13/05/2025
10 qodob iyo Sh. Mustafe📿💦🌴
"Dadka kale ninkoodii wax tara way tixgaliyaane Idinkuna caqliga taabudka ah waad ku tumataan..." Xaaji Aadan Af Qallooc
Sh. Mustafe X. Ismaaciil Haaruun, ma arag shakhsiyad Soomaaliyeed oo kulansatay sifooyinka wanaagsan ee Alle ku kulmiyey:📿💦🌴
1. Waa daaci u diran islaaxinta mujtamaca soomaaliyeed oo cumrigiisa ku idleeyey waxsan sheeg iyo toosinta bulshada.
2. Waa caalim ay si isku mid ah u jecelyihiin, una fahmaan hadalkiisa dhammaan qaybaha kala duwan ee bulshadu.
3. Waa aqoonyahan kulansaday culuumta waxyiga (Shareecada) iyo culuumta tajribo-galka ah ee Aadanaha, waa scientist philosopher ah oo aqoon durugsan u leh culuumta kala duwan ee Aadanaha.
4. Wuu yar yahay in aad aragto shakhsi Soomaaliyeed oo ka wax akhris badan, kana fahmad dheer, kana xifdi iyo weelayn weyn, haddaad wakhti yar la fadhiisato waad ku hafanaysaa sida uu mawduucyo kala fog mid walba xog ogaal ugu yahay, u akhriyey, u baadhay una weeleeyey.
5. Dhaqan ahaan waa shakhsi aad isu dhul-dhiga, saahid ah oo cibaado badan, aftahan ah oo hadalka kiisa quman ee waxtarka ah yaqaanna sida loo qaabeeyo ee loo gudbiyo.
6. Sh. Mustafe waxa aan aqaannay muxaadarooyinkiisa iyo duruustiisa duubanna ku taxnaa muddo dhowr iyo soddon sannadood ah, weligay ma arag isaga oo ku jira murannada madhalayska ah ee ay culimada qaarkood caadeysteen in ay culimo kale ama kooxo dacwadeed ku duraan oo ku ceebeeyaan.
7. Waa shakhsiyad ay u siman yihiin bulshada Soomaaliyeed oo dhammi, oo u diran waardiyeynta diintooda iyo dadnimadood, ka xor ah qabyaalad iyo u xaglinta kooxahaysiga.
8. Waa shakhsi dhiiran oo aan xaqa cidna uga haybadaysannin, sidaa darteed ayaa af iyo addinba loogu dhibay sheegista xaqa iyo u taagnida islaaxinta bulshada.
9. Haddaad maqasho caalim camalkiisa iyo cilmigiisu iswaafaqsan yihiin, Alle yaqaan ah, waxtar ummadeed leh Alle ka cabsi leh, mutawaadic ah, saahid ah, naf hur diineed leh waa Sh Mustafe X. Ismaaciil Haaruun.
10. Shakhsiyan qayb weyn ayuu ku lahaa qaabaynta noloshayda iyo dhismaha aqoontayda, talo toos ah iyo mid dadban ba waan ka qaatay marxaladdaydii waxbarasho ee jaamicadda iyo ka horba.
Nasiibdaranaa kuwa diiwaanka camalkooda uu ka mid yahay dhaleecaynta caalimkaa aynnu sifaynay, waa hubaal sh Mustafe in uu ku cafinayo haddii aad ka codsato, xataa adiga oo aan codsan in uu si guud wax u cafiyo waa la arkay, laakiin haddii Alle kuu soo jooji xaq Banii aadam Qiyaamaha wallee waad nasiibdarantahay.
Dadka xilkaska ahi ha u caqli celiyaan oo ha qabtaan dadkooda maangaabka ah ee haldoorka bulshada sida Sh. Mustafe oo kale ah ijaafaynaya ee magacdilaya.
Allahayow u barakee Sh. Mustafe cilmigiisa, caqligiisa, camalkiisa, caafimaadkiisa, caa'iladiisa, caruurtiisa, cuudkiisa iyo caynkasta oo aad siisayba.📿💦🌴
Allahayow khaatumada u wanaaji, shar iyo xumaan oo dhanna ka dhawr, Allahayow abaalkiisa ka dhig Fardowsada sare ee raalli ahaantaadu taallo.📿💦🌴
Allahayow culays kasta oo uu dareemayo ka dulqaad, rajo kasta oo uu leeyahayna u xaqiiji.
Aamiin, aamiin, aamiin.🤲🤲🤲📿💦🌴
✍️ Dr-Abdulqani Hussein Beder
