26/09/2026
📚როგორ მესახება ჩემი მომავალი,ბავშვების ოცნებებიდან შექმნილი წიგნი📚🖋️
რუსთავის აკადემიურ ქალაქში მოსწავლეთა შემოქმედებითი ნიჭისა და მომავლის ხედვის წარმოსაჩენად მნიშვნელოვანი პროექტი განხორციელდა. საქართველოს იაკობ გოგებაშვილის სახელობის პედაგოგთა კავშირის, საქართველოს სამეცნიერო-პედაგოგიური ჟურნალის „სკოლა და ცხოვრება“ თაოსნობით, განათლების, მეცნიერების და ახალგაზრდობის სამინისტროს ჩართულობით, საქართველოში მოქმედი საჯარო და კერძო სკოლების მოსწავლეთა მონაწილეობით ჩატარდა კონკურსი „როგორ მესახება ჩემი მომავალი“. კონკურსის მიზანი იყო ბავშვებისთვის საკუთარი ოცნებებისა და სამომავლო მიზნების წარმოჩენის შესაძლებლობის მიცემა და მათი შემოქმედებითი შესაძლებლობების წახალისება.
კონკურსში საქართველოს სხვადასხვა რეგიონის სკოლების მოსწავლეები მონაწილეობდნენ. ბავშვებმა თავიანთ ნამუშევრებში ისაუბრეს იმაზე, თუ როგორ წარმოუდგენიათ საკუთარი მომავალი, რა პროფესიის არჩევა სურთ და როგორი ქვეყნისა და საზოგადოების შექმნაში ისურვებდნენ მონაწილეობას. ნამუშევრებში განსაკუთრებულად გამოიკვეთა მათი სურვილი, მომავალში იყვნენ განათლებული, წარმატებული და საზოგადოებისთვის სასარგებლო ადამიანები.
მოსწავლეთა ნამუშევრები მრავალფეროვანი იყო, თითოეული ნამუშევარი ბავშვის ინდივიდუალურ სამყაროს, მის ინტერესებს, ფანტაზიასა და მიზნებს ასახავდა. სწორედ ამიტომ, კონკურსმა მხოლოდ შემოქმედებითი ნიჭის გამოვლენას კი არ შეუწყო ხელი, არამედ ბავშვებს საკუთარი შესაძლებლობებისა და მომავლის შესახებ დაფიქრების საშუალებაც მისცა.
კონკურსის ფარგლებში წარმოდგენილი ნამუშევრებისგან შეიქმნა კრებული, რომელშიც 82 საუკეთესო ნაშრომი გაერთიანდა. წიგნში თითოეული მოსწავლის ოცნება და მომავლის ხედვა თავისებურად ცოცხლდება. გამოცემა კიდევ ერთხელ ადასტურებს, რომ ბავშვების ფანტაზიასა და მიზნებში ქვეყნის მომავალს მნიშვნელოვანი ადგილი უჭირავს.
წიგნის პრეზენტაციასა და საზეიმო ღონისძიებას ესწრებოდნენ კონკურსის მონაწილე მოსწავლეები, მათი მშობლები, პედაგოგები, განათლების სფეროს წარმომადგენლები და ორგანიზატორები. ღონისძიებაზე აღინიშნა მონაწილეთა შემოქმედებითი შრომა და ის მნიშვნელობა, რომელსაც ბავშვების მხარდაჭერა, მათი იდეების მოსმენა და წახალისება წარმოადგენს.
განსაკუთრებული ყურადღება დაეთმო კონკურსის ორგანიზატორებისა და მხარდამჭერების როლს, რომელთა ძალისხმევით მოსწავლეთა ნამუშევრებმა ფართო აუდიტორიამდე მიაღწია და ბავშვების ოცნებები ერთ წიგნად გააერთიანა.ეს გამოცემა თითოეული პატარა ავტორისთვის საკუთარი შესაძლებლობების დაფასებისა და მომავლისკენ კიდევ ერთი ნაბიჯის გადადგმის შესაძლებლობაცაა.
„როგორ მესახება ჩემი მომავალი“ დღეს უკვე წიგნია, რომელიც ბავშვების ოცნებებს ინახავს და გვახსენებს, რომ დიდი მომავალი ხშირად სწორედ პატარა ასაკში დაბადებული ოცნებიდან იწყება. ❤️
