06/05/2021
Misigisannik avitseqagilaarusullusi, nalunnginnakku inuppassuarnut ingammik arnanut ajornartorsiutaasoq, privatiugaluaqaaq kisianni inummut ataasiinnarmulluunniit iluaqutaasinnaappat pingaartikkakku oqaluttuarilaarnissaa.
Tassaana imminut suliarersuaartunga angorusukkakku uanga imminut anaalerunnaassallunga, inuttullu ajunnginnerusumik inoqatinnut tunniusserusullunga.
Ukiorpassuit imminut anaalertuaannartuunikuuvunga, naammagisinnaanngivissorlunga amilukkama kanngusuutigiuaannarpara, salukkallarama salugiuaannarpunga puallarusussuaarlunga, puallarama imminut pualagiinnaavilerpunga, kigutikka equngammata nuisikkusunneq ajorpakka, ilumoortumik uannut ajoqutaasinnaasut tamaasa kisiisa takuniartuaannarlugit.
Uima qanorsuaq asatigigaluaraanga kusagiuarlunga inequgiuarlunga iluaqutaasinnaanatik, inunnut allanut sanillersuunnersuaq pigiuarlugu, allat kusanarnerupput, pinnernerupput pitsaanerupput ila taagorsinnaasakka amerlaqaat.
Inuusuttuullungali nakasulorujussuartuaannarpunga, ukiullu kingulliit amerlasuut qaammat tamaasa nakasulussuaartarlunga anniartangaarama sinissinnaaneq ajorlunga, anniangaarama merianngorujussuartarlunga silaga kaavittarluni.
Taavalu qulinik ukioqarlungali aaqartalerama anniarsuaartarlunga, misigisarlunga iluga mannissaqarfikkalu qaartuulersut, taavalu aaqalileraangama isumalussuaartarlunga aqutassaanngitsorsuarmik. Ilakka tujormisillugit aaqalilernera aqussinnaanngingaarakku, takkuppallu ullut siulliit aamma ingerlatiinnarlugu isumaluttarlunga anniaannaavittarlunga.
Ukiut qassit misissugaajuarlunga iisartakkanik assigiinngitsunik tuniorarneqartuarlunga, allaat kræfternerlunga misissortittarlunga ilora ajortangaarmat.
Allaat naallliungaarama aaqqikkusungaarama googlekkut isumalukkunnaarsaatinik ujartuillunga.
Asumi ukioqqortusiartortukasiugama, taanna sakkuguniakujuttarlugu “ukioqqortusiartorninni ajortikkaluttuinnarput” 😅
Ukiut qassit suliffiup tungaatigut sumiiffeqanngitsutut maaniittussaanngitsutullu misinikuullunga, nalujuarlugulu sumiittussaanerlunga, ukioq kingulleq nassaareriataarpara sumiinniarnerlunga.
Atualerama sukaallugu sinnattukka atorlugit imminut suliarersuaalerpunga, imminut ilinniarsuaarlunga takusinnaanngisakka takusalerlugit, imminut asanissara akuerinissara ilinniarsuaalerpara, taassumap kingorna nakasuluttarunnaariataarpunga, eqqumiigisarlugu kisiannilu annerusumik eqqarsaatigeqqinnagu.
Januarimi inuttut inerikkiartulerneq siulleq kursuserfigaara, februarimi aappassaaneerlunga kursuseqqippunga. Tassani tupinnarluinnaqqissaartumik misigisaqarpunga, sequnngerlunga mediterertitaalluta inuunera isiginnaalerpara, takusannut tupigusorujussuarlunga qulliikka nammineq kuussuaalerput akiorneqarsinnaanatik. Imminut isumakkeerfigivunga suulluunniit aqqusaakkakka iliuuserinikuusakkalu isumakkeerfigaakka ❤️Anigama misigivissorlunga aatsaat siullerpaamik anersaartorlunga qujarujussuarlungalu taanna misigisinnaatitaasimagakku 🙏🏻❤️
Taanna misigereerlugu ullormiit ullormut aaqartarnera aaqqippoq, anniartarunnaarpunga aaqalileraangamalu isumaluttarunnaarlunga, asuli taamatuinnapajuk. Qaammat siulleq tupangaarama uiga oqarfigaara aaqalersimallunga taamatuinnapajuk aaqaliinnapajullunga, tupigalugu uigaluunniit uumigisimannginnakku, anniarnanga isumalussimannginnamalu eqqumiigalugu, kisiannilu annerusumik eqqarsaatigeqqinngilara. Qaammat tullia aamma taamatuinnapajuk takkuppoq, maluginagu, isumalunnanga anniarnangalu, aamma taanna iluamik eqqarsaatiginngilara.
Kammalaatiga allaqatigalugu oqaluttuuppara eqqumiigalugu tassanngaannaq taamalisimallunga, allappoq aamma nammineq ilikkarusullugu, ua imaallunga “uangaluunniit sunngilanga”. Allaqatigereernerata kingorna eqqarsaatigileriataarpakka anniaatimma tammarneri “sugamajuna tammartut?”
Paasilerpara siulleq sumiiffissaviga nanigakku nappaataasannguara tammartoq, aappaalu imminut isumakkeerfigigama anniaatigisartagara kamassaatigalu tammariataartut 😳
Imaanngitsoq uku taagukkakka kisimik aqqutissaasut, sunaluunniit aqqut nammineq iluarinerusaq ujartugassaavoq.
Uannulli iluaqutaanerpaanikoq tassa sinnattukka aqqutigalugut imminut ilinniarnissara, kinaavunga? Qanoruna ittuusunga? Sunaakua eqqarsaatit utikajaaginnavissut? Sunaana inuuninni aaqqitassaasoq? Tamaasa sinnattunni takusarpakka, taakkuli atorlugit imminut ikiorujoorlunga.
Ukiorpassuit ingerlanerini sorpassuit aqqusaarnikuuakka psykologit assigiinngitsut qassit, healerisartut, clairvoyantit, tankefeltterapi, coacherisut, familiebehandling, atuakkat qasserpassuit, google ila ila suut misilinnikuunnginnerpakka. Soorunami sakkussannik tuniorartittaqaanga aamma iluaqutissannik tunioraanikooqaat, kisianni misigineq ajorpunga imminut ilikkariartorlunga, paatsiveerusimaarujoorneq naleqanngitsutut misigineq sorpassuillu piginiinnartarpakka misiginerlu ajorlunga aaqqikkiartorlunga.
Sinnattulerileramali aatsaat taamak sukkatigisumik siuariartorpunga, ukioq ataasiunngitsoq aaqqitanik ulikkaarpunga, anniaatillu uannut ilaquttannullu ulluinnannut nuanniitsumik sunniuteqangaartut tammartissinnaalersimallugit 🙏🏻❤️
Ilumoortumik upperilerlugu nammineq nappaatit tammartinneqarsinnaasut, takussavarsi misigisaq tupinnaq ingasak 😍🙏🏻
Upperilluinnarlugulu kialluunniit tamanna angusinnaaga 🙏🏻
Imak suliarinera iluaqutigitigaara allaat imminut ajorinera 80 %-imik takallugu, soorunami suli ulloqartarpunga utersaarlunga, kisianni inuuninni initujunnaarluni 🙏🏻 Imminut tatigersuaalerlunga taavalu pingaarnertut imminut asalerlunga ❤️
Inuuneq ingasannerpaaq nuanneq!! 😍❤️
