02/06/2026
終於都長大成人啦，今日係彩童視藝坊開業足十八年紀念日，由當初懵懵懂懂，連畫都唔識畫，就學人開畫室，到今日滿十八歲，終於都長大成人啦!
呢十八年黎，由我親手教出數唔清咁多，可以畫出一手人人都讚嘆畫作嘅學生，而每日經過我地畫室，都聽倒睇倒唔同路人，對我地學生畫作，流露出震驚嘅表情，就証明呢十八年黎，我地畫室，包括學生們嘅努力，係可以得到其他人認同嘅。
十八年唔係一段短時間，十八年前今日剛出世嘅BB，到今日已經可以領成人身份証，正準備或者已經讀緊大學，而由我地一開業，就已經加入我地大家庭，而現時仍然學緊畫畫嘅學生，即係我地嘅大師姐同二師姐，都已經到談婚論嫁嘅年紀，雖然過左咁長時間，但一切都係恍如昨日，當日開業嘅情況，仍然歷歷在目，感覺時間真係過得飛快!!
響呢度，我首先要多謝嘅係我對上嘅阿哥，即係 #童夢漫畫教室 嘅創辦人，佢幫助我開業，幫我慢慢走上教畫呢條路，無佢真係無我今日，再要多謝嘅係所有報名學畫嘅學生同家長，無你地真係無我地今日，未來仲有好長嘅路要行，仲有好多創新嘅想法，希望加入我地嘅課程，推陣出新，希望未來嘅發展，仍然能夠得到大家嘅支持，令我地行得更穩更順，多謝大家嘅支持!!非常感謝!!
張相係十八年前開業當日，我朋友黎探我，當時仍然響花都廣場，畫室由學生到一切應用物品，真係空空如也，好在十八年後，一切都已經補足。
