22/06/2026
【讀書唔係因為叻，所以先想讀】
我宜家其實又讀緊第二個 Master。
而我讀上去，唔係因為我需要讀，
係我想讀。
你有無聽過大人會同小朋友講：
「你咁叻，唔讀上去咪好浪費？」
「你咁聰明，就更加應該努力。」
「你有能力，就要做得更多。」
甚至你都被人咁講過。
但我自己一路讀上去，真正支撐我嘅，從來唔係呢份「責任」。
係因為 #我鍾意。
我鍾意數學。
我想知道更多。
我想繼續諗落去。
我想遇到一班同我志同道合嘅人，
可以一齊思考、一齊討論、一齊研究。
原來讀書讀到後面，
最吸引人嘅，唔係你終於證明到自己。
而係你終於搵到一班人，
同你一樣，願意為咗同一件事諗深啲。
呢個先係讀上去嘅意義。
亦係讓人會讀上去嘅動機。
——
其實學業同興趣，
本來冇我地想像中分得咁開。
你鍾意畫畫，
你先會願意花時間研究唔同顏料、線條、光暗、構圖。
你鍾意音樂，
你先會願意重複練一段旋律，聽一個音準，執一個節奏。
你鍾意短跑，
哪怕未來十年，你可能都快唔到兩秒，
你依然會每星期花好多時間去練，
去調整一個好微細嘅姿勢，
去感受身體每一次推進。
係因為你覺得：
呢件事值得我繼續行落去。
呢種就係學習，
呢種都係叫做讀書，
「書」有好多種形態。
所以，如果有一日，小朋友問你：
「 #點解我要讀？」
呢條問題，唔容易答。
因為好多人其實都唔知點解。
如果我地只係答：
「因為你而家係學生，所以你要讀。」
「為咗入好學校。」
「為咗搵份好工。」
「將來會點點點」
但呢啲答案，去到某個階段就會不攻自破。
一個人可以為咗責任讀一陣。
可以為咗考試讀一陣。
可以為咗唔想被罵讀一陣。
可以為咗希望證明自己讀一陣。
甚至係為咗你開心，
所以去完成個學位。
但如果要真正讀得遠，
真正願意一生都保持學習，
最後一定要回到一件好簡單嘅事：
#我想知道更多。
呢份心，
先係終身學習嘅開始。
——
香港太容易將讀書變成一件功利嘅事。
讀書係為咗考試。
考試係為咗升學。
升學係為咗前途。
前途係為咗生活穩定。
但去到最後，
這份學習嘅心能夠伴隨一世，
係因為感覺到學習讓我快樂。
而真正深層嘅快樂，
往往唔係來自「我贏咗人」。
而係來自：
我終於搵到一件我真係想投入嘅事。
我願意為佢花時間。
我願意慢慢變好。
我願意同一班同樣熱愛呢件事嘅人一齊行落去。
所以我嘅教育最核心
就係令小朋友想知道更多，對世界有更大的好奇嘅同時，一步一步裝備佢有能夠搵到答案嘅能力：
「因為我想知，所以我讀。」
「因為我想明，所以我想深入了解。」
真正嘅教育，
唔係不斷話俾小朋友聽佢有幾叻，
然後推佢去學更難嘅嘢。
而係慢慢幫佢保護住心入面嗰份：
「 #我仲想學落去。」
呢份心，
就係一切嘅起點。
——
🌈 我係梅校長，下個分享再見
#梅校長
#五感學習 #幼兒教育 #香港家長
