თბილისის სასულიერო აკადემიის ფსიქოლოგიის ფაკულტეტის კურსდამთავრებულები

ნინო გელდიაშვილის სიყვარულით და პასუხისმგებლობით ნაფერები ფსიქოლოგიური და საგანმანათლებლო საქმიანობა

ნინო გელდიაშვილი გახლავთ ფსიქოლოგი, ქცევის თერაპევტი, აკადემიური თერაპევტი და უფროსი სპეციალური განათლების მასწავლებელი. 2014 წელს მიღებული აქვს ფსიქოლოგიის ბაკალავრის ხარისხი საქართველოს საპატრიარქოს თბილისის სასულიერო აკადემიის საღვთისმეტყველო ინსტიტუტში, ხოლო 2017 წელს ფსიქოლოგიის მაგისტრის ხარისხი, წმიდა ანდრია პირველწოდებულის სახელობის ქართულ უნივერსიტეტში.
ნინომ პროფესიული საქმიანობა
დაიწყო სპეციალური საგანმანათლებლო საჭიროების მქონე მოსწავლეებთან მუშაობით. სხვადასხვა პერიოდში მუშაობდა თბილისის საჯარო სკოლებში სპეციალური განათლების მასწავლებლად და მოსწავლის ასისტენტად. შემდგომში მისი საქმიანობა გაფართოვდა ქცევის თერაპიისა და აკადემიური თერაპიის მიმართულებით.
ნინოს აქვს ბავშვებთან, მოზარდებთან და განსაკუთრებული საჭიროების მქონე პირებთან მუშაობის მნიშვნელოვანი გამოცდილება. იგი მუშაობდა „ბავშვთა და მოზარდთა რეაბილიტაციის ცენტრი ფაზლში“, ასევე ორგანიზაცია „პირველი ნაბიჯი საქართველოში“, ამჟამად მუშაობს ,,ბრაით აკადემიაში" ქცევის თერაპევტად და აკადემიურ თერაპევტად.
2023-2024 წლებში ნინო მოხალისედ იმყოფებოდა პოლონეთში, ვროცლავში, სადაც ბავშვთა ფსიქოლოგის მიმართულებით მუშაობდა.
,,European Solidarity Corps"- ის ფარგლებში მან განახორციელა ფსიქო-საგანმანათლებლო პროექტი ვროცლავში მცხოვრები ქართველი ემიგრანტი ბავშვებისთვის.
ნინოს გავლილი აქვს არაერთი პროფესიული ტრენინგი ინკლუზიური განათლების, ქცევის გამოყენებითი ანალიზის, აუტიზმის სპექტრის მქონე ბავშვებთან მუშაობის, სენსორული ინტეგრაციის, არტ-თერაპიისა და კოგნიტურ-ბიჰევიორალური თერაპიის მიმართულებით. მისი პროფესიული პროფილი აერთიანებს ფსიქოლოგიურ ცოდნას, პედაგოგიურ გამოცდილებას და ბავშვებთან პრაქტიკული მუშაობის კომპეტენციას.
ნინო ხასიათდება როგორც კომუნიკაბელური, შრომისმოყვარე, პასუხისმგებლიანი, კრეატიული და ორგანიზებული სპეციალისტი. მისი საქმიანობა განსაკუთრებით მნიშვნელოვანია ბავშვებისა და მოზარდების განვითარების ხელშეწყობის, ინკლუზიური განათლების მხარდაჭერისა და ფსიქო-საგანმანათლებლო გარემოს გაძლიერების მიმართულებით.
ნინოს პასუხისმგებლობა, ადამიანებისადმი სითბო, ბავშვებთან მუშაობის სიყვარული და მუდმივი განვითარების სურვილი განსაკუთრებულად დასაფასებელია.
გვჯერა,რომ ნინოს ცოდნა, გამოცდილება და სიკეთე კიდევ ბევრ ადამიანს დაეხმარება და გააძლიერებს.
ნინოს, გულით ვუსურვებთ წარმატებით, პროფესიული ზრდითა და ბედნიერი დღეებით სავსე ცხოვრებას.☀️💖

ნინო საძაგლიშვილი
მეცნიერებისა და სულიერი კულტურის დიალოგის სივრცეში

ნინო საძაგლიშვილი თბილისის სასულიერო აკადემიასა და სემინარიასთან არსებული საღვთისმეტყველო ინსტიტუტის ქრისტიანული ფსიქოლოგიის ფაკულტეტის 2011 წლის წარმატებული კურსდამთავრებული გახლავთ.
ნინოს მრავალმხრივი აკადემიური, სამეცნიერო და კულტურულ - საგანმანათლებლო საქმიანობა ნათლად წარმოაჩენს იმ ინტელექტუალურ და სულიერ პოტენციალს, რომელსაც აღნიშნული საგანმანათლებლო სივრცე აყალიბებს.
ფაკულტეტის დასრულების შემდეგ ნინომ საქმიანობა განაგრძო ეკლესიის ისტორიის, საეკლესიო სამართლისა და ასკეტიკის კათედრაზე, სადაც დეკანოზ მაქსიმე ჭანტურიას ხელმძღვანელობით კიდევ უფრო გაიღრმავა კვლევითი და ადმინისტრაციული გამოცდილება. აღნიშნულმა საქმიანობამ მნიშვნელოვანი როლი შეასრულა მისი პროფესიული და აკადემიური ფორმირების პროცესში.
ნინოს შემდგომი სამეცნიერო გზა საერთაშორისო აკადემიურ სივრცეს დაუკავშირდა.
2013 წელს საბერძნეთის საგარეო საქმეთა სამინისტროს სტიპენდიის ფარგლებში ნინო გაემგზავრა ათენში,სადაც კიდევ ერთი საბაკალავრო საფეხური დაასრულა თეოლოგიის მიმართულებით და როგორც წარჩინებულმა სტუდენტმა, სწავლა განაგრძო ამავე უნივეტსიტეტის მაგისტრატურაზე ბიოეთიკისა და ქრისტიანული ეთიკის მიმართულებით.
2023-2024 წლებში ნინომ თეოლოგიის სამაგისტრო პროგრამის დამატებითი საფეხური გაიარა შვეიცარიაში, ჟენევის სახელმწიფო უნივერსიტეტში.
ნინო გახლავთ ათენის სახელმწიფო უნივერსიტეტის მაგისტრი სისტემური თეოლოგიისა და ეთიკის მიმართულებით, ამჟამად კი დოქტორანტი და საბერძნეთის წმინდა სინოდის სტიპენდიანტი.
ნინოს კვლევითი ინტერესები მოიცავს ეკლესიისა და თანამედროვე საზოგადოების დიალოგს, თეოლოგიურ ანთროპოლოგიას, მენტალური ჯანმრთელობის საკითხებსა და დოგმატიკას.
განსაკუთრებით აღსანიშნავია ნინოს მრავალმხრივი შემოქმედებითი და კულტურული ინტერესები. იგი დაინტერესებულია წერით, მხატვრული ლიტერატურით, ესეისტიკითა და პოეზიით, რაც მის აკადემიურ ხედვას განსაკუთრებულ სიღრმეს ანიჭებს. ასევე მნიშვნელოვანია მისი სიყვარული საგუნდო მუსიკისა და გალობისადმი. 2006 წლიდან ნინო გახლდათ გორის ღირსი გიორგი მთაწმინდელის სახელობის გიმნაზიის ტაძრის მგალობელი და გოგონათა ფოლკლორული ანსამბლის „მახარობლები“ წევრი. მუსიკალური და საგუნდო საქმიანობა მისთვის მხოლოდ ესთეტიკური ინტერესის სფეროს არ წარმოადგენდა, არამედ სულიერი და კულტურული ცხოვრების მნიშვნელოვან ნაწილს უკავშირდებოდა. საგუნდო მუსიკისადმი სიყვარული დღემდე რჩება მისი ინტერესებისა და შემოქმედებითი თვითგამოხატვის ერთ-ერთ მნიშვნელოვან მიმართულებად. ნინოს ჰობებს შორის არის წერა, ხატვა და ჩოგბურთი, რაც მის პიროვნულ მრავალფეროვნებასა და ჰარმონიულ განვითარებას წარმოაჩენს.
ნინოს საქმიანობა ასევე მოიცავს როგორც წერილობით, ისე ზეპირ თარგმანით საქმიანობას. იგი არაერთი თეოლოგიური და ფსიქოლოგიური ნაშრომის მთარგმნელია, ხოლო ზეპირი თარჯიმნობის მიმართულებით აღსანიშნავია ჯვართამაღლების ტაძრის ორგანიზებით გამართულ ტელეხიდებში მონაწილეობა, სადაც იგი თარჯიმნობდა ბერძენ პროფესორებსა და იერარქებს. აღნიშნული გამოცდილება ნათლად უსვამს ხაზს მის პროფესიულ კომპეტენციას, პასუხისმგებლობასა და საერთაშორისო საეკლესიო-აკადემიურ სივრცესთან აქტიურ კავშირს.
ამჟამად ნინო სადოქტორო ნაშრომზე მუშაობს. გვჯერა, რომ მისი აკადემიური შრომისმოყვარეობა, პასუხისმგებლობა და სულიერი სიღრმე მნიშვნელოვან წარმატებას მოუტანს როგორც პიროვნულ, ისე სამეცნიერო საქმიანობაში. გულითადად ვუსურვებთ წარმატებებს სამომავლო სამეცნიერო გზაზე, ვგულშემატკივრობთ და გვეამაყება მისი მიღწევები.☀️💖

იოანა (მადონა) ლაზარაშვილის სულიერი და პროფესიული განვითარების გზა

გაგაცნობთ იოანას - ადამიანს, რომლის გზა სითბოთი, რწმენითა და პროფესიული ერთგულებით არის გამორჩეული.
იოანას ცხოვრების მნიშვნელოვანი საწყისი ეტაპი უკავშირდება სულიერ ფორმირებას. განსაკუთრებული როლი ამ პროცესში ეკუთვნის ნათლიას, რომელმაც იოანა ტაძარში მიიყვანა და დააკავშირა მეუფე ისაიასთან, რომელიც შემდგომში მისი სულიერი მამა გახდა. სწორედ მეუფე ისაიას ლოცვა-კურთხევით იოანა შეუერთდა მგალობელთა გუნდს, რაც მის სულიერ ცხოვრებაში ერთ-ერთ მნიშვნელოვან საყრდენად იქცა.
2010 წელს, მეუფე ისაიას რეკომენდაციით, იოანა საღვთისმეტყველო ინსტიტუტის ფსიქოლოგიის ფაკულტეტის სტუდენტი გახდა. აღნიშნული პერიოდი გამოირჩევა როგორც ინტენსიური სწავლებისა და შინაგანი ძიების ეტაპი, როდესაც ქრისტიანული მსოფლმხედველობა და სამეცნიერო ცოდნა პარალელურად ვითარდებოდა.
2014 წელს იოანამ წარმატებით დაასრულა სწავლა საღვთისმეტყველო ინსტიტუტში. შემდგომ წლებში მან პროფესიული განვითარების მიზნით მონაწილეობა მიიღო სხვადასხვა ტრენინგსა და სემინარში ფსიქოლოგიის მიმართულებით, რაც მის პრაქტიკულ უნარებს კიდევ უფრო ამაღლებდა.
პროფესიული საქმიანობა დაიწყო 2015 წელს ნიქოზის საბავშვო ბაღში ფსიქოლოგის პოზიციაზე. 2018 წლიდან მისი საქმიანობა გაფართოვდა - იოანა მუშაობდა ქ. გორის ბაღების გაერთიანების სააგენტოში, სადაც სხვადასხვა საბავშვო ბაღს ემსახურებოდა.
აღნიშნული პერიოდი ხასიათდება მრავალმხრივი პრაქტიკული გამოცდილების დაგროვებითა და ბავშვებთან ფსიქოლოგიური მუშაობის გაღრმავებით.
პირადი ცხოვრების მნიშვნელოვანი ეტაპი დადგა 2020 წელს, როდესაც იოანა ლაზარაშვილი დაოჯახდა. იგი არის მეუღლე და ორი შვილის დედა, რაც მის ცხოვრებაში მნიშვნელოვან როლს ასრულებს და დამატებით განამტკიცებს მის ღირებულებით სისტემას.
ამჟამად იოანა საქმიანობს ძეგვის საჯარო სკოლაში, სადაც აგრძელებს პროფესიული გამოცდილების გაზიარებას და აქტიურად არის ჩართული მოსწავლეთა ფსიქოლოგიურ მხარდაჭერაში.
იოანა გამოირჩევა თბილი, მზრუნველი და მადლიერი ბუნებით. მის პიროვნებაში განსაკუთრებულად ჰარმონიულად არის შერწყმული ადამიანებისადმი თანაგრძნობა, შინაგანი სიმშვიდე და პასუხისმგებლობის მაღალი განცდა, რაც მის პროფესიულ და პირად ურთიერთობებს განსაკუთრებულ სიღრმესა და სითბოს ანიჭებს.
გულითადად ვუსურვებთ იოანას, რომ მისი შინაგანი სინათლე, კეთილშობილება და ადამიანებისადმი მსახურების სურვილი მომავალშიც მრავალი ადამიანის ცხოვრების შემწე გახდეს, ხოლო მის გზას თან სდევდეს ღვთის მადლი, სიმშვიდე და კიდევ მრავალი ღირსრული და კეთილი საქმე.☀️💖

2008 წელს თბილისის სასულიერო აკადემიისა და სემინარიის კურსდამთავრებულთა ცხოვრების ამ მნიშვნელოვან ეტაპს განსაკუთრებულ სულიერ მნიშვნელობას ანიჭებს ის კურთხევა და სულიერი დარიგება, რომელიც პატრიარქისგან მივიღეთ. მისი სიტყვები და მამობრივი სიყვარულით განმსჭვალული დამოკიდებულება, რომელიც თითოეულ ჩვენგანზე გავრცელდა, დარჩა, როგორც სულიერი საზრდო, რომელიც ჩვენს სულიერ განვითარებას განამტკიცებს.
ვფიქრობ, პატრიარქის დალოცვა არ შემოიფარგლება მხოლოდ ჩვენი კურსით. იგი სცდება კონკრეტულ დროსა და სივრცეს და ვრცელდება როგორც მათზე, ვინც ჩვენამდე გაიარა ეს გზა, ვინც ახლა გადის მას და ასევე მათზე, ვინც მომავალში გაივლის ამ სულიერ - საგანმანათლებლო გზას.
ჩვენი პატრიარქის დალოცვა და მამობრივი დარიგება ერთგვარად აერთიანებს თაობებს საერთო სულიერ სივრცეში და ინარჩუნებს უწყვეტობას რწმენისა და ცოდნის გზაზე.
უცვლელად გთავაზობთ სრულიად საქართველოს კათოლიკოს-პატრიარქის სიტყვას კურსდამთავრებულების მიმართ:

„ჩვენთან არს ღმერთი!

არაჩვეულებრივი საღამოა და მე ახლა ვფიქრობდი იმის შესახებ, თუ რა უნდა მეთქვა თქვენთვის.
ძველი რომაელები ამბობდნენ: „Nosce te ipsum“ - შეიცანი შენი თავი. მე მინდა ვთქვა, რომ უკვე ხანდაზმული ვარ და ვერ შევიცანი ჩემი თავი. მე დღემდე ვეძებდი საკუთარ თავს, მუდამ ვეძებდი იმას, თუ რა უნდა გამეკეთებინა - ჩემთვის თუ სამშობლოსთვის - და მივედი იმ დასკვნამდე, რომ ძალიან მცირე საქმე მაქვს გაკეთებული.
მე გისურვებთ, რომ არასოდეს დაკარგოთ კავშირი სასულიერო აკადემიასა და სემინარიასთან. ასევე გისურვებთ, რომ მუდამ გიყვარდეთ სამშობლო და ადამიანი; ყოველთვის აპატიოთ ადამიანს მისი შეცდომები. ნუ განიკითხავთ და ღმერთიც იქნება მოწყალე თქვენდამი.
მე ბევრი რამის თქმა მინდა, მაგრამ სიტყვები არ მყოფნის, რადგან დიდია ის სულიერი სიყვარული, რომელიც ჩვენ შორისაა, და ამას, ალბათ, სიტყვებიც არ სჭირდება. როდესაც ადამიანები მიდიოდნენ სასულიერო პირთან, ხშირად ის არაფერს ეუბნებოდა - დასვამდა სადმე კუთხეში და თვითონ ლოცულობდა; და ის ადამიანი გულსავსე მიდიოდა მისგან. ამიტომ დარწმუნებული ვარ, რომ თქვენც მადლით სავსენი წახვალთ სემინარიიდან და აკადემიიდან. ეს მადლი უნდა შეინარჩუნოთ და გაამრავლოთ. აკეთეთ სიკეთე და სიკეთე დაგიბრუნდებათ თქვენ.

და ბოლოს, მინდა გითხრათ - ძალიან მიყვარხართ და ძალიან მომენატრებით.“