21/09/2026
A Facultade de Filosofía da USC, en colaboración co Instituto de Investigación en Humanidades (iHUS) e o Grupo de Investigación Discurso e Identidade, organizan unha nova edición das Conferencias Mazarelos, que contará coa participación do científico Juan Lerma, profesor de investigación do CSIC no Instituto de Neurociencias CSIC-UMH e académico de número da Real Academia de Ciencias Exactas, Físicas e Naturais de España.
Lerma ofrecerá mañá, 22 de setembro, ás 12:00 horas no Salón de Actos da Facultade de Filosofía, a conferencia ‘O cerebro humano: a gran fronteira da ciencia contemporánea’, na que abordará algúns dos grandes retos actuais para comprender o funcionamento do cerebro e os mecanismos que están na base da actividade neuronal.
A conferencia permitirá así achegar ao público unha cuestión que continúa constituíndo un dos grandes desafíos científicos: comprender como a actividade das células nerviosas e das súas conexións dá lugar ás funcións que caracterizan o cerebro humano. A entrada é libre ata completar a capacidade do espazo.
A presenza de Juan Lerma achega ás Conferencias Mazarelos a perspectiva dun investigador cunha longa traxectoria dedicada ao estudo da neurociencia e da comunicación entre as neuronas. O científico lidera actualmente o laboratorio de Fisioloxía Sináptica do Instituto de Neurociencias, centro mixto do Consello Superior de Investigacións Científicas (CSIC) e da Universidade Miguel Hernández (UMH) de Elche. A súa investigación céntrase especialmente nos mecanismos da comunicación neuronal e no papel dos receptores de glutamato, fundamentais para comprender a actividade e a plasticidade das redes neuronais.
Unha ampla traxectoria científica
Nado en Moral de Calatrava (Ciudad Real) en 1955, Juan Lerma licenciouse en Bioloxía pola Universidade Complutense de Madrid e doutorouse en Ciencias pola Universidade Autónoma de Madrid en 1983. Desenvolveu parte da súa carreira investigadora nos Estados Unidos, no Albert Einstein College of Medicine de Nova York, e posteriormente continuou o seu traballo no Instituto Cajal do CSIC antes de incorporarse, en 2004, ao Instituto de Neurociencias da UMH-CSIC.
A súa actividade científica contribuíu ao coñecemento dos receptores de glutamato, moléculas implicadas na transmisión do sinal entre neuronas. Entre as súas achegas destacan os estudos sobre os receptores de kainato e a súa relación con diferentes procesos neurolóxicos, así como investigacións sobre os mecanismos celulares da comunicación sináptica. O seu grupo tamén ten desenvolvido traballos relacionados coa memoria, a plasticidade neuronal e diferentes patoloxías neurolóxicas.
Lerma foi director do Instituto de Neurociencias entre 2007 e 2016. Durante esa etapa, o centro consolidouse como un referente internacional no ámbito da neurociencia e obtivo en 2014 a distinción de Centro de Excelencia Severo Ochoa. En 2016 recibiu a Medalla de Ouro do Instituto de Neurociencias en recoñecemento á súa etapa á fronte da institución.
A súa traxectoria científica recibiu tamén o recoñecemento da Real Academia de Ciencias Exactas, Físicas e Naturais de España, que o nomeou académico de número en setembro de 2024. Lerma tomou posesión en marzo de 2025, recibindo a medalla número 39 e pronunciando o discurso de ingreso titulado La sinapsis en el laberinto de la mente, centrado na comunicación entre neuronas e no papel das sinapses na actividade mental.
Ademais, é membro de organizacións científicas como a European Molecular Biology Organization (EMBO) e a Academia Europaea, e desenvolveu unha importante actividade de impulso e divulgación da investigación en neurociencia.
https://www.usc.gal/gl/xornal/eventos/conferencia-juan-lerma-cerebro-humano-fronteira-ciencia-contemporanea
