Imam Asim Mumtaz Al-Azhari

قدسی کھڑے ہیں حیران ہو کے
کہ سدرہ سے آگے بشر جا رہا ہے

یہ آرزو ہے پرندہ ہوتا تمہارے روضے کے گرد اڑتا
میں تکتا رہتا تمہاری بستی کبھی کہیں سے کبھی کہیں سے

(ڈاکٹر ابراہیم حسان)

یوں تیرے نام سے اس دل نے محبت کی ہے
نعت لکھے ہوئے کاغذ کی بھی عزت کی ہے

رات بھر جاگ کے اشعار لکھے ہیں میں نے
یعنی کاغذ پہ تہجد کی عبادت کی ہے

ہم کہ تاخیر زمانہ کہ سبب دور رہے
ہم نے ہاتھوں پہ نہیں ذکر پہ بیعت کی ہے

آیتیں چلتی رہیں آپ کے پیچھے پیچھے
آپ کے قدموں سے قرآن نے ہجرت کی ہے

گرد نے مدحت افلاک کی حسرت کی ہے
اپنی قامت سے بڑی بات کی نیت کی ہے

نعت گوئی جو اگر کی ہے کسی نے اکبر
حسب توفیق نہیں حسب عنایت کی ہے

میں وادئ حرم تک اسے ڈھونڈنے گیا
آواز دی تو اپنے ہی اندر ملا مجھے

وہ شہر محبت جہاں مصطفی ہیں
وہیں گھر بنانے کو جی چاہتا ہے

با احتیاط محبت بچشم تر کہنا
صبا حضور سے میرا پیام اگر کہنا

یہ بام و در کی اداسی یہ ہجر کا موسم
انہیں خبر ہے میرے حال کی مگر کہنا

نہ بار گوشِ مقدس پہ ہو یہ قصہ غم
میرے کریم سے ہر بات مختصر کہنا

حضور آپ کے در کا غلام، ادنی سہی
بجھا بجھا سا ہے طیبہ کو چھوڑ کر کہنا

کئی آنسوؤں کے قلزم تیرے در پہ بہہ چکے ہیں
غمِ دل کا تجھ سے پہلے کوئی رازداں نہیں تھا

نہ خرد کی یہ روشنی نہ جنوں کی آگہی تھی
تیری رہبری سے پہلے یہ جہاں جہاں نہیں تھا

صلی اللہ تعالیٰ علیہ وآلہ واصحابہ وبارک وسلم

روضہ رسول ﷺ کی جالی مبارک پر لکھا ہوا شعر

(نبي عظيم خلقه الخلق الذي
له عظم الرحمن في سيد الكتب

’عظیم نبی(ﷺ)، جن کا خلق وہ خلق ہے کہ جس کی عظمت کا تذکرہ خدائے رحمان نے کتابوں کی سردار کتاب میں فرمایا ہے‘‘-

تیرے دیار کے احسان بھولتے ہی نہیں
عنایتوں کے وہ سامان بھولتے ہی نہیں

وہ جالیاں ، وہ دریچے وہ ممبر و محراب
وہ در ، وہ روضہ ، وہ دربان بھولتے ہی نہیں

جبیں پہ نور ، نظر میں ادب ، دلوں میں گداز
حریمِ ناز کے مہمان بھولتے ہی نہیں

بوقتِ اذنِ حضوری ، وہ آنسوؤں کی تڑپ
وہ آرزوئیں ، وہ ارمان بھولتے ہی نہیں

ملائکہ بھی یہ جنت میں جا کہ کہتے ہیں
کہ اُس نگر کے خیابان بھولتے ہی نہیں

نظر بدل گئی ، منظر بدل گئے سارے
تیری نگاہ کے فیضان بھولتے ہی نہیں