26/04/2026
🏛️ სკანდინავისტიკის ცენტრი თსუ-ს ჰუმანიტარულ მეცნიერებათა ფაკულტეტზე 2005 წელს შეიქმნა. ის ახორციელებს:
1️⃣ სკანდინავიური ფილოლოლოგიის საბაკალავრო პროგრამას;
2️⃣ სკანდინავისტიკის სამაგისტრო პროგრამას
(აღნიშნულ ინტერდისციპლინურ სამაგისტრო პროგრამაზე სწავლა შეუძლია ნებისმიერი პროფილის ბაკალავრის ხარისხის მქონე პირს);
🧬 ცენტრი ასევე ინტეგრირებულია ფილოლოგიის სადოქტორო პროგრამაში სკანდინავიური ფილოლოგიის დარგის კვლევითი თემატიკით.
💰 სწავლა თსუ-ს საბაკალავრო და სამაგისტრო პროგრამებზე უფასოა.
🌍 თსუ-ს სკანდინავისტიკის ცენტრს რეგულარულად სტუმრობენ და სასწავლო პროცესშიც სხვადასხვა ფორმით ერთვებიან პროფესორ-მასწავლებლები ოსლოს, ბერგენის, მალმეს, პოზნანის და სხვა სკანდინავიური თუ არასკანდინავიური უნივერსიტეტებიდან, რომლებთანაც ცენტრს, სხვადასხვა საერთაშორისო პროექტების ფარგლებში, მრავალწლიანი მჭიდრო ურთიერთობა აკავშირებს. 🤝 ცენტრის სასწავლო პროგრამებს ჰყავთ შვედი და ნორვეგიელი პროფესიული კონსულტანტები.
🇳🇴 ქართული სკანდინავისტიკის განვითარებაში განსაკუთრებული მნიშვნელობა აქვს ურთიერთობას თსუ-ს სკანდინავისტიკის ცენტრსა და ოსლოს უნივერსიტეტს შორის რომელშიც ქართველი და ნორვეგიელი სტუდენტები და პედაგოგები წლებია აქტიურად მონაწილეობენ. ✈️ ჩვენი წარჩინებული სტუდენტები ერთ ან ზოგჯერ ორ სემესტრსაც კი ატარებენ ოსლოს უნივერსიტეტის სკანდინავისტიკისა და ლინგვისტიკის დეპარტამენტში.
☀️ ჩვენი სტუდენტები, სკანდინავიური დაფინანსებით, ასევე რეგულარულად მონაწილეობენ და იუმჯობესებენ თავიანთ ცოდნას საზაფხულო სკოლებში ნორვეგიაში, შვედეთსა და ფინეთში. 🎭 რაც შეეხება თსუ-ს სკანდინავისტიკის ცენტრს, მას ასევე ხშირად სტუმრობენ სკანდინავიელი დიპლომატები, მწერლები და საზოგადოებრივი ფიგურები, რომელთაც აქ სხვადასხვა დროს არაერთი საჯარო ლექცია აქვთ ჩატარებული.
📚 თსუ-ს სკანდინავიური ფილოლოგიისა და სკანდინავისტიკის საგანამანათლებლო პროგრამებში მონაწილე ლექტორები აქტიურად არიან ჩართულნი როგორც მხატვრულ-მთარგმნელობით, ისე სამეცნიერო საქმიანობაში. 📝 მათი თარგმანები თუ სამეცნიერო პუბლიკაციები ქვეყნდება როგორც საქართველოში ისე მის ფარგლებს გარეთ. ისინი მონაწილეობენ კონფერენციებში, სემინარებსა და სხვა შემოქმედებით თუ აკადემიურ აქტივობებში როგორც საქართველოში, ისე სკანდინავიაში. 💡 სამეცნიერო საქმიანობაში აქტიურად არიან ჩართულნი ჩვენი სტუდენტებიც. ასე მაგალითად, თსუ-ს ჰუმანიტარულ ფაკულტეტზე ყოველწლიურ საერთაშორისო სტუდენტურ სამეცნიერო კონფერენციას რეგულარულად აქვს სექცია, სახელწოდებით „სკანდინავისტიკა“.
🚀 კარიერული შესაძლებლობები:
სკანდინავისტიკის ცენტრის პროგრამების კურსდამთავრებულები წარმატებით აგრძელებენ სწავლას სკანდინავიისა და უცხოეთის სხვა ქვეყნების უნივერსიტეტებში, როგორც წესი, სწავლების შემდგომ საფეხურზე და ასევე სხვა სპეციალობებზეც (ანუ არამარტო სკანდინავისტიკაზე); 📖 ეწევიან ნაყოფიერ მთარგმნელობით საქმიანობას (უნდა აღინიშნოს, რომ თითქმის ყოველთვის ნორვეგიული ლიტერატურის უცხოეთში თარგმანის ორგანიზაცია (NORLA) და სხვა სკანდინავიურ ქვეყნებში მისი შესაბამისი ორგანიზაციები აფინანსებენ თავიანთი მხატვრული ლიტერატურის უცხო ენაზე, მათ შორის ქართულად, შესრულებულ თარგმანებს); შეიძლება დასაქმდნენ:
🔹 სახელმწიფო და არასამთავრობო სექტორში;
🔹 იმუშაონ გიდებად და კონსულტანტებად ტურიზმის სფეროში;
🔹 ეწეოდნენ სხვადასხვა სახის საქმიანობას დიპლომატიურ სამსახურში, საელჩოებსა და საგარეო საქმეთა სამინისტროში; საზოგადოებასთან ურთიერთობისა და მასმედიის სფეროში.
🔍 გარდა ამისა, შეუძლიათ აწარმოონ შესაბამის დარგში სამეცნიერო-კვლევითი, საინფორმაციო-ბიბლიოგრაფიული, სარედაქტორო, სარეფერენტო, საარქივო და მხატვრულ-კრიტიკული საქმიანობა. ასევე, შეუძლიათ საქმიანობა ბიზნეს-ფირმებში, მუზეუმებსა და სხვადასხვა კომპანიებში, გამომცემლობებში და ა.შ.
📞 დამატებითი ინფორმაციისთვის: თსუ-ს სკანდინავისტიკის ცენტრის საგანამანათლებლო პროგრამების შესახებ შეგიძლიათ მიმართოთ აღნიშნული ცენტრის ხელმძღვანელს - პროფ. კახაბერ ლორიას.
📱 საკონტაქტო: 577 57 54 55 📧 [email protected]
