26/09/2026
Haweeney muddo dheer nolosheeda u hurtay xifdinta iyo baridda Qur’aanka,
65 Sano ayay Nolosheeda Qur’aanka u hibeeysay , umadana ay la Wadaagtay iyadoo bareeysa.
Waxaa jira dad Qur’aanka akhriya sannadaha ugu dambeeya ee noloshooda, halka ay jiraan kuwo noloshooda oo dhan Qur’aanka la noolaada—xifdiya, bara, dadka u akhriya, oo jiilal kasii dambeeya u fura albaabka Kitaabka Alle.
Xaajiya Tasliima waxay ka mid ahayd dadkaas.
65 sano ayay Kitaabka Alle qalbigeeda iyo nolosheeda ku sidday; mar way xifdinaysay, mar way baraysay, marna dadka kale ayay Qur’aanka ka dhagaysanaysay.
Waxay ka qaybqaadan jirtay majaalisyada Qur’aanka,
Waxaana gacmaheeda ku barbaaray dad iyaguna Kitaabka Alle u sii gudbiyey kuwa kale.
Qur’aanku wuxuu qayb ka ahaa nolosheeda, maalmaheedana waxay u nidaamisay si cajiib ah,
Qur’aanku wuxuu u lahaa meel gaar ah iyo waqti gaar ah
Illaa maalintii ugu dambaysay ee cimrigeeda.
Mid ka mid ah majlisyada Qur’aanka ee Masjidka Al-Barakah Ash-Shaaficiyah, oo ku yaalla koonfurta Jakarta, ee dalka Indonesia, ayay Tasliima haweenka hortooda makarafoonka kaga akhrinaysay Qur’aanka, kaddib markii majlisku dhammeeyey khatmidii oo dib looga bilaabay Suuratul-Baqarah.
Waxay sii waday akhriska, balse xaaladdeedu si lama filaan ah ayay isu beddeshay, ugu dambayntiina akhriskii way joojisay.
Haweenkii meesha joogay ayaa u gurmaday, halka qaar kalena ay Qur’aanka ka sii wadeen meeshii ay ku hakisay.
Aayadihii ay markaas maraysay waxay ahaayeen:
﴿أُولَٰئِكَ عَلَىٰ هُدًى مِّن رَّبِّهِمْ ۖ وَأُولَٰئِكَ هُمُ الْمُفْلِحُونَ﴾
“Kuwaasi waxay ku sugan yihiin hanuun ka yimid Rabbigood, waana kuwa liibaanay.”
Waxay nolosheeda ku qaadatay Qur’aanka—xifdin, barid iyo akhris—waxayna ku jirtay fadhiyada Qur’aanka ilaa dhammaadkii cimrigeeda.
Sheekadeedu waxay ina xusuusinaysaa macne weyn:
Qofku wuxuu ku noolaado waxa uu jecel yahay, raadkiisuna halkaas ayuu ka harayaa.
65 sano oo Qur’aan ah ma aha oo keliya sannado la tiriyey; waa sannado lagu xifdiyey, lagu baray, lagu akhriyey, laguna gaarsiiyey dad kale.
Ilaahay ha u naxariisto Xaajiya Tasliima, hana ka dhigo Qur’aankii ay xifdisay iyo cilmigii ay dadka bartay nuur iyo ajar u sii socda.
Rabiyoow Qur’aanka ka dhig wehelka nolosheenna, nuurka qalbiyadeenna, iyo hanuunka jidkeenna. Nagu arsaaq inaan xifdinno, fahanno, ku dhaqanno oo dadka kale kheyrkiisa gaarsiino.
Ilaahayow, nagu sug Qur’aanka inta aan noolnahay, qalbiyadeennana ku xidh Kitaabkaaga.
Xigasho......
Mid ka ah Warbaahinta Indonesia
