წმინდა ნინოს სახელობის #3 საჯარო სკოლა

1 ივნისს, ნინოობას და ბავშვთა დაცვის საერთაშორისო დღეს, ქუთაისის წმიდა ნინოს სახელობის მესამე საჯარო სკოლის სცენამ კიდევ ერთხელ დაამტკიცა, რომ ის არ არის მხოლოდ საგანმანათლებლო სივრცე — ეს არის ადგილი, სადაც ჩვენი ქალაქისა და ქვეყნის კულტურული გენეტიკური კოდი იწერებოდა, იწერება და მარადაჟამს იცოცხლებს! ამ სიმბოლურ დღეს, მე-4 (ვ) კლასის მოსწავლეებმა (დამრიგებელი: შორენა კვერნაძე) მაყურებელს ნამდვილი შემოქმედებითი დღესასწაული აჩუქეს. სპექტაკლმა, სახელწოდებით „მზე მიგალობს ხასიათში“, დარბაზში მყოფნი მისტიკურ და კოლორიტულ ქუთაისში ამოგზაურა. შეასხეს ხორცი მათ, ვინც ქუთაისის სული შექმნა.
ეს არ იყო უბრალოდ თეატრალური წარმოდგენა. ეს იყო ხიდი წარსულსა და მომავალს შორის. ბავშვებმა არა მხოლოდ ითამაშეს, არამედ საკუთარ თავში გაატარეს თითოეული გენიის ხასიათი, სიდიადე და ის ქუთაისური მუხტი, რომელიც ასე ამშვენებს ჩვენს ქალაქს. განსაკუთრებულ მადლობას ვუხდით სკოლის დირექციას და მშობლებს — იმ შემოქმედებითი თავისუფლებისა და მუდმივი მხარდაჭერისთვის, რომლებმაც ბავშვებს მისცეს შესაძლებლობა, გამოევლინათ საკუთარი ნიჭი და რეალიზება გაეკეთებინათ ასეთი მასშტაბური იდეისთვის.
მადლობა მე-4 (ვ) კლასს, დამრიგებელს შორენა კვერნაძეს, ბატონ აბელ სოსელიას და ყველა გულშემატკივარს ამ დაუვიწყარი დღისთვის!
„ჩვენ ვართ იუნესკოს ნაწილი, ჩვენ ვართ ქუთაისის გული. და სანამ ეს ზარი ირეკება, წმინდა ნინოს სკოლა მუდამ იქნება ადგილი, სადაც საქართველო იწყება!“

#დემოკრატიაიწყებასკოლაში
#ინოვაციურისაგანმანათლებლოპრაქტიკა
ა/წ წლის 23 და 30 მაისს, ინოვაციური საგანმანათლებლო ინიციატივა „მოძრავი STEAM ლაბორატორია - AI სკოლაში მოდის“ ლეჩხუმისა და გურიის რეგიონს ეწვია.
პროექტი ხორციელდება ევროპის საბჭოსა და საქართველოს განათლების, მეცნიერებისა და ახალგაზრდობის სამინისტროს ერთობლივი ინიციატივის - „დემოკრატია იწყება სკოლაში“ - ფარგლებში და ეფუძნება სსიპ წმიდა ნინოს სახელობის ქალაქ ქუთაისის №3 საჯარო სკოლის დირექტორ თეიმურაზ ჭაბუკიანსა და სოხუმის სახელმწიფო უნივერსიტეტის რექტორ თეა ჯუღელს შორის გაფორმებულ თანამშრომლობის მემორანდუმს, რომელიც უნივერსიტეტისა და სკოლის პარტნიორულ ურთიერთობას განსაზღვრავს.
ინიციატივის მთავარი მიზანია რეგიონულ სკოლებში თანამედროვე ტექნოლოგიების, ხელოვნური ინტელექტისა (AI) და STEAM განათლების ხელმისაწვდომობის გაზრდა, მოსწავლეთა და მასწავლებელთა ციფრული კომპეტენციების გაძლიერება და ინოვაციური საგანმანათლებლო პრაქტიკების დანერგვა. პროექტის ერთ-ერთი მნიშვნელოვანი მიმართულებაა „თანატოლთა შორის სწავლების“ (peer-to-peer learning) მოდელი, რომლის ფარგლებშიც გადამზადებული უფროსკლასელები თავად ასრულებენ „მოსწავლე-ტრენერების“ როლს და საკუთარ ცოდნას რეგიონებში მცხოვრებ ახალგაზრდებს უზიარებენ.
სსიპ ცაგერის №1 საჯარო და სსიპ ჩოხატაურის მუნიციპალიტეტის ფარცხმის საჯარო სკოლაში გამართული გასვლითი სესიის ფარგლებში მოეწყო მობილური STEAM ლაბორატორია, სადაც ადგილობრივი მოსწავლეები ინტერაქტიულ ფორმატში გაეცნენ ხელოვნური ინტელექტის საფუძვლებსა და მისი გამოყენების პრაქტიკულ მიდგომებს, თანამედროვე ციფრულ ინსტრუმენტებსა და ინოვაციურ საგანმანათლებლო პლატფორმებს, ასევე პროექტზე დაფუძნებული და კვლევითი სწავლების პრინციპებს.
ვიზიტის ფარგლებში განსაკუთრებული ყურადღება დაეთმო სკოლაში STEAM კლუბის განვითარების ხელშეწყობას, რაც მიღებული ცოდნის მდგრადობასა და სკოლის შიდა საგანმანათლებლო სივრცეში გამოცდილების გაზიარებას უზრუნველყოფს.
პროექტი ეფუძნება უნივერსიტეტსა და სკოლას შორის თანამშრომლობის მოდელს. სოხუმის სახელმწიფო უნივერსიტეტი უზრუნველყოფს სასწავლო პროგრამებისა და მოდულების შემუშავებას, ტრენინგებისა და მენტორობის პროცესს აკადემიური პერსონალისა და სტუდენტების ჩართულობით, ხოლო ქუთაისის №3 საჯარო სკოლა, თავის მოსწავლეებთან ერთად, უზრუნველყოფს „მოსწავლე-ტრენერების“ ქსელის ფუნქციონირებას, რეგიონულ სკოლებში ტრენინგების ჩატარებასა და ინოვაციური საგანმანათლებლო პრაქტიკის გავრცელებას.

„მოძრავი STEAM ლაბორატორია - AI სკოლაში მოდის“ მომავალშიც გეგმავს გასვლითი სასწავლო სესიების ჩატარებას საქართველოს სხვადასხვა რეგიონში.
პროექტის ხელმძღვანელები არიან სოხუმის სახელმწიფო უნივერსიტეტის საბუნებისმეტყველო მეცნიერებათა, მათემატიკის, ტექნოლოგიებისა და ფარმაციის ფაკულტეტის ინფორმატიკის მიმართულების პროფესორი ნანა გულუა და ამავე ფაკულტეტის ინფორმატიკის მიმართულების ასოცირებული პროფესორი, სსიპ წმიდა ნინოს სახელობის ქალაქ ქუთაისის №3 საჯარო სკოლის დირექტორის მოადგილე ხათუნა ფუტკარაძე.

მეორე ოქრო საქართველოს!🇬🇪

🤼‍♂️იოანე სხილაძე (70კგ) ქვიშის ჭიდაობაში 17-წლამდელთა შორის ევროპის ჩემპიონია!🥇🏆
ვულოცავთ იოანეს ამ დიდ გამარჯვებას.

26 მაისს - საქართველოს დამოუკიდებლობის დღეს კინოთეატრ ,,საქართველოს“ დიდ დარბაზში შედგა პროექტის ,,საქართველოს“- პრეზენტაცია.

გთავაზობთ პრეზენტაციისა და ფოტოსესიის ამსახველ ფოტომასალას...

25 მაისს სსიპ წმიდა ნინოს სახელობის ქალაქ ქუთაისის N3 საჯარო სკოლას სტუმრობდა ილია სულამანიძე, ევროპის ჩემპიონი, მსოფლიო მასტერსის გამარჯვებული, გრანდ სლემის არაერთგზის ჩემპიონი, პარიზის ოლიმპიური თამაშების ვიცე-ჩემპიონი.
ახალგაზრდებს შესაძლებლობა ჰქონდათ პირადად შეხვედროდნენ წარმატებულ სპორტსმენს, მოესმინათ მისი გამოცდილება, გაეგოთ მეტი შრომის, მიზანდასახულობისა და წარმატების გზის შესახებ, მიეღოთ საჭირო რჩევები. შეხვედრა მეტად საინტერესო, ინსპირაციული და მოტივაციის მომცემი აღმოჩნდა თითოეული მოსწავლისათვის.
სტუმარს გადაეცა სამახსოვრო საჩუქრები.

ილია სულამანიძემ მე-9 კლასის მოსწავლე ნიკოლოზ დოლბაიასთან ერთად შეასრულა მუსიკალური კომპოზიციები, რომელმაც დამსწრე აუდიტორიის მოწონება დაიმსახურა.
ბატონ ილია სულამანიძეს ვულოცავთ ხვალინდელ დღეს, საქართველოს დამოუკიდებლობის დღეს, ვუსურვებთ წარმატებებს.
წმინდა ნინოს მადლი ფარავდეს მესამე სკოლას, ქუთაისის და სრულიად საქართველოს.

ქუთაისის N3 საჯარო სკოლამ, რომელიც არაერთი მნიშვნელოვანი საგანმანათლებლო კულტურული პროექტით არის ცნობილი, ამჯერად იტალიელ მწერალსა და მკვლევარს Francesco Trecci-ს უმასპინძლა.
სტუმარმა დაათვალიერა სკოლა, საგამოფენო სივრცე, გაეცნო სკოლის ისტორიას, მის ღირსეულ წარსულსა და მიმდინარე მნიშვნელოვან პროექტებს.
გარდა საინტერესოდ წარმართული კითხვა-პასუხებისა, ემოციური აღმოჩნდა მოსწავლეების მიერ იტალიური ფოლკლორის მოტივებზე შესრულებული ცეკვა ტარანტელა,რომელმაც სტუმრის განსაკუთრებული აღფრთოვანება დაიმსახურა.
შეხვედრის მთავარი გზავნილი იყო ის, რომ, როდესაც უცხოელი ადამიანი ასეთი ინტერესით და სიყვარულით ეცნობა ჩვენი ქვეყნის კულტურას, ისტორიას, ეროვნულ იდენტობას და ამ ღირებულებების პოპულარიზაციას ეწევა საკუთარ ქვეყანაში_ ეს ჩვენი ახალგაზრდებისთვის დიდი მოტივაცია და პასუხისმგებლობაა- მეტად შევიყვაროთ, დავაფასოთ და დავიცვათ ჩვენი კულტურული მემკვიდრეობა.
სტუმარმა აღნიშნა, რომ ქუთაისის N3 სკოლაში გატარებული დღე, ერთ-ერთი ყველაზე ემოციური და დასამახსოვრებელი გამოცდილება გახდა მის ცხოვრებაში და სწორედ ასეთ ახალგაზრდებში ხედავს საქართველოს ღირსეულ მომავალს.
შეხვედრის დასასურლს Francesco Trecci -ს საჩუქრად გადაეცა ჩვენი სკოლის დირექტოტის, ბ-ნ თამაზ ჭაბუკიანის ავტორობით გამოცემული წიგნები, რომელიც მშობლიურ ქალაქსა და სკოლას ეძღვნება. თავის მხრივ, სტუმარმაც სკოლას საკუთარი, ხელმოწერილი საავტორო წიგნები საქართველოს შესახებ, უსახსოვრა, იმ იდეის დასტურად, რომ სიყვარულს, კულტურას და ადამიანურ ურთიერთობებს თარჯიმანი არ სჭირდება, რადგან მას უნივერსალური ენა აქვს, რომელიც ყველა ერის ადამიანს ერთნაირად ესმის.

PS.ამ მნიშვნელოვანი შეხვედრის შესახებ სტატია უკვე გამოქვეყნდა საერთაშორისო პლატფორმაზე Medium ( ასევე Linkedin-ზე), რომელიც ითვლება მსოფლიოში ერთ-ერთ ყველაზე გავლენიან სივრცედ პროფესიული, კულტურული და საგანმანათლებლო ისტორიების გასაზიარებლად.
განსაკუთრებით საამაყოა, რომ ამ მოვლენით დაინტერესდა Education Jagat - საერთაშორისო საგანმანათლებლო გამოცემა, სადაც სტატია ივნისის დასაწყისში გამოქვეყნდება.

-ეს იყო დღე , რომელმაც კიდევ ერთხელ დაგვანახა - სკოლა შეიძლება იქცეს სივრცედ,სადაც საქართველო მსოფლიოს ხვდება.

👨‍👩‍👧‍👦📚
ჩვენს სკოლაში ა/წ 4-14 მაისის ჩათვლით გაიმართა განსაკუთრებული და ძალიან საინტერესო აქტივობა — „მშობელი გაკვეთილზე“.
კვირეულის განმავლობაში მშობლები თავად იქცნენ მასწავლებლებად და მოსწავლეებს გაუზიარეს ასაკისთვის შესაბამისი, საინტერესო და შემეცნებითი თემები. გაკვეთილები იყო მრავალფეროვანი, ცოცხალი და ემოციური, რამაც კიდევ უფრო გააძლიერა სკოლასა და ოჯახს შორის თანამშრომლობა.
მსგავსი აქტივობები ბავშვებისთვის არა მხოლოდ ცოდნის მიღების, არამედ ურთიერთპატივისცემის, გამოცდილების გაზიარებისა და ერთმანეთის უკეთ გაცნობის საუკეთესო შესაძლებლობაა.
მადლობას ვუხდით თითოეულ მშობელს ჩართულობისთვის, გულწრფელი დამოკიდებულებისა და იმ სითბოსთვის, რომელიც ამ დღემ ჩვენს სკოლაში შემოიტანა.