29/11/2025
Aana lägö ki lääk mo teek. Bee en:
- Juurrë ariew ma cwøw mo tar apïï ya atut mør. Ba ki kany mo thiinh, gena näk täw mørri jaak. Ba ni mara pöödhö ki ya atut manøgø, ŋatmør mo öödö bäät pany, acaane jïra man näk juurrë dagi ma wëëllë moo othøw. Kanyøgø, aana ci i øttø mana thøøgi yie ni cwïnya opädhö kiper naa läma bäätge kiper nee duugï maal ki i thøø.
- Kiper manøgønø, aana lämö ki lam mo dwøŋ døc ki kany mo yie bäär døc këël mana rööc cwaaga ni ge p**t ba duu wøk ki i thøø. Ba kanyo time naa manynya man wiia lam, jwøra jørø ki yïth jwïëy moa, kaa teeŋ mano nut raa obëëdë, man näk ap**t kär lämö døc ki lam mo jwïëy moa orøm ki gø. Kanyøgø, aana reeth ri lam døc ni cwaaga orööï jaak këël mana røm dëëra bäre ki teek Jwøk ni jøa näk othøw p**a ö maal ki i thøø karge riet. Køøre, yia arïëba piny na apwøya Jwøk ki pwøc mo dwøŋ.
- Ba naa ena i pwøc Jwøk ni yia yaa rïep piny, apool mør mo bëët kara ŋat Jwøk obëëdë oduny i øttø ni kwöa. Køøre ena päär bäät dhaanhø aciel ri juurrë ni pï bäät umgø ki thare ni manynya man näkgö. Kanya tïŋa wïïa maal ki i pwøc Jwøk, ena jooda ni dhaanhø ee pïël piny no opï bäät umgø ki thare. Køøre ena cööra piny oo tïŋa dhaanhø maal ni bäät ume ki bäät dhee bëët päŋ ki remø mo dwøŋ, kiper apool manøgø dëëre da pïïrïöt. Kanyøgø yia atumö ni raac këël mana maagø ki wïïë oo lämä bääte naa köö ni:
- Ïïnï ni män ki pät mar Jwøk en, ki nyiŋ Krïctö Jïïcö beerra man twöc ïïnï ki jwïëc bøølø; beerra man bëëdï ni ïïna bøøl moo onidhäk jaak, bøøl mo buŋ gïn løny jïrë ki tïïc, bøøl mo ba këëdï, bøøl mo buŋ gïn mo raac mo caala man mo caare nee tïïë dëër dhaanhø mør. Kanyøgø, ena put tumö na bøøl mo onidhäk ni bëëdö noo obut piny jaak.
Kanya lønya ki cien apoorøgø, ajooda ni juurrë dëëtge odøø karge døc. Køøre dhaanhø aciel rige aput köö ki aani ni nyooth atut jïrä (show me around). Kanyøgø waana aai ki ge nee atut nyoodha jïgë. Ba ni wa cäädhö dï paac ni ge nëënö jïra ni dëëtge jööt døc, cwïnya atumö ni manynya man pwøa Jwøk. Køøre aana but piny ki bäb yia dï jöö oo pwøa Jwøk koo oduuru mo dwøŋ døc ni yia yaa rïëp piny ni täärnyuma yaa këël i ŋøøm. Køøre, aana put pääö ki caa 1:30.
