27/06/2026
https://www.facebook.com/media/set/?vanity=Uyghurlar&set=a.388285557895087
ئوقيا كۈتۈپخانىسى
كىتابلارنىڭمۇ ئۆزىگە تۇشلۇق تەقدىرى بولىدۇ، ئىنسانلارنىڭمۇ شۇنىڭغا ئوخشاش. بەزى كىتابلار كىتابخانىلارنىڭ جىمجىت تەكچىلىرىدە ئۆمۈر ئۆتكۈزسە، بەزىلىرى بىر ئىنساننىڭ تەقدىرىنى ئۆزگەرتىدۇ. مەن ئۈچۈن «ئوقيا كۈتۈپخانىسى» پەقەت كىتاب ساقلايدىغان بىر كىتابلىقلار يىغىندىسى ئەمەس؛ ئۇ ئۆتمۈش بىلەن بۈگۈننى، ئۇستازلار بىلەن شاگىرتلارنى، تارىخ بىلەن كەلگۈسىنى تۇتاشتۇرىدىغان بىر كۆۋرۈك ھېسابلىندۇ.
بىر كىتابنى سېتىۋېلىش ئاسان، ئەمما ئۇنى ئوقۇش، چۈشىنىش ۋە ئۇنىڭغا قايتا-قايتا مۇراجىئەت قىلىش ئاسانغا توختىمايدۇ. شۇڭا «ئوقيا كۈتۈپخانىسى»دىكى ھەر بىر كىتابنىڭ ئۆزىگە خاس بىر ئۆتمۈشى ۋە ھېكايىسى بار. بەزى كىتابلارنى يىللاپ ئىزدەپ يۈرۈپ تاپتىم، بەزىلىرىنى دوستلار ھەدىيەغا قىلدى، يەنە بەزىلىرى بىلەن دۇنيانىڭ يىراق شەھەرلىرىدە ئۇچرىشىپ قالدىم.
بۇ كۈتۈپخانىنىڭ ئاساسلىق نىشانى كىتابلارنى توپلاش ئەمەس، بىلىم توپلاش؛ ئىلىم توپلاش. كىتابلار سانى بىلەن ئەمەس، كىتابنىڭ قىممىتى بىلەن پەخىرلىنىش. چۈنكى بىر ياخشى كىتاب بەزىدە مىڭ پارچە كىتابنىڭ ئورنىنى باسالايدۇ.
|ئوقيا كۈتۈپخانىسى»دا تىلشۇناسلىق، تارىخ، توپونومىيە، ئەدەبىيات، مەدەنىيەت، سىياسەت، قامۇسلار، ساياھەتنامىلەر، خاتىرىلەر ۋە نۇرغۇن نادىر ئەسەرلەر بار. بۇلارنىڭ كۆپىنچىسى بىر تەتقىقاتنىڭ مەنبەسى، بىر ماقالىنىڭ ئاساسى ياكى بىر كىتابنىڭ تۇغۇلۇشىغا تۈرتكە بولغان ئەسەرلەردۇر.
مەن كىتابنى زىننەت ئۈچۈن سېتىۋالمايمەن. كىتاب ئوقۇش ئۈچۈن، ئوقۇلۇش ئۈچۈن، ئىزدىنىش ئۈچۈن، ئارخىپ ئۈچۈن، قايتا -قايتا ۋاراقلاپ كۆرۈش ئۈچۈن مەۋجۇت. كىتابنىڭ قېرىپ ، چاچلىرىغا ئاق كىرىپ كېتىشىدىن قورقمايمەن؛ قولغىمۇ ئېلىنماي، بىر بۇلۇڭدا ئوقۇلماي چاڭ بېسىپ قېلىشىدىن قورقىمەن.
بىر كىتابخانىنىڭ قىممىتى ئۇنىڭ تەكچىسىدىكى كىتاب سانىنىڭ ئاز- كۆپلىكى بىلەن ئەمەس، شۇ كىتابلاردىن قانچىسىنىڭ ئادەمنىڭ تەپەككۇرىغا ئايلانغانلىقى، ئوي -پىكىرىدە ئۆزگىرىش ھاسىل قىلالىغانلىقى بىلەن ئۆلچىنىدۇ.
شۇڭا «ئوقيا كۈتۈپخانىسى»نىڭ ئىشىكى كىتابنى سۆيىدىغانلارغا ھەمىشە ئوچۇق (گەرچە بەك ئېچىلمىغان بولسىمۇ). بۇ يەردە كىتابلار پەقەت ئوقۇلمايدۇ؛ ئۇلار ھەققىدە پاراڭ قىلىنىدۇ، مۇنازىرە قىلىنىدۇ، تەتقىق قىلىنىدۇ ۋە يېڭى پىكىرلەرنىڭ تۇغۇلۇشىغا تۈرتكە بولىدۇ. شۇڭا «ئوقيا كۈتۈپخانىسى» كىتابلار ھەر خىل يوللار بىلەن يەنى ئىجتىمائى تاراتقۇلار ۋاسىتىسى بىلەن كىتابخانلارغا يەتكۈزىلىدۇ. ئۇ بەزىدە بىر كىتابنىڭ تونۇشتۇرىشى، ياكى بىر پارچە ماقالە، ۋە ياكى بىر ئۈزۈندە سۈپىدىە ئوتتۇرىغا چىقىشى مۇمكىن.
ئەگەر بىر كىتاب بىر ئىنساننىڭ ھاياتىنى ئۆزگەرتەلەيدىكەن، ئۇنداقتا بىر كۈتۈپخانا بىر مىللەتنىڭ ئەقلىي بايلىقىنى ساقلاپ قالالايدۇ.
«ئوقيا كۈتۈپخانىسى»نىڭ مەقسىتى كىتاب ساقلاشلا ئەمەس، بىلىمنى داۋاملاشتۇرۇش؛ ئوقۇشلا ئەمەس، ئويلىنىش؛ ئۆگىنىشلا ئەمەس، ئۇنى كېيىنكى ئەۋلادلارغا يەتكۈزۈش.
— ئوقيا
