ფსიქოთერაპიული ფუნქციის მატარებელი ?
21/05/2020
ხასიათი
ძენის ოსტატ ბანკეისთან მოწაფე ჩივილით მივიდა:
- ძალიან მძიმე ხასიათი მაქვს, აღარ ვიცი რა ვქნა. იქნებ რამე მირჩიოთ.
- უცნაური გასჭირი გქონია – უპასუხა ბანკეიმ – აბა ერთი, შენი სატკივარი მაჩვენე.
- მისი ჩვენება არ შემიძლია.
- იქნებ როგორმე მომიყვე.
- არ შემიძლია, ყველაფერი ჩემდაუნებურად ხდება.
- მაშინ შენი ხასიათი არ ყოფილა. ასე რომ იყოს, დაუყოვნებლივ გამოაჩენდი.
12/05/2020
ჭეშმარიტი ცვლილება
ოსტატმა რიონანმა ძენის შესწავლას მთელი ცხოვრება მიუძღვნა. მონასტერში საცხოვრებლად გადასვლის შემდგომ, მან საოჯახო ქონების განკარგვის უფლება ძმისწულს მიანდო, რომელმაც, მიუხედავად ნათესავების აღშფოთებისა, დანატოვარი ქონების მეძავებში განიავება დაიწყო, რის გამოც ოჯახის კეთილდღეობა საფრთხის ქვეშ დადგა.
იმედდაკარგულმა ნათესავებმა ოსტატს საკუთარი გასაჭირი შესჩივლეს.
რიონანმა დიდი ხნის უნახავი ძმისწულის სანახავად გრძელი გზა გაიარა. ახალგაზრდამ ბიძა დიდი სიხარულით მიიღო და ღამის გასათევად დარჩენა სთხოვა.
ოსტატი მთელი ღამის მანძილზე მედიტირებდა.
დილით, წასასვლელად მომზადებულმა მოძღვარმა ძმისშვილს სთხოვა:
- უკვე მოვხუცდი. ხელები მიკანკალებს. ფეხსაცმელის თასმებს ხომ ვერ შემიკრავ?
ძმისწულმა თხოვნა მაშინვე შეუსრულა.
- დიდი მადლობა – უთხრა რიონანმა – ხედავ, დღითი დღე როგორ ბერდება და სუსტდება ადამიანი. თავს გაუფრთხილდი.
რიონანი ისე წავიდა, რომ ნათესავების აღშფოთებასა და მეძავებზე სიტყვაც არ დასცდენია.
იმ დღის შემდეგ, ძმისწული თავაშვებულ ცხოვრებას მოეშვა და ნორმალურ ყოფას დაუბრუნდა.
12/05/2020
მისი უდიდებულესობის ბავშვები
იმპერატორის მოძღვარ იამაოკა ტესიუს, შეუდარებელ მოფარიკავესა და ძენურად განსწავლული ოსტატს სახლი მათხოვართა თავშესაფრად ჰქონდა გადაქცეული და მთელ შემოსავალს უპოვართა კეთილდღეობას ახმარდა.
ამის გამო, ის ისეთ სიღარიბეში ცხოვრობდა, რომ ერთ ხელი სამოსის მეტი არა ებადა რა.
ერთხელ, იმპერატორმა შეამჩნია რა ოსტატის ძველი სამოსი, მაშინვე ახლის საყიდელი ფული მისცა.
მეორე დღეს, ტესიუ სასახლეში კვლავ ძველი სამოსით დაბრუნდა.
- იამაოკა, ახალ ტანსაცმელს რა უყავი? – ჰკითხა იმპერატორმა.
- თქვენი უდიდებულესობის შვილებს სამოსი ვუყიდე. – აუხსნა მოძღვარმა.
12/05/2020
ჭირვეული აჩრდილი
მომაკვდავმა ახალგაზრდა ქალმა ქმარს დაუბარა:
- ისე მიყვარხარ, რომ შენი დატოვება უსაშველოდ მიმძიმს. იცოდე, თუ ჩემს მერე სხვას შეიყვარებ, აჩრდილად გამოგეცხადები და ცხოვრებას გაგიმწარებ.
მალე ცოლი გარდაიცვალა. ქალის სიკვდილიდან სამი თვის თავზე, კაცს სხვა ქალი შეუყვარდა და ის იყო ქორწინებაც გადაწყვიტა, რომ მისი უსიამოვნებანიც დაიწყო.
კაცს ყოველღამ გარდაცვლილი ცოლის აჩრდილი ეცხადებოდა და მიღებული გადაწყვეტილების გამო ისე ტუქსავდა, რომ მოსვენებას უკარგავდა. შეწუხებული კაცი რჩევისათვის მოძღვართან მივიდა, რომელმაც მისი ამბავი რომ მოისმინა, უთხრა:
- შენი ცოლყოფილი მეტად გონიერი აჩრდილია. თუ ისევ გამოგეცხადა, ჭკუა შეუქე და აღიარე, რომ მის თვალს არაფერი ემალება. თან გარიგება შესთავაზე და დაჰპირდი, რომ თუ ერთ კითხვაზე გიპასუხებს, ნიშნობასაც გააუქმებ და ცოლსაც აღარასოდეს მოიყვან.
- კი, მაგრამ ასეთი რა ვკითხო?
- აიღე ერთი მუჭა ცერცვის მარცვალი და სთხოვე, ზუსტად გითხრას მარცვლების რაოდენობა. თუ ვერ გიპასუხა, მაშინ შენი წარმოსახვის ნაყოფი ყოფილა და აღარ შეგაწუხებს.
იმავღამ, მამაკაცმა აჩრდილის გონიერებას გამოჩენისთანავე ხოტბა შეასხა.
- აბა, რა გეგონა – უპასუხა აჩრდილმა – მე ისიც ვიცი, რომ დღეს მოძღვართან იყავი.
- თუ ამდენი იცი, იქნებ ისიც მითხრა, რამდენი ცერცვის მარცვალი მაქვს ხელში?
აჩრდილი ჯერ დადუმდა, მერე კი ისე გაქრა, რომ ყოფილ ქმარს აღარასოდეს გამოცხადებია.
23/01/2020
ბედის ამარა
ერთ-ერთი ბრძოლისას, უდიდესმა იაპონელნა მეომარმა ოდა ნობუნაგამ ათჯერ უფრო მრავალრიცხოვან მოწინააღმდეგეზე შეტევა გადაწყვიტა. მიუხედავად იმისა, რომ სარდალი საკუთარ გამარჯვებაში დარწმუნებული იყო, ჯარიკაცთა უმეტესობას მტრის დამარცხება შეუძლებლად მიაჩნდა.
მეომრებთან ერთად გზაზე მიმავალი ნობუნაგა, ტაძარში შევიდა, ილოცა და გარეთ გამოსულმა ჯარს მოულოდნელი წინადადებით მიმართა:
- ახლა მონეტას ავაგდებ. თუ ალჩუზე დაჯდა, ბრძოლას მოვიგებთ, არადა წავაგებთ. დღევანდელი გამარჯვების ბედი ამ მონეტაზე ჰკიდია.
ამ სიტყვების წარმოთქმისთანავე, ნობუნაგამ მონეტა მთელი ძალით ჰაერში ატყორცნა. ალჩუზე დაცემულ მონეტას ჯარიკაცებმა სიხარულით ალყა შემოარტყეს. მერე კი, ისეთი მონდომებით იბრძოლეს, რომ მტერი იოლად სძლიეს.
ბრძოლის დასრულებითანავე, ნობუნაგას მსახურმა უთხრა:
- არავის ძალუძს ბედის შეცვლა.
- რა თქმა უნდა, არა - უპასუხა ნობუნაგამ და მსახურს ორთავ მხარეს ალჩუაღბეჭდილი მონეტა უჩვენა.