ሐወዘኒ ጣዕሙ Hawaz

ኣቦይ ቀሽን ኣደይ ሞኒካን ኣብ ሓደ መስመር ፦

እቶም ከም ወቃስን ምስክርን ኮይኖም ዝቀረቡ ቀሺ ።በቲ ሓደ ናይ ሞኒካ ዘረባ ከም ዘሕዘኖም በቲ ሓደ ወገን ግና ናይ ሞኒካ ዘረባ ሓቅነት ከም ዘለዎ ከም ምስክር ።ሞኒካ ንኣቦታት ገዳማውያን ፦

"ብሶዶማውነት እያ ኣጸሊማቶም " ይቅረታ ከም ዝሓተት ኣብ ዘለዎ ኮይኑ ማለተይ እየ ።እዞም ወቃስን ምስክርን ኮይኖም ዝቀረቡ ቀሺ ከም ዝብልዎ ድማ ፦

"ከምኡ ዝገበሩ ቤተ ክህነት ከም ዝነበሩ መንገስትና ግና ከም ዝኣሰሮም " ተዛረቡ ።ድሕሪዚ እንበኣር ከም ተቃወሚ ኮይኖም ድማ እዚ ንቤተ ክርስትያን ኣይውክልን ክብሉ ተሰምዑ ።

ብመጀመርትኡ እዛ ናይ ሞኒኻ ዘረባ ምንጫ ካበይ እዩ ፧ ኢልካ ክሕተት ጽቡቅ እዩ ።እቲ ካልኣይ ድማ ፦

ሕጂኸ መን ኮን ሰዶማዊ ስለ ዝኾነ እዩ ተኣሲሩ ዝበሃል ካህን ኣሎ ኮይኑ እዩ ኢልካ ምሕታት ይግባእ ።እዛ ጉዳይ ምጽጽ ትብል ዘላ ኮይኑ ይስማዓኒ ።

ኣቀዲምካ ከምዚ ዓይነት ናብ ህዝቢ ትዝርግሕ እሞ ።ሽዑ ንዝተቃወመካ ዘበለ ናብታ ዝዘርጋሕኻያ መርበብ ምእታዉ ጥራይ እዩ ።ህዝብና ነታ ቀደም ከም ኣጀንዳ ዝተዋህበቶ ስም ለሚድዋስ ገዲፍዋ ይመስለኒ ።ሕጂ ክኣ በታ ኣዝዩ ዝፈርሓ ሰዶማውነት ትበሃል ክንደይ ሰብ ኮን ከጥፍእ ይኸውን ።ንሕናስ ካብ ቀደም እታ "ሰዶማውነት " እትብል ስም ምስ ተደጋገመት ገለ ስራሕ ከም ዘለዋ ግምት ኔርና እዩ ።እዛ ቃል ካብ ሞኒካ መጺኣ ኢሉ ዝሓስብ በዚ ዘመን እዚ ዓሻ ጥራይ እዩ ።ከመይስ ፦

"ብዙሓት ክሕነቁን ብዘይ ፍርዲ ክእሰሩን ዝተደልዩን ሰባት " ከም ዘለዉ ዘይምዝንጋዕ የድሊ ።ብግሉጽ ኣባሃህላ ልክዕ እዛ ቃል ፦

*ከም ከዳዕን ተሓድሶን ከተገልግል እያ ትዝርጋሕ ዘላ !!!!!!!!!!

ዝተፈጸመን ዘይተፈጸመን ድሕነት ዝብል ምስ ረኣኹ

" ሕጂ ግና፥ ከምቲ ሕግን ነቢያትን ዝመስከርዎ፥ ጽድቂ ኣምላኽ፥ ብሕጊ ሙሴ ዘይኮነ ብኻልእ መገዲ ተገሊጹ ኣሎ። ኵሎም እቶም ዚኣምኑ ኣብ ቅድሚ እግዚኣብሔር ዚጸድቁ፥ ብኢየሱስ ክርስቶስ ብምእማን እዩ። ኣብዚ ሌላን ጉሌላን የልቦን። ከመይ ኵሎም ስለ ዝኃጥኡን ካብ ክብሪ ኣምላኽ ስለ ዝረኃቑን፥በቲ ብኢየሱስ ክርስቶስ ዚርከብ ድኅነት ብኸምኡ፥ ብጸግኡ ይጸድቁ።ኣምላኽ ከኣ ጽድቁ ምእንቲ ኼርኢ፥ ነቲ ቐደም ዝተገብረ ኃጢኣት ብመለኮታዊ ትዕግሥቱ ይኅለፍ ኃደጎ፤ ንእኡ ድማ ብደሙ ንዚኣምን ኵሉ መተዓረቒ ገይሩ ኣቖሞ። ኣብዚ ዘመን እዚ ዚገልጾ ዘሎ ኸኣ፥ ንሱ ጻድቕ ከም ዝኾነ፥ ነቲ ብኢየሱስ ዚኣምን ዘበለ ዅሉውን ከም ዜጽድቖ ምእንቲ ኼርኢ እዩ።"(ሮሜ,3፥21-26)

እዚ ሓው ንድሕነት ኣብ ክልተ ይኸፍሎ እሞ እቲ ብምክንያት ኣዳም ዝመጸ ብክርስቶስ ተደምሲሱ ድሕነት ረኺብና ኢና ይብል ።ድሕሪኡ ኣብ ዘሎ ግና ቅዱስ ጳውሎስ "ብፍርሓትን ብምንቅጥቃጥን ድሕነትኹም ፈጽሙ " ስለ ዝብለና ንሕና ከም ንፍጽሞ እዩ ዘረድእ ።ነዛ ጽሕፍቲ ምስ ረኣኹ እዛ ንክክቲኡ ብብሩሕ ክትገልጽ እትክእል ናይ ቅዱስ ጳውሎስ ሓሳብ እያ መጺኣትኒ ።ቅዱስ ጳውሎስ

ነቲ ቀደም ዝተገብረ ሓጢኣት ብመለኮታዊ ትዕግስቱ ይሕከፍ ሓደጎ ይብል።እዚ ማለት እቲ ብመጀመርታ ሰብ ኣዳም ናብ ደቂ ሰብ ዝኣተወ ሓጢኣት ማለት እዩ ።ቀጺሉ ቅዱስ ጳውሎስ ፦

"ንእኡ ድማ ብደሙ ንዝኣምን ኩሉ መተዓረቂ ገይሩ ኣቆሞ " ይብል ።

እንበኣር ቅድሚ ሕጂ ኮነ ፡ሕጂ ኮነ ዋላ ንዝመጽእ ድሕነት ብክርስቶስ ምኳኑ ኢና ንኣምን ።ምናልባት ሰናይ ግብሪ ዝበሃል ድኣ እንታይ እዩ ክንብል ንክእል ኢና ።ኣብዚ ሕጂ ነታ ናይ ቅዱስ ጳውሎስ ቃል ንጠቀመላ ፦

"ብፍርሓትን ብምንቅጥቃጥን ንምድሓንኩም ፈጽሙ " (ፊሊ,2፥12-13)

እቲ ሰናይ ዝግበር ኣብ ልዕሌና ኣምላኽ ምኳኑ ፡ንሕና ብርሃናት ዓለም ክንከውን ከም ዝግበኣና ስለዚ ብፍርሓትን ብምንቅጥቃጥን ነቲ ዝተዋህበና ድሕነት ክሳብ መፈጸምታ ከነብጸሖ ከም ዝግበኣና ኢዩ ዘረድእ ።እዚ ማለት ድማ ሰብ እንተኣሚኑ ኣብቲ ዝኣመነሉ ክነብር ይግበኦ ማለት እዩ ።ኣብቲ ዝኣመነሉ ዘይነብር እንተኮይኑ ግና ካብቲ መንገዲ እምነት ይወጽእ ኣሎ ።ቤተ ክርስትያን ብደም ክርስቶስ እትነብር ንጽሕትን ቅድስትን ኢያ ።ካብዚ እምነት እዚ ወጺኡ ብመንገዲ ሥጋ ክጓዓዝ ዝደሊ ሰብ ግና ካብታ ቅድስቲ ቤተ ክርስትያን ይወጽእ ኣሎ ማለት እዩ።ብዛዕባ እዚ ጸሎት ክትገብር ከላ ቤተ ክርስትያን "ነቶም ኣብ ንሥሓ ዘለዉ ህዝብኻ ናብ ቅድስቲ ቤተ ክርስትያንካ ምለሶም" ኢላ ትጽሊ ።ወይ'ውን "ኣነ ድሕሪ ምድሓነይ ሰይጣን ናብ ልበይ ኣትዩ በቲ ፍላጻኡ ጌሩ ወቅዓኒ ኦ ጎይታ ካብቲ ንምሥሓተይ ዘይዓርፍ ጸላኢየይ ኣድሕነኒ ተበቀለለይ " ኢልና ንጽሊ ።

ትማሊ ብደሙ ፡ሎሚ ብደሙ ፡ጽባሕ ብደሙ ኢና ንድሕን።በቲ ሓንሳብ ንሓዋሩን ንምድሓን ደቂ ሰባት ዝፈሰሰ ደሙ ማለት እዩ ።ንሱ ጉንዲ ወይኒ ኮይኑ ንሕና ጨናፍር ስለ ዝኾና ግና ሰናይ ፍረ ክንፈሪ ይግባእ ።ኣብቲ ሰናይ ዝኾነ ክርስቶስ እንተለና ክኣ ናይ ግድን ኢና ሰናይ ፍረ ክንፈሪ ።ከመይ "ሰናይ ኦም ሰናይ ፍረ ጥራይ እዩ ዝፈሪ " ካብኡ እንተወረድና ግና "ብሥጋና ተመሪሕና ግብሪ ሥጋ ኢና እንፍጽም "። ስለዚ ንሕና ንጉዓዞ ጉዕዞ ምልኣት እምነት ንክሕልወና እዩ ።ከመይስ ንሕና ጉድላት እምነት ኢና ።ከምቲ ኣብ ወንጌል " ንእምነትና ባዕልኻ ደግፎ "ወይ'ውን " ምልኣት እምነት ሃበና "ዝብል ጸሎት ዘለዎ ምልኣት እምነት ዘለዎ ሰብ " ሰናይ ፍረ እዩ ዝፈሪ "።እቲ ጎደሎ እምነት ዘለዎ ግና ምስ ኩነታት እዩ ዝጋላበጥ ።ቅዱስ ጳውሎስ እምነት ኢያ ተድሕን ዝብላ እንበኣር " ነታ ሕፍቲ ዘይርከባ እምነት "እዩ ።ኣብርሃም ኣመነ ጽድቂ ኮይኑ ተቆጽረሉ ከም ዝተባህለ ማለት እዩ ።ብርግጽ ኣብርሃም " ንእምነቱ ንወዱ ብምስዋዕ ንእግዚኣብሔርን ንሰባትን ኣርእዩ "እዩ ።ንሕና 'ውን ንእምነትና ብግብርና ብምግላጽ " ብርሃን ናይ ዓለም ክነከውን "ይግባኣና እዩ ።ብካልእ ኣብ ወንጌል ዘሎ ምሳለ ክንጥቀም እንተኮይንና'ውን " ንሕና ጨው ኢና "።ጨው ክኣ ንኩሉ መቀረት ይህብ ማለት እዩ ።ጨው መቀረት እንተዘይብሉ ግና ይርገጽ ጥራይ እዩ ።ስለዚ ንሕና ብኣምላኽ ንኣምን ሰባት ንዓለም ጨው ኢና ።ጨውነትና እንተጠፍአኸ እንተተባሂሉ ንርገጽ እዩ እቲ ሓሳብ ።ጨውነትና ግና እንታይ እንተኮይንና እዩ ዝጠፍእ ኢልና እንተሓተትና እቲ መልሲ ንጹር እዩ ፦

" ኣብ ኣምላኽ እምነት ሰለዘይብልና እዩ "ብሓጺሩ " እምነት ኣሎኒ ዝብል ግናኸ ዘይእመን ሰብ ኣብ እምነት የልቦን ።ስለዚ እቲ ናይ እምነት ዓቅሚ ዝዘንገዐ ጽሑፍ ኮይኑ ይስማዓኒ ።ንሕና ኩሉ ጊዜ ብግብርና ዘይኮነ ብክርስቶስ ኢና ዲሒንና ።ነዚ ድሕነት እዚ ግና ብእምነት ክንቅበሎ ይግባኣና ።ሕጂ እዛ ብእምነት ትብል ዘላ ብምልኣት እምነት ኢልና ኢና ክንወስዳ ዘሎና ።ንሕሰቦ ኣብዚ ዘመን ኣብ ክርስትና ተኣኪብና ዘሎና ንማለቱ ኢዩ ።ይትረፍ ንዓለም ጨው ብርሃን ክንከውንስ ንርእስና እኳ ብርሃንን ጸልማትን ፈሊና ዘይንፈልጥ ኢና ።ከም ኣባላት ጥራይ ንቁጸር ግናኸ ዘየለና ሰባት በዚሕና ኣሎና ።እዚ ኩሉ ንምንታይ ይኸውን ኣሎ እንተበልና "እምነትና ስለ ዝጎደለ " እዩ ።ናይዚ ዋና ጸገም ክኣ ንሕና ኣብቲ ክርስቶስ ዝፈጸሞ ድሕነት ፍጹም ክንኣምን እናተገብአ ፦

"ናይ ርእስና ድሕነትን ጽድቅን ከነቁም ብምሕሳብና ኢዩ "

ነቲ ዘቆምናዮ ጽድቂ ክንክእሎ ስለ ዘይክኣልና ክኣ ምስ ዕድልና እናማረርና ንነብር ኣሎና ።ስለዚ ናብቲ ክርስቶስ ዘቆመልና ድሕነትን ጽድቅን ክንምለስ ይግባእ ።ናብኡ እንምለስሉ ሓደ መንገዲ ድማ ንስሓ እዩ ፦

"ማለት፥ ጓሂ ኸም ፍቓድ ኣምላኽሲ ንምድሓን ዚኸውን ዘይትጠዓሰሉ ንስሓ የምጽእ፡ ጓሂ ዓለም ግና ሞት እዩ ዜምጽእ" (2ይ ቆሮ,7፥10)

ነየናይ ምድሓን እንተበልና ነቲ ክርስቶስ ዝህበና ምድሓን እዩ ናባና ዘምጸኦ ንስሓ ።ከመይስ እቲ ምድሓን ዘለዓለማዊ እዩ ።ከምዞም ዝተፈጸመን ዘይተፈጸመን ድሕነት ዝሓስቡ ሰባት ግና ካብቲ ኣዳም ዘምጸኦ ሓጢኣት ነጻ ኣውጺኡ ሕጂ ግና ከከመ ስሬኹም ከም ዝበለና እዩ ዝርደኦም ማለት እዩ ።ከምኡ ግና ኣይኮነን ።ሓጢኣት ጌርና ብንስሓ ምስ ተመለስና ድሕነት ዘውህበና እቲ ሓንሳብ ንሓዋሩ ዝቆመ "ደም ኢየሱስ ክርስቶስ ወዱ " እዩ ።ሥርየት ሓጢኣት ዝረከብ "ብደም እዩ "። እንበኣር እቲ ንዘለዓለም ንሥርየት ሓጢኣት ኢሉ ዝቆመ ደም ክርስቶስ ኢዩ ቅድሚ ሕጂን ፡ሕጂን ንዘለዓለምን ዘድሕነና እንበር ካልእ ሓዱሽ ነገር የልቦን ።ምናልባት ደም ኢየሱስ ክርስቶስ " ካብቲ ብኣዳም ዝመጸ ሓጢኣት ጥራይ ዘድሕነና "ኢሉ ዝኣምን ሰብ እንተሎ ግና ።ነዚ ሕጂ ንገብሮ ሓጢኣት'ውን ካልእ " ደም ከድሊ "እዩ ማለት እዩ ።ከመይስ ብዘይ ደም " ሥርየት ሓጢኣት "ዝበሃል የልቦን ።እንበኣር ቅድሚ ሕጂ ፡ሕጂ ፡ንዝመጽእ ብደም ወዱ ንድሕን ካብ ኮና ከመይ ጌርና ኢና ዝትፈጸመን ዘይተፈጸመን ድሕነት ኣሎ ክንብል እንክእል ፧ ኩሉ ድሕነት ተፈጺሙ እዩ ።ንሕና ብመንገዲ እቲ ድሕነት'ዶ ንጓዓዝ ኣሎና ዋላስ ወጺእና ኢዩ ሕቶ ክኸውን ዝግባእ ።ብሕጂ ዝስቀል ክርስቶስ የልቦን እሞ ዘይፈጸመ ድሕነትስ የልቦን ።ስለዚ ኢና ድማ ርግጸኛታት ኮይንና ።ድሒንና ንድሕን ኣሎና ክንድሕን ኢና ኢልና ንኣምን ።

መኣረምታ ንምቅባል ድውል እየ !!!!!!!!!!

"ካልእ ምስላ ድማ ከምዚ ኢሉ መለሰሎም፡ መንግስተ ሰማያት ኣብ ግራቱ ጽቡቕ ዘርኢ ዝዘርኤ ሰብ እያ እትመስል።እቶም ሰብ ደቂሶም ከለዉ፡ ጸላኢ መጸ፡ ኣብቲ ማእከል ስርናይ ድማ ክርዳድ ዘሪኡ ኸደ"(ማቴ,13-24-25)

እዞም ነቲ ጎይታና ዝዘርኦ ጽቡቅ ዘርእን ነቲ ጽላኢ ዝዘርኦ ክርዳድን ብሓደ ኣጥሒና እንተዘይበላዕና ኣይንድሕንን እትብሉ ሰባት ግና ኣእምሮኹም ናበይ እዩ ተሰዊሩ ።መስተውዓሊኹም'ኸ ናበይ ኣበለ ።

ቅዱስ ጳውሎስ ነዞም ከምዚኦም ዝበሉ ህዝቡ ከምዚ ኢልዎም ነበረ ፦

"ክርስቶስ ነቲ ዚኣምን ዘበለ ዂሉ መደምደምታ ሕጊ ንጽድቂ እዩ እሞ፡ ጽድቂ ኣምላኽ ሰኣን ምፍላጦምን ጽድቂ ርእሶም ኪተኽሉ ብምድላዮምንሲ ንርእሶም ኣብ ትሕቲ ጽድቂ ኣምላኽ ኣየግዝኡን" (ሮሜ,10-3-4)።

ብርግጽ ቅንኣት ይህልወኩም ይኸውን እዩ ።ቅንኣት ኣብ ክርስቶስ ዘይተመስረተ እንተኮይኑ ግና ክትዕ እዩ ዝወልድ ።ክትዕ ድማ ትዕቢት ይወልድ ።ትዕቢት ድማ ንውድቀት ትቅድማ እያ 'ሞ ትወድቅ ማለት እዩ ።ኣብዚ ዘመን እንሪኦ ዘሎና ሰብ ፦

ንዓ በጃኻ ብክርስቶስ ጸዲቂኻ ኢኻ እንተበልካ ኣይሰምዕን በንጻሩ ናይ ገዛእ ርእሱ ጽድቂ ክተክል ኮለል ይብል ።ነዚ ናይ ገዛእ ርእሱ ጽድቂ ክተክል ክብል እዩ እንበኣር ፡-

ነቲ ክርዳድ ምስ ስርናይ ጥሒነ እንተዘይበሊዐዮ ኣይጸግብን ዝብል ዘሎ ።ክርዳድ ክጓሓፍ ጥራይ እዩ ዘለዎ ።እቲ ስርናይ ግና ናብ ቆፎኡ ክኣቱ ኣለዎ ።ክርዳድን ስርናይን ንምፍላይ ግና "ሕርኩት ሓረስታይ" ምኳን የድሊ ።ስለዝስ ነስተውዕል ፦

ነቲ ክርዳድ ካብ ስርናይ ንፍለዮ እንበር ነቲ ክርዳድ ስርናይ ንክንገብሮ ኮለል ኣይንበል !!!!!!!!!!

በዝ

"ካብ ኩለን ዕለታት ንሰንበት ኣኽበረ ፡ካብ ኩለን ኣዴታት መሕደሪት ክትኾኖ ንማርያም ፈተወ (መረጸ )(ዚቅ)

ሓደ ዝፈትዎ ዲያቆን ሓወይ ነዛ ጥቅሲ ኣብ ዝሓለፈ ሰሙን ሰዲዱለይ ።ኣነ ድማ ካብኣ ተበጊሰ ብዛዕባ ቅድስት ድንግል ማርያም ክጽሕፍ ደልየ ።እንበኣር እዛ ጥቅሲ እንታይ እያ ትብለና ዘላ ካብተን ሸውዓተ ዕለታት እግዚኣብሔር ንኸዕርፈላ ንቀዳመይቲ ሰንበር ፈለየ ወይ ኣኽበረ ።ኣብ ሓዱሽ ኪዳን'ውን ሓዱሽ ፍጥረት ፈጢሩ ብትንሣኤ ከዕርፈላ ነታ ቀዳመይቲ መዓልቲ መረጸ ።ካብ ኩለን ኣንስቲ ድማ ኣዴኡ ንክትኾኖ ንድንግል ማርያም መረጸ ።እግዚኣብሔር ንዓለም ከድሕን እንከሎ ብሥጋ ተገሊጹ እዩ ።ብሥጋ ንክግለጽ ግና ሓንቲ ኣደ ተድልዮ ነበረት ።ምክንያቱ እቲ ናይ ተስፋ ጽሑፍ ንባዕሉ " ዘርኢኺ "ኢሉ ስለ ዝጅምር ።ስለዚ ከምቲ ኣብ መጽሓፍ ምሳሌ ፦

" ብዙሓት ጽቡቅ ዝገበራ ኣንስቲ ኣለዋ ፡ንስኺ ግና ንኩለን ትበልጽየን ኢሉ ይንእዳ "(ምሳ,31፥29)ዝብል ተጻሒፉ እንረኽቦ ።ድንግል ማርያም'ውን ካብ ኩለን ኣዴታት ዝበለጸት ስለ ዝኾነት ተመርጸት ።ነዚ ክምስክር ከሎ መልኣኽ ገብርኤል ፦

" ቡርክት ኣንቲ እምኣንስት ወቡርኽ ፍሬ ከርሥኺ "እቲ መልኣኽ ናብኣ ኣትዩ፥ ኣቲ ምልእቲ ጸጋ፡ እግዚኣብሄር ምሳኺ እዩ እሞ፡ ባህ ይበልኪ፡ ካብ ኣንስቲ ብርኽቲ ኢኺ፡ በላ" (ሉቃ,1፥28)

ኣብዚ ከም እንዕዘቦ ድንግል ማርያም ካብ ኣንስቲ ዝተባረኸት እግዚኣብሔ ምሳኣ ዝኾነ ምልእቲ ጸጋ ምኳና እዩ ።ስለዚ እንበኣር እግዚኣብሔር ነዛ ካብ ኩለን ኣንስቲ ዝበለጸት ወላዲቱ ንኽትከውን መረጸ ።ቤተ ክርስትያን ኩሉ ጊዜ ፦

"እስመ ሓረያ እግዚኣብሔር ለጽዮን ፡ወኣብደራ ከመ ትኹኖ ማሕደሮ ፡ዛቲ ይእቲ ምዕራፍየ ለዓለም " ማለት "እግዚዚኣብሔር ንጽዮን ሓረያ ፡መሕደሪቱ ክትከውን'ውን በኅጋ " ንዝብል ናይ ቅዱስ ዳዊት ጽሑፍ "እግዚኣብሔር ንከተማ ጽዮን ከም ዝሓረየ ንጊዜኡ ኢላ ፍጻሜኡ ግና እግዚኣብሔር ካብኣ ንኽወለደ ንድንግል ማርያም ከም ዝመረጸ " ተረድእ ።እግዚኣብሔር ንዓሰርተ ቃላት ዝጽሕፈሉ ጽላት ከም ዝመረጸ ኣሳራርሓኡ ከም ዝነገረን ።እግዚኣብሔር መሕደሪት ኣማናዊት ቃል ንኽትከውን'ውን ንድንግል ማርያም ሓረየ ።ነዚ'ውን ኣብ መልክዓ ማርያም ፦

"ማርያም ጽዮን ታቦተ ቃለ ጽድቅ መንፈቀ ዕሥራ " ማለት "ጽላት ንዓሰርተ ትእዛዛት ከም ዝጾረትን ጸግዒ ናይ እስራኤል ዘስጋ ከም ዝኾነት ማርያም ንስኺ ንኣማናዊ ቃል መሕደሪት ኮይንኺ ጸግዒ እስራኤል ዘነፍስ ኮንኪ " ማለት እዩ ።ቅዱስ ጳውሎስ ኣብ ገላትያ ከምዚ ኢሉ ጽሒፉ ኣሎ ፦

"ምልኣት ዘመን ምስ መጸ ግና፡ ነቶም ትሕቲ ሕጊ ዘለዉ፡ ተሻዪጡ ምእንቲ ኼውጽኦም፡ ንሕናውን ውልድነት ምእንቲ ኽንረክብሲ፡ ኣምላኽ ነዚ ኻብ ሰበይቲ እተወልደ ትሕቲ ሕጊውን ዝዀነ ወዱ ለኣኾ" (ገላ,4፥4-5)።

ነዚ ካብ ሰበይቲ ዝለኣኾ ወዱ ለኣኾ ይብለና ኣሎ ።እወ ናይ ኣምላኽ ድሕነት ዝህበሉ ጊዜ ምስ ኣኸለ ንወዱ ካብ ሰበይቲ ንክውለድ ለኣኾ ።ቅድሚ ወዱ ምምጽኡ ግና ንመልኣኹ ናብ ሓንቲ ድንግል ለኣኾ ።እቲ መልኣኽ ድማ ነታ ድንግል "ካብ ኣንስቲ ዝተባረኸት ምኳናን ምልእቲ ጸጋ ምኳናን ነጊሩ " ወዲ ክትወልድ ምኳና "እቲ ወዲ'ውን ቅዱስ ወዲ ኣምላኽ ምኳኑ " ነገራ ።ነዚ ኣባ ሕርያቆስ ፦

"እግዚኣብሔር ኣብ ካብ ሰማይ ናብ ምድሪ ጠመተ ፡ናብ ምብራቅ፡ምዕራብ ፡ሰሜን ፡ደቡብ ናብ ኩሉ ኣጽናፍ ጠመተ ኣስተንፈሰ ኣጫነወ ከማኺ ዝበለት ግና ኣይረኸበን ስለዚ ንወዱ ካባኺ ክውለድ ለኣኾ " ቅዳ,ማርያም ።

ደጊሙ 'ውን

"ወሶበ ርእየ ንጽሕናኪ ለሊሁ እግዚኣብሔር ኣብ ፈነወ መልኣኮ ብርሃናዌ ወይቤለኪ መንፈስ ቅዱስ ይመጽእ ላዕሌኺ ወኅይለ ልዑል ይጸልለኺ ,,,,,,,,,,,መጽኣ ቃል እንዘ ኢይትፈለጥ እምኅጽነ ኣቡሁ ወኅደረ ላዕሌኪ " ማለት "እግዚኣብሔር ኣቦ ንጽሕናኺ ምስ ረኣየ ንገብርኤል ዝበሃል ብርሃናዊ መልኣኹ ናባኺ ለኣኸ ንሱ ድማ መንፈስ ቅዱስ ክመጸኪ ፡ሓይሊ ልዑል'ውን ከጽልለኪ እዩ ,,,,,,,ቃል ድማ ካብ ሕቁፊ ኣቡኡ ከይተፈለየ ካባኺ ክውለድ እዩ " ይብል ።እንበኣር ካብዚ ኹሉ ከም እንርደኦ ነገር እንተደኣ ሃልዩ ።እግዚኣብሔር ንደቂ ሰባት ንምድሓን ናብዚ ምድሪ እዚ ክመጽእ እንከሎ ሓንቲ ሰበይቲ ተድልዮ ኔራ ።ነዛ ሰበይቲ እዚኣ ንምምራጽ ድማ ንኹለን ኣብ ዓለም ዘለዋ ኣንስቲ ተመልከተ ።እንተኮነ ካብ ኩለን ዝበለጸት ድንግል ድንግል ማርያም ኮይና ተረኽበት ።በዚ መሰረት ድማ እቲ ምሉእ ጸጋ ዝተባህለ ቃል ንክትወልዶ ከኣለት ።እንበኣር ንድንግል ማርያም ንምንታይ ኢና ነኽብራ ኢልና ንኣባ ሕርይስቆስ እንተሓቲትናዮ ፦

"ኦ ማርያም በእንተዝ ናፈቅረኪ ወናዓብየኪ ፡እስመ ወለድኪ ለነ መብልዓ ጽድቅ ዘበኣማን ወስቴ ህይወት ዘበኣማን " ማለት "ኦ ማርያም ኣማናዊ ብልዕን ፡መስተ ሓቅን ስለ ዝወለድክልና ነክብረክን ልዕል ልዕል ነብለክን " ክብል ይገልጸልና ።መን እዩ መልዕ ሓቅን መስተ ሓቅን ንዝብል ድማ ባዕሉ ክርስቶስ ከምዚ ኢሉ ይምልሰልና ፦

"ስጋይ ብልዒ ሓቂ እዩ እሞ፡ ደመይ ከኣ መስተ ሓቂ እዩ" (ዮሓ,6፥55)

እንበኣር ንሕናስ ንክርስቶስ ስለ ዝወለደትልና ነፍቅራን ልዕል ኣቢልና ነኽብራን !!!!!!!!!!

በስመ ኣብ ወወልድ ወመንፈስ ቅዱስ ኣኅዱ ኣምላክ ኣሜን

"ካባታቶም እቶም ዝበዝሑ ግና ንኣምላኽ ባህ ኣየበልዎን "(1ቆሮ,10፥

ሎሚ መዓልቲ ካብ ዝተነቡ ምስባኽን ፡መልእክታትን ወንጌልን ዓቢ ትምህርቲ ክንመሃር ኢና ።ከም ኣርእስቲ ወሲድናዮ ዘሎና ቃል " ኣምላኽ ብመብዛሕቲኦም ኣይተሓጎሰን "ኢዩ ዝብል ።ኣምላክ ብመን እዩ ዘይተሓጎሰ ንምንታይ እዩ'ኸ ዘይተሓጎሰ ኢልና እንተሓቲትናዮ ንቅዱስ ጳውሎስ ከምዚ ኢሉ ይምልሰልና ፦

" ኣሕዋተየ፡ ኵላቶም ኣቦታትና ትሕቲ ደበና ኸም ዝነበሩ፡ ኲላቶምውን ባሕሪ ኸም እተሳገሩ፡ ዘይትፈልጡ ኽትኰኑ ኣይፈቱን እየ።ኲላቶም ድማ ብደበናን ብባሕርን ናብ ሙሴ ተጠምቁ። ኲላቶምውን እቲ ሓደ መንፈሳዊ ምግቢ በልዑ፡ኲላቶምውን እቲ ሓደ መንፈሳዊ መስተ ሰተዩ። ካብቲ ዚስዕቦም ዝነበረ መንፈሳዊ ኸውሒ ሰትዮም እዮም እሞ፡ እቲ ኸውሒ እቲ ኸኣ ክርስቶስ እዩ" (1ይ,ቆሮ,10፥1-4)።እንበኣር ንኣቦታትና እስራኤል ዝተገብረሎም ውዕለት እዩ ዝነግር ።እስራኤል ካብ ባርነት ናይ ግብጺ ብምክንያት ገንሸል በጊዕ ምስ ወጹ ።ናብ ከንኣን ንክኣትዉ ብባሕርን ደመናን ተጠመቁ ።በዚ መሰረት ድማ "ሰዓብቲ ሙሴ " ኮኑ ።ሙሴ መን እዩ ከይንብል ኣብ እብራውያን ከምዚ ዝብል ጽሑፍ ኣሎ ፦

"ሙሴስ ብዛዕባ እቲ ደሓር ኪንገር ዘለዎ ነገር ምስክር ምእንቲ ኪኸውን፡ ከም ጊልያ ዀይኑ ኣብ ኵላ ቤቱ እሙን ነበረ" (ዕብ,3፥5)

እንበኣር ሙሴ ማለት እሙን ኣገልጋሊ እግዚኣብሔር እዩ።እንበኣር እስራኤል ሰዓብቲ እቲ እሙን ኣገልጋሊ ክኾኑ ብባሕርን ብደመናን ተጠመቁ ።ካብ ሰማይ ዝወረደ መንፈሳዊ መና'ውን በልዑ ካብ ከውሒ ዝፈለቆ ጽሩይ ማይ'ውን ሰተዩ ።እዚ ኩሉ ዝገበረሎም እግዚኣብሔር እዩ ።ካብ ሰማይ መና ዝመገቦም ፡ካብ ከውሒ ማይ ዘፍለቆሎም ፡ብባሕርን ብደመናን ዘጥመቆም ፡ካብ ባርነት ናይ ግብጺ ኣውጺኡ ናብ ርስቶም ዝመርሖ ዘሎ እግዚኣብሔር እዩ ።እዚ ኩሉ እናገበረሎም ግና ንሱ ብእኣቶም ኣይተሓጎሰን ።እንታይ ኮይኑ ዘይተሓጎሰ 'ዶ ንብል ኣሎና ።እቶም መና ዝመገቦም ካብ ከውሒ ማይ ዘስተዮም ህዝቢ ኣብ ክንዲ ምስጋና ክፉእ ፍረ ዝፈረዩ እዩ ።ዝፈረይዎ ፍረ ክነግር ከሎ ቅዱስ ጳውሎስ ከምዚ ይብል ፦

" እምብኣርከ፡ እቲ ህዝቢ ኺበልዕን ኪሰትን ተቐመጠ ኺሰሐቕውን ተንስኤ፡ ዚብል ከም እተጻሕፈ፡ ከምቶም ገሊኣቶም መምለኽቲ ጣኦት ኣይትኹኑ።ከምቲ ገሊኣቶም ዝመንዘሩ እሞ ብሓንቲ መዓልቲ ዕስራን ሰለስተን ሽሕ ዝወደቑ፡ ኣይንመንዝር። ከምቲ ገሊኣቶም ዝፈተንዎ እሞ በትማን ዝጠፍኡ፡ ንክርስቶስ ኣይንፈትኖ።ከምቲ ገሊኣቶም ዘዕዘምዘሙ እሞ እቲ መጥፍኢ ዘጥፍኦም፡ ኣይነዕዘምዝም" (1ይ ቆሮ,10፥7-10)

ኣርባዕተ ክፉኣት ፍረ ከም ዝግበሩ ንምልከት ኣሎና ።መንፈሳዊ መና በሊዖም ፡መንፈሳዊ ማይ ሰትዮም ንሳቶም ግና ሥጋዊ ፍረ ፈረዩ ።እቲ ዝፈረይዎ ፍረ ድማ ከምዚ ነበረ ፦

ሀ,ኣምላኾ ጣኦት ፡-ነቲ ዝመገቦም ኣምላክ ሓዲጎም ጣኦት ኣምለኹ ።
ለ,ብምንዝርና ተሳዕሩ ።
ሐ,ገሊኣቶም'ውን ንኣምላኽ ፈተንዎ ማለት ኣብ ዘይግበኦም ቦታ ኣትዮም ንቤት ኣምላኽ ደፈሩ ።
መ,ገሊኣቶም ድማ ኣብ ክንዲ ምሥጋና ኣጉረምረሙ ።ነቲ ኣምላኽ ዝገበረሎም ነገር ብምርሳዕ ኣብ ግብጺ ኣብ ጥሕቲ ባርነት ምሓሸና በሉ ።እዚኣቶም ኩላቶም መንፈሳዊ ፍረታት ኣይኮኑን ።እንታይ ግብሪ ሥጋ እዮም ።ንኣምላኽ ዘሐጉሶ ግና ፍረ መንፈስ ቅዱስ እዩ ።ስለዚ እዞም ህዝቢ እዚኦም ግብሪ ሥጋ ስለ ዝፈረዩ ዓቢይ መቅሰፍቲ ናብ ልዕሌኦም ኣንጽኡ ።ገሊኣቶም ብመቅሰፍትን ብኣትማንን ተወድኡ ።እቲ ቃል ከምዚ ኢዩ ዝብል ፦

"ካባታቶም እቶም ዚበዝሑ ግና ንኣምላኽ ባህ ኣየበልዎን፡ ስለዚ ኣብ በረኻ ተወድኡ" (1ይ,ቆሮ,10፥5)

እንበኣር እዞም ሰባት ዝፈረይዎ ፍረ ሕማቅ ስለ ዝኾነ ናብታ ርስቲ ክኣትዉ ኣይክኣሉን እኳ ድኣ ኣብ በረኻ ተወድኡ ።እስከ ናባና ንመለስ ንሕና ድማ ሰዓብቲ ክርስቶስ ክንከውን ብማይ ገቦ ተጠመቅና ፡ካብ ሰማይ ዝወረደ ኣማናዊ ብልዒ ሥጋ ክርስቶስ በላዕና ፡ካብ ጎድኑ ዝፈሰሰ ደም'ውን ሰተና ።ሕጂ ግና ንፈርዮ ዘሎና ፍረ ከምዞም ኣቀዲምና ክንገልጾም ዝጸናሕና ድዩ ዋላስ መንፈሳዊ ፍረ እዩ ፧ናይ ሎሚ ዝነበረ ስብከት ፦

"ጻድቅሰ ከመ በቀልት ይፈሪ ፡ወይበዝሕ ከመ ዘግባ ዘሊባኖስ ፡ትኩላን እሙንቱ ውስተ ቤተ እግዚኣብሔር " ትርጉም

"ጻድቕ ከም ስየ ይልምልም፣ከም ጽሕዲ ሊባኖስ ይዐቢ።እቶም ኣብ ቤት እግዚኣብሄር እተተኽሉ ኣብ ኣጸድ ኣምላኽና ይልምዑ" (መዝ,92፥12፥13)

ጻድቅ ዝበሃል እቲ ብናይ ክርስቶስ ተበጃውነት ድሒኑ ።ብስሙ ዝተጠመቀ ፡ሥጋኡን ደሙን ዝተመገበ ሰብ እዩ ።እዚ ሰብ እዚ እንበኣር ኣብ ቤት እግዚኣብሔር ተተኪሉ ሰናይ ፍረ ይፈሪ ።እዚ ናይ ወዲ እግዚኣብሔር ወደ መዝሙር ክኸውን ዝተጠመቀ ፡ሥጋን ደምን ናይ ክርስቶስ ዝተካፈለ ሰብ "ግብረ ሥጋ እንተፈረየ " ግና ወዲቁ ከም ዘሎ ይፍለጥ ።ምክንያቱ እዚ ታሪኽ ናይቶም ኣቦታት ንዓና መምሃሪ ክኸውን እዩ ዝተጻሕፈ ።ከምቲ ንሳቶም መንፈሳዊ መና በሊዖም ጣኦት ብምምላኾም ፡ብምምንዛሮምን ፡ንእግዚኣብሔር ብምፍታኖምን ፡ብምጉርምራሞምን ነቲ ርስቲ ዘይወረስዋ እኳ ደኣስ ኣብ ምድረ ባዳ ዝተረፉ ።ንሕና እዞም ዝበለጸ መንፈሳዊ ምግቢ ዝበላዕና ኣምልኮ ጣኦትን ፡ምንዝርናን ፡ንእግዚኣብሔር ምፍታንን ፡ምጉርምራምን እንተፈረና ነታ እትመጽእ መንግስቲ ኣይክንወርሳን ኢና ።ነዚ ቅዱስ ጳውሎስ ፦

"እቲ ግብሪ ስጋ ግሁድ እዩ፡ ንሱ ኸኣ ምንዝር፡ ርኽሰት፡ ዕብዳን፡ኣምልኾ ጣኦት፡ ጥንቈላ፡ ጽልኢ፡ ባእሲ፡ ቅንኢ፡ ቍጥዓ፡ ሻራ፡ ምፍልላይ፡ ዝርግርግ፡ ቅንኣት፡ ቅትለት፡ ስኽራን፡ ጓይላ፡ ከምዚ ዘመሰለ ኻልእውን እዩ። እቶም ከምዚ ዘመሰለ ዚገብሩ ንመንግስቲ ኣምላኽ ከም ዘይወርስዋ፡ ከምቲ ቐደም ዝበልክዎ ኣቐዲመ እብለኩም አሎኹ" (ገላ,5፥19-21)።ብምባል እቲ ወዲ መዝሙር ክርስቶስ ንምኳን ብስሙ ኣሚኑ ፡ብስሙ ዝተጠመቀ፡ካብቲ ክቡር ሥጋኡን ደሙን ዝተኻፈለ ግብሪ ሥጋ እንተፈረየ ንኣምላኽ ባህ ኣየብሎን ።ስለዚ ከምቶም ንኣምላኽ ባህ ዘይበልዎ ኣብቲ ምድረ በዳ ዝተባህለ ካልኣይ ሞት ድኣ ይተርፉ እንበር ናብ መንግስተ ሰማያት ኣይኣትዉን ይብለና ።ቅዱስ ጳውሎስ እንበኣር ከምዚ ኢሉ ይመክር ፦

"እዚ ዂሉ መለበሚ ኪኸውን እዩ ዝበጽሖም፡ ንኣና እቲ መወዳእታ ዘመናት ንዘርከበናውን ንተግሳጽ ኪዀነና እዩ እተጻሕፈ፥ ስለዚ እቲ ደው ኢሉ ዘሎ ዚመስሎ፡ ከይወድቕ ይጠንቀቕ"(1ይ ቆሮ,10፥11-12)።ኣብ ካልእ'ውን ፦

"ነቶም ሓደ ጊዜ ብርሃን ዝበርሃሎም እቲ ሰማያዊ ውህበት ከኣ ዝጠዓሙ፡ ተማቐልቲ መንፈስ ቅዱስውን ዝዀኑ፡ እቲ ሰናይ ቃል ኣምላኽን ሓይሊ እታ እትመጽእ ዓለምን ከኣ ዝጠዓሙ፡እንተ ወደቑ፡ ንወዲ ኣምላኽ ከም ብሓድሽ ንርእሶም ስለ ዚሰቕልዎ ብግሁዶውን ዜላግጹሉ ስለ ዝዀኑ፡ ከም ብሓድሽ ንንስሓ ኺሕደሱ ኣይከአሎምን እዩ። እታ ብዙሕ ጊዜ ነቲ ኣብኣ ዝወረደ ዝናብ ዝሰተየት ምድሪ ነቶም ብዛዕባኦም ዚሐርስዋ ዚጠቅም ፍረ እንተ ሃበቶም፡ ካብ ኣምላኽ በረኸት ትረኽብ እያ።እሾዅን ዳንዴርን እንተ ኣብቈለት ግና፡ ንቅፍትን ጥቓ መርገምን እያ፡ መወዳእታኣውን ምንዳድ እዩ" (ዕብ,6፥4፥8)

እንበኣር ንሕና ብርሃን ዝበርሃሎም እቲ ሰማያዊ ውህበት ዝኾነ ዝኾነ ክርስቶስ ዝጠዓምና ኢና እሞ ከምታ ንሓረስታይ ሰናይ ፍረ ትህብ ግራት ድኣ እንበር ከምታ ዘይተዘርኣላ ዳንዴርን እሾክን እንፈሪ ኮይንና ምስቶም ሰቀልቲ ጎይታ ክንከውን ኣይግባእን ።ሎሚ መዓልቲ ዝተነበ ወንጌል ፦

ብዕለት ሰንበት ፍረ ክንፈሪ እንበር ከምቶም ኣይሁድ ኮፍ ኢልና ክንውዕል ከም ዘይብልና ኢዩ ዝምህረና ።ፍረ ብክልተ ክንፈሪ ንክእል ኢና ።ብሥጋኦም ብምሕጋዝ ፡ብነፍሶም ድማ ነጻነት ብምስባኽ ኢዩ ።ብሓፈሻ ብዓላትና ሰናይ ግብሪ ክንገብረሎም ኢዮም ተሰሪዖም እንበር ከም ኣይሁድ ኮፍ ክንብለሎ ኣይኮነን ።ካብቲ ወንጌል ሓንቲ ጥቅሲ እንሆ ፦

" ካብ በጊዕሲ ሰብዶ ግዳ ኣዝዩ ኣይበልጽን፧ እምብኣርሲ፡ ብሰንበት ጽቡቕ ምግባር ግቡእ እዩ"(ማቴ,12፣12)

ሰናይ ናይ መንፈስ ቅዱስ ፍረ ክትፈሪ ክትብገስ ከሎኳ ፈተና ከጋጥመካ ከም ዝክእል ቅዱስ ጳውሎስ ከምዚ ይብል ፦

"ሰብ ኪጾሮ ዘይኽእል ፈተና ኣይበጽሓኩምን። ኣምላኽ እሙን እዩ እሞ፡ ምስቲ ፈተናኹም ምጽዋሩ ምእንቲ ኽትክእሉስ፡ መውጽኢ ገይሩልኩም ኣሎ፡ ካብ ዓቕምኹም ንንየው ክትፍተኑ ኣይሐድገኩምን እዩ" (1ቆሮ,10፥13)።ነዚ ብግብሪ ከብረሃልና ከሎ ድማ ናብ ግብረ ሓዋርያት ይወስደና ዝተነበ ግብረ ሓዋርያት =4፥19-31 እዩ ኔሩ ።ኣብዚ ታሪኽ እንሪኦ ።ጴጥሮስን ዮሓንስ ንሓደ ንኣርበዓ ዓመት ልሙስ ኮይኑ ኣብ ኣፍ ቤት መቅደስ ዝልምን ዝነበረ ብስም ኢየሱስ ክርስቶስ ፈወስዎ ።ነዚ ዝራኣዩ ኣብቲ መቅደስ ዝነበሩ ህዝቢ ድማ ብኢየሱስ ክርስቶስ ኣመኑ ።ሽዑ ግና እቶም መራሕቲ ኣይሁድ ንጴጥሮስን ዮሓንስን ከሰስዎም ።ድሕሪ እቲ ጊዜ ብዛዕባ ኢየሱስ ከይዛረቡ ኣጠንቂቆምን ገሪፎምን ሰደድዎም ።በዓል ጴጥሮስ ድማ "ካብ ንዓኹም ንኣምላኽ ምእዛዝ ይበልጽ ኢሎም " ከይዶም ነቶም ህዝቢ እቲ ዝኾነ ኩሉ ነገርዎም ።እቶም ህዝቢ ድማ ከምዚ እናበሉ ጸለዩ ፦

"ሕጂ ድማ፡ ጐይታይ፡ ናብ ምፍርራሆም ርኤ፡ ብስም እቲ ቅዱስ ወድኻ የሱስ፡ ምሕዋይ ሕሙማትን ትእምርትን ተኣምራትን ኪኸውን፡ ኢድካ ዘርግሕ፡ ንባሮትካ ድማ ብዂሉ ትብዓት ቃልካ ኺዛረቡ ሀቦም።ምስ ለመኑ ኸኣ፡ እታ ተኣኪቦምላ ዘለዉ ስፍራ ተናወጸት፡ ኲላቶም ከኣ መንፈስ ቅዱስ መልኡ፡ ቃል ኣምላኽውን ብትብዓት ተዛረቡ" (ግ,ሓ,4፥29-31)።ጸሎቶም ምስ ወድኡ ሓይልን ትብዓትን ዝኾኖም መንፈስ ወረደሎም ።እንበኣር ንሕና 'ውን ንኣምላኽና ዘበርትዓናን ዘጽንዓናን መንፈሱ ክልእከልና እናጸለና ሰናይ ፍረ ድኣ ንፍረ እንበር ግብሪ ሥጋ ክንፈሪ ኣይግባኣናን እዩ ።ነዘን ክልተ ጸሎታት ኢለ ሓሳበይ ክዓጹ ፦


*ሕጂ ክኣ ኦ ጎይታይናን ኣምላኽናን ብርሃንኻን ጽድቅኻን ለኣኸልና ።ናይ ልብናን ናይ ሕልናናን ኣዕይንቲ ኣብርሃልና ፡ቃል ቅዱስ ወንጌልካ ብጥብኣት ክንሰምዕ ዝበቃዕና ግበረና ።ከም ዝሰማዕናዮ ክንሰርሕ እንበር ክንሰምዕ ጥራይ ኣይኹን ፡ኣብ ክንዲ ሓደ ሰላሳ ፡ስሳ ፡ሚኢቲ ሰናይ ፍረ ኣብ ህይወትና ክንፈሪ ባርኸና "(መጽሓፈ ቅዳሴ ፡ገጽ,33)

*ቅዱስ ቅዱስ ቅዱስ ሥሉስ ዘይምርመር ፡እዚ ሥጋን ደምን ብዘይ ኩነኔ ንሕይወት ኪኾነኒ ሃበኒ ።ኣብ ክብርኻ ምእንቲ ክርአ ፡ናትኻ ፍቃድ እናገበርኹ ድማ ምእንቲ ንኣኻ ክነብር ፡ዘሥምረካ (ባህ ዘብለኻ )ፍረ ክገብር ሃበኒ " ቅ,ሓ,ገጽ ,55)

ነቲ ማሕተም ንምፍታሕ ብቁዕ ዝኾነ መን እዩ ፧

እታ ንቅዱስ ዮሓንስ ኣዝያ ዘጨነቀቶ ማሕተም ኣብ ራእይ ተጻሒፋ ኣላ ።

" ኣብ የማን እቲ ኣብ ዝፋን ተቐሚጡ ዘሎ ድማ ብውሽጡን ብወጻኢኡን ተጽሒፉ፡ ብሾብዓተ ማሕተም እተሐትመ መጽሓፍ ርኤኹ" (ራእ,5፥1)እዚ ማሕተም እዚ ንምፍትሑ ዘጨንቅ እዩ ዝነበረ ።እቲ መልኣክ እግዚኣብሔር ከይተረፈ ብዛዕባ እዚ ማሕተም እዚ ከምዚ ክብል ንሰምዖ ፦

" ሓደ ብርቱዕ መልኣኽ ድማ፡ ነዚ መጽሓፍ እዚ ኪግንጽሎ ንመሓትሙውን ኪፈትሖ ዚበቅዕ መን አሎ፧ ኢሉ ብብርቱዕ ድምጺ ኺጭርሕ ከሎ ርኤኽዎ።ነቲ መጽሓፍ እቲ ኺግንጽሎ ወይስ ኪርእዮ ኣብ ሰማይ፡ ወይስ ኣብ ምድሪ፡ ወይስ ኣብ ትሕቲ ምድሪ ንሓደ እኳ ኣይተኻእሎን" (ራእ,5፥2-3)

ነዚ ማሕተም እዚ ካብ ሰማይ ኮነ ካብ ምድሪ ክፈትሖ ዝክእል የልቦን ።ካብ ሰማይ ማለት ካብ መላእክቲ ካብ ምድሪ ድማ ደቂ ሰባት ክፈትሕዎ ኣይክእሉን ።ኣብየት ናይዚ ማሕተም እዚ ጽንዓት ክንደይ የጨንቅ እዩ !!!!ቅዱስ ዮሓንስ ነዚ ማሕተም ዝፈትሖ ከም ዘየለ ምስ ረኣየ ፦

"ኣነ ድማ፡ ነቲ መጽሓፍ ዚግንጽሎ ወይስ ዚርእዮ ብቑዕ ሓደ እኳ ስለ ዘይተረኽበ፡ ብዙሕ በኼኹ"(ራእ,5፥4)

ብዙሕ በኸየ ።ከመይስ እዚ ማሕተም እዚ ናይ ግድን ክፍታሕ ዘለዎ ማሕተም እዩ ።እንተኮነ ካብ መላእክቲ ኮነ ካብ ሰባት ክፈትሖ ዝክእል ኣይተረኽበን ።ስለዚ ንቅዱስ ዮሓንስ ብዙሕ ብክያት ከም ዝበኪ ገበሮ ።እንቶኮነ ንቅዱስ ዮሓንስ ንብዓት ክደርዘሉ ዝክእል ብስራት ብከምዚ ሰምዐ ፦

"ካብቶም ሽማግሌታት ሓደ ድማ፡ ኣይትብከ፡ እንሆ፡ እቲ ኻብ ነገድ ይሁዳ ዝዀነ ኣንበሳ፡ እቲ ሱር ዳዊት፡ ነቲ መጽሓፍ ኪግንጽሎን ነቲ ሾብዓተ ማሕተሙውን ኪፈትሖን ስዒሩ አሎ፡ በለኒ" (ራእ,5፥5)

እንበኣር ነዚ ማሕተም ዝፈትሖ እቲ ካብ ዘርኢ ዳዊት ዝተወልደ ፡ካብ ነገድ ይሁዳ ዝተወልደ ኣንበሳ ምኳኑ ንቅዱስ ዮሓንስ ሓደ ካብቶም ሽማግለታት ነገሮ ።ነዚ ማሕተም ብከመይ ከም ዝፈትሖ ድማ ንቅዱስ ዮሓንስ ብከምዚ ተራእዮ ፦

"ኣብ ማእከል እቲ ዝፋንን እቶም ኣርባዕተ እንስሳን ኣብ ማእከል እቶም ሽማግሌታትን ተሐሪዱ ኸም ዝነበረ ዚመስል ገንሸል ደው ኢሉ ርኤኹ። ንሱ ሾብዓተ ቐርንን ሾብዓተ ዓይንን አለዉዎ፡ ንሳቶም ከኣ እቶም ናብ ብዘላ ምድሪ እተላእኩ ሾብዓተ መናፍስቲ ኣምላኽ እዮም።ንሱ መጺኡ፡ ነቲ መጽሓፍ ካብ የማነይቲ ኢድ እቲ ኣብ ዝፋን እተቐመጠ ወሰዶ" (ራእ,5፥6-7)

ኣብ ማእከል እቲ ዙፋን ዝተሓርደ ዝመስል ገንሸል ረኣየ ።ንሱ ድማ ካብ የማነይቲ ኢድ እቲ ኣብ ዙፋን ዝተቀመጠ ወሰዳ ።ማለት ነታ ብሾብዓተ ማሕተም ዝተዓጸወት መጽሓፍ ፈቲሑ ወሰዳ ።ናይዛ መጽሓፍ እዚኣ ማሕተም ንምፍታሕ ግና ሓደ ገንሸል ተሰወዐ ።እዚ ገንሸል እዚ ካብቶ ካልኦት መስዋእትታ ዝተፈለየ ክኸውን ኣለዎ ።ምክንያቱ እዚ ማሕተም እዚ እቶም ኣብ ሰማይ ዘለዉ ቅዱሳን መላእክትን እቶም ኣብዚ ምድሪ ዘለዉ ደቂ ሰባትን ክፈትሕዎ ኣይተካእሎምን ።ኣብ መወዳእታ ግና እቲ ካብ ነገድ ይሁዳ ፡ካብ ዘርኢ ዳዊት ዝኾነ ኣንበሳ ተሓሪዱ ነዛ ንዮሓንስ ዘብከየት መጽሓፍ ፈትሓ ።ነዚ ምስ ፈትሓ ድማ ከምዚ ዝብል ሓዱሽ መዝሙር ቀረበሉ ፦

" ነቲ መጽሓፍ ምስ ወሰዶ ኸኣ፡ እቶም ኣርባዕተ እንስሳን እቶም ዕስራን ኣርባዕተን ሽማግሌታትን፡ ነፍሲ ወከፎም መሰንቆን ዕጣን ዝመልኤ ጽዋእ ወርቅን ሒዞም፡ — እዚ ድማ ጸሎት እቶም ቅዱሳት እዩ፡ — ኣብ ቅድሚ እቲ ገንሸል ተደፍኡ። ንሳቶም ከኣ፡
ተሐሪድካስ ብደምካ ኻብ ብዘሎ ዓሌታትን ቋንቋታትን ህዝብን ኣህዛብን ንኣምላኽ ዚዀኑ ሰባት ዐዲግካሉ ኢኻ፡ ንኣምላኽና ዚዀኑ መንግስትን ካህናትን ገቢርካዮም፡ ኣብ ምድሪ ድማ ኪነግሱ እዮም እሞ፡ ንስኻ ነቲ መጽሓፍ ክትወስዶ፡ ነቲ መሓተምውን ክትፈትሖ ብቑዕ ኢኻ፡እናበሉ ሓድሽ መዝሙር ዘመሩ"(ራእ,5፥8-10)

እዚ ሓሳብ እዚ ከመይ እዩ እንተበልና ።እቲ ብብርቱዕ ማሕተም ዝተዓጽወ መጽሓፍ እቲ ብምክንያት ሓጢኣትና ኣብ ልዕሌና ዝነበረ መሪር ዝኾነ ሞት ፡ሓጢኣት ፡መርገም እዩ ።እዚ ኣብ ልዕሌና ሰልጢኑ ዝነበረ ካብ ልዕሌና መላእክቲ ኮኑ ደቂ ሰባት ክፈትሕዎ ኣይተካእሎምን ።ከመይስ ደቂ ሰባት "ኩላቶም ሓጢኦም ክብሪ ኣምላክ ስለ ዝሰኣኑ እዩ "። እዚ ማለት ወልሓደ ጻድቅ ሰብ ኣይነበረን ።ብግብሮም እኳ ጽቡቅ እንተገበሩን መስዋእቲ እንተኣቅረቡን ።ጽድቆም ግና ጽድቂ ኮይኑ ይቁጸር ኣይነበረን ።እኳ ደኣስ ከምቲ ነቢይ እግዚኣብሔር ኢሳይያስ ፦

"ኲላትና ኸም ሓደ ርኹስ ኰንና፡ ብዘሎ ጽድቅና ኸኣ ከም ጽዩቕ ክዳን እዩ፡ ኲላትና ኸም ቈጽሊ ቐምሰልና፡ ኣበሳና ድማ ከም ንፋስ ይብቊጸና ኣሎ" (ኢሳ,64፥6)ዝበሎ ።ኩላቶም ብሕጊ ዝግዝኡ ኣይሁድን እቶም ብዘይ ሕጊ ዝነብሩ ኣህዛብን ብሓደ ጽድቂ ዝበሃል የብሎምን ።መስዋእቶም እውን ነዚ ማሕተም እዚ ክኸፍቶ ኣይተካእሎን ።እቲ ጻድቅ ዝበሃል ንሕጊ ብምልኣት ዝፍጽም እዩ ።እንበኣር ካብ ደቂ ሰባት ንሕጊ ብምልኣት ክፍጽም ዝክእል ኣይተረኽበን ።ቅዱሳን መላእክቲ 'ውን እንተኮኑ ንጹሓት እኳ እንተኮኑ ረቀቅቲ ስለ ዝኾኑ ግና ነቲ ማሕተም ፈቲሖም ንወዲ ሰብ ነጻ ክገብርዎ ኣይተካእሎምን ።ክሳብ ብእምነት ህይወትካ ምውፋይ እኳ እንተነበረ ነዚ ማሕተም እዚ ክፈትሕ ዝክእል ግና ኣይነበረን ።ካብ ደም ኣቤል ጻድቅ ክሳብ ደም ዘካርያስ ወልደ በራኽዪ ደም ነቢያት እኳ እንተፈሰሰ ነዚ ማሕተም እዚ ክፈትሖ ግና ኣይተካእሎን ።ስለዚ ፦

"እቲ ብቁዕ ጻድቅ ፡ንሕጊ ብምልኣት ክፍጽም ዝክእል ፡ብቁዕ መስዋዕቲ ኮይኑ ነቲ ማሕተም ክፈትሖ ዝክእል ግና ሓደ ኢዩ ንሱ ድማ እቲ ከምዚ ዝተባለሉ ገንሸል እዩ ፦

" ናብ መልኣኽ ማሕበር ፊላደልፍያውን ጽሐፍ፡ እቲ ቅዱስ፡ ሓቀኛ፡ መርሖ ዳዊት ዘለዎ፡ ንሱ ምስ ከፈተ፡ ሓደ እኳ ዘይዐጹ፡ ንሱ ምስ ዐጸወ ኸኣ፡ ሓደ እኳ ዘይከፍት፡ ከምዚ ይብል አሎ" (ራእ,3፥7)ዝተባህለ "ካብ ዘርኢ ዳዊት ዝተወልደ ።ነገዱ ድማ ካብ ወገን ሌዊ ዘይኮነ ፦

"ጐይታናስ ካብ ይሁዳ፡ ሙሴ ብናይ ካህናት ሓንቲ እኳ ዘይተዛረበሉ ዓሌት ከም ዝወጸ፡ ፍሉጥ እዩ"(ዕብ,7፥14)እዩ ከም ዝበሎ ካብ ነገደ ይሁዳ ዝኾነ ኣንበሳ እዩ ።ስለዚ ነቲ ማሕተም ምስ ፈትሖ እቶም ኣብ ሰማይ ዘለዉ ኣሕሉቅ ከምዚ እናበሉ ኣመስገኑ ።

" ንሳቶም ከኣ፡ተሐሪድካስ ብደምካ ኻብ ብዘሎ ዓሌታትን ቋንቋታትን ህዝብን ኣህዛብን ንኣምላኽ ዚዀኑ ሰባት ዐዲግካሉ ኢኻ፡ ንኣምላኽና ዚዀኑ መንግስትን ካህናትን ገቢርካዮም፡ ኣብ ምድሪ ድማ ኪነግሱ እዮም እሞ፡ ንስኻ ነቲ መጽሓፍ ክትወስዶ፡ ነቲ መሓተምውን ክትፈትሖ ብቑዕ ኢኻ፡እናበሉ ሓድሽ መዝሙር ዘመሩ"(ራእ,5፥9-10።

ሎሚ 'ውን እንበኣር ነዚ ካብ ነገድ ይሁዳ ዘርኢ ዳዊት ዝኾነ ።ንሱ ምስ ኣሰረ ዝፈትሕ ፡ንሱ ምስ ፈትሐ ዝዓጹ ዘይብሉ ።ነቲ ማንም ክፈትሖ ዘይክኣለ መጽሓፍ ዕዳና ፈቲሑ ንእግዚኣብሔር ቅዱስ ህዝብን ካህናትን ክንኮኖ ዝገበረና ንስኻ ብቁዕ ኢኻ ዝብል ሓዱሽ መዝሙር ክንዝምረሉ ይግባእ ።እንበኣር ነቲ ማሕተም ፈቲሑ ንብዓትና ዝደረዘ ገንሸል በጊዕና ክርስቶስ ኢዩሱስ እዩ ።ንሱ ብቁዕ መስዋዕቲ ።ንእግዚኣብሔር ኣቦኡ ብቁዕ መስዋዕቲ እዩ እሞ ።ሕጂ'ውን በዚ ሓዱሽ ምሥጋና ፦

"ንስኻ ብቁዕ ኢኻ " ኢልና ንዘምረሉ !!!!!!!!!!!

ብዛዕባ ኣቦይ ቀሺ ክብረኣብ ዝበልዎ ብዓይኒ መጽሓፍ ቅዱስ

ሰላም ኣቦና ከመይ ኣሎኹም ......

ናይዞም ኣቦና ቀሲስ ክብረኣብ ሕጂ ብቪድዮ ፖስት ኢሎሞ ዘለዉ ሪእኽሞ ዲኹም .....ነቲ ዝኾነ ኦርቶዶክሳዊ ምእመን ዝተመሃሮ ትምህርቲ ዝጻረር ትምህርቲ'ዩ ስለዝስ ንስኹም ከ እንታይ ትብሎ ?

* እዚ ክብል ዘገደደኒ ግን ሓደ ግዜ ናይ ኣቦና ቀሲስ ክብረኣብ ፖስት ሼር ምስ በልክሞ ሓንቲ ሓፍትና ኣብ ኮመንት " እዞም ኣቦስ ን(ቀሲስ ክብረ-አብ ) ኦርቶዶክስ ተዋሕዶ ኮይኖም ዘይስምዑኒ ምስ በለትኩም ፥ ንስኹም ድማ " እስከ ፖስት ዝበልዎ ወይ ዝተዛረብዎ ናይ ክሕደት ወይ ጌጋ ትምህርቲ ብ ማስረጃ ኣርእይኒ ኢልኩማ ኔርኩም !

እሞ በዚ ሕጂ ብብዙሕ ሰብ ዝዝረበላ ዘላ ናይ መወዳእታ ፖስትኦም(ቪድዮ) እንታይ ትብሉ ብዛዕባ እታ ትምህርቲ ?

ምስ ኣኽብሮት ኣቦና !

ብመጀመርታ ኣቦይ ቀሺ ክብረኣብ እንታይ እዮም ኢሎም ።ብዙሕ ሰብ ተረዲእዎ ዘሎ ጸናጽንን ሞቆምያን ፡አረ ገሊኣቶምስ ማህሌት ኣየድልን ከም ዝበሉ ጌሮም እዮም ተረዲኦምዎ ዘለዉ ።ሰብ ነቲ ሓቂ ሓቂ ነቲ ሓሶት ሓሶት ክብል ኣለዎ ።እዚ ክብል እንተኮይኑ ግና መጀመርያ ብስርዓት ነቲ ዝተባህለ ክሰምዕ ኣለዎ ።ምስ ሰምዐ ነቲ ዝሰምዖ ከም ዘለዎ ወይ ሓቂ ወይ ጌጋ ክብል ኣለዎ ።ኣብዚ ናትና ሕብረተ ሰብ ዘጋጥም ዘሎ ግና ነቲ ናይ ሰብ ቃላት ባዕልኻ ናብ ትደልዮ ምትርጓም እዩ ።ባዕልና ንትርጉሞም ሓደ ሓደ ክብለኹም ፥

ሀ,ፕሮቴስታንት ክርስቶስ የማልድ እዩ እንተኢሎም ንሕና ድማ ኣምላኽ ኣይኮነን ከም ዝበሉ ምትርጓምና ።

ለ,ሥእሊ ሥላሴ ኣየድልን ዝብል እንተሰሚዕና ሥላሴ የለዉን ከም ዝተባህለ ጌርና ምትርጓምና ።

ሐ ,ገድላት ድርሳናት ስሕተት ኣለዎ እንተተባህለ ገድላት ድርሳናት ኣየድልዩን ኢሎም ኢልና ምትርጓምና ።ወዘተ

እዛ ናይ ኣቦይ ቀሺ ክብረኣብ'ውን እንበኣር ባዕልና ኢና ኣስሒትናያ ዘሎና ።ምክንያቱ ንሶም ዝበልዋ ከምዛ ትስዕብ እያ ።ሓደ ፕሮቴስታንት ዝኾነ ሰብ ቤተ ክርስትያን ንክርስቶስ ኣይትሰብኽን እንተበለ ።ብወገን ቤተ ክርስትያን ድማ ቤተ ክርስትያን "ጸናጽላ ሞቆምያኣ " ንክርስቶስ እዩ ዝሰብኽ ተባሂሉ ይምለስ ።እቲ ኽከውን ዝነበሮ ግና ሞቆምያን ጸናጽን ዘይኮነ ሰባት እዮም ዝሰብኹ ።ቤተ ክርስትያን ንክርስቶስ ትሰብኽ'ዶ ኣላ እንተተባሂሉ ።እቲ ሕቶ ንጹር መታን ክኸውን ።ካህናት ፡ዲያቆናት ፡ምእመናን ናይታ ቤተ ክርስትያን ንክርስቶስ ይሰብክዎ 'ዶ ኣለዉ ማለት እዩ !!!!! ብልክዕ ንክርስቶስ ክሰብኩ ዝተላእኩ'ውን ንሳቶም ስለ ዝኾኑ ።ናይ መቆምያን ጸናጽልን ስራሕ ንክርስቶስ ምስባኽ ዘይኮነ ንሕና ኣብ ምስጋናን ክንጥቀመሎም ምክኣል እዩ ።ብሓፈሻ ብመጽሓፍ ቅዱስ ንምርዳእ ፦

"ንሰባት ብቀለም ኣብ ወረቀት ምጽሓፍ ዝመሃሮም ንሱ እዩ ።ስለዚ ብዙሓት ካብ ዘለዓለም ክሳብ ዘለዓለም ክሳዕ እዛ ዕለት እዚኣ 'ውን ይጋገዩ ኣለዉ ፡ከመይ ሰብ ብጸሊም ቀለም ሃይማኖቱ ከጽንዕ ኣይተወልደን ፡ሰባት ከም መላእክቲ ጻድቃንን ንጹሓንን ኮይኖም ክነብሩ ድኣ እንበር ንከምዚ ኣይተፈጥሩን " (ሄኖ,19፥21-23)

ብመስረቱ ንሕና ደቂ ሰባት ከምቶም ንጹሓት ጻድቃንን መላእክትን ንኩሉ ትእዛዝ እግዚኣብሔር ኣብ ልብና ጽሒፍና ንእግዚኣብሔር እናመስገና ክነብር እንበር ።ኣብ ጽሑፍ ወይ ኣብ ነገራት ከነምልኽ ኣይተፈጠርናን ።እንተኮነ ካብቶም መስሓትቲ ዝኾኑ ሓደ ንደቂ ሰባት ጽሕፈት መሃሮም ።ንእምነቶም ድማ ካብ ልቦም ኣውሪዶም ብቀለም ኣብ ወረቀት ጸሓፍዎ ።ስለዚ ብዛዕባ እግዚኣብሔር ንክዛረቡ ናይ ግድን መጽሓፍ ምርኣይ ኣድለዮም ።ኣዝያ ደስ ትብል ጥቅሲ እያ ።ነዚ ዓይነት ናብራ ዘጽልኦ ቅዱስ ዳዊት ፦

"ኦ ኣምላክ ጽሩይ ልቢ ፍጠረለይ ጽኑዕ መንፈስ ክኣ ኣብ ውሽጠይ ሓድስ " (መዝ,51፥10)ኢሉ ይጽሊ ነበረ ።ምክንያቱ ጽኑዕ መንፈስ ኣብ ውሽጡ እንተተሓዲሱ ንኩሉ ትእዛዝ እግዚኣብሔር ኣብቲ ጽሩይ ልቡ ክስከሞ ክከኣሎ እዩ ማለት እዩ ።ኣብ ካልእ ምዕራፍ'ውን ከምዚ በለ ፦

"ንዓኻ ምእንቲ ከይብድልሲ ንቃላትካ ኣብ ልበይ ዓቆርክዎ " (መዝ,119፥11)ብመስረቱ ቃላት ኣምላክ ኣብ ልቢ እዮም ክጸሓፉ ዝግበኦም ።ኣብ ልቢ እንተተጻሒፎም ድማ ብልሳንካ ክትዝረቦም ኢኻ ።ብግብርኻ 'ውን ክትነብሮም ኢኻ ማለት እዩ ።እንበኣር እግዚኣብሔር ብኣፍ ነቢይ ህዝቅኤል ኣቢሉ ከምዚ ዝብል ዓቢይ ተስፋ ሃበ፦

"ጽሩይ ማይ ክነጽገልኩም እየ እሞ ክትጸርዩ ኢኹም ፡ካብ ኩሉ ርክሰትኩምን ካብ ኩሎም ጣኦታትኩምን ከጽርየኩም እየ ፡ሓዱሽ ልቢ ክህበኩም ፡ሓዱሽ መንፈስ ክኣ ከሕድረልኩም ፡ነቲ ዕቡይ ተሪር ከም እምኒ ዝኾነ ልቢ ካባኹም ከውጽእ ፡ዝእዘዝ ናይ ሥጋ ልቢ 'ውን ክህበኩም እየ ፡ንመንፈሰይ ኣብ ውሽጥኹም ከሕድሮ ፡ብትእዛዘይ ክማላልሰኩም ፡ፍርደይ ከሐልወኩምን ከግብረኩምን እየ ፡ንስኻትኩም ህዝቢ ክትኮኑኒ ኣነ ድማ ኣምላኽ ክኾነኩም እየ " (ህዝ,36፥25-28)

ከምቶም ቀዳሞት ተሪር ከም እምኒ ልቢ ዘይኮነስ ሓዱሽ ልቢ ክህበና ።ከምቶም ቀዳሞት ንመንፈሱ ኣብ ልዕሌና ከውርዶ ዘይኮነስ ንመንፈሱ ኣብ ውሽጥና ከሕድሮ ።ከምቶም ቀዳሞት ኣብ እምኒ ብዝትጻሕፈ ሕጊ ዘይኮነስ ኣብ ውሽጥና ብዝሓደረ መንፈስ ትእዛዛቱ ክንሕሉን ክንገብርን ምኳናን ነገረና ።እዚ ድማ ክርስቶስ ምስ መጸ ኩሉ ተፈጸመ ፦

"ካብ መንፈስ ዝተወልደ መንፈስ እዩ" (ዮሓ,3፥5)

ጽሩይ ማይ ጎቦ ምስ ተነጸገልና ካብ ኩሉ ርክሰትናን ጣኦታትናን ነጻሕና ፡ሓዱሽ ልቢ ብምሃብ ድማ ብመንፈሱ ወለደና ።ንመንፈሱ ድማ ኣብ ውሽጥና ከም ዝሓድር ገበሮ ።በዚ መስረት ድማ ንሕና ማሕደር ኣምላኽ ኮንና ፦

"ቤት መቅደስ ኣምላኽ ቅድስቲ እያ እዛ ቤት መቅደስ እዚኣ ንስኻትኩም ኢኹም " (1ቆሮ,3፥17)

"ቤት መቅደስ ኣምላኽከ ምስ ጣኦታት እንታይ ስምምዕ ኣለዎ ፧ኣምላኽ " ምስኣቶም ክነብር ኣብ ሞንጎኦም'ውን ክማላለስ እየ ፡ኣነ ኣምላኾም ክኸውን እየ ንሳቶም'ውን ህዝበይ ክኾኑ እዮም "ከም ዝበለ ንሕና ቤት መቅደስ ህያው ኣምላኽ ኢና " (2ቆሮ,6፥16)

"እንበኣር ንስኻትኩም ኢየሱስ ክርስቶስ ባዕሉ እምኒ መኣዝኑ ዝኾነ መሰረት ነቢያትን ሓዋርያትን ዝተነደቅኩም ደጊም ደቂ ዓዶም ንቅዱሳንን ስድራ ቤቱ ንኣምላክን ኢኹም እንበር ኣጋይሽን መጻእተኛታትን ኣይኮንኩምን ፡እቲ ህንጻ ብምልኡ ዝተቀደሰ ቤት መቅደስ ምእንቲ ክኸውን ብጎይታ እናተኣሳሰረ ይዓቢ ፡ንስኻትኩም'ውን ኣምላኽ ብመንፈሱ ክሓደረኩም ሓቢርኩም ትህነጹ ኣሎኹም " (ኤፌ,2፥19-22)

"እቲ ንመዓልቲ ምድሓን ዝተሓተምኩሙሉ ናይ ኣምላክ መንፈስ ቅዱስ ኣይተጉህይዎ " (ኤፌ,4፥30)

ካብዞም ኩላቶም ጥቅስታት እናመሃሮ ነገር ንሕና ኣብ መሰረት ነቢያትን ሓዋርያትን ማለት ኣብቲ ክርስቶስ ባዕሉ ርእሲ መኣዝኑ ዝኾነ መቅደስ ከም ዝተሃነጽና እዩ ።እዚ ዝኾንናሉ ድማ "ደቂ ዓዶም ንቅዱሳንን ስድራ ቤቱ ንኣምላክን " ስለ ዝኾንና እዩ ።እንበኣር ንሕና ስድራ ቤቱ ካብ ኮንና ድማ መተዓይይቱ ኢና ።እንበኣር ወንጌል ክሰብኽ ዝግበኦ ወይ'ውን ብዛዕባ ክርስቶስ ክሰብኽ ዝግበኦ እቲ ዘይንቃሳቀስ እንታይ ከም ዝብል ዘይስማዕ ጸናጽል ወይ ከበሮ ዘይኮነ ንሕና እዞም "ኣብ ውሽጥና መንፈስ ቅዱስ ዝሓደረና " ኢና ።ከምቶም ቀዳምት ብሰይጣን ተመሪሖ ንቃል ኣምላክ ካብ ልቦም ኣውጺኦም ብቀለም ኣብ ወረቀት ዘስፈርዎ ።ንሕና'ውን ሎሚ ነቲ ኣብ ውሽጥና ዘሎ ክርስቶስ ካብ ልብና ኣውጺእና ኣብ ጸናጽል ከበሮ ንደልዮ እንተለና ተሳሓሒትና ኣሎና ።ቅዱስ ጳውሎስ ንሰብ ቆሮንቶስ ከምዚ ኢልዎም ነበረ ፦

"እታ ኩሉ ሰብ መታን ክፈልጣን ኬንብባን ኣብ ልብና ዝተጻሕፈት መልእክቲ ንስኻትኩም ኢኹም ።ንስኻትኩም ካብ ክርስቶስ ዝተላእከት ብኣና ዝበጽሐት ብቀለም ዘይኮነ ብመንፈስ እቲ ህያው ዝኾነ ኣምላክ ዝተጻሕፈት ፡ኣብ ቀጸላ እምኒ ዘይኮነ ኣብ ልቢ ወዲ ሰብ ዝተቀርጸት ምኳንኩም ግሁድ ኢዩ "(2ይ,ቆሮ,3፥2-3)።

ክቡራት ህዝቢ ኣምላክ ከምቲ ቅዱስ ጳውሎስ ንሰብ ቆሮንቶስ ዝለመኖም ክንልመነኩም ፦

" ኣቱም ሰብ ቆሮንቶስ ብግህዶ ንዛረበኩም ኣሎና ፡ናይ ልብና'ውን ኣይሓባእናልኩም ፡ንስኻትኩም ድኣ ኢኹም ልብኹም ዝዓጾኩምልና እንበር ንሕናስ ልብና ኣይዓጸናልኩምን ፡እንበኣር ንስኻትኩም 'ውን ከምኡ ከም ንደቀይ እየ ዝዛረብ ዘለኹ ልብኹም ኣይትዕጸዉልና "(2ይ ቆሮ,6፥11-13)

ልብኹም ከፊትኹም እንተሰሚዕኩምናስ እቲ ሓቂ እዚ እዩ ።ብዛዕባ ክርስቶስ ንምስባኽ ዝተላኣክና ንሕና እዞም መንፈስ ኣምላክ ኣብ ውሽጥና ዝሓደረና ሰባት ድኣ እንበር ጸናጽልን መቆምያን ከበሮን ኣይኮኑን ።ጸናጽልን መቆምያን ከበሮንስ ንሕና ንምስጋናን ክንጥቀመሎም ዝተዋሃቡ መሳሪሕታት እዮም ።እንበኣር ነቲ ሓቂ ሓቂ ድኣ ንበሎ እንበር ።ነቲ ሓቂ እናጠምዘዝና ንጥፍኣት ገዛእ ርእስና ኣይንድከም !!!!!!!!!!!!!

ክርስቶስ ዝስበክ ብቃል ወይ ብግብሪ ቤተ ክርስትያን እዩ ።ስለዚ እዞም ኦርቶዶክሳውያን እንቶ ብቃልና እንቶስ ብግብርና ንክርስቶስ ንሰብኽ ደብዳበ ዲና ኮይንና ዘሎና ርእስና ንመርምር !!!!!!!

"ዎ ህዝበይ፡ መራሕትኻ ኣጋገዩኻ፡ ነታ እትኸደላ መገዲ ኸኣ የጥፍእዋ ኣለው።(ኢሳ,3፥12)

ቀሺ ተባሂልኩምስ ኣብ ቲክቶክ እንታይ ትገብሩ ኣለኹም ፧

ብዙሕ ጊዜ ካብ ብዙሓት ምእመናን ዝመጽእ ሕቶን ርእይቶን ምኳኑ ይፈልጥ እየ ።ስለ ዝኾነ ድማ ንዓይ'ውን እዛ ሕቶ ብዙሕ ጊዜ እያ ትሕተተኒ ።ካብቶም ብሰንኪ ቲክቶክ ምጥቃመይ ዘጋጠሙኒ ጸርፍታት ሓደ ሓደ ክብለኹም "ቀሺ ሓጢኣት እንታይ ትገብር ኣሎኳ ኣብ ቲክቶክ ፧

እዚ ከምዚ ዓይነት ሕቶታትን ዘለፋታትን ካብቶም ክብሪ ናይ ሓደ ካህን ዘይተረድኦም ሰባት ዝምንጭዉ እዮም ።ነዞም ሰባት ናይ ሓደ ካህን ክብረት ማለት ኣብ ቤተ ክርስትያን ኮይኑ ምግልጋል ጥራይ ኮይኑ እዩ ዝስምዖም ።ነዞም ከምዚ ዓይነት ምእመናን ከምዚ ዝስመዖም ዝገበርና ግና ንሕና ከይኮና ኣይንተርፍን ።ምክንያቱ ንሕና 'ውን ክብረትካ ምሕላው ንብሎ ነገራት ካብኡ ዝፍለ ስለ ዘይኮነ ።ግዳ ክርስቶስ ክብረቱን ምስዛ ሕጂ ኣልዒለያ ዘለኹ ኣርእስቲ እንታይ ይመስል ፧ እቶም በቶም ትዕቢተኛታት መራሕቶም ዝተሃነጹ ህዝቢ ኣይሁድ ናይ ክርስቶስ ምስ ሓጥኣንን መጸብሓንን ምግቢ ምብላዕ ኣይተዋሕጠሎምን እዩ ዝነበረ ።እዚ ጉዳይ መበገሲኡ እቶም ክብረቶም ኣብ ነውሮም ዝኾኑ መራሕቶም ምኳኖም እንሪኤሉ ጥቅሲ ከምዚ ዝስዕብ ዝብል እዩ ፦

" ፈሪሳውያን ከኣ ርእዮም ንደቀ መዛሙርቱ፡ መምህርኩምሲ ስለምንታይ እዩ ምስ ተገውትን ሓጥኣንን ዚበልዕ፧ በልዎም"(ማቴ,9፥11)

መራሕቲ ኣይሁድ ክርስቶስ ምስ ሓጥኣንን መጸብሓንን ምግቢ ምብልዑ ከም ዘይቅበልዎ እዮም ዝዛረቡ ዘለዉ ።ነዞም ሰባት ክብሪ ማለት ስራሕኻ ምብኳር ምኳኑ እዩ ዝርድኦም ።ብካልእ ኣባሃህላ ናይ ዶክተር ክብሪ "ሕሙማት ምፍዋስ " እዩ ።ዶክተር ናብ ሕሙማት ኣይቀርብን እንተበለ ግና "ዶክተርነቱስ " ኣብ ምንታይ እዩ ፧ እንበኣር ክርስቶስ ኣምላክና ዝመለሰሎም ከምዚ ዝስዕብ ነበረ ፦

"ኢየሱስ ግና ሰሚዑ፡ ንሓኪምሲ ሕሙማት እምበር፡ ጥዑያት ኣይደልይዎን።ኣነ ሓጥኣን እምበር፡ ጻድቃን ክጽውዕ ኣይመጻእኩን እሞ፡ ምሕረት እፈቱ፡ መስዋእቲ ኣይኰነን፡ ዚብል እንታይ ምዃኑ፡ ኪዱ ተምሀሩ፡ በሎም" (ማቴ,9፥12-13)

እንበኣር ክርስቶስ ሓኪም ኮይኑ ሓጥኣን ክሕክም ከም ዝመጸ ።ክሕክሞም እንተ ኮይኑ ክኣ ምስኣቶም ክህሉ ከም ዘለዎ ነገሮም ።ንሓኺም ጥዑያት ኣየድልይዎን ሕሙማት እንበር ።ምክንያቱ ጥዑያት ኣቀዲሞም ጥዑያት ስለ ዝኾኑ ።እንበኣር ኣነን መሰልተይን ኣብ ሚድያ ዘለናሉ ምክንያት'ውን ክብረትና ስለ ንፈልጥ ኮይኑ ይስማዓኒ ።ቅዱስ ጳውሎስ ብዛዕባ ክብረቱ ክዛረብ እንከሎ ከምዚ በለ ፦

" ክብርናን ሓጐስናን ንስካትኩም ኢኹም እሞ፡ ኣብ ቅድሚ ጐይታና ኢየሱስ ብምጻኣቱኸ ተስፋና ወይ ሓጐስና፡ ወይስ ኣኽሊል ትምክሕትና መን እዩ፧ ንስኻትኩም ደይኰንኩምን" (1ይ ተሰ,2፥19-20)

ቅዱስ ጴጥሮስ 'ውን ከምዚ ይብለና ፦

"ነቲ ምሳኻትኩም ዘሎ መጓሰ ኣምላኽ ጓስይዎ፡ ብፍታው ከም ፍቓድ ኣምላኽ እምበር፡ ብግዲ ኣይኹን፡ ብታሕጓስ እምበር፡ ምእንቲ ኸንቱ ረብሓውን ኣይኹን፡ነቲ መጓሰ ኣርኣያ እናዀንኩምዎ እምበር፡ ኣብተን ማሕበራት ከም ጐይተት ኣይትኹኑ።እቲ ሓለቓ ጓሶት ምስ ተገልጸ ድማ፡ ዘይጽምሉ ኣኽሊል ክብሪ ኽትቅበሉ ኢኹም" (1ይ ጴጥ,5፥2-4)

እንበኣር እቲ መልሲ ናይቲ ሕቶ ንጹር እዩ ።ንሕና ኣብ ሚድያ ዘለናሉ ምክንያት ክብርናን ሓጎስንና ኣብ ዳግማይ ምጽኣት ኣክሊል ትምክሕትናን ዝኾንኩም ንስኻትኩም ኣብ ሚድያ ስለ ዘለኹም እዩ ።ብመሰረቱ ንሓዋርያትስ "ናብተን ዝጠፍኣ ኣባጊዕ እስራኤል'ዶ ኣይኮነን ዝለኣኾም ።ንዓና ክብርናስ " ካብ ኢየሩሳሌም ክሳብ ይሁዳ ፡ሰማርያ ክሳብ ወሰን ምድሪ ወንጌል መንግስቲ ምስባኽ እዩ ።ብዛዕባ እቲ ጸርፊ እንተኮይኑ ድማ ይትረፍ ንዓና ነቲ ንጹሓ ባህርይ ክርስቶስ "ዓርኪ ሓጥኣን " ተባሂሉ እዩ ።

"ንዶክተር ሕሙማት እዮም ክብረቱ ንዓና ድማ ንስኻትኩም ኢኹም ክብረትና ፡ስለዚ ንዓኻትኩም ነቶም ስልማትናን ኣክሊል ትምክሕትናን ዝኾንኩም ንምድላይ ኣብ ሚድያ ኣሎና !!!!!

ንዓና ክብርኻ ምሕላው ማለት እዚ እዩ ።ንዓኻትኩም ክብርኻ ምሕላው ማለት ከመይ እዩ ፧

በስመ ኣብ ወወልድ ወመንፈስ ቅዱስ ኣኅዱ ኣምላክ ኣሜን

"ንሙሴ እንተ ትኣምንዎስ፡ ንሱ ብዛዕባይ ጽሒፉ አሎ እሞ፡ ንኣይ ድማ ምኣመንኩምኒ ኔርኩም"(ዮሃ,5፥46)

ነዚ ጽሑፍ ዝተዛረበ ክርስቶስ ኣምላክና እዩ ።እዞም ንሙሴ እንተትኣምንዎ ዝበሃሉ ዘለዉ ድማ ኣይሁድን መራሕቶምን እዮም ።ኣይሁድን መራሕቶምን ክንብል እንከሎና መን እዮም ፧

መራሕቲ ኣይሁድ ማለት እቶም ኣብ ማቴዎስ ምዕራፍ 23

"ጸሓፍትን ፈሪሳውያንን ኣብ መንበር ሙሴ ተቐሚጦም ኣለዉ"(ማቴ,23፥2)

እዞም ሙሴ ዝበሎን ሕጊ ሙሴን ብዝግባእ ዘይፈልጡ ክንሶም ኣብ መንበር ሙሴ ተቀሚጦም ግና ንህዝቢ ኣይሁድ ይመርሕዎም ኔሮም ።እዞም ህዝቢ ክመርሕዎም ከለዉ ብሕጊ ሙሴ መሰረት ዘይኮነ ብልምዲ ናይ ኣቦታቶም እዮም ።ከም ትምህርቲ ክርስቶስ እዞም መራሕቲ ኣይሁድ " ንሕጊ ሙሴን ነቲ ሙሴ ዝጸሓፎን ከም ዘይኣምንዎ "እዩ ዘረድኣና ።ዋላ እኳ ብኣፎም ፦

"ንሕናስ፡ ኣምላኽ ንሙሴ ኸም እተዛረቦ፡ ንፈልጥ አሎና። እዚ ግና ካበይ ምዃኑ ኣይንፈልጥን ኢና፡ በልዎ" (ዮሃ,9፥29)

ብምባል ኣምላክ ንሙሴ ከም ዝተዛረቦ ይፈልጡ እንተነበሩ ።ነቲ ንሙሴ ኣምላኽ ዝተዛረቦ ግና ብእምነት ክቅበልዎ ኣይክኣሉን ።ነቲ ኣምላኽ ንሙሴን ነቢያትን ዝተዛረቦ እንተዝኣምንዎ ግና "ንክርስቶስ " ምተቀበልዎ ኔሮም ።እዞም ሰባት ኣብ ብዙሕ ጊዜ ከም እንሪኦም ነቶም ቅዱሳን ኣቦታት ንትምክሕቲ ጥራይ ከም ዝጥቀሙሎም እዩ ።ኣብርሃም ኣቦ ኣሎና ፡ንሕና ደቂ መዛሙርቲ ሙሴ ኢና "ዝብሉ ቃላቶም ክትዕዘብ ከለኻ ኣዝዩ እዩ ዘገርም ።እዞም ሰባት ፦

" ትምህርቲ ሙሴ ዘይኣምኑን ዘይክተሉን ክንሶም ሰዓብቲ (ደቂ መዛሙርቲ ሙሴ "ኢና ይብሉ ።ግብሪ ኣብርሃም ዘይብሎም ክንሶም 'ውን " ደቂ ኣብርሃም ኢና "ይብሉ ኔሮም ።ክቡራት ህዝቢ ኣምላኽ እዚ ትምህርቲ " ንተግሣጽናን ምእራምናን "ከም ዝተጻሕፈ ንፈልጥ ኢና ።ስለዚ በዚ መሰረት እዚ ሓሳብ ናባና ነምጸኣዮ ፦

ሎሚ ከም ንዕዘቦ ዘሎና ኣብ መንበር ክርስቶስ ዝተቀመጡ ግናኸ ትምህርቲ ክርስቶስ ዘይፈልጡን ዘይኣምኑን ይበዝሑ ምህላዎም እዩ ።በዚ መሰረት ድማ ብዙሕ ኣቦይ ክርስቶስ ኢዩ ዝብል ግናኸ ከም ግብሪ ክርስቶስ ዘይነብር ።ብዙሕ ወዲ መዝሙር ክርስቶስ እየ ዝብል " ትምህርቲ ክርስቶስ ግና ዘይፈልጥን ዘይኣምንን "በዚሑ ኣሎ ።እስከ ሕስብ ነብሎ፦

" ንሕና እዞም መራሕቲ ዘሎና ኣብዚ እዋንን እቶም ንኣይሁድ ዝመርሑ ዝነበሩ ብዘይካ መንበር እንታይ ይፈላልየና ፧ መንበር ንሳቶም ኣብ መንበር ሙሴ ንሕና ኣብ መንበር ክርስቶስ ኢና ዘሎና ።ንሳቶም "ንሕግን መጻሕፍትን ሙሴ ኣይኣምኑን ኣይገብሩን'ውን ንሕና 'ውን ንሕጊ ወንጌልን ትምህርቲ ወንጌልን ኣይንገብርን ስለዚ ኣይንኣምንን 'ውን ፧ ንሳቶም ኣብርሃም ኣቦ ኣሎና ይብሉ ንሕና 'ውን ኣምላክ ኣቦና ፡ሓዋርያት ኣቦታትና ንብል ።ንሳቶም ከም ግብሪ ኣብርሃም ኣይነብሩን ንሕና 'ውን ከም ግብሪ ኣቦና ኣይንነብርን ፡ከም ግብሪ ሓዋርያት'ውን ኣይንነብርን ።

ንስኻትክን ኣንትን ኣባጊዕ'ውን " ድምጺ ጎይታኽን ኣይትሰምዓን "።እዚ ማለት ድምጺ ጎይታኽን ኣይትፈልጣን ኣይትሰምዓን ኣይትኣምናን ማለት እዩ ።ስለዚ ድማ ከምቶም ስቀሎ ክብሉ ዝዋዓሉ ኣይሁድ " በሎ ፡ጽቡቅ ገብርካዮ ፡ቅተሎ "እናበልክን ትውዕላ ኣሎኽን ማለት ።ንማለቱ እቲ ጎይታኽን እኮ ከምዚ ዝተባህለሉ እዩ ፦

"ንሱ ሓጢኣት ዘይገበረ፡ ተንኰልውን ኣብ ኣፉ ዘይተረኽበ፡ምስ ጸረፍዎ መሊሱ ዘይጸረፈ፡ መከራ ምስ ኣጽገብዎ ኸኣ፡ ነቲ ብቕንዕና ዚፈርድ ደኣ ነገሩ ኣሕሊፉ ሀበ እምበር፡ ዘየፈራርሄ" (1ይ ጴጥ,2፥22-23)

ጸርፊ ኣብ ኣፉ ኣይተረኽበን ።እሞኸ ድኣ ንሕና ደቁ ካብ ኮንናስ ከም ናቱ ግብሪ ክህልወና'ዶ ኣይኮነን ዝግባእ ።እንታይ ድኣሞ ብኣፍና "ደቂ መዛሙርቲ ክርስቶስ " ኢና እናበልና ኣብ ጸርፊ ክንውዕል ፈቀድና ።ጸርፊ እኮ ካብቲ ክፉእ እዩ ዝወጽእ ፦

"ዓሰርተ ቐርን ሾብዓተ ርእስን፡ ኣብቲ ኣቕርንቱ ኸኣ ዓሰርተ ዘውዲ፡ ኣብቶም ኣራእሱውን ስማት ጸርፊ ዘለዎ ኣራዊት ካብ ባሕሪ ኺወጽእ ከሎ ርኤኹ" (ራእ,13፥1)

ነስተውዕል'ዶ ኣሎና ጸርፊ ካብቲ ክፉእ ዲያብሎስ እዩ ዝወጽእ ።ስለዝስ ትምህርቲ ክርስቶስ ግብሪ ክርስቶስን ክንፈልጥ ይግባኣና ።እንተዘይኮይኑ ንሕና'ውን "ምስቶም ስቀሎ " ክብሉ ዝዋዓሉ ሰባት ሓደ ኢና ንኸውን ዘሎና ማለት እዩ ።ብስም መራሕቲ ሃይማኖት ኢልካ ምስማዕ ዘይኮነ ።ድምጺ ክርስቶስ ኣየናይ እዩ ምባል ከድልየና እዩ ።ድምጺ ክርስቶስ ንምፍላጥ ድማ "በጊዕ ናይ ክርስቶስ " ምኳን እዩ ።እንተዘይኮይኑ ኣብ "መንበር ክርስቶስ ዝተቀመጡ " ሰባት'ውን ከስሕቱና ይክእሉ እዮም ።እስከ ነሰተውዕል ፦

እዛ እንስሳ ኢልና ንጽዋዓ በጊዕ እኳ ናይ ዋናኣ ድምጺ ሰሚዓ ከም ተለሊ ንፈልጥ'ዶ እሞ ንዓና ድኣ እንታይ ኢዩ ናይቲ ሓላው ነፍሳትና ዝኾነ ክርስቶስ ድምጺ ንኸይነለሊ ዝዓግተና ዘሎ ፧ንኣይሁድ ንክርስቶስ ንኸይቅበሉ ዝገበሮም ናይ መራሕቶም ስሕተት ጥራይ ዘይኮነ ናቶም ኣብ ኣምላኾምን ቃል ኣምላኾምን ዘለዎም ሸለልትነት'ውን እዩ ።ንምንታይ መጽሓፍ ቅዱስ ንምንባብ ሸለልትነት ነሪኢ ኣሎና ።መራሕትኻ ሒዞምካ ክጠፍኡ ከም ዝክእሉ ዘይትፈልጥ እንተኮይንካ ጽሑፍ እዩ እሞ ካብ ኣይሁድ ተመሃር ።ስለዚ ርእስኻ ሃሰስ በል ።ንስኻስ ድምጺ ክርስቶስ ኣለሊኻ ትክእል 'ዶ ፧ድምጺ ክርስቶስ ሰሚዕካ ንክትክእል መጽሓፍ ቅዱስ ኣንብብ ።ንኣቦታት'ውን ሕተት ።እንተዘየለ ግና ኣማኒ መምለክን ክርስቶስ ካብ ምኳን ኣውጺኦም ናቶም ደጋፍን መምለክን ክገብሩኻ ኣይክጽገሙን እዮም ።ናቶም ኣምላኽን ደጋፍን እንተጌሩሙኻ ድማ ንክርስቶስ ከም ትሰቅል ክገብሩኻ'ውን ይክእሉ እዮም።እዛ ጥቅሲ ኣስተውዕለላ ፦

" እቶም ሊቃውንቲ ኻህናትን ዓበይትን ነቶም እኩባት ህዝቢ ንበርባን ኪልምኑሉ፡ ንኢየሱስ ግና ኪቕተል፡ ሕራይ ኣበልዎም" (ማቴ,27፥20)

ነስተውዕል'ዶ ኣሎና ፧ ርእስኻ ኣሕሊፍካ ንኣምላኽ ጥራይ ኢኻ ክትህብ ዝግባእ ።ኣብ ሰብ ዝውከል ርጉም ይኹን ከም ዝብል ቅዱስ ጽሑፍ ኣብ ሰብ ትውከል እንተኮይንካ ግና እቲ ሰብ "መጋበርያ " ክገብረካ ይክእል እዩ ።ኣስተውዕል ኣቢልኩም እሞ ኣንብብዋ "ጲላጦስ ንክርስቶስ'ዶ ንበርባን ክፈትሓልኩም " ኢሉ ምስ ሓተቶም ።እቶም ሊቃውንት ነቶም ህዝቢ ንበርባን ፍትሓዮ ንክርስቶስ ግና ቅተሎ ከም ዝብሉ ጌሮም ኣእመንዎም ይብለና ።እንታይ ዓይነት ጽላለ እዩ 'ዶ ትብሉ ኣሎኹም ፧

በርባን ማለት ብሽፍተነት ዝፈለጥ ዓዲ ዘሰከሐ ሰብ እዩ ።ክርስቶስ ግና ንብዙሓት ኣሕዋቶም ካብ ዝነበሮም ሕማም ዝፈወሰ ፡ምንም ኣበር ዘይብሉ ኢዩ ።እንበኣር እዞም ህዝቢ ባዕላቶም ከስተንትኑ ስለ ዘይክኣሉ እቶም ሊቃውንት "መጋበርያ" ገበርዎም ።ሎሚ'ውን እንበኣር "ጠጠው ኢልና ምሕሳብ ከድልየና እዩ ።ትምህርቲ ክርስቶስ ዲና ንመሃር ዘሎና ዋላስ መጋበርያ ኢና ንኸውን ዘሎና ፧

እዚ ዘመን ክፉእ ካብ ምኳኑ ዝተላዕለ ሊቃውንትና ኣጋግዩሙና ንንጹሓት ክቅተሉ ፈሪድና ንገበነኛታት ነጻ ነውጽእ ኮይንና ከይንህሉ ርእስና ንመርምር ።

ንክርስቶስ እንተንኣምኖ ከምዚ ሕጂ ኮይንናዮ ዘሎናስ ኣይምኮናን ኔርና ።ንሙሴ ስለ ዘይኣመንዎ ንክርስቶስ ሰቀልዎ ።ንሕና ድማ ንክርስቶስ ስለ ዘይኣመናዮ ንወንጌል ብግብርና ሰቀልናዮ ።ስለዚ ካብ ምስሉይነት ንውጻእ ኣብ ወንጌል ድማ ንንበር ።ሽዑ ብኣፍና ዋላ እንተዘይመስከርና ግብርና ክርስትያን ምኳንና ክምስክር እዩ ።እንተዘይኮይኑ ግብርና ስም ኣምላክ የጽርፍ ፡ልሳንና ግና ደቂ ኣምላክ ንብል ኮይንና እንተለና " መጋበርያ "ጥራይ ኢና ክንከውን ንክእል እንበር ካልእ ወልሓደ ክንከውን ኣይንክእልን ።

መራሕቲ ሃይማኖት

ትምህርትን ዕላማን ክርስቶስ እንታይ እዩ ምኳኑ ክንፈልጥ ይግባእ እንበር ብልምዲ ክንሽየም ኣይግባእን እዩ ።ነቲ ህዝቢ ድማ ብትምህርትን ዕላማን ክርስቶስ ክንመርሖ እንበር " መጋበርያ "ክንገብሮ ኣይግባእን ።ባዕሉ መጋበርያ ክኸውን ኢሉ ኣነ ናይ ቀሺ እከለ ክብል እኳ እንተጸንሓና ነቲ ድኻሙ ገሲጽና " ንስኻ ናይ ክርስቶስ እንበር ናተይ ኣይኮንካን "ንበሎ ።እንተዘይኮነ ድኻሙ መዝሚዝና መጻርፍትና ክኸውን ኣይንፍረዶ !!!!!!!

ምእመናን

ድምጺ ዋናኹም ዝኾነ ክርስቶስ ብዝግባእ ንምልላይ መሰረታዊ ትምህርቲ ክርስቶስ ክትመሃሩ ።ኩሉ ጊዜ'ውን ከም ምግብኹም ነቲ ናይ ክርስቶስ ቃል ዝኾነ ወንጌል ክትምገቡ ይግባእ ።ከምቶም ደቂ ኣብርሃም ኢና እናበሉ ብግብሮ ግና ደቂ ዲያብሎስ ኮይኖም ዝተረኽቡ ፡ከምቶም ሰዓብቲ ሙሴ እናበሉ ነቲ ሙሴ ዝበሎ ግና ዘይፈልጡን ዘይቅበሉን ኣይሁድ ፡ደቂ ክርስቶስ ኢና እናበልኩም ብግብርኹም ግና ደቂ ዲያብሎስ ፡ሰዓብቲ ክርስቶስ ኢና እናበልኩም ነቲ ክርስቶስ ዝመሃሮ ዘይትፈልጡን ዘይትኣምኑን ኮይንኩም ከይትርከቡ ክትጥንቀቁ እላበወኩም ።

እዚ ዘመን ልክዕ ከምቲ ኣይሁድ ወዲቆምዎ ዝነበሩ ዘመን ክርስቶስ ዝወደቅናሉ ዘመን ኮይኑ ይስማዓኒ ።ንጹሕ ገበነኛን ዘይንፈላልየሉ ዘመን ፡ንገበነኛ ተሓባብርና ኣህዲምና ንንጹሕ ኣሕሊፍና እንህበሉ ዘመን ኮይኑ ይስማዓኒ !!!!!!!!!!!!!!!!!!!!

"ንሕና ግና ነቲ ዕብየትኩም ከም ዝግባእ ጌርና ኣይጸሓፍናን ፡ከመይ ንሕና ፈላጣት ኣይኮናን ፡እኳ ደኣ ስለቲ ጉድለት ኣእምሮና ይቅረ በሉልና "ዘኣ,31፥48፥ ገጽ112)።

መኣረምታ ንምቅባል ድልው እየ !

ኣብ ናይ ኮሜንት መውሃቢ ቦታ
" እቲ ንሰማዕቱ ንበረኸት ዚኸውን፥ ከከም ዜድልዮም ከኣ ኪሓንጽ ዚኽእል ሠናይ ዘረባ ደኣ ተዛረቡ እምበር ዘይጠቅም ዘረባስ ካብ ኣፍኩም ኣይውፃእ።ኤፌ.4፡29