Piano Lessons in HK

喺 Online 考試盛行嘅年代，不約而同有幾位學生（小朋友、大人、長者都有）堅持挑戰實體考試，勇氣同毅力可嘉。
過去四、五月陪佢哋周圍去試場試琴，由荃灣走到鴨脷洲，坦白講，啲鋼琴質素真係好一般。最棘手係幾部琴嘅 Pedal（踏板）都好難掌控，一唔小心就會發出「嘭嘭聲」嘅噪音。
大部分學生屋企用開直立琴，雖然我哋上堂係用三角琴，但去到試場要即時適應一部陌生三角琴嘅 Pedal 敏感度係好有挑戰性。
咁我就即時同學生調整踩／放Pedal 嘅深度、時機，或者有時調整唔切就索性踩少啲。另外就係音量控制，有時坐喺個琴度聽同埋坐喺個考官個位度聽，其實聲量同埋音色可以好唔同，我喺度就可以坐喺考官嘅位幫手聽俾吓意見。雖然大家試完琴嗰一刻都有唔同程度嘅崩潰，但可能係天道酬勤，收到成績，大部份都比預期嘅更好，感恩！ #鋼琴實體考試

恭喜呢位學生一take過考到ATCL，雖然佢對成績就唔係太滿意，不過實體考試有七十幾分已經好好㗎啦，始終臨場表現好難控制，坦白講我亦都覺得考官嘅評分略欠公允，考官嘅評語偏正面，但似乎因為佢技術未夠完善而一次過拖低咗三項評分的分數，雖然techniques係會影響fluency 同 musicality, 但係既然係三項獨立嘅評分準則，係咪應該客觀啲呢。
好彩學生好快就平復咗心情，即刻諗點樣改善技巧，希望下一次LTCL考好啲。雖然考試就唔係求分數，你有認真準備點都會有啲嘢攞到，但係唔好咁容易俾打沉嘅心態絕對係值得嘉許嘅。

恭喜呢位同學，ATCL攞咗咁好嘅成績。喺教琴嘅生涯裏面遇到有天份嘅學生唔少，但係有天份加勤力再加情緒穩定 (喺高壓環境下表演係好重要）就唔係咁多，難得佢集三者於一身， 恭喜晒！
知道嚟緊佢DSE佢會選修音樂，希望透過音樂創作，佢會對樂曲嘅了解多一個唔同嘅角度。