ორატორიუმი მოქმედებაში
აღნიშნული პროექტი გულისხმობს სტუდენტებისთვის და დამამთავრებელი კლასების მოსწავლეებისთვის საჯარო ლექციების წაკითხვის საშუალების მიცემას. აღსანიშნავია, რომ თემატიკა შეუზღუდავია. ერთად-ერთი მოთხოვნა ნაშრომის მაღალი ხარისხია, რაც მკაცრად გაკონტროლდება. ორატორიუმი აძლევს საშუალებას სტუდენტს წარდგეს არა მარტო სტუდენტების, არამედ მისივე ლექტორების წინაშე ორატორის, ლექტორის ამპლუაში, გამოსცადოს საკუთარი უნარი სიტყვით გამოსვლისა, აუდიტორიის მართვისა და დისკუსიის წაყვანისა.
ლექციის წაკითხვისთვის აუცილებელი ფორმალობები
ნებისმიერ მსურველს შეუძლია წარუდგინოს სპეციალურად შექმნილ კომისიას მის მიერ მომზადებული და დამუშავებული თემა, რომლითაც მას სურს წარდგომა აუდიტორიის წინაშე. ზემოთ აღნიშნული კომისია მოისმენს ლექციის სრულ ტექსტს და დაამტკიცებს ან არ დაამტკიცებს მომხსენებელს. გაითვალისწინეთ, რომ მოთხოვნები მკაცრი იქნება და როდესაც გადაწყვეტთ თემის მომზადებას, დაამუშავეთ ის სრულყოფილად. კომისია აუცილებლად გამოთქვამს რჩევებსა და შენიშვნებს, რომელთა გათვალისწინების შემდეგაც დაწუნებულ მომხსენებელს აქვს უფლება კვლავ წარდგენს კომისიის წინაშე რამდენჯერაც თვითონ სურს. დაინიშნება მოსმენის სპეციალური დღე(ები), რომელიც საჯაროდ გაცხადდება, ხოლო კლუბის წევრების პრივილეგია დანარჩენებთან შედარებით იქნება სწორედ ის, რომ განსახილველი კანდიდატების რიგის შედგენისას, უპირატესობა ჯერ კლუბის წევრებს მიანიჭებათ. კომისიის მიერ დამტკიცებული ორატორი წარდგება აუდიტორიის წინაშე შეთანხმებულ დღეს. საჭროდ ჩავთვალეთ, რომ გამოგვეყო ლექციების ორი ტიპი: უნიტარული და პარტნიორული. პირველ შემთხვევაში მომხსენებელი დამოუკიდებლად ამზადებს თემას და თავადვე წარსდგება აუდიტორიის წინაშე. მეორე ტიპის ლექციისას, მომხსენებელი მიმართავს მისთვის სასურველ ლექტორს და ისინი ერთად ამუშავებენ საკითხს, ამზადებენ ლექციას და, შემდგომში, ერთადვე წარადგენენ ლექციას საჯაროდ. ჩვენი აზრით, ეს ხელს შეუწყობს ახალბედა ორატორების მიერ გამოცდილების დაგროვებასა და ასევე გააუმჯობესებს და უფრო უშუალოს გახდის ურთიერთობას ლექტორებსა და სტუდენტებს შორის. ლექციის აუცილებელ ნაწილად მიგვაჩნია დისკუსია, ამიტომაც მომხსენებლები უნდა იყვნენ მზად შესაძლო კითხვებისთვისა და დისკუსიისთვის.
