10/08/2026
--- 感受文 ---
做師傅耐咗，越來越覺得——
師傅同學生，真係講求「人夾人」。
教車，其實唔單止係教一個個動作。
好多時，我好明白學生揸車會緊張。
揸車係手、腳、眼嘅配合。
所以當我發現學生緊張，我會嘗試將「放鬆」呢件好抽象嘅事，拆開嚟講：
手 🖐🏻
9點、3點位置握軚，
用一隻手做主力，另一隻手配合，
扭軚嘅力度，就好似耍太極咁——有力，但唔係用死力。
腳 🦶🏻
油門、煞車都唔需要太用力，
我會形容成——
好似踩住一個蕃茄，但又唔想將佢踩爆。
眼 👀
唔好只係望住車頭前面嗰一小段路，
將視線放遠啲，至少望向大約自己兩秒後會到達嘅位置，
實際上大約係前面幾個車位，又或盡量望向新路。
我知道呢啲形容未必係人人都會即刻明白。
但對我嚟講，已經係嘗試將一件「感覺上嘅嘢」，
盡量變成可以理解、可以想像、甚至可以量化嘅東西。
可惜有時候，
你以為自己已經講得好具體，
對方聽落仍然覺得抽象。
嗰一刻，其實幾無奈。
因為你知道自己唔係求其講一句「放鬆啲」就算，
而係真係花心思去諗——
點樣先可以令學生更容易理解、做到。
但教學從來都係雙向嘅。
師傅需要尊重學生，
學生亦需要尊重師傅嘅專業。
有時唔係邊個啱、邊個錯，
只係大家嘅理解方式、學習方式，未必夾得埋。
而當一個師傅已經盡力，
仍然發現彼此越教越辛苦，
我相信適時停低、適時放手，
反而係對大家最好嘅選擇。
有緣同行，就好好教、好好學。
唔夾，就好好道別。
當然，
我深知自己仍然有好大進步嘅空間。
所以就只能叫自己盡快收拾心情，
繼續盡心諗辦法點去教好下一個學生吧💪🏼
