11/08/2025
"Ky është amaneti dhe mesazhi im i fundit. Nëse këto fjalë ju arrijnë, dijeni se I.. ka arritur të më vrasë dhe të heshtë zërin tim.
Fillimisht, selam alejkum dhe rahmetullahi ve berekatuhu.
Zoti e di se unë kam dhënë gjithçka kisha, gjithë përpjekjen dhe forcën time, për të qenë një mbështetje dhe zë për fëmijët e popullit tim, që kur hapa sytë në jetë në rrugicat dhe lagjet e kampit të refugjatëve Xhebalia.
Shpresa ime ishte që Zoti të ma zgjaste jetën derisa të kthehesha me familjen dhe të dashurit e mi në qytetin tonë të origjinës, Askalanin e okupuar, "Mexhdil".
Por vullneti i Zotit erdhi i pari dhe vendimi i Tij është i vlefshëm.
Unë e kam jetuar dhimbjen me të gjitha detajet e saj, kam shijuar hidhërimin dhe humbjen herë pas here.
Megjithatë, asnjëherë nuk jam tërhequr nga përcjellja e së vërtetës ashtu siç është, pa falsifikim apo shtrembërim, me shpresën që Zoti të jetë dëshmitar për ata që heshtën, që pranuan vrasjen tonë, që rrethuan frymën tonë dhe që copat e fëmijëve dhe grave tona nuk zgjuan asgjë në zemrat e tyre, dhe nuk ndaluan masakrën që populli ynë po përjeton për më shumë se një vit e gjysmë.
Ju lë amanetin për Palestinën, perlën e kurorës së muslimanëve, dhe pulsin e zemrës së çdo të liri në këtë botë.
Ju lë amanetin për popullin e saj, për fëmijët e saj të shtypur të vegjël, të cilëve koha nuk u dha mundësinë të ëndërrojnë dhe të jetojnë në siguri dhe paqe, sepse trupat e tyre të pafajshëm u shtypën nga mijëra tonë bomba dhe raketa i.., u copëtuan dhe mbetjet e tyre u shpërndanë nëpër mure.
Ju lë amanetin që të mos lejoni që prangat t’ju heshtin, as kufijtë t’ju ndalojnë, dhe të jeni ura drejt çlirimit të tokave dhe njerëzve, derisa dielli i dinjitetit dhe lirisë të lindë mbi vendin tonë të grabitur.
Ju lë amanetin për familjen time.
Ju lë amanetin për dritën e syve të mi, vajzën time të dashur Sham, të cilën ditët nuk më lanë ta shoh të rritet siç ëndërroja.
Ju lë amanetin për djalin tim të shtrenjtë Salah, të cilin doja të isha për të një mbështetje dhe shok rruge derisa të forcohej, të mbante barrën time dhe të vazhdonte misionin.
Ju lë amanetin për nënën time të dashur, me bekimin e lutjeve të së cilës arrita aty ku jam, lutjet e saj ishin fortesa ime dhe drita e saj rruga ime.
Lutem që Zoti t’i japë durim zemrës së saj dhe ta shpërblejë për mua me shpërblimin më të mirë.
Ju lë amanetin gjithashtu për shoqen e jetës, bashkëshorten time të dashur, nënën e Salahut, Beyan, të cilën lufta na ndau për ditë dhe muaj të gjatë, por ajo qëndroi besnike ndaj zotimit, e palëkundur si një trung zytini që nuk përkulet, e durueshme dhe e mbështetur te Zoti.
Ju bëj thirrje të qëndroni pranë tyre, të jeni mbështetja e tyre pas Zotit të Madhërishëm. Nëse vdes, vdes i palëkundur në parimet e mia. Dëshmoj para Zotit se jam i kënaqur me dekretin e Tij, i sigurt për takimin me Të dhe i bindur se ajo që është tek Zoti është më e mirë dhe e përjetshme.
O Zot, pranome mes dëshmorëve, m'i fal mëkatet e mia të kaluara dhe të ardhshme dhe bëje gjakun tim një dritë që ndriçon rrugën e lirisë për popullin tim dhe familjen time.
Më falni nëse kam gabuar dhe lutuni për mua me mëshirë, sepse unë e mbajta premtimin tim dhe kurrë nuk ndryshova apo e tradhtova atë.
Mos e harroni G… Dhe mos më harroni në lutjet tuaja të sinqerta për falje dhe pranim.
Anas Xhemal Al-Sharif
06.04.2025 (Data kur e ka pergatitur kete amanet)
Ky ishte mesazhi i fundit i tij, Allahu e meshirofte dhe e befte prej banoreve te xhennetit firdeus.
