სსიპ რამინ დიხამინჯიას სახელობის ქალაქ ჩხოროწყუს N1 საჯარო სკოლა.

30 აპრილს მეორედ ჩატარდა ნინო ბოკუჩავასა და მისი გოგონას, ნიანოს სახელობის კონკურსის შემაჯამებელი საღამო;
ამ დღისთვის პროექტის ავტორი, ქართული ენისა და ლიტერატურის მასწავლებელი დათო ნაჭყებია თავის მოსწავლეებთან ერთად სასწავლო წლის დასაწყისიდანვე ემზადებოდნენ; მასწავლებელმა მეორე და მესამე საფეხურების მოსწავლეებს წასაკითხად მისცა გურამ ფანჯიკიძის „სპირალი“ და ჯემალ ქარჩხაძის „ზებულონი“, შემდეგ კი გამარჯვებულების გამოსავლენად ტესტირება ჩატარდა; ამ საქმიანობაში კი აქტიურად ჩაერთო ნინო ბელქანია, რომელიც უზრუნველყოფდა ტესტირების პროცესის სანდოობასა და ფარულობას;
გამოვლინდნენ საუკეთესო შედეგის მქონე მოსწავლეები:
მე-2 საფეხური-ლილე ჩაგანავა, ლუკა პაპავა, ლიზი შენგელია, გვანცა გაბისონია,
მე-3 საფეხური- ლიზი გულუა, მარიამ თოლორდავა, ფრიდონ ქობალია, ნატალი მიქაია;
ნინოს ოჯახმა გამარჯვებულებს ფულადი ჯილდოები გადასცა.
ამ დღისთვის დათო მასწავლებელმა და მისმა მოწაფეებმა წარმოადგინეს სპექტაკლი „იავნანამ რა ჰქმნა?“, რომელმაც მაყურებელთა მოწონება დაიმსახურა.
ამ სახის კონკურსის ჩატარებით თუ ერთი მოსწავლე მაინც დაინტერესდება და წაიკითხავს თუნდაც ერთ ნაწარმოებს, ჩავთვლით, რომ საქმიანობის გაგრძელებას აზრი ექნება!
მადლობა ამ დღის მონაწილე თითოეულ ადამიანს ჩართულობისთვის!

ძვირფასო ქალბატონებო/ბატონებო, შეგახსენებთ, დღეს, 20:00 საათზე, დაიწყება ნინოსა და ნიაკოსადმი მიძღვნილი საღამო. ღონისძიების ბოლოს გამოვლინდებიან ლიტერატურული ვიქტორინის გამარჯვებულები, რომელთაც გადაეცემათ ფულადი პრიზები. დასწრება თავისუფალია. მეორე საჯარო სკოლის შენობა, პირველი სართული.

2026 წლის 29 აპრილს ჩხოროწყუს მერიის კულტურის, განათლებისა და ძეგლთა დაცვის სამსახურის ორგანიზებით, ქალაქ ჩხოროწყუს ისტორიული მუზეუმისა და აკაკი ხორავას სახელობის სახლ-მუზეუმის მხარდაჭერით ჩხოროწყუს მუნიციპალიტეტის სოფელ ლესიჭინეში ( ოჩხომურის უბანი) გაიმართა ქართული თეატრის ფუძემდებლის აკაკი ხორავას საიუბილეო საღამო. საღამო დატვირთული იყო სხვადასხვა აქტივობებით. ერთ-ერთი გახლდათ სასკოლო თეატრალურ ნომინაციებში გამარჯვებული სკოლებისა და მოსწავლეების დაჯილდოება.
სსიპ რამინ დიხამინჯიას სახელობის ქალაქ ჩხოროწყუს N1 საჯარო სკოლის სასკოლო თეატრალურ გუნდს , რომელსაც ხელმძღვანელობს ქართული ენისა და ლიტერატურის მასწავლებელი დავით ნაჭყებია, ფესტივალის ჟიურის გადაწყვეტილებით გადაეცა ჯილდო ნომინაციაში: „იდეურად გამართული საუკეთესო სპექტაკლი“ და, ასევე, ჯილდო ნომინაციაში „საუკეთესო რეჟისურა“. „ საუკეთესო ქალი როლი“ წილად ხვდა მე-10 კლასელ ნატალი მიქაიას და წლის საუკეთესო მხატვრული სახე გახდა მე-10 კლასელი მართა ვეკუა. ვულოცავთ სკოლას, ორგანიზატორებს და ყველა მონაწილე მოსწავლეს ამ დიდ სიხარულს!
მასალა მოამზადა ბელა ყალიჩავამ.

STEM-ით დაინტერესებული ახალგაზრდებისთვის საინტერესო შემაჯამებელი შეხვედრა შედგა;
ყველაფერი კი ასე დაიწყო: გასული წლის ზაფხულში ჩვენი სკოლის მოსწავლეები-ბექა ჯიჯელავა, მერიკო დარსალია და ლიზი გულუა იმყოფებოდნენ შეკრებაზე, სადაც მათ მიერ შექმნილი საინტერესო პროექტის განსახორციელებლად ჩხოროწყუს მერიამ სკოლას 500 ლარი გამოუყო, რისთვისაც მადლიერებას გამოვხატავთ მერიისა და პირადად მერის, ბატონ ჯუმბერ იზორიას მიმართ.
დაწყებულ საქმეს ეკოკლუბელებზე უკეთესად ვინ დაასრულებდა და ისინიც შეუდგნენ საქმიანობას; გადამწყვეტი სიტყვა ამ საქმიანობაში მე-8 კლასის მოსწავლეს, ბექა ჯიჯელავას ეკუთვნის: შეიქმნა ე.წ. „ჭკვიანი“ სახლი, რომლის ხიბლი იმაში მდგომარეობს, რომ ის ეკოლოგიურია- მზიან ამინდში ინახავს და სიბნელეში მოიხმარს მზის სინათლეს;
ვინაიდან დღევანდელი დღე ეკოლოგიას მიეძღვნა, მოსწავლეებმა გამოკვეთეს ყველა ის პრობლემა, რაც თითოეული კონტიგენტისთვის საფრთხის შემცველია ( ხელმძღვანელი გეოგრაფიის მასწავლებელი მიმოზა წურწუმია).
დღევანდელი დღე ფლეშმობით დაიწყო და კოსტუმირებული „კონტინენტების“ გამასპინძლებით დამთავრდა.
დღის ბოლოს მადლობის წერილები გადაეცათ ეკოლოგიისადმი მიძღვნილი პოსტერების ავტორებსა და ორგანიზატორ მოსწავლეებს- ნატალი მიქაიასა და ქეთი თოლორდავას.
საინტერესო და აქტიური საქმიანობისთვის მადლობას ვუხდით ეკოკლუბის უცვლელ ხელმძღვანელს, ქალბატონ მაია სიჭინავას!
კიდევ ერთხელ მადლობას ვუხდით დაფინანსებისა და სტუმრობისთვის ბატონ ჯუმბერ იზორიას, აგრეთვე საკრებულოს თავმჯდომარეს ჯანო პერტაიას, ჩხოროწყუს საგანმნათლებლო რესურსცენტრის უფროსს, ქალბატონ ლელა კვირტიას, მამა გიორგი ქვარცხავას.

დღეს სსიპ რამინ დიხამინჯიას სახელობის ქალაქ ჩხოროწყუს N1 საჯარო სკოლის მე-6 კლასში ჩატარდა აქტივობა „აჩუქე წიგნი“!
ამ დღესთან დაკავშირებით მოსწავლეებმა ერთმანეთს მათთვის ნაცნობი და საყვარელი წიგნები აჩუქეს, ისაუბრეს საყვარელ ნაწარმოებებზე და კიდევ ერთხელ გააცნობიერეს, რომ წიგნი არის ცოდნის, ფანტაზიისა და ემოციების უსაზღვრო წყარო.
ეს დღე გვახსენებს, რომ კითხვა არა მხოლოდ სწავლაა, არამედ მოგზაურობაა ახალი სამყაროსკენ.
ვიკითხოთ მეტი, ვაჩუქოთ მეტი წიგნი და გავაზიაროთ ცოდნა!
მასალა მოამზადა ანა პაპავამ.