港好大機會比往年更熱、雨水更多。當大家討論點樣「避暑」嘅時候，我哋有無諗過：對於輪椅使用者、視障聽障朋友，對環境感知比較敏感或有社交困難嘅神經多元與精神復元人士嚟講，一場極端天氣，可能係一場生存考驗？🏃‍♂️🚫

要建立一個「氣候韌性」城市，除咗硬體設施，社區嘅包容力都係關鍵。當極端天氣嚟到，殘疾社群面對嘅唔止係「唔方便」，而係：

❗資訊斷層：警報訊息或避暑中心相關資訊有冇手語或簡易圖文版本？或者其他提示方式？
❗設施障礙：避暑中心附近通道係咪可以俾輪椅通行？環境會唔會太嘈雜擠擁令感官超載？
❗心理壓力：前線人員如果唔了解特殊需要或者合適溝通方法，可能會令求助者感到無措不安。

目前社會討論多聚焦喺基層或無家者，但對於殘疾人士喺極端天氣下嘅支援，依然有待更多關注。真正嘅氣候韌性，係要做到：無人被遺留。 🌈

＝＝＝＝＝＝＝＝＝＝

國際借鏡💡：從「應急」轉向「生活化」

🌎 加拿大溫哥華：避暑中心唔應該係「孤島」

有關注溫哥華避暑設施嘅研究指出，傳統單一功能嘅避暑中心使用率低，其中一個原因係市民覺得陌生、冇安全感、擔憂被歧視；因而建議善用圖書館、商場等既有日常社交場所，當有酷熱警告時，延長服務時間及提供食水等應急物資。

💚共融點子：研究亦建議避暑中心可劃分出「感官友善區域 (Sensory-friendly areas)」——減少強光、噪音，為感官敏感嘅神經多元及精神復元人士提供一個安心又安全嘅避暑空間。同時，中心可為職員提供培訓，例如點樣支援使用輔助器材嘅市民，同埋如何與唔同需要嘅殘疾人士溝通相處。

-----

🌏 新加坡：無障礙遮蔭步道

新加坡將城市中嘅罅隙填滿綠色大喬木，形成一個龐大嘅「綠色頂篷」。呢種做法唔只有美化城市嘅功效，更重要係透過植物蒸騰作用，直接降低體感溫度 2-3 度，能夠大大減低行人曝曬中暑嘅風險。

💚共融點子：建造呢種「連續性遮蔭系統」時，遵循無障礙標準，確保遮蔭通道坡度平緩、路面闊落，為不同行動能力或有長期醫療需要等殘疾社群，提供舒適友善嘅出行體驗。

＝＝＝＝＝＝＝＝＝＝

本地觀察🔎 ：香港避暑配套可以點進步？

回到香港，如果要讓設施更共融及對用家友善嘅話，可以點做？

✅ 資訊通達：增加圖文並茂、易讀嘅宣傳，同更多服務不同社群嘅社區組職合作，確保避暑相關資訊得以有效快速地傳達
✅ 空間規劃：考慮增加私隱隔板同劃分感官友善空間，照顧不同使用者嘅需要
✅ 共融培訓：提升前線人員對多元背景及需要嘅敏感度；比起冷氣，一句合適嘅溝通問候更讓人舒服

當設施做得更共融，受惠嘅唔止係殘疾社群，亦包括無家者、長者同所有受極端天氣影響嘅市民，令資源發揮最大效用。🤝

＝＝＝＝＝＝＝＝＝＝

下一篇我哋會分享「🏢企業與經濟篇」，點樣將氣候風險納入企業策略，避免供應鏈中斷，仲可以喺轉型中創造新機遇！記得繼續留意我哋最新嘅資訊！✨

【氣候韌性🌡｜從極端天氣中學習：打造有韌性嘅城市設計🏙️】傳送門：https://www.facebook.com/share/p/1JbupVc7am/

👉你覺得香港有邊啲無障礙設施值得推廣？歡迎留言分享你嘅睇法同親身經驗👇

#氣候韌性 #氣候風險 #極端天氣 #可持續金融 #企業管治 #供應鏈管理 #社會共融 #殘疾人士 #可持續發展

03/06/2026

【一件恤衫，背後其實係一條產業鏈 🌱】

你身上嘅一件恤衫，其實遠比想像中「有份量」。

根據資料，時裝產業每年嘅碳排放約佔全球總排放量嘅 10%，同時亦係全球第二大用水產業；而單單係織物染色同處理工序，就已經產生咗全球約 20% 嘅工業廢水。

表面上只係一件衣服，背後其實牽涉資源消耗、污染排放，以至整個生態系統嘅平衡。

🛍️永續時尚，唔只係「買少啲」

好多人一聽到「永續時尚」，都會即刻聯想到回收布料、二手衣，或者簡單地減少消費。但如果要令時尚產業真正走向可持續，其實唔可以只停留喺消費端，而係要回到源頭——由原材料、生產方式，以至整條產業鏈同自然系統之間嘅關係，全面重新思考。

而正正喺呢個背景之下，近年愈來愈多人關注NbS（Nature-based Solutions，自然為本解決方案）：即係唔再單方面消耗自然資源，而係學識同自然合作，甚至從自然當中搵答案。

👕咁一件棉質恤衫，點樣連結成條產業鏈？

由棉花種植開始，到紡紗、織布、染色、印花，再到包裝、零售，甚至消費之後如何延長產品壽命——整條價值鏈環環相扣，每一個環節，其實都同環境息息相關。亦正因為咁，如果要推動改變，就必須由「局部優化」，走向「整體改變」。

今次我同溢達集團副董事長 Tessie，一齊上咗香港電台節目做訪談，就深入討論點樣透過「縱向一體化」管理，將可持續發展由科研開始，一步步滲透至整條產業鏈，同時致力於令 NbS 真正落地：

🌾 種植
• 連結小農，提供技術支援；
• 透過滴灌技術精準供水同養分，減少水資源浪費；
• 研發更抗蟲、抗旱嘅棉種，以應對氣候變化。

💧 生產
• 自家研發污水處理系統，減少排放污染；
• 推廣「無水染色」技術（非水介質），由源頭降低用水量。

🌿 染色與生態
• 復育棕地，重新建立融合科研、生產同教育嘅可持續發展園區；
• 設立天然染料植物園，推動植物染，逐步取代部分化學染料；
• 同時保育傳統染色工藝，兼顧環保與文化傳承。

✅永續，其實係重新定義「共存」。

呢啲實踐，正正就係永續同 NbS 嘅核心——唔只係減少傷害，而係聚焦人同自然可以點樣建立一種更加平衡、長遠嘅關係，做到「天人合一」。

👉 想了解更多，可以去港台網頁重溫今次訪問：
https://www.rthk.hk/radio/radio1/programme/climate_watcher2017/episode/1104946

#可持續發展 #商界永續發展 #可持續發展目標

港大講永續

09/09/2026

02/09/2026

26/08/2026

19/08/2026

29/07/2026

22/07/2026

26/06/2026

17/06/2026

11/06/2026

03/06/2026

Address

Website

Alerts

Contact The School

Shortcuts

Featured

Share

Listing takedown request