Addis Ababa University

28/09/2026

አዲስ አበባ ዩኒቨርሲቲ የማስተርካርድ ፋውንዴሽን ሽልማትን ተቀበለ
አዲስ አበባ ዩኒቨርሲቲ በማስተርካርድ ፋውንዴሽን የተዘጋጀውን Africa Higher Education for Transformation (AHEFT) Prize በመጀመሪያው ዙር ከተሸለሙ አምስት የአፍሪካ ከፍተኛ ትምህርት ተቋማት አንዱ ሆኖ ሽልማቱን ተቀብሏል። ሽልማቱ በተቋማዊ ደረጃ ዘላቂ ለውጥ በማምጣት ላይ የሚገኙ የአፍሪካ ከፍተኛ ትምህርት ተቋማትን እውቅና ለመስጠት የተዘጋጀ ነው።
ዩኒቨርሲቲው ሽልማቱን መስከረም 14 ቀን 2019 ዓ.ም. በጋና አክራ በተካሄደው የመጀመሪያው Higher Education Transformation Convening ላይ የተቀበለ ሲሆን፣ መድረኩ የአፍሪካ ዩኒቨርሲቲዎች አመራሮችን፣ የአፍሪካ ኅብረት ተወካዮችን፣ የመንግሥት ተቋማትን፣ የፋይናንስ ተቋማትን፣ የግል ዘርፍ አጋሮችን፣ የልማት አጋሮችን እና ወጣቶችን አሰባስቧል።
ከአዲስ አበባ ዩኒቨርሲቲ ጋር የቡርኪና ፋሶው International Institute for Water and Environmental Engineering፣ የጋናው Kwame Nkrumah University of Science and Technology፣ የዩጋንዳው Muni University እና University of Rwanda የ2026 የሽልማቱ ተቀባዮች ሆነዋል። እያንዳንዱ ተሸላሚ ተቋም ለወጣቶች የትምህርት ዕድሎችን የሚያሰፉና ተቋማዊ ለውጥን የሚያጠናክሩ ሥራዎችን ለማስፋት 3 ሚሊዮን የአሜሪካ ዶላር ድጋፍ ያገኛል።
የአዲስ አበባ ዩኒቨርሲቲ ፕሬዝዳንት ዶ/ር ሳሙኤል ክፍሌ ለመድረኩ በተቀዳ የቪዲዮ መልዕክት ያስተላለፉ ሲሆን፣ የአፍሪካ ዩኒቨርሲቲዎች ወጣቶችን ለወደፊቱ ዓለም ተሳታፊ ብቻ ሳይሆኑ የወደፊቱን ዓለም እንዲቀርጹ የማስቻል ኃላፊነት እንዳለባቸው አፅንዖት ሰጥተዋል። በንግግራቸውም “የአፍሪካ ትልቁ ሀብት ወጣቶቿ ናቸው። ስለዚህ ዩኒቨርሲቲዎቻችን ወጣቶችን የወደፊቱ ዓለም ተሳታፊ እንዲሆኑ ማዘጋጀት ብቻ ሳይሆን፣ ያንን የወደፊት ዓለም እንዲቀርጹ የማስቻል ኃላፊነት አለባቸው። የማስተርካርድ ፋውንዴሽን ከአዲስ አበባ ዩኒቨርሲቲ ጋር ያለው አጋርነትም በዚህ የጋራ እምነት ላይ የተመሠረተ ነው። በአፍሪካ ወጣቶች አቅም ላይ ስንሰራ፣ ጥራት ያለው ትምህርት፣ ምርምር፣ ፈጠራና ዕድል እንዲያገኙ ስናስችላቸው፣ በአህጉሪቱ የወደፊት ሕይወት ላይ እየሰራን ነው። ይህ የአፍሪካ ዩኒቨርሲቲዎች ኃላፊነትም ተስፋም ነው።” ብለዋል።
የAHEFT ሽልማት በመማር ማስተማር፣ በምርምርና ፈጠራ፣ ተማሪዎችን ወደ ሥራ ዓለም በማሸጋገር እና በጤና ውጤቶች ላይ ዘላቂ ተቋማዊ ለውጥ እያመጡ ያሉ የአፍሪካ ተቋማትን ለመደገፍ የተጀመረ ዓመታዊ ሽልማት ነው። አዲስ አበባ ዩኒቨርሲቲም ሽልማቱን በምርምር እና ፈጠራ ዘርፍ ባሳየው ተቋማዊ ለውጥና እድገት አግኝቷል። በ500 ሚሊዮን የአሜሪካ ዶላር የተደገፈው ይህ መርሐ ግብር በቀጣዮቹ አሥር ዓመታት ቢያንስ 150 የአፍሪካ ከፍተኛ ትምህርት ተቋማትን እውቅና ለመስጠት ያለመ ነው።
በአክራው መድረክ የአፍሪካ ዩኒቨርሲቲዎች የእውቀት፣ የምርምር፣ የፈጠራ እና የችግር ፈቺ ሐሳቦች ማዕከላት ሆነው ሊያበረክቱ ስለሚችሉት ሚና ሰፊ ውይይት ተካሂዷል። ውይይቱ በተለይ በከፍተኛ ትምህርት፣ በኢንዱስትሪና በማኅበረሰብ መካከል ያለውን ትስስር ማጠናከር፣ ወጣቶችን በአዳዲስ ቴክኖሎጂዎች ፈጣሪና መሪ እንዲሆኑ ማስቻል፣ ምርምርን ከዩኒቨርሲቲ ባሻገር ወደ ኢንዱስትሪና ማኅበረሰብ ማድረስ እና ከትምህርት ወደ ሥራና ፈጠራ የሚወስዱ መንገዶችን ማጠናከር ላይ አተኩሯል።
አዲስ አበባ ዩኒቨርሲቲ ከመጀመሪያዎቹ የAHEFT Prize ተሸላሚዎች አንዱ መሆኑ፣ ዩኒቨርሲቲው በመማርና ማስተማር፣ በምርምር እና ፈጠራ፣ በአጋርነት እና ለወጣቶች ዕድል በመፍጠር የሚያከናውናቸውን ተቋማዊ የለውጥ ሥራዎች ለማጠናከር ጉልህ እርምጃ ነው።

26/09/2026

25/09/2026

አዲስ አበባ ዩኒቨርሲቲ ከቀድሞ የንግድ ሥራ ትምህርት ቤት ምሩቃን ማህበር ጋር የትብብር ስምምነት ተፈራረመ።

ስምምነቱን የአዲስ አበባ ዩኒቨርሲቲ ፕሬዝዳንት ዶ/ር ሳሙኤል ክፍሌ እና የንግድ ሥራ ምሩቃን ማህበር ፕሬዝዳንት አቶ ክፍሌ ይርጋ የተፈራረሙ ሲሆን ማህበሩ በቦሌ አካባቢ የሚገኘውንና ይዞታው (4,814 ካሬ ሜትር ገደማ )የሆነውን መሬት ለዩኒቨርሲቲው በኢንዶውመንት አቅርቧል።

በዚህ ስምምነት መሰረትም ዩኒቨርሲቲው በቦታው ላይ የሚያካሂደው የልማት እንቅስቃሴ እንደተጠበቀ ሆኖ፣ የምሩቃን ማህበሩ የራሱ ቢሮዎችና ልዩ ልዩ አገልግሎት የሚሰጡ ቦታዎች እንዲኖሩት ይደረጋል።

የአዲስ አበባ ዩኒቨርሲቲ ፕሬዚዳንት ዶ/ር ሳሙኤል ክፍሌ እንደተናገሩት ማህበሩ እየሰራው ያለው ስራ ለሌሎች የቀድሞ ምሩቃን ምሳሌ መሆን የሚችል እንደሆነ አንስተው፤ዩኒቨርሲቲውም ይህን ሀላፊነት ተቀብሎ ለውጤት እንደሚያበቃው ተናግረዋል፡፡

የንግድ ሥራ ምሩቃን ማህበር ፕሬዝዳንት አቶ ክፍሌ ይርጋ በበኩላቸው ለአዳዲስ ምሩቃን የልምድ ልውውጥና የሥራ ዕድል ለመፍጠር እንዲሁም ሀገራዊ ጥናቶችና ኮንፈረንሶችን ለማካሄድ ትልቅ አቅም እንደሚፈጥር ተናግረዋል። ይህ ስምምነት አዲስ አበባ ዩኒቨርሲቲ ራስ-ገዝ ሆኖ ከተደራጀ በኋላ የቀድሞ ምሩቃን ተቋማቸውን መልሰው እንዲደግፉ በተደረገው ጥሪ መሰረት በርካታ አበረታች ስራዎች እየተከናወኑ እንደሆነም ማሳያ እንደሆነ በዚሁ ወቅት ተገልጿል።

22/09/2026

የመጀመሪያው የአፍሪካ የውሃ ዋስትና ዓለም አቀፍ ኮንፈረንስ በአድዋ ድል መታሰቢያ ሙዚየም እየተካሄደ ነው

ኮንፍረንሱ በአዲስ አበባ ዩኒቨርሲቲ፤ ውሀና ኢነርጂ ሚኒስትር፤ በተፈጥሮና ኮምፒውቴሽናል ሳይንስ ኮሌጅ ስር ከሚገኘው የአፍሪካ ውሀ ማኔጅመንት ልቀት ማዕከል ጋር በጋራ የተዘጋጀ ሲሆን የኮንፈረንሱ ዋና ትኩረት አቅጣጫዎች ውሃን እንደ ትልቅ የአህጉራዊ የትብብር ማዕከል አድርጎ ማስተሳሰር እና የኢትዮጵያን የውሃ አስተዳደር አጠቃላይ ገጽታ ለሌሎች አገሮች ማካፈል መሆኑ ተመላክቷል።
በዚህ ጉባኤ ላይ ለመሳተፍ ከ20 ሀገሮች ከ300 በላይ ተመራማሪዎች፣ፖሊሲ አውጪዎች እና በመሬት ላይ ያለውን ስራ የሚሰሩ አስፈፃሚዎች ተሳታፊ ይሆኑበታል።
የአዲስ አበባ ዩኒቨርሲቲ የአፍሪካ የውሃ ልቀት ማዕከል ኃላፊ ፕሮፌሰር ፈለቀ ዘውገ አገራዊና አህጉራዊ የውሃ ተግዳሮቶችን ለመፍታት ሰፊ ሥራዎች መሠራት እንዳለባቸው ገልፀዋል። አያይዘውም የውሃ ሀብት አስተዳደርን ውጤታማ ለማድረግ የጥናት ውጤቶችና በፖሊሲ አቅጣጫዎች ዙሪያ ውይይቶች በማድረግ ሀገራት የጋራ መፍትሄዎችን እንዲያበጁ ለማድረግ የዚህ አይነት ውይይት አስፈላጊ ነው ብለዋል።
በጉባኤው ላይ የተገኙት በውሃና ኢነርጂ ሚኒስቴር የተቀኛጀ የውሀ ሀብት አስተዳደር ስራ አስፈፃሚ ደበበ ደፈርሶ በበኩላቸው የሳይንስ ማህበረሰቡንና የፖሊሲ አውጪዎችን ግንኙነት በማጠናከር የውሃ ሀብት ችግሮችን በዘላቂነት ለመፍታት በሚያስችሉ ጉዳዮች ላይ የሚቀጥሉት የኮንፈረንሱ ቀናት ውይይቶች እንደሚያደርጉባቸው ተነግረዋል።
የመጠጥ ውሃና የውሃ ደህንነት፣ሥነ ምህዳር እና የውሃ ደህንነት፣ድንበር ተሻጋሪ ውሃና የውሃ ደህንነት በሚሉ ሀሳቦች ዙሪያ የተሰሩ ሌሎችም ጥናታዊ ፅሁፎች ይቀርባሉ።
ከሶስቱ ቀን ጉባኤና የምርምር ስራ የሚገኘው ውጤት ተሰንዶና መልክ ይዞ ለሚመለከታቸው አስፈፃሚና ፖሊሲ አውጪዎች እንዲደርስ ይደረጋል ተብሏል።
በተጨማሪም መድረኩ የኢትዮጵያን የውሃ አስተዳደር አጠቃላይ ሁኔታ፣ አቋም እና ግንዛቤ ለሌሎች አገሮች ልምድ ለማጋራት ያለመ ነው ሲሉ አብራርተዋል፡፡

19/09/2026

የአዲስ አበባ ዩኒቨርሲቲ የ1978 ዓ.ም. የመካኒካል ምህንድስና ምሩቃን 40ኛ የምረቃ ዓመታቸውን አከበሩ።

የአዲስ አበባ ዩኒቨርሲቲ የቴክኖሎጂ ፋካልቲ ኮሌጅ የ1978 ዓ.ም. የመካኒካል ምህንድስና ምሩቃን ከ40 ዓመታት በኋላ በድጋሚ ተገናኝተው ትዝታቸውን ያደሱበትና ቀጣይ ትብብራቸውን የመከሩበት ልዩ መርሐ ግብር ተካሄደ።

በመርሐ ግብሩ ላይ የተገኙት የዩኒቨርሲቲው ፕሬዚዳንንት ዶ/ር ሳሙኤል ክፍሌ የእንኳን ደኅና መጣችሁ መልዕክት አስተላልፈው፣ ምሩቃኑ ባለፉት ዓመታት ያካበቱትን የሙያና የሕይወት ተሞክሮ ለተማሪዎች እንዲያጋሩና ለዩኒቨርሲቲው የልማት ጥረቶች ድጋፍ እንዲያደርጉ ጥሪ አቅርበዋል።

በውይይቱም የምሩቃኑን ልምድ ከዩኒቨርሲቲው የለውጥ ሂደት ጋር ማስተሳሰር፣ በምርምር፣ በፈጠራ፣ በዩኒቨርሲቲና ኢንዱስትሪ ትስስር እንዲሁም በተማሪዎች የሙያ እድገት የሚኖራቸውን ሚና ማጠናከር በዋናነት ተነስተዋል።
መርሐ ግብሩ ምሩቃኑ በዩኒቨርሲቲው የተከናወኑ አዳዲስ ሥራዎችንና ዋናውን ግቢ በመጎብኘት ተጠናቋል።

18/09/2026

Addis Ababa University Model Community School: Where Future Talent is nurtured and Future Leaders are shaped.

17/09/2026

የአዲስ አበባ ዩኒቨርሲቲ ሞዴል ኮሚዩኒቲ የመጀመሪያ ደረጃ ትምህርት ቤት በዛሬው ዕለት ሥራ ጀመረ::

ለ75 ዓመታት በከፍተኛ ትምህርት፣ በምርምርና በሀገራዊ አገልግሎት የተገነባውን ልምድ፣ ዕውቀትና ኃላፊነት ከታዳጊው ትውልድ ጋር ለማገናኘት አዲስ አበባ ዩኒቨርሲቲ አንድ አዲስ በር ከፍቷል። ለበርካታ ጊዜያት ከፍተኛ ዝግጅት ሲያደርግበት የቆየውን ዘመናዊ ሞዴል ኮሚዩኒቲ የመጀመሪያ ደረጃ ትምህርት ቤት የዩኒቨርሲቲው ከፍተኛ አመራሮች፣ የመንግሥት የሥራ ኃላፊዎች፣ ተማሪዎች እና ወላጆች በተገኙበት ዛሬ መስከረም 7 ቀን 2019 ዓ.ም. በታላቅ ሥነ-ሥርዓት መርቆ ሥራ አስጀምሯል።
የአዲስ አበባ ዩኒቨርሲቲ ፕሬዚዳንት ዶ/ር ሳሙኤል ክፍሌ በምረቃ መርሃ-ግብሩ ላይ እንደገለጹት፣ የትምህርት ቤቱ መመረቅ የዩኒቨርሲቲው የረጅም ጊዜ እቅድ ፍሬ ያፈራበት ታሪካዊ ዕለት ነው ብለዋል። አክለውም ትምህርት ቤቱ የዘመኑን ቴክኖሎጂ የዋጁ የላቦራቶሪ ክፍሎችን፣ የስፖርት ማዕከላትን፣ ደረጃቸውን የጠበቁ የመማሪያ ክፍሎችን እና ምቹ ከባቢን ያካተተ በመሆኑ የሀገራችንን የቀጣይ ዘመን ተስፋዎች የሚቀርጹ ውጤታማ ተማሪዎችን ለማፍራት ትልቅ አስተዋጽኦ እንደሚኖረው ገልጸዋል።
በመርሀ ግብሩ ላይ የተገኙት የአዲስ አበባ ትምህርት ቢሮ ምክትል ሃላፊ እና የቢሮው ተወካይ አቶ ሳምሶን መለሰ በበኩላቸው ዩኒቨርሲቲው በከፍተኛ ትምህርት ዘርፍ ብቻ ሳይወሰን የመጀመሪያ ደረጃ ሞዴል ትምህርት ቤት መክፈቱ ትውልድን በእውቀት ለመቅረጽ ያለውን ቁርጠኝነት እንደሚያሳይ ተናግረዋል። በተጨማሪም ይህ የማህበረሰብ ትምህርት ቤት የዩኒቨርሲቲው አካል በመሆኑ የላቀ የትምህርት ውጤት ብቻ ሳይሆን ከፍተኛ ፈጠራ እና ክህሎት እንደሚጠበቅበት አሳስበዋል።
ትምህርት ቤቱ ለ2019 ዓ.ም. የትምህርት ዘመን ከ 450 በላይ ተማሪዎችን ከ 1ኛ እስከ 7ኛ ክፍል ድረስ የተቀበለ ሲሆን በሚቀጥሉት ዓመታት የቅድመ አንደኛ ደረጃ እና የከፍተኛ ሁለተኛ ደረጃ ትምህርቶችን ለመስጠትም ስራውን ጀምሯል። ከ 100 ባላይ መምህራን እና የአስተዳደር ሰራተኞችን ይዞ ስራውን የጀመረው ትምህርት ቤቱ የተማሪዎችን ሁለንተናዊ ዕድገትን የሚያበለፅግ የትምህርት ስርዓትን ተግባራዊ ያደርጋል።
አዲስ አበባ ዩኒቨርሲቲ በከፍተኛ ትምህርት ዘርፍ እያበረከት ያለውን አስተዋፅኦ በማስፋት በሀገራችን የትምህርት ስርዓት እድገት ላይ የራሱን አሻራ እያሳረፈ እንደሚገኝ በዝግጅቱ የተገለፀ ሲሆን ዩኒቨርሲቲው ይህን መሰል ተግባሩን አጥናክሮ እንደሚቀጥል የዩኒቨርሲቲው ፕሬዝዳንት ዶ/ር ሳሙኤል ክፍሌ ተናግረዋል።

17/09/2026

ማስታወቂያ
መስከረም 07 ቀን 2019 ዓ.ም.
ለ2019 ትምህርት ዘመን በአዲስ አበባ ዩኒቨርሲቲ ተወዳድራችሁ በመደበኛው መርሃ - ግብር ቅበላ ላላገኛችሁ አመልካቾች በሙሉ:
የዩኒቨርሲቲውን መግቢያ ፈተና (UAT) 50 እና ከዚያ በላይ ያገኛችሁ በተከታታይ ትምህርት (Extension) ማመልከት የምትችሉ መሆኑን እንገልፃለን፡፡

አዲስ አበባ ዩኒቨርሲቲ ይማሩ: ህልሞን ያሳኩ::

አዲስ አበባ ዩኒቨርሲቲ ሬጅስትራር

16/09/2026

A Warm Welcome to our Students

Dear Students of Addis Ababa University,
It is with great pleasure and a deep sense of responsibility that I welcome you to the 2019 Ethiopian academic year (2026/2027 ) at Addis Ababa University.
To our new students, I extend a particularly warm welcome. You are beginning a new chapter in an institution whose history is intertwined with the intellectual, scientific and national development of Ethiopia. Your arrival marks not only the beginning of your university education, but also your entry into a community of scholars, researchers, innovators and future leaders. I encourage you to embrace this journey with curiosity, discipline and an eagerness to discover not only what you know, but what you are capable of knowing and becoming.
To our returning students, welcome back to the University. Your continued journey at AAU is an opportunity to build upon the knowledge and experiences you have already gained, to deepen your scholarship and to take an increasingly active role in shaping our academic community. I encourage you to lead by example and to recognize the responsibility that comes with being part of Ethiopia’s premier and flagship university.
To all our students, I ask that you make this year a year of learning, research and innovation. Do not be satisfied with simply receiving knowledge. Create it. Test it. Challenge it. Apply it. As we begin this new academic year, I invite each of you to approach it with ambition, humility and purpose. I wish you all a successful, productive academic year.
Welcome to Addis Ababa University. Welcome to a year of discovery, and a year in which your ideas can become part of our shared future.

Dr. Samuel Kifle
President
Addis Ababa University

ውድ የአዲስ አበባ ዩኒቨርሲቲ ተማሪዎች፣
ወደ አዲስ አበባ ዩኒቨርሲቲ የ2019 የትምህርት ዘመን በታላቅ ደስታ እና የኃላፊነት ስሜት እንኳን ደህና መጣችሁ እላለሁ።
አዲስ ለተቀላቀላችሁን ተማሪዎቻችን፣ እንኳን ደህና መጣችሁ ለማለት እወዳለሁ። አዲሱ የህይወታችሁ ምዕራፍ የሚጀምረው ታሪኩ ከኢትዮጵያ ምሁራዊ፣ ሳይንሳዊና ሀገራዊ ዕድገት ጋር በጥብቅ ከተሳሰረ ተቋም ጋር ነው። የጉዟችሁ ጅማሬ የሚያበስረው የዩኒቨርሲቲ ትምህርታችሁን መጀመራችሁን ብቻ ሳይሆን ከምሁራን፣ ከተመራማሪዎች፣ ከፈጠራ ባለሙያዎች እና ከወደፊት የማኅበረሰብ መሪዎች ጋር በአንድነት መጓዝ መጀመራችሁንም ጭምር ነው። ይህንን ጉዞ በጠያቂነት፣ በሥነ-ሥርዓት እና በጉጉት እንድትቀበሉት አበረታታችኋለሁ። የምታውቁትን ብቻ ሳይሆን ምን ማወቅ እንደምትችሉና ወደ ምን ማደግ እንደምትችሉም ለመረዳት ጥረት አድርጉ።
ወደ ዩኒቨርሲቲው ለተመለሳችሁ ተማሪዎቻችን፣ እንኳን ወደ እውቀት ቤታችሁ በሰላም ተመለሳችሁ። በአዲስ አበባ ዩኒቨርሲቲ የቀጠለው ጉዟችሁ እስካሁን ያገኛችሁትን ዕውቀትና ልምድ ይበልጥ የምታዳብሩበት፣ ምሁራዊ ብቃታችሁን የምታጎለብቱበት እና የአካዳሚያዊ ማኅበረሰባችንን በመቅረፅ ሂደት የበለጠ ንቁ ሚና የምትጫወቱበት ዕድል ነው። ለሌሎች አርአያ እንድትሆኑ እና የኢትዮጵያ ቀዳሚው ዩኒቨርሲቲ አካል መሆን የሚጠይቀውን ኃላፊነት እንድትገነዘቡ አበረታታችኋለሁ።
ለተማሪዎቻችን በሙሉ፣ ይህንን ዓመት የመማር፣ የምርምርና የፈጠራ ዓመት እንድታደርጉት እጠይቃችኋለሁ። ዕውቀትን በመቀበል ብቻ አትርኩ። ዕውቀትን ፍጠሩ። ፈትኑት። ተግብሩት። ይህንን አዲስ የትምህርት ዘመን ስንጀምር፣ ሁላችሁንም በታላቅ ራዕይ፣ በትህትና እና በጠንካራ ዓላማ እንድትቀበሉት እጋብዛችኋለሁ። ለሁላችሁም የተሳካ፣ ውጤታማ እና አስደሳች የ2019 ዓ.ም. የትምህርት ዘመን እመኛለሁ።
እንኳን ወደ አዲስ አበባ ዩኒቨርሲቲ በደህና መጣችሁ። እንኳን ወደ አዲስ የፈጠራ፣ ሐሳቦቻችሁ የጋራ የወደፊት ተስፋችን አካል ወደሚሆኑበት ዓመት በደህና መጣችሁ።

ዶ/ር ሳሙኤል ክፍሌ
ፕሬዝዳንት
አዲስ አበባ ዩኒቨርሲቲ

15/09/2026

**የአዲስ አበባ ዩኒቨርሲቲ የ1988 ዓ.ም. ምሩቃን ከ30 ዓመታት በኋላ ተገናኙ!*
የአዲስ አበባ ዩኒቨርሲቲ የ1988 ዓ.ም. ምሩቃን ከ30 ዓመታት በኋላ በቢዝነስና ኢኮኖሚክስ ኮሌጅ ተገናኝተው ትዝታቸውን ያደሱበት ልዩ መድረክ ተካሄደ።

በፕሮግራሙ ላይ የተገኙት የአዲስ አበባ ዩኒቨርሲቲ ፕሬዚዳንት ዶ/ር ሳሙኤል ክፍሌ፣ ምሩቃኑን “ወደ ቀድሞ ቤታችሁና ዩኒቨርሲቲያችሁ እንኳን ደህና መጣችሁ!” በማለት ተቀብለዋቸዋል።
የዩኒቨርሲቲው የቀድሞ ተማሪና የዝግጅቱ አስተባባሪ አቶ ኃይሉ ወልደገብርኤል በበኩላቸው፣ ምሩቃኑ እርስ በርሳቸው በመወያየትና ከዩኒቨርሲቲው አመራሮች ጋር በመነጋገር ዝግጅቱን በአጭር ጊዜ ውስጥ እውን ማድረግ እንደቻሉ አብራርተዋል።

በመድረኩ ላይ የተገኙት የአዲስ አበባ ዩኒቨርሲቲ ፕሬዚዳንት ጽሕፈት ቤት ኃላፊ ፕሮፌሰር ማቴዎስ እንሰርሙ፣ ምሩቃኑን እንኳን ደህና መጣችሁ በማለት ከተቀበሉ በኋላ፣ ዩኒቨርሲቲው በአሁኑ ወቅት ራስ ገዝ ተቋም በመሆኑ፣ የቀድሞ ተማሪዎች በማንኛውም ጊዜ ወደ ግቢያቸው ተመልሰው የተማሩባቸውን ክፍሎችና የዩኒቨርሲቲውን ዕድገቶች እንዲጓበኙ ጥሪ አቅርበዋል።
በተጨማሪም፣ የቀድሞ ተማሪዎች ወደ ተማሩበት ተቋም ተመልሰው ትዝታቸውን ማደሳቸውና ዩኒቨርሲቲውን መደገፋቸው ለቀጣዩ ትውልድ ታላቅ አርአያ እንደሚሆን ተናግረዋል።
ምሩቃኑ በዝግጅቱ ላይ የቀድሞ ትዝታዎቻቸውን በማንሳት አስደሳችና ልዩ ቆይታ አድርገዋል። ትዝታዎቻቸውን ከመጋራት ባሻገርም፣ ያስተማራቸውን ዩኒቨርሲቲ ለመደገፍ ቃል ገብተዋል።